¹ «Wlan wema ɖodan ɛwɛndotɔ Saadi we agun tɔn byo: oxo ke ɛmɛ ke ɖo Mawu gbigbɔ acowe lɛye, kpo sunhwevi acowe lɛye lɔ xɛn: ko nyɔ odan tɔwe, ko bo nywɛ tun ye nɔ sɔ we do ɛmɛ ke le ɛgbɛ vɔ o ku. ² Fɔn, a bo do hɔnhlɔn onu ke drɔn na we bo mɔ ba ku nɔ ye, ɖo ko kpɔn tun odan tɔwe lɛye hɔn sɔgbe le Mawu tɛye we ŋumɛ. ^{3 4} Ɖoŋu do okplan ke o se bo yi wu. zɔn gbɔn eji a bo ɖɔli jijɔ. Na hɔn nɔ ŋuzɔn, ko na va ɖi ajotɔ ha, o ko na nyo ogan ke mɛ na ko na va cɔ we do. Ganke ko ɖo ɛmɛ ɖeye le Saadi lɔ, ye ko doɖyu awu yetɔnye. Ɛmɛ xin lɛye wɛ nyi ɛmɛ ke jɛ na do xodo-o ye, kpo awu owe pepepe le okɔ. ⁵ Exin, ɛmɛ ke na oji, awu owe wɛ e na do. Ko hɔn tutu nyikɔ etɔn tɛ nɔ kpɔn gbeɖe le ɛgbɛ wema lɔ mɛ. Ko na nywɛ tun ɛmɛ tɛye mwɛ e mɔ nyi le didaye kpo kpo ɛwɛn do tɔ etɔnye we ŋukɔn. ⁶ Ɛmɛ ke ɖo otó ni se onu ke gbigbɔ lɔ o lɔ na agunye nɔ.» ⁷ «Wlan wema ɖodan ɛwɛndotɔ Filadɛfi we agun tɔn tun byo: ɛmɛ kinkwɛn, oxojolɔtɔ, ɛmɛ ke si na Davidi we cavi lɔ le, na e hu ohɔn, ɛmɛti hɔn mɔ nɔ kpewu nɔ tu-i, na e tu ohɔn, ɛmɛti hɔn nɔ kpewu nɔ hun-i, e o lɔ tun: ⁸ ko nyɔ odan towe ye kpɔn, ko hun ohɔn ɖo do ŋukɔn na we, ɛmɛti ko kpewu na tu-i; ɖo hɔhlɔn oviiɖe wɛ le wu we, ganke o bo zɔn gbɔn oxo tɛye ji, o ko gbɛ-ɔ. ⁹ Ye'mɛ ojokantɔye, ke le Satana we gbɛta lɔ mɛ ye, bo nɔ yɔ yeɖɛ nɔ tun jwifuye, ganke ye ko nɔ wa onu ɖi jwifuye ha; ko na sɔ ye sɔ do alɔ mɛ na we. Ko na na na ye na va jɛ klita le akɔnmɛ na we, ye mɔ do nywɛ byo bo mɔ yi owan na we. ¹⁰ Ɖo, oxo ke ko lɔ na we tun i mɔ do vivɛnu o hɛn e wu. Bo tete can, ko na hɛn we ɖo ote le didokpɔn we ogan ke gbɔn nɔ ɛgbɛ lɔ bi ji nɔ mɛ, e bo na nyi didokpɔn na ɛmɛ ke le nyidan ji ye. ¹¹ Ko gbɔn zaanɖɛ. Hɛn onu ke le asi na we wu nywɛɖe, na ɛmɛ ɖe ni ká yi xɔlugba tɔwe. ¹² Ɛmɛ ke do oji, ko na sɔ-ɛ do wasi goundo le Mawu tɛye we xwegbe, e ko mɔ tɔn le emɛ nɔ kpɔn gbeɖe. Ko na wlan Mawu tɛye we nyikɔ do e wu a bo wlann Mawu tɛye we toxo we nyikɔ can do e wu, (toxo ke Jeruzalɛmu yɔyɔ lɔ, ke jɛ ote sɔn sɛxwe, sɔn Mawu tɛye de), ko na mɔ wlan nyikɔ yɔyɔ tɛye can do e wu. ¹³ Ɛmɛ ke ɖo oto, ni se oxo kena gbbigbɔ lɔ o lɔ na agunye nɔ.» ¹⁴ « Wlan wema ɖodan ɛwɛndotɔ Lawodise we agun tɔn tun byo: oxo ke ɛmɛ Ami, kunnuɖetɔ ogbejinɔtɔ, oxojototɔ, bo nyi onu ɖekpokpwe ke Mawu wasi we jɔtɔ lɔ xɛn: ¹⁵ ko nyɔ odan tɔwe ye: o hɔn fa, o ko hunzo. Na o do fa alɔ o do hunzo wɛ, e na nyɔ! ¹⁶ Vɔ ke e nyi tun gblɔ wɛ ogblɔ, o ko hunzo o ko mɔ fa, ko na tun we, le onu tɛye mɛ. ¹⁷ Ɖo, o lɔ nɔ tun byo: ko jɛ dokun, dokunnu le sye onuti hɔn dɛn-ɔ. Vɔ o ko nywɛ tun, ɛmɛ ke onu ɖe hɔn nyɔkan, doŋuɖunu, ayanɔ ŋuvanɔ kpo ɛmɛ ke le govɛ wɛ o nyi. ¹⁸ I wɛ dɔn, susu ke ko ɖe na we nɔ xɛn: va xɔ sika ke ye do ozo mɛ, oɖyu ti ko mɔ le emɛ le kɔn ye, naa do nyi dokunnɔ xojoxo tɔn. Va xɔ awu owe pepepe na do, na govɛ we ŋunya ko mɔ na do wa we, a bo xɔ ŋukunsintinkɛn a do ŋukunsin tɔwe ye ji na kpɔn onu. ¹⁹ Ɛmɛ ke ko yi owan na bi seseye ko nɔ gbɛ onu na ye, a bo dɔn oto na ye. Exin wu, bizo, a bo ɖɔli jijɔ! ²⁰ Ɖo'to, ko le ohɔn ji bo xuxu-i nɔ, na ɛmɛ ɖe se ogbe tɛye bo hun ohɔn lɔ na, ko na ɖyɛ emɛ le e kɔn. Ko na ɖu onu kpwe, i can bo na ɖu onu kpo. ²¹ Ɛmɛ ke na ɖu oji, ko na ɛcɛ wi e mɔ do xlɔn onyi kpo le xɔluzinkpwe tɛye ji; ɖi ke bo can ko ɖu oji, bo xlɔn onyi kpo didaye le xɔluzinkpwe etɔn ji ɖo ha. ²² Ɛmɛ ke ɖo oto ni se onu ke gbigbɔ lɔ o lɔ na agunye nɔ!»