¹ Exin godo, ko kpɔn Mawu we ɛwɛndotɔ ke jɛ ote sɔn sɛxwe nɔ kpo cavi vivɛ sese we ogun ma ɖo dogbo lɔ tɔn kpo caba ɖaxo ɖe le alɔ mɛ. ² E wle dragɔn lɔ, odan xixo, ke nyi lɛgba satana lɔ, e bo do caba ni-i na oxwe akpo ɖokpo (1000). ³ E sɔ-ɛ sɔ flɛn do vivɛsise we ogun ɖaxo maɖodo lɔ mɛ, bo tu-i kpo cavi lɔ bo do ogan mɛ e ko mɔ do blɛ otoguye ɖu nɔ gbɔɔn do yi oxwe akpon ɖokpo (1000) lɔ we vivɔnu, exin godo ye mɔ na mɔ jo-e do na azan oviiɖe. ⁴ Bɔ ewu, ko kpɔn xɔluzinkpweye. Ɛmɛ ke xlɔn onyi le ye ji ye, ye na ye ɛcɛ na ye a do ɖɔ, ɛhwɛ. Ko bo mɔ kpɔn ɛmɛ ke na ye gbo ota na ye we okla, do kunnu kena ye ɖe na Yesu kpo Mawu we oxo lɔ wu. I wɛ ko mɔ kpɔn ɛmɛ kena hɔn sɛn kanlin lɔ gbɔn do sɛn onutita etɔn lɛye, ye ko yi josi lɔ do ŋukɔnnu alo alɔ wu. Ye gbɔn va ɛgbɛ seŋu, bo ɖu xɔlu kpo Klisi lɔ na oxwe akpo ɖokpo ( 1000). ⁵ I wɛ nyi finfɔn sɔn oku tantyɛn tɔn lɔ.

Ɛmɛ kuku gbokpweye hɔn gbɔn va ɛgbɛ nɔ gbɔɔn do yi hwekena oxwe akpo ɖokpo (1000) lɔ vɔ.

⁶ Nyɔnanɔye kpo ɛmɛkinkwɛnye wɛ nyi ɛmɛ ke ɖo mima le finfɔn sɔn oku tantyɛn lɔ mɛ ye! Oku owegɔ lɔ hɔn ɖo acɛ do ye ji, vɔ, ye na nyi Mawu kpo klisi we avɔsantɔye, ye bo na ɖu axɔlu kpo-e na oxwe akpo ɖokpo (1000) lɔ. ⁷ Na oxwe akpo ɖokpo (1000) lɔ va yi vɔ, ye na ɖe Satana lɔ tɔn le ogankpa etɔn mɛ, ⁸ E na tɔn a do blɛ otogun ke le wɛkɛzwe ɛnɛ lɛye mɛ ɖu, ye wɛ nyi Gɔgu kpo Magɔgu. E na kple ye na ahwan funfun. Ye su ɖi ɛxu ta kɔ ha. ⁹ Ye yì nyixɔ lɔ ji seŋu bo xa xɔsetɔye we ahwankpa kpo toxo kena Mawu yi owan na lɔ. Vɔ, ozo ɖe flɛ sɔn jiŋukunsin bo fyɔ ye mɛ bisese. ¹⁰ Ye sɔ lɛgba ke blɛ ye ɖu nɔ lɔ flɛn do ozokpo ɖaxo kpo hwemi mɛ, blɛ lɔ wɛ kanlin lɔ kpo oxolɔɖenyitɔ ojokantɔ lɔ le. Ye na do vivɛsise na ye keklo kpo ozan gbɔɔn do yi mavɔmavɔ ¹¹ I wɛ ko kpɔn xɔluzikpwe ɖaxo owé ɖe kpo ɛmɛ ke xlɔn eji lɔ. Jiŋukunsin kpo nyixɔ kpo si le ŋukɔn ni-i, e ko mɔ kpɔn ye. ¹² Ko mɔ kpɔn ɛmɛ kukuye, ɛmɛhyɔnye kpo vikpɛvyuye, ye bo le ote le xɔluzikpwe lɔ we ŋukɔn, wemaye le hunhun, wema bu bo mɔ le hunhun, yi nyi ɛgbɛwema lɔ. Ye ɖo kojo na ɛmɛkuku lɛye do gbɔn odan yetɔnye ke wa mɛ, ɖi kena e le winwlan ɖo le wema lɛye mɛ ha. ¹³ Ɛxu ɖe ɛmɛkukuye ke le emɛ tɔn, oku kpo okotomɛ bo ɖe ɛmɛ ke le ye mɛ ye tɔn-ɛ, ye bo ɖo kojo na ɛmɛkuku lɛye do gbɔn ɛmɛ ɖokpo-ɖokpo we odan ke e wa mɛ. ¹⁴ Ye sɔ oku kpo okutomɛ sɔ flɛn do ozokpo lɔ mɛ. Ozokpo lɔ wɛ nyi oku owegɔ lɔ. ¹⁵ Ye bo sɔ ɛmɛɖekpokpwe ke we nyikɔ na ye hɔn kpɔn le winwlan le ɛgbɛwema lɔ mɛ, sɔ flɛn do ozokpo lɔ mɛ.