¹ Ko dɔn odan ke wu mi nɔ lɔ byo, mía nɔ vyɔ Fwebe, ke nyi odansɔvi le agun Sankletɔn mɛ, tu mi mɔɔ ɖ'eji do e wu, ² a bo yi jonɔ ni-i ganji le Xwetɔ lɔ mɛ. Mi gɔ alɔ ni-i le onu ɖekpokpwe ke mɛ na e na ɖo ohyan miatɔn le ɖi kena ɛmɛ mimɛyee nɔ wasi ɖo ha. Ɖo e nyi alɔgɔtɔ na ɛmɛ susu gbɔɔn bo mɔ gɔ alɔ na blɔ tete can. ³ Mi do ogbe na Plisili kpodo Akilasi kpo ke nyi odanwagbɛ tɛyee le Klisu Yesu mɛ ye, ⁴ yee mɛ ke baa crɔn ɛgbɛ yetɔnye do ota tɛye mɛ klo, e hɔn nyi bo ɖokpo hwɛn do ɛkpɛ na yee nɔ, vɔ mɛ ke hɔn nyi Jwifuyee can we agunyee bisese can, wɛ do ɛkpɛ na yee nɔ. ⁵ Mi dogbe na agun kena le oxwe yetɔngbe yee na. Mi d'ogbe na nɔvye vɛna-vɛna Ekpayinɛti ke nyi ɖokpo le ɛmɛ tantɛntɔn ke kando KLisu ji le Azi we tomɛ yee mɛ na-a. ⁶ Mi d'ogbe na Mali ke jɛ tagba susu do ota miatɔn mɛ. ⁷ Mi d'ogbe na Andlonikwisi kpodo Junyasi, ke nyi bo we emɛye, kpodo ɛmɛ ke kpo bo kpo sɛn ogan kpɔkpɔ yee. Ɛmɛ ŋukunsin le e ji ye wɛ yee nyi le ɛmɛdindɔnye mɛ, ye bo mɔ loe Klisu lɔ mɛ jɛ ŋukɔn na blɔ. ⁸ Mi d'ogbe na Anpliyasi ke nyi nɔvye vɛna-vɛna le Xwetɔ lɔ mɛ. ⁹ Mi d'ogbe na Wibɛn, ke nyi mía we odanwagbɛ le Klisu lɔ mɛ, kpo nɔvye vɛna-vɛna Sitakisi can. ¹⁰ Mi d'ogbe na Akpelɛsi, ke ɖe i we gbɛjininɔ sɔ xlɛ le Klisu mɛ. Mi d'ogbe na mɛ ke le Alisitobulu we xwegbeyee. ¹¹ Mi d'ogbe Elodyɔn ke nyi ɛmɛ tɛye. mi d'ogbe na mɛ kena le Nasisi we xwegbe bo le Xwetɔ lɔ mɛ yee. ¹² Mi d'ogbe na Tlifɛnu kpodo Tlifozu, ke nyi odanwatɔ Xwetɔ lɔ tɔn ye. Mi d'ogbe na Pɛsidi ke nyi nɔvye vɛna-vɛna, ke wadan susu le Xwetɔ lɔ mɛ. ¹³ Mi d'ogbe na Hlufusi ke nyi ɛmɛ cincan le Xwetɔ lɔ mɛ, kpodo onɔ ke mɔ nyi bo can gba naye. ¹⁴ Mi d'ogbe na Asɛnkliti, kpo Flejɔn, Ɛmɛsi, Kpatlobasi, kpo Ɛmasi kpo nɔvi xɔsetɔ kena le yekɔn yee. ¹⁵ Mi d'ogbe na Filolɔgu, Juli, Nele kpodo nɔvyɔ nyɔnusi, kpo Olinpu, kpo xɔsetɔ bisese ke le yekɔn yee. ¹⁶ Mi d'ogbe na miaɖeye dogbɔn osikiki mɛ. Agun Klisutɔn yee bisese d'ogbe ɖodan mi. ¹⁷ Syɛ nɔvyee mi, ko byɔ mi nɔ tun miye mɔɔ cɔ miaɖeye do mɛ kena nɔ hɛn kinklan do va ɛmɛ mɛ yee kpo a bo nɔ dɔn na ɛmɛye nɔ jɛnyi le xɔse mɛ ye wu, a bo mɔ cite kpanŋukɔn okplan ke mi yi yee wu. Mi tɛyi le yee wu. ¹⁸ Ɖo mɛxinye hɔn sɛn Xwetɔ miatɔn Klisu lɔ nɔ, vɔ adɔ yetɔnye mɛ wɛ yee vi do nɔ. I wɛ dogbɔn oxo vivi yetɔnye lilɔ kpodo aglanmɛ ɖuɖu yetɔn mɛ, ye nɔ blɛ ojimɛ le faa nɔ ye ɖu. ¹⁹ Ɖo miye mɛ bisese we nywɛ tun tonu se tɔye mɛ mi mɔ nyi. Oji bo nɔ jɔɔ do miawu, vɔ ko bo ba nɔ tun na mia mɔ ɖo gbigbɔ onunywɛtɔn a mɔɔ nɔ do wa onu nywɛye, mi mɔ nyi ɛmɛ mimɛyee a bo nɔ gbɔn akpa na onunyinyla yee. ²⁰ Mawu ke nɔ na fifa wu ɛmɛ na gbidi satana le afɔgɔ na mi zaanɖe. Na ɛfɛnu Xwetɔ Yesu Klisutɔn ni nɔ kpɔ kpo mi. ²¹ Timɔte, odanwagbɛ tɛye, kpo Luswisi kpo Jazɔn kpodo Sosikpatɛ ke nyi ɛmɛ tɛyee d'ogbe ɖodan mi. ²² Blɔ, Tɛtwisi ke dogbɔn wema ke mɛ, ko do ogbe ɖodan mi le Xwetɔ lɔ mɛ. ²³ Gayiwusi, ke we xwegbe ko nɔ nɔ wɛ agun lɔ bisese bo mɔ nɔ kple do, e do ogbe ɖodan mi. Elasi kena nyi toxo lɔ we ohohɛntɔ, d'ogbe na mi, nɔvi Katusi can. ²⁴ Na ɛfɛnu Xwetɔ míatɔn Yesu Klisutɔn ni nɔ kpɔ kpo mimɛ bisese! Ami! (Onuwinwlan xoxo ɖeye trɔ ota na winwlan ke lɔ.) ²⁵ Syɛ mía kanfu wu Mawu kena ɖo acɛ bo na na wɛ mi na do aɖɔdo, ɖi kena ɛwɛn nywɛ ke ko jla nɔ bo do lɔ Yesu Klisu we xo nɔ lɔ, lɔ-ɛ ɖo ha. Ɛwɛn Nywɛ xin lɔ bo nyi onu bo le hwihwla sɔn xoxo hwenu gbɔɔn, bo nyi onumakpɔndona. ²⁶ Vɔ syɛ ye va ɖe-e sɔ xlɛ dogbɔn wema ke oxolɔɖenyitɔye wlaan ji, e bo dɔ na togun kena hɔn nyi Jwifuye bisese va nyɔ-ɛ. Gbɔn tito kena Mawu mavɔmavɔ ɖo ji wɛ e nyi wiwasi le, ye mɔ do ɖo xɔse a bo mɔ do se tonu. ²⁷ Mawu ɖɔkpo gee ke nyi nunyɔtɔ, dogbɔn Yesu Klisu ji, tɔn ni nyi gigo tɛgbɛ. Ami.