¹ Le exin lɔ godo, ko kpɔn Mawu we ɛwɛndotɔ le ote le nyixɔ we azwe ɛnɛ lɛye ji. Ye wɛ hɛn jɛhɔn nyidan ji tɔn ɛnɛ lɛye ɖo'te na jɛhɔn ti ko mɔ do xo nɔ le nyixɔ lɔ ji, ɛxu ji, alo do otin ti ji nɔ. ² Ko bo mɔkpɔn Mawu we ɛwɛndotɔ bu, e bo sɔn hwezɛdo, bo Mawu ɛgbɛgbyo lɔ we jisido. E bo do axwa bo lɔ ɖodan ɛwɛndotɔ ɛnɛ ke o yi ɛcɛ tun ye mɔɔ wa onunyinyla do nyixɔ ji okp ɛxu mɛ ye, tun byo: ³ Mi ka wasi onunyinyla do nyixɔ lɔ, gbɔɔn a do wasi kpo ɛxu kpo otinye can mi nɔ'te gbɔɔn do jɛ hwekenu mí na ɖo josi ŋukɔnnu na Mawu míatɔn we odansɔviye. ⁴ Ko bo se ɛmɛ nɛmu ke ye ɖo Mawu we josi lɔ ŋukɔnnu na. Ye ɛmɛ akpo sandi ɖokpo akpo'ta ɛnɛ akpo ŋukun ɛnɛ: 144.000 wɛ ye nyi, bo sɔn Irayɛli we akɔnta lɛye bi mɛ. ⁵ Le Juda we akɔta mɛ, ye ɖo josi ɛgbɛtɔ akpo weve, ( 12.000), Rubɛn we akɔta mɛ, ɛgbɛtɔ akpo weve; le Gadi we akɔta mɛ, ɛgbɛtɔ akpo weve, ⁶ le Azɛɛ we akɔta mɛ, ɛgbɛtɔ akpo weve; le Nɛfutali we akɔta mɛ, ɛgbɛtɔ akpo weve; le Manase we akɔta mɛ, ɛgbɛtɔ akpo weve; ⁷ le Simɛnyɔ we akɔta mɛ, ɛgbɛtɔ akpo weve; le Levi we akɔta mɛ, ɛgbɛtɔ akpo weve; Isaka we akɔta mɛ, ɛgbɛtɔ akpo weve; le ⁸ Zabulɔn we akɔta mɛ, ɛgbɛtɔ akpo weve; le Jozɛfu we akɔta mɛ, ɛgbɛtɔ akpo weve; le Bejamɛ we akɔta mɛ, ɛgbɛtɔ akpo weve. Ɛmɛ bi sese wu wɛ ye ɖo josi. ⁹ Exin va yi, ko kpɔn ɛgbɛtɔ ahwankpɔ ɖe, ke ɛmɛti hɔn kpewu na xlɛ, ye sɔn otogun ɖekpokpwe mɛ, akɔta ɖekpokpwe mɛ, oto ɖekpokpwe mɛ, bo sɔn ogbe ɖekpokpwe mɛ. Ye bo le ote le xɔluzinkpwe lɔ we ŋukɔn, bo le ŋukɔn na lɛngbɔvi lɔ. Ye do awugaga owe pepepe, ye bo hɛn ɛdemaye do asi. ¹⁰ Ye bo do axwa nɔ hoo bo lɔ tun byo:« Hwlɛngan sɔn Mawu míatɔn ke xlɔn onyi le xɔluzinkpwe lɔ ji kpo lɛngbɔvi lɔ kɔn!» ¹¹ Ɛwɛndotɔye bi bo lɛdo xɔluzinkpwe lɔ, bo lɛdo ɛmɛhyɔn lɛye kpo nou le ɛgbɛ ɛnɛ lɛye. Ye bo cɔn ŋumɛ'nyi le ŋukɔn na xɔluzinkpwe lɔ, bo sɛn Mawu nɔ, ¹² bo lɔ nɔ tun byo:« Ami! kanfun kpo gigo, onunyinyɔ, ɛkpɛdido, sisi, hɔnhlɔn, kpo ɛcɛ wɛ nyi Mawu míatɔn tɔn, sɔn mavɔ do yi mavɔ! Ami!» ¹³ Iwɛ ɛmɛhyɔn lɛye ɖokpo kan-a se tun byo: « Ɛme ke do awugaga owe pepepe lɛye, ɛmɛ nɛ lɛ ye nyi? Fye lɛ ye sɔn?» ¹⁴ Ko bo ɖo ewu ni-i tun byo: « Ɛmɛɖaxo tɛye nyi wɛ nywɛ ma!» E bo lɔ na-a tun byo: « Ye wɛ nyi ɛmɛ ke gbɔn ofunkpikpe ɖaxo lɔ mɛ ye; ye nya awugaga yetɔnye, le Lɛngbɔvi lɔ we ɛhun mɛ, awu lɛye bo we. ¹⁵ Iwɛ dɔn ye do le Mawu xɔluzinkpwe lɔ we ŋukɔn, ye bo nɔ sɛn-ɛ nɔ okle kpo ozan le oxwé etɔn gbe. Ɛmɛ ke xlɔn onyi le xɔluzinkpwe ji, na cɔn alɔ ye ji. ¹⁶ Xɔvɛ hɔn mɔ ci ye nɔ, kɔmyɔ ko mɔ ci ye nɔ; ohwe hɔn mɔ ɖu ye nɔ kpɔn gbeɖe, ozo ko mɔ ji ye. ¹⁷ Ɖo lɛngbɔvi ke le xɔluzinkpwe lɔ we dodomɛ na nyi kplɔtɔ ye tɔn, e bo na kplɔ ye do yi ɛgbɛsin we jɔtyɔn kɔn. Mawu bo na tutu ɖasin yetɔnye le ŋumɛ na ye.»