¹ E xin godo ko mɔ kpɔn Mawu we ɛwɛndotɔ hɔnhlɔnnɔ bu, e bo jɛ ote nɔ sɔn sexwe, sunwɔye bo butu-i, anyi ɖohwɛɖo bo lɛdota ni-i, ŋumɛ etɔn bo klɛn nɔ ɖi ohwe ha, afɔ etɔnye bo le ɖi gundotin kena ji ozo nɔ ha. ² E hɛn wema oviiɖe do asi, wema bo le hunhun. E sɔ aɖusifɔ etɔn sɔ ɖo ɛxu ji, bo sɔ amyɔfɔ etɔn sɔ ɖo nyidan ji. ³ E do axwa lelele ɖi kinnikinni jaŋuta wɛ tɛn ogbe ha. Kena e do axwa lɔ,oju d'ogbe zɔn acowe. ⁴ Kena oju d'ogbe zɔn acowe lɔ, ko ba wlan onu keye na ye lɔ nɔ kpoŋu, ko bo se ogbe ɖe sɔn sɛxwe bo lɔ tun byo blɔ: « cɔn d'oxo kena ojudogbe acowe lɛye lɔ ji, ko wlan-ɛ.» ⁵ I wɛ ɛwɛndotɔ kena ko kpɔn le ote le ɛxu kpodo nyidan ji lɔ, drɛn aɖusilɔ etɔn ɖodan sɛxwe, ⁶ bo ta Mawu, ɛmɛ ke le ɛgbɛ do yi mavɔ, kena ɖo jiŋu kunsin kpo onu keye ni le e mɛ ye, bo mɔ ɖo nyidan kpo onu keye ni le e ji ye, bo ɖo ɛxu kpo onu keye ni le e mɛ ye, e bo lɔ tun byo blɔ: « Ganmɛ ti ɔn mɔ le!» ⁷ Vɔ azan keye ji na ɛwɛn dotɔ acowegɔ lɔ na va kun okpɛn, gan xin mɛ wɛ Mawu we tito makpɔndona lɔ na jɛ e ji, ɖi lena e lɔ-ɛ na odansɔvi etɔn keye ni nyi ogbedotɔyedo ha. ⁸ E xin godo, ogbe kena ko se sɔn sexwe lɔ bo lɔ na-a ke, tun byo:« Va yi wema ovii ke le hunhun lɔ, le asi na ɛwɛndotɔ ke le ote le ɛxu kpo nyidan ji lɔ.» ⁹ Ko yi ɛwɛndotɔ lɔ kɔn, bo lɔ ni-i tun byo ni boo sɔ wema ovii lɔ na-a. E bo lɔ na tun byo blɔ: « mɔ yi-i bo ɖu-i. E na vivi ɖi owinsin ha le onu mɛ na we, a bo vɛ le dɔmɛ na we.» ¹⁰ Ko yi wema ovii lɔ le asi na ɛwɛndotɔ lɔ, bo ɖu-i. E vivi ɖi owinsin ha le onu mɛ na-a, vɔ kena ko mi-i, e vɛ kpaɖa-kpaɖa le dɔmɛ na-a. ¹¹ I wɛ ye lɔ na-a tun byo blɔ:« bo ɖo na mɔ lɔ oxo kena Mawu lɔ d'oto susu, otogun susu we ŋukɔn, ogbe susu kpo xɔlu susu wu. »