¹ Exin godo, ko kpɔn lɛngbɔvi lɔ, e bo fo jisido tantyɛn yɔn lɔ. Le onu le ɛgbɛ ɛnɛ lɛye mɛ, ko ɖokpo do axwa ɖi oju wɛ do ogbe ha, bo lɔ tun byo: « Va!» ² I wɛ ko kpɔn osɔ owe pepe ɖe. Ɛmɛ ke le osɔ lɔ ji, bo hɛn odà, ye bo na xɔlu ɖe wi e bo jɛ ɖi ɛmɛ ke ɖu oji ha, e bo na ɖu oji. ³ Kena e fon josido owegɔ lɔ, ko se onu le ɛgbɛ owegɔ lɔ tun byo: « Va!» ⁴ I wɛ osɔ bu ove cɛcɛcɛ ɖe tɔn ɛmɛ ke xɛ eji lɔ, ya na ɛce wu-i ni a do de fifa tɛ le nyidan lɔ ji, exin ɛgbɛ mɔ do gbo ohlo na ye nɔnyɔye. Ye bo sɔ kunmɛhwi ɖaxo ɖe sɔ ni-i. ⁶ Ke e fo josido atɔngɔ lɔ, onu le ɛgbɛ atɔngɔ lɔ tun byo: « Va!» I wɛ ko kpo osɔ owi ɖe. Ɛmɛ ke le xɛ eji lɔ bo hɛn onudaga ɖe do alɔ mɛ. ⁵ Ko bo se onu ɖe, ɖi ogbe ɖe ha, ke ɖi sɔn onu le ɛgbɛ ɛnɛ lɛye we dodomɛ, bo lɔ nɔ byo:« Ye na sɔ onyihinhɔn blebu ɖokpo we odan ho a do xɔ mɔlu onudagan ɖokpo gee, a bo sɔ onyihinhɔn blebu ɖokpo we odan ho, a bo sɔ yɛvo agban atɔn gee. Vɔ, ka ɖo alɔ ami kpo vin wu.» ⁷ Ke e fo jisido ɛnɛgɔ lɔ, ko se onu le ɛgbɛ ɛnɛgɔ lɔ we ogbe, e lɔ byo:« Va! » ⁸ Kpoŋu, ko bo kpo osɔ amamu ɖe. Ɛmɛ ke xɛ eji lɔ we nyikɔ bo nyi oku, okutomɛ bo xodo-e. Ye bo na ye ɛcɛ do nyixɔ lɔ we mado ɛnɛ ji, na ye a sɔ dɛnkpwe, xovɛ, adokwinye, kpo kanlin ajanɔye a do hu ɛmɛye le nyidan lɔ ji. ⁹ Ke e fo jisido atungɔ lɔ, ko kpɔn ɛmɛ ke ye hu do Mawu we oxo lɔ, kpo kunnu ke ye ɖe do oxo lɔ wu ye we okl. Okla lɛye bo le avɔsinsan we agba lɔ gɔ. ¹⁰ Ye bo do axwa gbogbo nɔ, tun byo: « Xwetɔ kinkwɛn oxojototɔ! gbɔɔn do jɛ hwenɛnu lɛ o na nɔ ete na, gbɔxwe a do ɖɔ ɛhwɛ na nyidan ji tɔ ye na mí, a bo do ɖe ohlɔn do mía nu do ɛhun míatɔn ke ye kɔn ɖo inyi wu?» ¹¹ Ye bo na awugaga owe pepepe ɖe wu ɖokpo-ɖokpo yetɔnye bi, ye bo lɔ na ye tun ye ni mɔ mɔ̀ tre na azan oviiɖe gbɔɔn do jɛ hwekenu na ye hatɔ odan sɔviye kpo ye nɔvyɔ, kena ye ɖo na va hu ɖi ye ha ye, we xixlɛ a sɔgbe. ¹² Ke na e fo josido atrekpogɔ lɔ, onu ke ko kpɔn xɛn nyi eke: Nyixɔ hunuhun taŋu. Ohwe bo ci, bo trɔ zun onu owi ɖi lutuvɔ ha, osun lɔ blebu bo trɔ ove ɖi ɛhun ha. ¹³ Sunhweviye bo flɛ jɛ nyixɔ ji nɔ sɔn jiŋukunsin, ɖi kena tinkun afanye nɔ flɛ nɔ ɖo ha le otin ke jɛhɔn ɖaxo do owe na nɔ ji. ¹⁴ Jiŋukunsin bo xa eɖe tɛ ɖi ke ye nɔ xa ojyɛn ɖo ha, ye bo ɖe oso bi kpo oto ke le otɔ dodomɛ bi seŋu tɛ le tɛnxo yetɔnye. ¹⁵ Xɔlu nyidan ji tɔnye, ogaye, sɔjagaye, dɔkunnɔye, hɔnhlɔnnɔye gbɔɔn do jɛ ɛmɛ gbokpweye bi seŋu ji, ɛmɛ xixɔye o, ɛmɛ le yeɖesiye o, ye vɔ́ bi bo va yi bɛ do ogun ke le ɛkpɛn ɖaxo-ɖaxo ye mɛ, kpo ɛkpɛn ɖaxo-ɖaxoye ji le osoye mɛ. ¹⁶ Ye bo lɔ na oso lɛye kpo ɛkpɛn lɛye tun byo: « mi hɔ jɛ mia ji, mi sɔ mi sɔ hwla do ɛmɛ ke xinnɔ onyi le xɔluzinkpwe lɔ ji na mia a do si na lɛn gbɔvi lɔ we aɖi dido. ¹⁷ Ɖo aɖi dido yetɔn we azan ɖaxo lɔ va; ɛmɛ enɛ lɛ na nɔ ete le e nu?»