¹ Mɛ kena xɔse yetɔn hɔn ɖo hɔnhlɔnye, mi yi yee ganji, a bo ka lɔ oxo nyinyla ɖe do susu yetɔnye wu. ² Mɛɖe le e ɖo xɔse bo nɔ ɖu onu bisese, mɛɖyɔ ke hɔn ɖo hɔnhlɔn, oma kɛɖɛ wɛ e nɔ ɖu. ³ Mɛ ke nɔ ɖu onu bisese ni ko gbɛ owan na mɛ ke hɔn nɔ ɖu onu bisese. Ɖemɔha ke mɛ ke hɔn nɔ ɖu onu bisese ni ko do ɛhwɛ ti na mɛ ke nɔ ɖu onu bisese. Ɖo Mawu yi-i. ⁴ Mɛnɛ lɛ o nyi na do ɖo kojo na mɛbu we odansɔvi? E nyi tun e le ote alo e mɔ do le onyihinhlɔn can, cica etɔn tete wɛ e kan. Vɔ e na va nɔ otegaga; ɖo Xwetɔ Mawu kpewu bo na do hɔnhlɔn wu-i. ⁵ Mɛ ɖokpo nɔ sɔ kpinkpɛnmɛ sɔ ɖo na azan ɖokpo-ɖokpo. Mɛ bu bo nɔ sɔ kpinkpɛnmɛ ɖokpo sɔ ɖo na azan lɛye bisese. Na mɛ ɖokpo-ɖokpo ni kando onu kena susu etɔn lɔ ni-i ji. ⁶ Mɛ kena ɖo sisi na azanyee, e wasi na Mawu; mɛ kena ɖu onu nɔ, e ɖu na Mawu, ɖo ɛkpɛ wɛ e do na Mawu nɔ. Mɛ kena hɔn mɔ ɖu onu can, e mɔ wasi na Xwetɔ lɔ; i can gba nɔ do ɛkpɛ na Mawu. ⁷ Ɖo mɛti hɔn le míamɛ bo le ɛgbɛ na eɖe, alo mɛti hɔn le bo nɔ ku na eɖe. ⁸ Ɖo na mí le ɛgbɛ, Xwetɔ lɔ wɛ mí le ɛgbɛ na; e nyi tun mí mɔ ku, Xwetɔ lɔ ke wɛ mí ku na. Hun na mí le ɛgbɛ alo mí mɔ do ku can, Xwetɔ lɔ tɔn wɛ mí nyi. ⁹ Ɖo nu xin lɔ wɛ dɔn na Klisu lɔ do ku bo mɔ fon va ɛgbɛ, na ni a do nyi Xwetɔ na mɛ ke le ɛgbɛyee kpo mɛ kena kuyee can. ¹⁰ Vɔ l̵ɔ, ŋunɛ lɛ jɔ na o do do ɛhwɛ wu nɔvywe nɔ? Lɔ ŋunɛ dɔn na o do gbɛwan na nɔvywe? Ɖo mímɛ bisese na ve kple le kojo ɖo tɛnxo mawutɔn lɔ. ¹¹ Ɖo e nyi winwlan tun: «Ɖi ke ko le ɛgbɛ ɖo ha,» Xwetɔ lɔ wɛ lɔ ɖemɔha, « Klitayee bi na yi odo le ŋukɔn na-a, ɛɖɛyee bisese mɔ va kanfu wu Mawu.» ¹² Ɖemɔ wɛ mɛɖokpo-ɖokpo na jo kɔnŋuta na Mawu ɖo le míamɛ ɖo. ¹³ Onu ke mí na wa syɛ wɛ nyi tun mí hɔn mɔ do ɛhwɛ wu míaɖeye nɔ ke, vɔ e nyɔ wa, mí ɖo na sɔ gbeta ke, na mɛti ni ka mɔ nyi ɛkpɛn ke wu na nɔvyɔ na klɛn afɔ do alo a mɔ ɖo omɔ na nɔvyɔ. ¹⁴ Ko kandeji gbɔn Xwetɔ Yesu lɔ ji bo nywɛ lɔ byo, onu ti mɔ hɔn nyi onuɖuɖyu, vɔ na mɛɖe kpɔn lɔ byo e mɔ nyi onuɖuɖyu, e mɔ nyi onuɖuɖyu na elɔ. ¹⁵ Na e nyi tun onu kena oɖu nɔ wɛ dɔn na nɔvwe na do ci dɔŋuɖunu we ɛgbɛ mɛ, hun hɔn mɔ ɖe wanyiyi we afɔ ti. Ka sɔ onuɖuɖu tɔwe a do crɔn mɛ kena Klisu ku do tamɛ na ɖe. ¹⁶ Mi ko va yigbe na onunywɛ wiwa miatɔnye a va nyi onu ca ko na gbɛtɔyee. ¹⁷ Ɖo xɔluɖuɖu Mawutɔn lɔ hɔn nyi onuɖuɖu kpodo ahannunu, vɔ ɛhwɛjijɔ, fifa kpodo jijwɛ le Gbigbɔ kinkwɛn mɛ wɛ e nyi. ¹⁸ Ɖo mɛ kena wa odan na Mawu nɔ ɖemɔha nɔ jɛŋu na Mawu wɛ gbɛtɔye mɔ nɔ kpagbe ni-i. ¹⁹ Na e le ɖemɔha hun mía bo kan onu ke nɔ hɛn fifa va ye kpodo onu ke nɔ dɔn na mi na do hwɛn le xɔse mɛ yee. ²⁰ Mi ka sɔ onuɖuɖu a do gu Mawu we dan. Onuɖuɖu bisese wɛ mɛɛ, vɔ onu ke nyla lɔ wɛ nyi lɔ byo, ye a ɖu onu ke nyi afɔklɛnnu na ɛmɛ nɔvyɔ. ²¹ Onu ke nyɔ wɛ nyi lɔ byo, ye ni ko o ɖu olan ɖe, alo a bo nu ahan ɖe alo a bo ɖu onu ɖe ke na dɔn na nɔvi ɖe do jɛnyi. ²² Xɔse xin lɛye kena o ɖo, hɛnyee ganji le Mawu we ŋukɔn na lɔ tete. Donanɔ wɛ nyi, mɛ kena kpɔn tun onu nywɛ mɛ he ɔ wa, wɛ ayixa etɔn ko nɔ do ɛhwɛ de ni-i! ²³ Vɔ na mɛɖe ɖu onuɖe bo mɔ xo kpɔn nɔ, ye da ɛhwɛ ni-i, ɖo walɔ xin lɔ hɔn xinnɛnyi do xɔse ji; onu kena hɔn xinnɛnyi do xɔse ji yee ɛhwɛhuhu wɛ e nyi.