¹ Wlan wema ke ɖodan ɛwɛndotɔ Efɛzu we agun tɔn tun byɔ: oxo ke ɛmɛ ke hɛn sunhwevi acowe lɛye do aɖusilɔ etɔn mɛ bo zɔn zɔnlin nɔ gbɔn sikazogbɛnhɛntin acowe lɛye we dodomɛ nɔ, lɔ xɛn: ² Ko nyɔ odan tɔwe ye bo nyɔ gbagba ke o jɛ nɔ ye, vivɛnu dido tɔweye. Ko bo nywɛ tun i mɔ hɔn nɔ lwɔn danuwatɔye we oxo. Ɛmɛ ke hɔn nyi ɛmɛ dindɔ́nye, vɔ, bo nɔ yɔ yeɖe nɔ tun ɛmɛ dindɔ́n tɛye o do ye kpɔn bo kpɔn tun ojo kantɔye mwɛ ye mɔ nyi. ³ O nɔ do vivɛnu, o ɖu aya do nyikɔ tɛye lɔ wu, ganke lanmɛ ko nɔ ku we. ⁴ Vɔ onu tɔwe ke vɛ le wuye, wɛ nyi tun: o hɔn mɔ yi owan na-a ɖi kena o yi owan ɖo sɔn do jɛ ha. ⁵ I wɛ dɔn, ɖoŋu do ofi kena o jɛ onyi le lɔwu. Ɖɔli jijɔ, a mɔ jɛ onu kena o nɔ wasi sɔn sa xoxo lɛye wiwa si ji. Na e hɔn e mɔ, ko na va kɔn we, a bo ɖe sikazogbɛnhɛntin tɔwe tɛ le tɛnxo etɔn, a davo o ɖɔli jijɔ. ⁶ Ganke onu ɖe le, o bo nɔ wasi, e bo jɛŋu na-a, i wɛ nyi tun, o gbɛ owan na onu ke ɛmɛ ke le Nikola we ogbɛta mɛ ye nɔ wasi, ɖi ke na bo can ko gbɛ owan na ɖo ha.» « ⁷ Na ɛmɛ ke ɖo otó ni se onu ke na gbigbɔ lɔ o lɔ na agouye nɔ. E lɔ tun byo: ɛmɛ ka na ɖu oji ko na ni-i ɛgbɛ we otin lɔ we sinsɛn ke le Mawu we ɛjikpa lɔ mɛ, na ni a ɖu.» ⁸ « Wlan wema ɖodan ɛwɛndotɔ tiyati we agun tɔn, tun byo: oxo ke ɛmɛ ke nyi tantyɛn kpo kpotwi, ɛmɛ kee ku sa, bo mɔ trɔ va ɛgbɛ lɔ xɛn: ⁹ ko nyɔ vivɛ sise tɔwe, bo nywɛ tun o hɔn ɖo onu ti co ganke dokunnɔ wɛ onyi. ɛmɛ ke nɔ yɔ yeɖe tun Jwifuye vɔ ye ko nɔ wa onu ɖi Jwifuye ha, ko acɔn ke ye kɔn do wu we nɔ ye. Santana we ogbɛta wɛ ye nyi. ¹⁰ Bo ká aya ke o ba ɖu nɔ lɔ. Mi kpɔn! Lɛgba na sɔ ɛmɛ ɖeye le mia mɛ, a sɔ flɛn do ogankpa mɛ, a do do mi kpɔn. Ye na ɖe ofun na mi na nyihinhɔn owo. Nɔ ogbeji gbɔɔn do yio oku, na ma na we xɔlugba ɛgbɛ tɔn.» ¹¹ Na ɛmɛ ke ɖo oto ni se onu ke gbigbɔ lɔ o lɔ na agunye nɔ. e lɔ tun byo ɛmɛ ke nà ɖu oji hɔn mɔ ku oku owegɔ lɔ nɔ. ¹² «Wlan wema ɖodan ɛwɛndotɔ Pɛgamu we agun tɔn, tun byo: oxo ke ɛmɛ ke hɛn dɛnkpwe ɖiɖa onu owe lɔ, lɔ xɛn: ¹³ ko nyɔ ofi ke o nɔ nɔ lɔ nywɛɖe; blɛ lɔ wɛ satana we xɔluzinpwe le. Vɔ o bo hɛn nyikɔ tɛye wu sinsyɔn, o ko gbɛ xɔse ke o ɖo do ji ye lɔ. Ye hu Antipasi kunnuɖetɔ ogbejinɔtɔ tɛye le mia kɔn, ofi ke Satana ɖo nɔtyɔn do lɔ ganke le hwexin lɔ nu, o ko gbyo. ¹⁴ E le emɔ co ganke, onu tɔwe ɖeye bo vɛ le wu ye nɔ. Ɛmɛ ɖeye le mia mɛ bo tɛdo onukpinkplan Balamu tɔn wu. E lɔ lɔ wɛ kplan Balaki sa kena e na trɛ omɔ na Irayeli vikpɛye ɖo, na ye a do ɖu olan ke ye do san avɔ na yehweye, a bo mɔ zan ɛgbɛ ɖuɖyu. ¹⁵ E mɔ ha ke, i can, o ɖo ɛmɛ ɖeye, ye bo tɛdo Nikola we onukpinkplan wu. ¹⁶ E xin wu, bo ɖɔli jijɔ, na o hɔn ɖɔli jijɔ ko va kɔwe zaanɖe a bo wa ahwan kpaŋu ɛmɛ lɛyɛ kpo dɛnkpwe ke le onu mɛ na.» ¹⁷ Na ɛmɛ ɖe ɖo oto ni se onu kena gbigbɔ lɔ o lɔ na agunye nɔ. E lɔ byo: « ɛmɛ ke na ɖu oji, ko na ni-i ke le hwihwla, kpo ɛkpɛn owe pepepe ke ji na ye wlan nyikɔ yɔyɔ do, nyikɔ ɛmɛ ti hɔn nyɔ zɛ gbɔn ɛmɛ kena yi ɛkpɛn lɔ wu. ¹⁸ « Wlan wema ɖodan ɛwɛndotɔ tiyati we agun tɔn, tun byo: oxo ke Mawu we vi ke we ŋukunsin o klɛn nɔ ɖi ozo ha, afɔ etɔn o da ozo nɔ ɖi oganve ke ɖiɖi do goto ha lɔ xɛn: ¹⁹ Ko nyɔ odan tɔwe ye, owannyinyi tɔwe, xɔse tɔwe, odan wiwa tɔwe kpo vivɛnu dido tɔwe. Ko nywɛ nywɛɖe tun odan ke o wasi syɛye su hugan ke na o wasi sɔn dojɛ gbɔn ye. ²⁰ Ganke, onu tɔwe ɖe bo vɛ le wu ye nɔ: Nyɔnu Jezabɛli xin ke yɔ eɖe nɔ tun ogbeɖotɔ, o jo-e do, e bo flu odan sɔvi tɛye nɔ do gbɔn okplan ke e na ye nɔ tun ye mɔɔ zan ɛgbɛ ɖuɖyu, a bo ɖu olan ke ye do san avɔ na yehweye xɛn xin. ²¹ Ko ni-i ogan mɛ ɖe, ni a do ɖɔli jijɔ, ganke e hɔn jro na lɛkɔ le ɛgbɛ ɖuɖyu zinzan etɔn lɔ tɛ. ²² I we dɔn, ko na na vivɛ sise ɖaxo ɖe na tɛ-ɛ do ojyɛn ji, i kpo ɛmɛ ke kpo nɔ do afɔ ogbe nɔ lɛye. Adavo ye lɛkɔ le onu wiwa e mɔ ha tɔn ye tɛ. ²³ Ko na hu vikpɛ etɔye, i xin agun bi sese mɔ do nywɛ tun bo wɛ nyi ɛmɛ ke na nɔ gbeje ayixaye kpo ojloye kpɔn. Ko bo na tu odan ke ɖokpo-ɖokpo miatɔn o wa nɔ ye we axɔ na ye. ²⁴ Vɔ miye, mi ɛmɛ bi ke le agun Tiyatii tɔn mɛ ye, bo gbɛ zinzɔn gbɔn onu kpinkplan agɔgwɛ etɔn lɔji ye, ye ko yi okplan ke ye o yɔ nɔ tun: ''Satana we onu hwihwla'', blɔ ko lɔ na mi nɔ tun byo: ko hɔn do agban bu kpe-e na mi nɔ. ²⁵ Vɔ, onu ke mi ɖo mi hɛn e wu sinsyɔn gbɔɔn do jɛ hwekenu na ko na va. ²⁶ Ɛmɛ ke na ɖu oji, a bo wa odan tɛye gbɔn do yi vivɔnu, ko na ni-i otogunye ji. ²⁷ E na kpa ɛcɛ na ye, ɛcɛ kpikpa etɔn bo na syɛnxu ɖi gankpo ha, e bo na gba ye, ɖi kena ye nɔ gba okɔzin ɖo ha, ²⁸ emɔ ha ke wɛ bo ko yi ɛcɛ sɔn didaye si ɖo. Ko na mɔ ni-i sunhwevi keklenu tɔn. ²⁹ Ɛmɛ ke ɖo oto ni se onu ke gbigbɔ lɔ o lɔ na agunye nɔ.»