¹ Josi ɖaxo ɖe ze le jiŋukunsin mɛ. Ko kpɔn nyɔnu ɖe sɔ ohwe sɔ do ɖi awu ha, osun bo le afɔye gɔ ni-i, xɔlugba ɖe bo le ota ni-i, sunhwevi weve bo le xɔlugba lɔ wu. ² Gomi le nyɔnu lɔ si, alin bo ɖu-i nɔ, ovi jiji we vivɛ sise bo na na, e lo do axwa nɔ. ³ Josi bu mɔ ze le jiŋukunsin mɛ. Ko kpɔn dlagɔn ɖaxo ovɛ cɛcɛcɛ ɖe, e bo ɖó ota acowe, bo ɖo azo owo, xɔlu we ogbavi bo le ota ɖokpo-ɖokpo ji. ⁴ E sɔ fɔgan etɔn do za sunhwevi ke na le jiŋukunsin mɛ ye we maɖo atɔn kɔn do nyidan lɔ ji. Dlagɔn lɔ le ote le ŋukɔn na nyɔnu ke na ka ji ovi nɔ lɔ, e xin, ovi lɔ gbɛ tɔn kpoŋu, e ba vunvun-i ɖu. ⁵ E ji ovi ŋusunglovi ɖe. Ovi lɔ na kpa ɛcɛ kpikpa etɔn na syɛnxu taŋu ɖi gankpo ha. Zɔnɖokpo; ye kɔ ovi lɔ do sɔn yi Mawu kpodo xɔlu zinkpwe etɔn kɔn. ⁶ I wɛ nyɔnu lɔ si sɔn yi gbefaji, Mawu bo o jla tɛnxo ɖe ɖo onyi ni-i le blɛ lɔ, ye ba do ni-i onuɖuɖu le blɛ lɔ na anyihinhɔn akpo ɖokpo sandi owe ota ɛdɛn. ⁷ Ahwan bojɔ le sɛxwe. Mikayɛli kpodo ɛ wɛndotɔ ke na le ɛcɛ etɔn we agɔye bo wa ahwan kpan ŋukɔn dlagɔn lɔ. Dlagɔn lɔ bo fun ahwan, emyɔ kpodo ɛwɛndotɔ etɔnye. ⁸ I wɛ, dlagɔn lɔ ɔn ɖu oji, nɔtyɔn ne ko mɔ le sɛxwe na e lɔ kpodo ɛwɛndotɔ etɔnye. ⁹ Ye sisɛ, dlagɔn ɖaxo lɔ, odan xixo ke na ye nɔ yɔ tun lɛglɔa kpodo satana lɔ, e lɔ kena nɔ blɛ ɛgbɛtɔ bisese ɖu. Ye sɔ e lɔ kpodo ɛwɛn dotɔ etɔnye sɔ flɛn do nyidan ji. ¹⁰ I wɛ ko se ogbe sinsyɛnxu ɖe ɖi le sɛxwe, bo lɔ nɔ byo: « Syɛ hwlɛngan va, Mawu miatɔn bo ɖe hɔnhlɔn kpodo xɔluɖuɖu etɔn sɔ xlɛ. Syɛ, ɛcɛ kpikpa le alɔ mɛ na klisu etɔn lɔ. Ɖo, ɛhwɛ dona-ɛmɛtɔ ke na nɔ le Mawu miatɔn lɔ ŋukɔn a bo do ɛhwɛ na mianɔvyɛye nɔ okle kpodo oza, ye sisɛ-ɛ le sɛxwe. ¹¹ Vɔ, dogblɔn lɛngbɔvi lɔ we ɛhun mɛ kpodo Mawu we oxo kena ye ɖe kunu na lɔ wu, ye ɖu le e ji. Ye ɔn gbɛ tun ye na sɔ ɛgbɛ ye tɔnye sɔ na, ye bo le ogbe sisɔ na oku. ¹² I wɛ dɔn sɛxwe kpodo ɛmɛ ke na le e mɛ ye, ni kpɔn jijwɛ! vɔ, baba na miye, nyidan kpodo ɛxu. Lɛgba xinflɛ jɛ miakɔn, bo le adan ji taŋu, e bo nyɔ-ɛ tun ogan xixo oviiɖe jan bɛ bo drɔn na he.» ¹³ Ke na dlagɔn lɔ kpɔn tun ye bo sɔ he flɛn do nyidan lɔ ji, e jɛ nyɔnu ke na ji ovi ŋusungblo lɔ we ogbe. Nyinya ji. ¹⁴ I wɛ ye sɔ gangan ɖaxo we axwe owe lɛɛye sɔ na nyɔnu lɔ, e ba do zɔn, a bo sɔn yi gbe fa lɔ ji, nɔtyɔn ke na ye o jla ɖo ni-i lɔ, na ye a do ni-i onu ɖuɖu le blɛ lɔ, na oxwe atɔn adaɖe e ba do si yi dandyɔnnu le odan lɔ wu. ¹⁵ I wɛ odan lɔ tun ɛsin ɖi otɔsisa ha sɔn onu etɔn mɛ do ɛtɛ na nyɔ nu lɔ, e mɛ, otɔsisa lɔ ba do dɔn-ɛ do sɔn. ¹⁶ Vɔ nyidan bo va hwlɛn nyɔnu lɔ gan, nyidan lɔ kɛ onu etɔn bo mi otɔsisa ke na dlagɔn lɔ tun sɔn onu etɔn mɛ lɔ. ¹⁷ Xomɛ si wle dlagɔn lɔ taŋu do nyɔnu lɔ wu, e bo trɔ ahwan lɔ kpan ŋukɔn nyɔnu lɔ we jiji mɛvi gbokpweye,ye ɛmɛ ke na lozɔn do Mawu we osɛnye ji nɔ ye, bo le ogbe ji na kunu ke na yesu ɖe cɔ sɔ xlɛ ye lɔ. ¹⁸ I wɛ dlagɔn lɔ, ci ɛxuto.