¹ E xin godo ye sɔ okɔn ɖe na-a, e bo ɖi onujlɛtin ha, ye bo lɔ na-a tun blɔ mɔ:« site a bo jiɛ Mawu we oxwe lɔ, ovɔsinsan we agba lɔ, a bo xlɛ ɛmɛ keye ni lo sɔn Mawu le e mɛ nɔ ye kpɔn. ² Vɔ, oxwe lɔ we gaji, jo-e do, ko jlɛ-ɛ. Ɖo blɛ lɔ wɛ ye jo do na ɛmɛ keye ni ɔn nɔ sɛn Mawu ye. Yee na va gbidi toxo kinkwɛn lɔ le afɔnu na osunzan kanɖe ŋukun . ³ Ko na ɖe omɔ na kunuɖetɔ tɛye owe lɛɛye, ye na sɔ dɔkpoye sɔ do, a bo do ɛwɛn kena ye yi le Mawu kɔn lɔ na anyihinhɔn akpo ɖokpo sandi owe ota ɛdɛn. ⁴ Kunuɖetɔ owe xin lɛɛye wɛ nyi olivutin owe lɛɛye kpo zogyan owe lɛɛye keye ni le ŋukɔn na xwetɔ Mawu ke kpa ɛcɛ do nyidan lɔ ji. ⁵ Na ɛmɛ ɖɛ jlo na wa onu nyannyla ye, ozo nɔ tɔn le onu mɛ na ye, a bo fyɔ kɛntɔ ye tɔnye. Ɛɛn, na ɛmɛ ɖe jlo na wasi onu nyanyla kpo ye, ɖena e ɖo na ku ɖo mɛ. ⁶ Ye ɖo hɔnhlɔn bo na do tu jiŋukunsin oju ti ko do ja nɔ, le azan keye glamɛ na ye na lo jla ɛwɛn kena ye yi le Mawu de lɔ nɔ. Ye bo ɖo hɔnhlɔn a do sɔ ɛsin do trɔ zun ɛhun, a bo mɔ hɛn ofunkpikpe tɛnmɛ-tɛnmɛ ye do va nyidan lɔ ji le hwe ɖekpekpe nu na ye jlo. ⁷ Na ye ɖe kunu yetɔn vɔ, kanlin ke vivɛsise we ogun ɖaxo maɖodo lɔ mɛ, na wa ahwan kpo ye, a bo ɖu ye ji, a bo hu ye. ⁸ Ocɔ yetɔnye na le toxo ɖaxo lo we amɔ to, ofi kena ye kan xwetɔ yetɔn do otinsoga ji le. Blɛ lɔ wɛ ye sɔ nyi kɔ na tun sodomu kpo Ejiputi. ⁹ Ɛgbɛtɔ keye ni sɔn oto ɖekpekpe mɛ, akɔta ɖekpekpe mɛ,na kpɔn ocɔ ye tɔn na onyihinhɔn atɔn adaɖe , ye ko lɔn na ye a ɖi ye nɔ. ¹⁰ Ɛmɛ keye ni le nyidan ji ye, na kpɔn jijwɛ tun ye bo ku, a bo ɖu oxwe, a bo ɖo onu ɖodan yenɔniɔye nɔ, d'ogbeɖotɔ owe xin lɛɛye dɔn vivɛsise va ɛgbɛ tɔye ji taŋ. ¹¹ Onyihunhɔn atɔn adaɖe lɛɛye godo, Mawu fun gbigbɔ kena nɔ na ɛgbɛ ɛmɛ do ye mɛ, ye bo site do afɔ yetɔnye ji, vivɔ ɖaxo ɖe bo jɛ ɛmɛ keye ni lo kpɔn nɔ lɛɛye ji. ¹² I we kunuɖetɔ owe owe lɛye se ogbe sinsyɛnxu ɖe ɖi sɔn sɛxwe, bo lɔ na ye tun blɔ: " Mi xɛ bwɛ!" I wɛ kɛntɔ yetɔnye lo kplɔn ye nɔ, ye bo lo sɔn yi sɛxwe nɔ le sunwɔ mɛ.» ¹³ Le hwe xin lɔ nu, nyidan hunhun ɖaxo ɖe jɛ, toxo lɔ we maɖowo bo gudu seŋu. Ɛgbɛtɔ akpo acowe bo ku le nyidan hunhun xin lɔ mɛ, ɛmɛ gbokpweye bo vɔ seŋu, bo kanfu Mawu ke na le sɛxwe. ¹⁴ Ofunkpikpe owegɔ lɔ va yi; Mi kpɔn atɔngɔ lɔ na jɛ zaanɖe syɛ! ¹⁵ I wɛ ɛwɛndotɔ Mawutɔn acowegɔ lɔ kun okpɛn. Ogbe sinsyɛnxu ɖeye ɖi le jihwe, bo lɔ nɔ tun byo: « Syɛ xolu ɖuɖu do ɛgbɛ lɔ ji, trɔ zun " xwetɔ Mawu miatɔn kpodo" klisu etɔn tɔn. Xɔluɖuɖu lɔ na nɔ onyi gbɔɔn do yi mavɔmavɔ!» ¹⁶ Ɛmɛhyɔn oko ŋukun ɛnɛ ke na le xɔlu zin kpwe yetɔnye ji ye, le Mawu we ŋu kɔn lɛɛye, bo cɔn ŋumɛ onyi, bo sɛn Mawu hɔ. ¹⁷ Ye bo lɔ nɔ tun byo: « Mi lo do ɛkpɛ na we nɔ xwetɔ Mawu hɔnhlɔn bise seyetɔ, I ke na le egbe, I ke na le saa, Ɖo o zan hɔnhlɔn ɖaxo tɔwe, bo do na na xɔluɖuɖu tɔwe nɔ onyi. ¹⁸ Otogun ke na ɔn nɔ sɛn Mawu ye bo le adan ji taŋu, vɔ ogan lɔ, xo na o na do ɖe xomɛsi tɔwe sɔ xlɛ ye, a bo ɖɔ ɛhwɛ ɛwɛ ke na ku ye, a bo tu axɔ na adan sɔvi tɔwe ogbeɖotɔye, vikpɛvio ɛmɛhyɔn o. Ogan lɔ xo, na ona do vɔ okun na ɛmɛ ke na hɛn nyidan lɔ ji gú nɔ. ¹⁹ I wɛ, ye hun Mawu we oxwe kena le sɛxwe, okancica we ɖa ka lɔ bo ze le e mɛ. Oju bo ɖe abi, ogbe ye bo ɖi, ogbeye bo ɖi, oju bo do ogbe, nyixɔ bo hun, ɛkpɛnju ɖaxo ɖe boja.