¹ I wɛ ko kpɔn jiŋukunsin yɔyɔ kpo nyidan yɔyɔ, ɖo jiŋukunsin tantyɛn lɔ kpo nyixɔ tantyɛn lɔ bu, ɛxu can ko mɔ le. ² Ko mɔ kpɔn toxo kinkwɛn lɔ, Jeruzalɛmu yɔyɔ lɔ, e bo jɛ ote sɔn sexwe le Mawu de. E le ogbe sisɔ ɖi nyɔnu ke jraɖo nywɛɖe a do va yi kpe oswɔ ha. ³ Ko se ogbe sinsyɛnxu ɖe ɖi sɔn xɔluzinkpwe lɔ mɛ bo lɔ nɔ tun byo:«Syɛ Mawu we nɔtyɔn le ɛgbɛtɔye mɛ, e na nɔ ye mɛ ye mɔ ,nyi otogun etɔnye, Mawu tete bo na le kpo ye a bo nyi Mawu yetɔn. ⁴ E na tutu ɖasinye bi le ŋumɛ na ye, oku hɔn mɔ le nɔ, lutu hɔn mɔ le nɔ, gbɔɔn na axwa dido, vivɛ sise do le nɔ can, ɖo onu tantyɛn tɔn lɛye bu.» ⁵ I wɛ ɛmɛ ke xlɔn onyi le xɔluzinkpwe lɔ ji lɔ tun byo: «Syɛ, ko sɔ onu bi do wasi yɔyɔ nɔ.» I wɛ lɔ na-a tun byo:« wlan, ɖo oxo xinlɛye nyi oxojɔxo na kandeji.» ⁶ E bo lɔ na tun byo:«E sɔgbe bo wɛ nyi Alufa bo mɔ nyi Omɛga, bibɛnu kpo vivɔnu. Ɛmɛ ke kɔmyɔ o ci nɔ, ko na na ɛsin ke sɔn ɛgbɛ'sin we jɔtyɔn wu-i vɔvɔ. ⁷ Onunina xin lɔ wɛ na nyi ɛme ke na ɖu oji tɔn; ko na nyi Mawu etɔn i can mɔ nyi ovi tɛye. ⁸ Vɔ ojimadotɔye, ogbeji ma nɔ tɔye, onu xyɛwu wa tɔye, ɛmɛhutɔye agalɛtɔye, azetɔye, yehwesɛntɔye, ojokantɔye, bi sese nɔtyɔn yetɔn le hwemi we ozo hɛhɛhɛ ke hɔn nɔ ci lɔ mɛ. I wɛ nyi oku owegɔ lɔ.» ⁹ I wɛ le Mawu we ɛwɛndotɔ acowe ke hɛn kɔfo acowe keye gɔ kpo ofun kpikpe kpotwi acowe leye mɛ, ɖokpo va lɔ na tun byo: «Va, na ma sɔ nyɔnu lɔ, lɛngbɔvi lɔ osyɔ sɔ xlɛ we.» ¹⁰ Gbigbɔ kinkwɛn lɔ jɛ jiye Mawu we ɛwɛndotɔ lɔ bo kɔ-ɔ do yi oso ɖaxo kikɔ ɖe ji, e bo sɔ toxo kinkwɛn lɔ, Jeruzalɛmu ke jɛ ote nɔ sɔn sɛxwe Mawu kɔn lɔ sɔ xlɔ-ɔ. ¹¹ E bo klɛn nɔ gbɔn Mawu we gigo mɛ, kinklɛn etɔn le ɖi ɛkpɛn oho vivɛ tɔn ha, e le ɖi ɛkpɛn ke na ye nɔ yɔ byo jasipu ha bo kɔn ceɖe-ceɖe di klisitalikpɛn ha. ¹² E ɖo odokpa ɖaxo ke kɔ yi oji ɖe. E ɖo agbo weve, Mawu we ɛwɛndotɔ weve bo le agbo lɛye ji. Ye bo wlan akɔta weve Irayɛli vikpɛye tɔn we nyikɔ ye do agbo lɛye ji. ¹³ Agbo atɔn le hwezɛdo, atɔn le otagbe, atɔn le afɔgbe, atɔn bo le hweyixɔ. ¹⁴ Toxo lɔ we adokpa ɖo dodwe weve; lɛngbɔvi we ɛmɛdin weve lɛye we nyikɔye bo le ye ji. ¹⁵ Onujrɛnu le alɔ mɛ na Mawu we ɛwɛndotɔ ke lɔ oxo kpo-o nɔ lɔ, okɔn sika tɔn wɛ ye na do jrɛ toxo lɔ, agbo etɔnye kpo adokpa etɔn lɔ. ¹⁶ Toxo lɔ ɖo ŋumɛ gbeswɛ, gigame etɔn sɔgbe kpo kpolimɛ etɔn. E jrɛ toxo lɔ kpo okɔn lɔ. Ojrɛ lɔ bo yi ɛkpɛntin okpo weve (12.OOO) ha. Gigagamɛ, kpolimɛ kpo temɛ etɔn bo sɔgbe. ¹⁷ E jra adokpa lɔ we temɛ. Ojrɛ lɔ bo yi abɔ sandi ɖokpo ota ɛnɛ ŋukun ɛnɛ (144) ha. Ojrɛ kena gbɛtɔye nɔ zan wɛ, e bo sɔgbe ɛwɛndotɔ lɔ we ojrɛ ji. ¹⁸ Jasipu we ɛkpɛn wɛ ye do wasi ado lɔ, toxo lɔ tete bo nyi sika tete ŋutɔ bo kɔn ceɖe-ceɖe ɖi nukpwɛn ha ¹⁹ .Ye sɔ ɛkpɛn nywɛ-nywɛ hamɛ-hamɛye do ɖo acɔ na adokpa toxo lɔ tɔn we dodweye. Dodwe tantyɛntɔn we ɛkpɛn bo nyi jasipu, owegɔ we ɛkpɛn bo nyi safi, atɔngɔ we ɛkpɛn bo nyi kalisedwanu, ɛnɛgɔ we ɛkpɛn bo nyi emɛlodu, ²⁰ atungɔ we ɛkpɛn bo nyi sadonisi, atrekpogɔ we ɛkpɛn bo nyi sadwanu, acowegɔ we ɛkpɛn bo nyi klizoliti, atrotɔngɔ we ɛkpɛn bo nyi Beliti, acɛnnɛgɔ we ɛkpɛn bo nyi topazi, owogɔ we ɛkpɛn bo nyi klisoplazi, weɖokpogɔ we ɛkpɛn bo nyi yasɛnti, wevegɔ we ɛkpɛn bo nyi amɛtisi. ²¹ Jɛnu weve wɛ ye do wasi agbo weve lɛye, jɛnu ɖokpo ge wɛ ye do wasi agbo ɖokpo. Sika tete wɛ ye do wasi toxo lɔ omɔ ɖaxo lɔ, e bo kɔn ceɖe-ceɖe ɖi nukpwɛn ha. ²² Ko hɔn kpɔn sinsenxɔ ɖe le toxo lɔ mɛ, ɖo, Mawu Xwetɔ lɔ, Mawu hɔnhlɔn bi sese we otɔ lɔ, kpo lɛngbɔvi lɔ wɛ nyi toxo lɔ we sinsɛnxɔ. ²³ Toxo la hɔn hyan ohwe a lo osun we kinklɛn, ɖo Mawu we gigo we nɔ klɛn do ɛmɛ, lɛngbɔvi lɔ zogbɛn etɔn. ²⁴ Kinklɛn etɔn nu wɛ otogunye na va zɔn zɔnli le, nyixɔ ji we xɔluye bo na hɛn dɔkun yetɔnye va ɛmɛ. ²⁵ Toxo lɔ we agboye na le hunhun le kiklo, ye hɔn mɔ tu ye nɔ kpɔn gbeɖe ɖo ozan hɔn mɔ le nɔ. ²⁶ Ye na sɔ otogunye we acɔɖonu kpo dɔkun yetɔnye va ɛmɛ. ²⁷ Onuɖuɖyu ti hɔn ɖyɛ e mɛ nɔ, ŋunyanuwatɔye kpo ojokantɔye ti ko ɖyɛ ɛmɛ nɔ, vɔ ɛmɛ kena ye wlan nyikɔ yetɔn do lɛngbɔvi lɔ we ɛgbɛ wema mɛ ye jan wɛ na dyɛ e mɛ.