¹ Ɛmɛ ɖokpo-ɖokpo ɖo na sɔ eɖe sɔ hwe na otogaye, ɖo otoga ti hɔn le Mawu mɛvɔ. Otoga ke le yee Mawu wɛ ɖo yee. ² E le ɖemɔha, hun mɛ ke gbɛ fɔn ogu do otoga ɖe ji, hun e fɔngu kpan ta wu tito Mawutɔn; ye mɛ ke fɔngu xin lɛyee bo na va dɔn ɛhwɛdido na ɛmɛ Mawutɔn do yeɖeye ji. ³ Ɖo, otogaye hɔn nɔ do vivɔ na mɛ ke nɔ wa onunywɛyee, vɔ mɛ ke nɔ wa onunyinylayee wɛ nɔ vɔ na otogayee. Mi jlo tun vivɔ mɔ hɔn mɔ hu hiye do otogayee wu nɔ? Mi bo wa onunywɛ na ye a kanfu wu mi. ⁴ Ɖo Mawu wɛ e wa odan na nɔ na onywɛ miatɔn. Vɔ na mi wa onunyinyla, mi vɔ na togayee; ɖo e hɔn nyi vɔ kpoŋu hwɛn ye do ɖo acɛ ke na dɔn oto na mi. Ɖo odansɔvi Mawutɔn wɛ e nyi, mɛ ke nɔ xo ɛvu kpo xomɛsin kpo do mɛ ke nɔ wa onunyinyla ji. ⁵ I wɛ dɔn, e do le vivɛɖe tun mi mɔ ɖo na sɔ miaɖeye sɔ hwe na otogayee, e ko va nyi do oto kena ye na dɔ na mi kɛɖɛ wu nɔ hwɛn, vɔ do ɛmɛtete we ayixa wu. ⁶ E xin lɔ ke wɛ dɔn na mi nɔ do tu takwɛ. Ɖo toga lɛyee Mawu we odansɔviyee wɛ ye nyi, a nɔ do kpe ŋukunsin do onu xin lɛye wu tɛgbɛ. ⁷ Mi sɔ nu ke nyi mɛɖetɔn a bo sɔ ni-i: takwɛ a sɔ na mɛ ke tɔn nyi takwɛ; mi tu oho na mɛ ke mi ɖo na tu oho na; a bo vɔ na mɛ ke mi ɖo na vɔ na; a bo ɖo owi ota na mɛ ke mi ɖo na ɖo owi ota na. ⁸ Mi ka ɖu nuɖe we axɔ do mɛɖe, onu ke we axɔ mi na ɖu jan wɛ nyi wanyiyi ɖiɖo na miaɖeye. Ɖo me ke yi owan na owegɔ etɔn zɔn gbɔn osɛn lɔ ji. ⁹ Ɖo:«Hɔn ɖo na do afɔgbe, hɔn ɖo na hu ɛmɛ, hɔn ɖo na fin ɛfin, mɛɖe we onu hɔn ɖo na byaŋu na we, » na osɛn bu mɔ le hun i wɛ ye dɔn kple le bwɛ tun: «O ɖo na yi owan na owegɔ tɔwe ɖi itete ha.» ¹⁰ Mɛ ke ɖo wanyiyi hɔn nɔ do fɔku wu owegɔ etɔn. Hun wanyiyi wɛ nyi osɛn lɔ ji wa onu do. ¹¹ Do e ke lɔ wu, mi nyɔ ganxixo lɔ, ogan lɔ boo xo na mi na do fɔn sɔn awlɔn mɛ. Ɖo syɛ, hwlɛngan míatɔn tɛkpɔ mí hugan wu hwekenu na mí kan do e ji le titɔ eji. ¹² Ozan lɔ o do diin, ŋukɔn bo kpɔ ɖiɖe. Mía jo vuvlu we odanye do, a bo sɔ kinklɛn we odanye a bo sɔ do ɖi awu ha. ¹³ Mía zan ɛgbɛ ganji ɖi kena e jɛ ɖo ha, ɖi kena ye nɔ wasi ɖo le keklo ɖo ha, onuɖu hunu kpo ahannumu hɔn le emɛ, ɛgbɛ ɖuɖyu zinzan kpodo onuɖuɖyu wiw hɔn mɔ le emɛ. ¹⁴ Vɔ mi sɔ Xwetɔ Yesu Klisu, a sɔ do ɖi awu ha, mi bo ka mɔ va jo miaɖeye do na gbaza kpo ojlo nyinyla etɔnye a va ɖu le miaji.