¹ I wɛ ko na mɔ kpɔn kpoŋu, ko ko kpɔn lɛngbovi lɔ le ote le synɔ we otó lɔ ji, e lɔ kpodo ɛmɛ akpo sandi ɖokpo akpo ota ɛnɛ akpo ŋukun ɛnɛ ke na ye wlan nyikɔ etɔn kpodo otɔ we nyikɔ do ŋukɔnnu na ye. ² Ko se ogbe ɖe ɖi le sɛxwe ɖi otɔ ɖaxo ɖe wɛ do nɔ ha, alo ɖaxo ɖe wɛ do ogbe nɔ ha. Ogbe ke na ko se lɔ bo le ɖi ogbe ke na onuxonu okannɔ nɔ do, na ye xo-e nɔ ha. ³ Ye bo lo ji ohan yɔyɔ ɖe nɔ le xolu zinkpwe lɔ we ŋukɔn, le onu le ɛgbɛ ɛnɛ lɛɛye kpodo ɛmɛhyɔn lɛɛye we ŋumɛ. ɛmɛ ti ɔn kpewu na kplan ohan lɔ, zɛgbɔn ɛmɛ akpo sandi ɖokpo akpo ota ɛnɛ akpo ŋukun ɛnɛ lɛɛye ke na ye trɔ xɔ le nyixɔ ji ye wu. ⁴ Ɛmɛ xin ye, ɔn do odyu yeɖe kpodo nyɔnusiye, ye ɔn tɛkpɔ nyɔnukpɔ. Ye nɔ le ɛtɛ na lɛngbovi a do yi ofi ɖekpekpe ke na lo yi nɔ.Ye trɔ xɔ ye le ɛgbɛtɔye mɛ na ye a do nyi ɛmɛ tantyantɔn ke na ye sɔ na Mawu kpodo lɛngbovi lɔ. ⁵ Ye ɔn kan ojo kpɔn. Ofɛn ti ɔn le ye wu Mawu we ɛwɛndotɔ atɔn we oxo ⁶ I wɛ ko kpɔn ɛwɛndotɔ bu, e bo zɔn gbɔn jiŋukunsin mɛ daan nɔ, ɛwɛn nywɛ mavɔmavɔ ɖe le e si, e bo ka do na ɛmɛ ke na le nyidan lɔ ji bisese nɔ, otogun ɖekpekpe, akɔta ɖekpekpe, ogbe ɖekpekpe, kpodo oto ɖekpekpe. ⁷ E do axwa sinsyɛnxu ɖe bo lɔ nɔ byo: « Mi ɖo sisi na Mawu, a bo kanfu-i ɖo kojoɖiɖo etɔn we ogan xo, mi sɛn ɛmɛ ke na ɖo jiŋukunsin, nyidan, ɛxu kpodo otɔjɔtyɔn ye!» ⁸ Mawu we ɛwɛndotɔ owegɔ bu, jɛ ɛtɛ na tantyantɔn lɔ, bo lɔ nɔ byo:« E gba, e gba Babilɔnu toxo ɖaxo lɔ e lɔ ke na dɔn otogun bisese do ɛgbɛ ɖuɖyu zin zan ɖi tun vɛn wɛ ye kpe na ye ha, e bo hɛn aɖidido taŋu va ye ji! » ⁹ Mawu we ɛwɛndotɔ bu, ɛwɛndotɔ atɔngɔ, bo lɔ nɔ kpodo axwa kpo byo: « Na ɛmɛ ɖe sɛn kanlin lɔ kpodo onutita etɔn, bo yi josi ɖe do ŋukɔn nu alo alɔ wu, ¹⁰ e lɔ can na nu Mawu we aɖido taŋu ɖi vɛn aku-aku ke na ye kɔn do aɖidido we kɔkpo etɔn mɛ ha. E bo na se vivɛ taŋu le ozo kpodo lɛngbɔvi lɔ ! ¹¹ Ye ɛwɛ ke na lo sɛn kanlin kpodo onutita etɔn nɔ, kpodo ɛmɛ ɖekpekpe ke na yi nyikɔ etɔn we josi lɔ, ozo ke na na do aya na ye na lɔ we azɔ lo tun nɔ tɛgbɛ, ye ko ɖo vivo nɔ oklo kpodo ozan.» ¹² I wɛ dɔn, xɔsetɔ, ke na do osɛn Mawu tɔnye ji nɔ ye, bo ɖo xɔse do Yesu ji ye, ɖo na do vivɛnu. ¹³ Ko se ogbe ɖe ɖi le sɛxwe, bo lɔ byo:« wlan oxo ke: " Bɛ sɔn syɛ, nyɔnanɔye wɛ nyi ɛmɛ kukuye, ye ɛmɛ ke na ku le xwetɔ lɔ mɛ ye" ! Ɛɛn, gbigbɔ lɔ byo, " ye ni boo va yi gbɔjwɛ do gbagba jijɛ ye tɔnye wu, ɖo odan nywɛnywɛ yetɔnye kplɔ ye do".» Ɛjinukun gbigbo le nyidan lɔ ji. ¹⁴ Ko kpɔn sunwɔ owee ɖe, ɛmɛ ɖe ke na le ɖi ɛgbɛtɔ vyɛ ha bo xlɔn onyi le sunwɔ lɔ ji. Xɔ lu we ogba ke na ye sɔ sika do wasi bo leota ni-i, ɛji nukun gbonu ɖiɖa ɖe bo le alɔ . ¹⁵ Mawu we ɛwɛndotɔ bu tɔn sɔn Mawu oxwe lɔ gbe, bo lo lɔ na ke na xlɔn onyi le sunwɔ lɔ ji nɔ kpodo axwa lelele byo:« sɔ ɛjinu kungbonu tɔwe lɔ, a bo ɖe ɛjinu kun! ɛjinukun ɖiɖe we ogan xo, ɖo nyidan lɔ ji we ɛjinukunye o bya.» ¹⁶ I wɛ ɛmɛ ke na xlɔn onyi le sunwɔ lɔ ji nyi ɛjinukungbonu etɔn lɔ gbɔn nyidan lɔ ji, bo ɖe ɛjinukun lɛɛye le nyidan lɔ ji. ¹⁷ Mawu we ɛwɛndotɔ bu tɔn sɔn Mawu we oxwe ke na le sɛxwe lɔ mɛ, e lɔ can hɛn ɛjinu kungbonu ɖiɖa do asi. ¹⁸ Mawu we ɛwɛndotɔ bu ke na ɖo ɛcɛ do ozo ji, tɔn le ovɔsinsan we agba lɔ mɛ, bo lɔ kpodo axwa lelele na ɛmɛ ke na ɖo ɛjinukungbonu ɖiɖa lɔ byo: « Sɔ ɛjinukungbonu ɖiɖa tɔwe a bo gbo vɛntin kena le nyidan ji we oxwiye, ɖo hlɛzɛn yetɔnye o bya.» ¹⁹ Ɛwɛndotɔ lɔ nyi ɛjinu kungbonu etɔn lɔ do nyidan lɔ ji, bo gbo oxwi ke na le vɛngbe lɔ mɛ le nyidan lɔ ji ye, bo bɛ ye kɔn do Mawu we a ɖidido wee onu fyɔngun ɖaxo lɔ mɛ. ²⁰ Ye li hlɛzɛn lɛɛye le onufyɔngun lɔ mɛ le toxo lɔ godo. Ɛhun bo tɔn sɔn onu fyɔn gun lɔ mɛ taŋu bo gbakpe gbɔɔn bo na yi kpɛntin sandi atɔn. Na e nyi tun osɔ ɖe ɖyɛ e mɛ, ota jan wɛ ye na kpɔn ni-i nɔ le ɛhun lɔ mɛ.