¹ E xin godo, ko kpɔn kanlin ɖe sɔn ɛxu mɛ, bo ɖo azo owo kpodo ota acowe. E bo cɔn xɔlu we ogbavi do azo ɖokpo ji. Ye bo wlan nyikɔ ke na nyi acɔn kinkɔn do Mawu wu do ota ɖokpo-ɖokpo wu. ² Kanlin ke na ko kpɔn lɔ le ɖi okpɔ ha afɔ etɔnye bo ɖi ohla we afɔye ha, onu etɔn bo ɖi kinnikinni jaŋuta we onu ha. Dlagɔn lɔ bo sɔ hɔnhlɔn etɔn, xɔluzinkpwe etɔn kpodo ɛcɛ ɖaxo ɖe sɔ ni-i. ³ Kanlin lɔ we ota ɖokpo le ɖi onu ke na ye do abi e wu ha gbɔɔn kanklin lɔ bo tun ma ku, vɔ abi ke na tun ma hɛn oku va lɔ, bo ku. E xin lɔ bo jɛŋu na ɛmɛ bisese kena le nyidan lɔji, ye bo kpɔ-ɛ do. ⁴ Ɛmɛye jɛ dlagɔn lɔ sinsɛn ji, ɖo, e na ɛcɛ kanlin lɔ. Ye nɔ sɛn kanlin lɔ can a bo lɔ tun byo:« Onu lɛ le ɖi kanlin ke ha, onu lɛ na kpewu fun ahwan kpan ŋukɔn-ɛ ? » ⁵ Ye ni-i ogbe, e ba do lɔ gonyi we oxoye, a bo kɔn acɔn do Mawu wu. ⁶ Kanlin lɔ jɛ oxo nyanyla lilɔ ji bo do kɔn acɔn do Mawu wu nɔ, e nɔ kɔn acɔn do ɛmɛ ke na nɔ nɔ sɛxwe ye wu. ⁷ Ye ni-i ogbe ni a do fun ahwan kpan ŋukɔn xɔsetɔye, a bo ɖu le ye ji. Ye ni-i ɛcɛ do akɔta ɖe kpekpe, oto ɖekpekpe, ogbe ɖekpekpe kpodo otogun ɖekpekpe. ⁸ Ɛmɛ bisese kena le nyi dan lɔ ji ye na sɛn-ɛ. Ye ɛmɛ ke na ye ɔn wlan nyikɔ yetɔnye do lɛngbo vi ke na hu lɔ we ɛgbɛwema lɔ mɛ ye sɔn ɛgbɛ lɔ we dojɛ gbɔɔn ye, we na sɛn-ɛ. ⁹ Na ɛmɛ ɖe ɖo oto, ni se onu! ¹⁰ ɛmɛ ke na ɖo na yi ogankpan mɛ ɛmɛ ke na ɖo na ku le dɛnkpwe nu, bo na ku le dɛn kpwe nu. I wɛ dɔn na xɔsetɔye ɖo na do vivɛnu a bo ɖo xɔse. ¹¹ I wɛ ko mɔ kpɔn kanlin bu, e bo tɔn sɔn nyidan gɔ. E ɖo azo owe ɖi lɛngbɔvi we azoye ha, e bo lɔ oxo nɔ ɖi dlagɔn ha. ¹² Kanlin tantyantɔn lɔ we ɛcɛ bisese wɛ e lo zan nɔ le ŋumɛ etɔn. E bo na ɛmɛ bisese ke le nyidan lɔ ji ye sɛn kanlin tantyan ke na abi ke na tun ma hu-i lɔ, va ku na. ¹³ Kanlin owegɔ mɛ lɔ, bo jlɛ onu ɖaxo-ɖaxoye nɔ, gbɔɔn bo nɔ na na ozo nɔ jɛ ote sɔn jiŋukunsin a bo jɛ nyidan ji, le ŋumɛ na ɛmɛ bisese. ¹⁴ Onu ke na ye ɖe omɔ ni-i tun ni boo jlɛ le ŋumɛ na kanlin ɖe lɛɛye e nɔ sɔ ye do blɛ nyidan ji tɔ ye ɖu. E nɔ do nyidan ji tɔ lɛɛye nɔ tun ye boo wasi kanlin ke na ye xu dɛnkpwe, e bo mɔ gbɔn va ɛgbɛ lɔ we onutita. ¹⁵ Ye na ogbe kanlin owegɔ lɔ tun ni boo na ɛgbɛ kanlin tantyan lɔwe onutita, e xin onu tita lɔ ba lɔ oxo, a bo na na ye a hu ɛmɛ bisese ke na ɔn sɛn-ɛ nɔ ye ¹⁶ kanlin lɔ nɔ zin ɛmɛ bi sese ji gannu gannu, vikpɛviye kpo do ɛmɛhyɔnye, dɔkunnɔye kpodo ayanɔye, ɛmɛxixɔye kpodo ke le yeɖe nu ye, na ye a do yi josi ɖe do aɖusilɔ wu alo ŋukɔnnu ye tɔnye. ¹⁷ E xin ɛmɛ ti ɔn kpe wu xɔ onu nɔ gbɔɔn do sa onu nɔ, na e ɔn yi josi lɔ na nyi kanlin lɔ we nyikɔ alo akɔnŋuta wemakun ke na sɔgbe kpodo nyikɔ etɔn. ¹⁸ Le bwɛ, e hyan onunyinywɛ. Ɛmɛ ke na ɖo zinzin, ni wa akɔnŋuta na kanlin lɔ we nyikɔ. Akɔnŋuta wemakun lɔ sɔgbe kpodo ɛgbɛtɔ we nyikɔ. I wɛ nyi sandi ɛdɛn ota ɛdɛn ŋukun ɛdɛn.