¹ E xin godo ko se ogbe sinsyɛnxu ɖe ɖi sɔn sɛxwe, bo le ɖi ɛmɛ susu gbagbagba we agbe ha, bo lɔ nɔ byo: « Ale luya! Hwlɛngan, kanfu kpodo hɔnhlɔn nyi Mawu miatɔntɔn ! ² Ɖo kojoɖiɖo etɔnye nyi oxojɔxo bo sɔgbe. E ɖo kojo na kpaco ɖaxo keni lo do oɖyu nyixɔ lɔ nɔ kpodo kpaco wiwa etɔn, bo ɖe ohlɔn do odansɔvi atɔnye kena e hu ye nu.» ³ Ye bo mɔ ke byo: «Aleluya! Toxo ɖaxo kenu bi la we azɔ lo yi Jigbe nɔ nɔ tɛgbɛ.» ⁴ Ɛmɛhyɔn oko ŋukun ɛnɛ lɛɛye kpo do dónu odo, bo sɛn Mawu keni xlɔn anyi le xɔluzinkpwe lɔ ji, ye bo lɔ nɔ byo: « Ami Ale luya! » Lɛngbɔvi lɔ we alɔwiwle ⁵ ogbe ɖe ɖi sɔn xɔluzinkpwe lɔ mɛ, bo lɔ byo:« Mi kanfu Mawu miatɔn, mi ɛmɛ odan sɔvi etɔn zɛtɛye mi ɛmɛ kelɛɛye ni nɔ ɖo si si-i ye, vikpɛviye kpodo ɛmɛhyɔnye!» ⁶ I wɛ ko se ogbe ɖe ɖi, ɖi ɛmɛ susu gbagbagba we ogbe ha, ɖi tun otɔ ɖaxo ɖe wɛ do nɔ ha, ɖi oju ɖaxo ɖe wɛ d'ogbe nɔ ha, bo lɔ nɔ byo:« Aleluya! ɖo xwetɔ lɔ, Mawu hɔnhlɔn zɛtɛyetɔ miatɔn lɔ, sɔ xɔluɖuɖu etɔn sɔ xlɔn onyi! ⁷ Mi a kpɔn jijwɛ, mi a zɔn jɛ ote, a bo kanfu-i ɖo, lɛngbɔvi lɔ we alɔ wi wle we ogan xo, osyɛ lɔ bo o jlo ɖo. ⁸ Ye bo na na e do awu kena ye sɔ avɔ nywɛ fɛɖɛ do wasi, ebo klɛn nɔ, bo le mimɛ.» Avɔ fɛɖɛ-fɛɖɛ lɔ, odan jijwɛ kena xɔsetɔye wasi wɛ. ⁹ Ɛwɛndotɔ ɖe bo lɔ na-a byo: « Nyɔnanɔye we nyi ɛmɛ kelɛye na ye yɔ na lɛngbɔvi lɔ we a lɔwiwle we agɔ ɖuɖu!» E xin godo, e mɔ lɔ na-a byo:« oxojɔxo wɛ, Mawu ŋu tɔ wɛ lɔ-ɛ» ¹⁰ I wɛ ko jɛ klita le akɔnmɛ ni-i a do sɛn-ɛ, vɔ e lɔ na-a byo:« ká wasi mɔsinha o! odansɔvi wɛ ko nyi ɖi lɔɔ kpodo nɔvwe keye ni lo ɖe konu na Yesu nɔ ye ha. Mawu wɛ o ɖo na sɛn, ɖo Yesu we kunuɖiɖe la mɛ wɛ ogbeɖiɖo do Mawu nu jɔ sɔn.» Osɔ owce lɔ kpodo ɛmɛ keni xɛ e ji ¹¹ I wɛ ko kpɔn sɛxwe hun, osɔ owee ɖe bo tɔn. Ɛmɛ keni le eji lɔ ye nɔ yɔ-ɛ byo Ogbejinɔtɔ kpodo oxojɔxotɔ, e nɔ ɖɔ ɛhwɛ a bo mɔ wa ahwan d'omɔ jijwɛji. ¹² ŋukunsin etɔnye klɛn nɔ ɖi ozo ha, xɔlu we ogbavi susu bo le ota ni-i. Ye wlan nyikɔ ɖe do e wu, e lɔɔ ɖokpo gee bɛ nyɔ nyikɔ lɔ. ¹³ Awu kena ye sɔ nylɔ do ɛhun mɛ wɛ e do. Nyikɔ etɔn wɛ nyi Mawu we oxo lɔ. ¹⁴ Sɛxwe we ahwankpaye bo le ɛtɛ ni-i, ye bo le osɔ owee ye ji bo do awu kena ye sɔ avɔ nywɛ fɛɖɛ-fɛɖɛ owee do wasi, e bo mɛ. ¹⁵ Dɛnkpwe ɖiɖa lo tɔn sɔn onu etɔn mɛ nɔ, exin lɔ wɛ ena do ɖu le otogunye ji. E lɔɔ wɛ na kpa ɛcɛ do ye ji, ɛcɛ kpikpa etɔn bo na syɛnxu ɖi ogankpo ha. E na li hlɛzɛn lɔ le Mawu Hɔnhlɔn zɛtɛyetɔ we aɖi ɖaxo we onufyɔngun mɛ. ¹⁶ Le awu etɔn kpodo atagbo etɔn ji, ye wlan nyikɔ ɖe. I wɛ nyi: xɔluye we vɔlu, xwetɔye we xwetɔ. ¹⁷ I wɛ ko kpɔn Mawu we ɛwɛndotɔ ɖe le ota le ohwe mɛ. E do axwa lelele bo lɔ na oxɛ zɛtɛye keni zɔn gbɔn jigbe daan nɔ ye byo:« Mi va, mi kpli miaɖe na Mawu we agɔɖuɖu ɖaxo lɔ. ¹⁸ Mi va ɖu xɔluye we olan, hɔnhlɔntɔye we olan, osɔye kpodo ɛmɛ kelɛɛye ni nɔ xɛ ye ji ye we olan, ɛgbɛtɔ zɛtɛye, ɛmɛ kelɛɛye ni le yeɖe nu wɛ, ɛmɛxixɔye wɛ, vikpɛviye wɛ, alo ɛmɛhyɔnye we olan.» ¹⁹ I wɛ ko mɔ kpɔn kanlin lɔ, nyidan ji we xɔ luye kpodo ahwankpa yetɔn ye, bo va kpli a do wa ahwan kpan ŋukɔn ɛmɛ keni le osɔ lɔ ji kpodo ahwankpa atɔn. ²⁰ Ye wle kanlin lɔ, bo wle ogbeɖotɔ ojokantɔ keni wasi ŋudandonuye le kanlin la we ŋumɛ bbo do blɛ ɛmɛ kelɛɛye ni yi kanlin la we josi, bo sɛn onutita atɔnye. Ye sɔ ye ɛmɛ owe lɛɛye ɛgbɛ-ɛgbɛ sɔ flɛn do ozokpo ke mɛ na hwemi lo bi le nɔ la mɛ. ²¹ Ɛmɛ keni xɛ osɔ la ji, hu ɛmɛ gbokpweye kpodo dɛnkpwe keni lo tɔn sɔn onu etɔn mɛ nɔ, oxɛ zɛtɛye bo ɖu olan yetɔnye bo gɔ gomi.