¹ Exin gogo, ko kpɔn wema ɖe le aɖusilɔ mɛ na ɛmɛ ke xlɔn onyi le xɔluzinkpwe lɔ ji. Ye wlan onu do dɔme kpo goto na wema lɔ, bo trɛ kpo josido acowe. ² Ko bo mɔ kpɔn Mawu we ɛwɛndotɔ hɔnhlɔn nɔ ɖe e bo lɔ nɔ kpo axwa gbogbo tunbyo: « Ɛmɛ nɛ lɛ jɛ bo na fo josido lɛye tɛ, a bo hun wema lɔ?» ^{3 4 5} Vɔ ɛmɛti hɔn le, le nyixɔ ji, le jiŋukunsin gbɔn do yi nyixɔ gɔ, bo na kpewu hun wema lɔ, a bo kpɔn emɛ. Ko vi avi taŋu, ɖo ɛmɛti hɔn jɛ bo na hun wema lɔ, gbɔn na do kpɔn emɛ can. Vɔ le ɛmɛhyɔn lɛye mɛ, ɛmɛ ɖokpo lɔna tun byo:«ka mɔ vi avi. kpɔn! kinnikinni ajaŋuta akɔta Juda tɔn, jijimɛvi xɔlu Davidi tɔn lɔ, ɖu oji a do fo jisido acowe lɛye a bo hun wema lɔ.» ⁶ I wɛ ko kpɔn lɛngbɔvi ɖe e bo le ɖi hu wɛ ye hu-i ha, e bo le ote le xɔluzinkpwe lɔ we dodomɛ, onu le ɛgbɛ ɛnɛ lɛye kpo ɛmɛhyɔn lɛye bo trɔ do-e. E bo ɖo azo acowe, ŋukunsin acowe, ke gbigbɔ nyi acowe Mawu tɔn ke ye sɔ ɖodan nyidan lɔ bi jin ye. ⁷ E va yi wema lɔ le aɖusilɔ mɛ na ɛmɛ ke xlɔn onyi le xɔluzinkpwe lɔ ji. ⁸ Kena e yi wema lɔ, onu le ɛgbɛ ɛnɛ lɛye kpo ɛmɛhyɔn oko ŋukun ɛnɛ lɛye do onu do na lɛngbɔvi lɔ. Ɖokpo-ɖokpo yetɔn bo hɛn onuxonu okannɔ, bo mɔ hɛn sika kɔfoye ke gɔ kpo zruya, ye wɛ nyi xɔsetɔye we ɛɖɛ xixoye. ⁹ Ye bo ji ohan yɔyɔ ɖe nɔ tun byo: I wɛ jɛ bo na do yi, bo na do fo jisido lɛye tɛ! Ɖo i wɛ ye hu. O bo sɔ ehun tɔwe do xɔ ɛgbɛtɔye bi seŋu na Mawu, o xɔ ye sɔn akɔta ɖekpokpwe mɛ, ogbe ɖekpokpwe mɛ, oto ɖekpokpwe mɛ, otogun ɖekpokpwe. ¹⁰ O na na ye trɔzu xɔluye we otogun kpo avɔsantɔye na Mawu miatɔn. Ye bo na xɔ ɖu xɔlu do nyixɔ lɔ ji. ¹¹ Ko na kpɔn kpoŋu, ko se ɛwɛndotɔ Mawu tɔn ye susu geɖe-geɖe we ogbe. Ye na yi akpo nɛmu-nɛmu ɖe, zahwanhyɔn nɛmu-nɛmu ɖe; ye bo lɛdo xɔluzinkpwe lɔ kpo onu le ɛgbɛ lɛye, kpo ɛmɛhyɔn lɛye. ¹² Ye bo ji ohan nɔ kpo axwa lelele tun byo: lɛngbɔvi ke ye hu lɔ wɛ jɛ na yi hɔnhlɔn, dokun, onunyinyɔ, ɛcɛ, bubu, gigo kpo kanfu.» ¹³ Ko bo mɔ se onu ke Mawu ɖo ye bi sese, ke le jiŋukunsinye, ke le nyixɔ ji ye, ke le nyidan gɔ ye kpo ke ɛxu mɛ ye, onu le ɛgbɛ bi sese ke gbɛ le ɛgbɛ lɔ mɛ ye bo ji ohan nɔ tun byo: kanfun, bubu, gigo kpo ɛcɛ wɛ nyi ɛmɛ ke xinnɔ onyi le xɔluzinkpwe lɔ ji, kpo lɛngbɔvi lɔ tɔn sɔn mavɔ do mavɔ. ¹⁴ Onu le ɛgbɛ ɛnɛ lɛye bo yi ogbe nɔ tun byo: « Ami!» Ɛmɛhyɔn lɛye bo jɛ klita bo do onu do.