¹ Syɛ, mímɛ kena syɛnxu le xɔse mɛyee, mí ɖo na kpedo mɛ kena hɔn ɖo hɔnhlɔn le xɔsemɛ yee wu le hɔnhlɔ maɖo yetɔn mɛ, mí ko ɖo na nɔ ba onu ke jlo míye tete yee. ² Na mɛɖokpo-ɖokpo ni nɔ ba a jɛŋu na nɔvyɔ le onunywɛ wiwa ni-i mɛ, e mɔ do hwɛn le xɔse mɛ. ³ Ɖo Klisu lɔ hɔn wa onu a do nyɔ na eɖe; vɔ ɖi kena e nyi winwlan ɖo ha tun:«Ozun ke nyi ozun tɔwe lɔ bo wɛ yi bisese.» ⁴ Ɖo onu kena ye wlan do Mawuxo lɔ mɛ bisese yee, ye wlan ye a do kplan onu wu mí, na dogbɔn hunkuku ɖiɖo mɛ kpodo akɔnkpikpan do winwlan kinkwɛn lɛye mɛ, mí mɔ do ɖo kandeji. ⁵ Syɛ, na Mawu hunkukuɖotɔ kpo akɔnfa na ɛmɛtɔ lɔ ni na mia ɖo susu ɖokpo lɛye ɖodan miaɖeye kɔn ɖi kena Klisu Yesu lɔ byɔ ɖo ha. ⁶ E xin mi mɔ nɔ kpɔkpɔ a do sɔ susu ɖokpo, onu ɖokpo le gbenɔkpɔ mɛ, a do do gigo na Mawu kena nyi otɔ na Xwetɔ míatɔn Yesu Klisu. ⁷ Mi yi miaɖeye di kena Yesu lɔ yi mi ɖo ha, e mɔ do gigo na Mawu. ⁸ Ɖo ko tɛɖɛ e ji nɔ tun Klisu mɔ va sɔ eɖe do wasi odansɔvi na Jwifuye, e xin atanŋu kena Mawu kan na dagbo-dagbo yetɔnye mɔ do cɛ, emɔ ke wɛ e ɖexlɛ tun lɔ byo, oxo kena Mawu mɔ lɔ, e mɔ nɔ wasi ɖ'eji, ⁹ exin mɛ ke hɔn nyi Jwifuye mɔ do do gigo na Mawu do i we dɔŋuɖunu kpɔn na ɛmɛ wu. Ɖi kena e nyi winwlan ɖo le Mawuxo lɔ mɛ lɔ byo:«Ko na kanfu wu we le mɛ kena hɔn nyi Jwifuye mɛ, ko ko bo na mɔ ji ohan a do mla nyikɔ tɔwe.» ¹⁰ Ye bɔ mɔ wlan le Mawuxo lɔ mɛ ke tun:«Mɛ ke hɔn nyi Jwifuyee mi kpɔn jijwɛ kpo Mawu we togun lɔ.» ¹¹ Emɔ ke wɛ ye mɔ wlan ke tun:« Mimɛ ke hɔn nyi Jwifuyee, mi kanfu wu Xwetɔ lɔ, na togun lɔ bisese ni do gigo ni-i.» ¹² Ezayi mɔ lɔ ke tun:«Jɛse we jijimɛvi ɖokpo na va cite a do ɖu oga na mɛ ke hɔn nyi Jwifuyee. Mɛ ke hɔn nyi Jwifu xin lɛye bo na va kando oga xin lɔ ji.» ¹³ Na Mawu kandejinɔ lɔ ni gɔ mi kpo i we jijwɛ kpo fifa na mia do kandeji, na kandeji miatɔn a do ɖɔ ŋukɔnyiyi dogbɔn Gbigbɔ Kinkwɛn ji. ¹⁴ Nɔvyee mi, botete can ko kandeji taŋu tun miye teteyee mɔ ɖo susu nywɛ titeŋugbetɔn, mɔɔ nyi ɛmɛ kena na kpewu na nɔ ɖo afɔ afɔji na miaɖeyee. ¹⁵ Nɔvye ŋuunglo kpo nyɔnusiye mi, kpodo ota sinsyɛn kpo wɛ ko do wlan onu diye le wema tɛye lɔ mɛ le akpaɖexwe, a do flin nu kean mi o nyɔ yee na mi, onu wɛ e nyi na do gbɔn ɛfɛnu Mawutɔn mɛ i wɛ dɔn. ¹⁶ Onunina xin lɔ we danwiwa bo nyi lɔ byo, ma Klisu Yesu we odansɔvi. Ke e sɔ ɖodan mɛ ke hɔn nyi Jwifuye kɔn, ko bo trɔ zun Mawu we ɛwɛn nywɛ lɔ jijla we avɔsantɔ, exin mɛ ke hɔn nyi Jwifuyee mɔ do nyi avɔsan ke Gbigbɔ Kinkwɛn ɖe d'ovo bo jɛŋu na Mawu. ¹⁷ Ɖemɔha wɛ gigo tɛye le le Klisu Yesu kpo onu Mawutɔnyee mɛ ɖo. ¹⁸ Ɖo ko hɔn kpewu na lɔ oxo bu ti, zɛgbɔn onu kena Mawu wa gbɔn blɔ jiye, bo do dɔn mɛ kena hɔn nyi Jwifuyee do va tonusise mɛ, dogbɔn oxo lɔ kpodo onuwiwayee mɛ wɛ e wasi-i gbɔn. ¹⁹ Do gbɔn hɔnhlɔn josiyee kpodo onukpaca-ɛmɛye tɔn mɛ, gbɔn Gbigbɔ Kinkwɛn we hɔnhlɔn mɛ. Ɖemɔha wɛ ko jla ɛwɛn nywɛ Klisutɔn lɔ ɖo le ofi bisese ɖɔ xɛn xin, bɛ sɔn Jeluzalɛmu gbɔɔn do jɛ Iyili we kansinmɛ. ²⁰ Ɖemɔ wɛ ko jlo byo, ofi kena ye hɔn ka se Klisu we oxo lɔ leyee, ko mɔ na mɔ ve jla oxo lɔ le blɛ, exin ko ko mɔ do ve gba oxɔ do ado dodwe mɛbutɔn ji nɔ. ²¹ Ɖi kena e nyi winwlan ɖo le Mawuxo lɔ mɛ tun: «Mɛ keyee na ye hɔn lɔ Klisu lɔ we oxo na kpɔn yee na va kpɔn-ɛ, mɛ kena hɔn se oxo etɔn kpɔn yee mɔ va se oxo lɔ we gɔnmɛ.» ²² I wɛ dɔn na zɔnnɛmu ɖe na ko hɔn nɔ do kpɔn vivo a do va mia kɔn. ²³ Vɔ syɛ ko hɔn mɔ ɖo tɛnxo ti le kansin ke lɔ mɛ wɛ sɔn oxwe nɛmu ɖe syɛ ko bo va sɔ gbeta na do yi mia kɔn. ²⁴ E jlo tun hwekenu na ko na va yi Ɛsipanyi ma zɛ mia kɔn, exin ojlo kena ko ɖo na do va mia kɔn lɔ mɔ do jɛmɛ na viɖe hin, mi mɔ va gɔ alɔ na-a ma do yi oto xin lɔ mɛ, ko mɔ do kpɔn jijwɛ viɖe kpo mi na hwenu viɖe. ²⁵ Vɔ syɛ Jeluzalɛmu wɛ ko yi nɔ ma do vee gɔ alɔ na xɔsetɔ ke le blɛ yee. ²⁶ Ɖo Masedwanutɔye kpo Akayitɔyee sɔ gbeta a do jɔ onu a do kpedo ayanɔ ke le Jeluzalɛmu we xɔsetɔye mɛ wu. ²⁷ Ye tete wɛ sɔ gbeta xin lɔ. Ɖo na mɛ ke hɔn nyi Jwifuye ɖo mima le nyɔna Gbigbɔ mɛ tɔn Jwifuyetɔn mɛ, mɛ kena nyi Jwifuye lɛye can ɖo na gɔ alɔ na ye le gbazamɛ we ohyan yetɔnye mɛ. ²⁸ E nyi na ko kpa odan ke lɔ vɔ bo sɔ onujijɔ lɛye sɔ ve na vɔ, ko na gbɔn mia ,kɔn a bo do sɔn-i Ɛsipanyi. ²⁹ Ko nyɔ-ɛ lɔ byo na ko gbɔnnɔ miakɔn nɔ, na do va ba jonɔ wu mi, bo kpodo ɛwɛn nywɛ jijla we dona Klisutɔn wɛ na va. ³⁰ Syɛ ko byɔ mi nɔ nɔvi ŋusunglo kpodo nyɔnusi kpo dogbɔ mía we xwetɔ Yesu Klisu ji gbɔn Gbigbɔ Kinkwɛn we wanyiyi mɛ n tun, miye mɔɔ fun ahwan kpo-o, le ɛɖɛxixo miatɔnyee mɛ kpanta wu le Mawu we ŋukɔn. ³¹ Mi xo ɛɖɛ na, exin, ko ko mɔ do jɛ maxɔsetɔye, kandejiadotɔye ke le Judeye we alɔ lɛ nɔ, alɔgɔ ke ko hɛn do yi Jeluzalɛmu nɔ lɔ, xɔsetɔ lɛye ni mɔɔ yi fifaa ɖe. ³² Mi xo ɛɖɛ na, exin dogbɔn Mawu we jlo mɛ ko mɔ do kpewu a va miakɔn le jijwɛ mɛ, a bo do gbɔjwɛ viɖe le miakɔn. ³³ Na Mawu fifa na ɛmɛtɔ lɔ ni nɔ kpo mi. Ami.