¹ Ɛwɛndotɔ atungɔ lɔ kun ahwankpɛn. Ko kpɔn sunhwevi ji ye. bo sɔ vivɛsise we ogun ɖaxo maɖodo lɔ we cavi bo sɔ ni-i. ² Sunhwevi lɔ bo hun ogan mɛ lɔ, azɔ ɖe bo tɔn le e mɛ nɔ ɖi ozokpo ɖaxo ɖe we azɔ ha. Azɔ kena tɔn lɔ, bo na na ohwe kpo ɛgbɛ lɔ mɛ wii. ³ Bɔsukleye bo tɔn le azɔ lɔ mɛ, bo gbakpe gbɔn nyidan lɔ ji. Ye bo na ye ɛcɛ ɖi kekleye tɔn ha. ⁴ Ye bo do osɛn na ye tun byo ye boo ko wa onu nyanyla dogbe ti, alo ama ti o, otin ti, vɔ ye boo wa onu vivɛ do ɛgbɛtɔ kelɛɛye na Mawu we josido lɔ ɔn le ŋukɔnnu na ye, ɖodyo. ⁵ Ye ɔn ɖe omɔ na tun byo ye boo hu ɛmɛ xin lɔye, vɔ, ye na ye ogbe tun byo ye boo do aya na ye na osunzan atun: vivɛsise kena ye nɔ do na ɛmɛ, le ɖivivɛsise kena ye nɔ se hwekenu na kekle mɛ ɛmɛ ha. ⁶ Le azan xin lɛɛye ji, ɛgbɛtɔye na kan oku bo na kan dokpo. Ye na jlo na ku, vɔ oku bo na si le ye kɔn. ⁷ Bɔsukle lɛɛye le ɖi osɔ kena ye bla akpa na, na ahwan kena ye sɔ sika do wasi ha. Ŋumɛ yetɔnye bo ɖi ɛgbɛtɔ we ŋumɛ ha. ⁸ Ye bo mɔ ɖ'oɖa ɖi ŋyɔnusiye we oɖa ha, aɖu yetɔnye bo ɖi kinni kinni jaŋuta we aɖu ha. ⁹ Hunkɛnnu yetɔnye le ɖi onu kena ye do aganwu na ha. Axwe yetɔnye we zigidi lo ɖi nɔ ɖi ahwanhun kelɛɛye na osɔ susu lo dɔn yi ahwan nɔ ye ha. ¹⁰ Fɔgan yetɔnye bo ɖi kekle we fɔganye bo trɔn xwinni-xwinni. Fɔgan yetɔn lɛɛye mɛ wɛ hɔnhlɔn yetɔn le, ye bo na do do aya na ɛgbɛtɔye na osunzan atun. ¹¹ Xɔlu ɖokpo bo le ye nu-i lɔ wɛ nyi ɛwɛndotɔ kena le vivɛsise we ogan ɖaxo maɖodo lɔ nu ye nɔ yɔ-ɛ le heblegbe mɛ tun byo « Abadɔn » le glɛkigbe mɛ ye nɔ yɔ- ɛ tun « Apolinyɔ» ¹² Ofunkpikpe tantyantɔn lɔ va yi, kpɔn, ofunkpikpe owe buye mɔ gbɔn nɔ. ¹³ Ɛwɛndotɔ ɛdɛngɔ lɔ kun ahwan kpnɛn. I we ko se agbe ɖe ɖi sɔn sika we ovɔsinsan we agba we azo ɛnɛ lɛɛye mɛ. Ovɔsinsan we agba mɛ lɔ bo le ŋukɔn na Mawu. ¹⁴ Ogbe lɔ bo lɔ na ɛwɛndotɔ ɛdɛngɔ kena hɛn ahwankpɛn lɔ tun byo lɔ:«tun okan na ɛwɛndotɔ ɛnɛ keye ni le bibla le otɔsisa ɖaxo kena nyi Eflai lɔ ji.» ¹⁵ E tun okan na ɛwɛndotɔ ɛn ɛlɛɛye keye na ye o jla ɖo, ɖ'onyi na oganxixo ke lɔ, azan ke lɔ, osunzan ke lɔ,oxwe ke lɔ, ni ye a do hu ɛgbɛtɔye we maɖo atɔn. ¹⁶ Ye bo lɔ sɔja osɔjinɔtɔ yetɔnye we xixlɛmɛ na-a: ye nyi zanhwanhyɔn sandi Owe ¹⁷ ɖena ko kpɔn osɔye kpo osɔkuntɔye ɖo le ɖiɖexlɛ tɛye lɔ mɛ xɛn: ye do oganwuye; ɖeye le ovɛ ɖi ozo ha, ɖeye bo nyi ɛkpɛn ɛfɛsin kena ye yɔ tun safii ha ɖeye bonyi goklozindɔmɛ ɖi hwemi ha. Osɔ lɛɛye we ota bo le ɖi kinnikinni jaŋuta we ota ha. Ozo, azɔ kpodo hwemi bo tɔn le onu mɛ na ye nɔ ¹⁸ Ofunkpikpe atɔn keye ni nyi ozo, azɔ, kpodo hwemi kena tɔn sɔn onu mɛ na osɔ lɛɛye nɔ, hu ɛgbɛtɔye we maɖo atɔn. ¹⁹ Ɖo osɔ lɛɛye we hɔnhlɔn, onu mɛ kpodo fɔgan mɛ wɛ ele na ye. Fɔgan yetɔn bo ɖi adɔn ha, bo ɖ'ota, mi lɔwɛ ye nɔ zan a do do vivɛsise na ɛgbɛtɔye. ²⁰ Ɛgbɛtɔ gbokpweye keye na ofunkpikpe mɛ lɔye ɔn nu ye, ye ɔn lɛkɔ le ɛtɛ na onu keye na sɔ alɔ yetɔn ŋutɔye do waso bo lo sɛn nɔ ye. Ye ɔn jo lɛgba sinsɛn do, ye ko jo onu kpikpla keye na ye sɔ sika do wasi ye do. Onu xin mɛ lɛɛye ɔn kpewu nɔ kpɔn onu ye ko se onu nɔ gbɔɔn do zɔn zɔnlin nɔ can. ²¹ Ye ɔn lɛkɔ le ɛmɛ huhu yetɔnye tɛ, gbɔɔn do trɔ okɔ le aze yetɔnye, ɛgbɛ ɖuɖyu zinzan yetɔnye, kpo ɛfin finfin yetɔnye tɛ can.