¹ E xin godo ko mɔ kpɔn Mawu we ɛwɛndotɔ bu, e bo jɛ ote sɔn sɛxwe bo klɛn do nyixɔ lɔ ji seŋu. ² E do axwa lelele bo lɔ byo: « E gba, e gba, Babilɔnu ɖaxo lɔ! E trɔ zun gbigbɔ nylakanye we nɔtyɔn, bɛtyɔn gbigbɔ baɖa-baɖa ɖekpekpe tɔn, blɛ lɔwɛ oxwɛ nyanyla ɖekpekpe kpo ( kanlin nyanyla ɖekpekpe keni xyɔ ɛwu ) nɔ nɔ. ³ Ɖo, e dɔn otogun zɛtɛye do ɛgbɛ ɖuɖyu zinzan mɛ ɖi vɛn wɛ ye kpe na ye ha, xɔlu keye ni le nyixɔ lɔ ji ye zan ɛgbɛ ɖuɖxu kpo-e, nyidan lɔ ji ajɔdotɔye bojɛ dɔkun dogbɔn dɔkunnu su su kena e ɖo mɛ.» ⁴ ko mɔ se ogbe bu ɖi sɔn sexwe bo lɔ nɔ byo: «Otogun tɛye; mi tɔn le toxo mɛ la mɛ, mi ko mɔ do ɖo alɔ le onu nyanyla etɔnye mɛ nɔ, e mɛ ofunkpikpe keye ni na jɔ do e ji ye, ɖe ko mɛ va nyi miatɔn nɔ. ⁵ Ɖo, onu nyanyla etɔnye su gbɔɔn bo yi jiŋukunsinɔ, Mawu bo ɖoŋu do onu baɖa-baɖa keye nae dote ye wu. ⁶ Mi wasi kpo ɛmɛye ɖo ha, mi ɖe onu kena e dote we atɔ ni-i zɔn owe! kokpo ke mɛ na e caka vɛn do, mi kɔn vɛn cica mɔsinhatɔn donu owe do e mɛ ni-i. ⁷ Ɖi ɖena e kɔ eɖe sɔ su, bo ɖo acɔ ɖo ha, mɔsinha ke wɛ mi na do vivɛsise ni-i ɖo, e mɔ do le lutu mɛ! Ɖo, e nɔ lɔ le eɖe mɛ nɔ byo: xɔlu nyɔnusi wɛ ko nyi le bwɛ, ko ko nyi okposi, ko ɔn nɔ lutu mɛ nɔ kpɔn gbeɖe, ⁸ Do e mɛ lo wu,ofunkpikpe keye na ye xla ɖo nyi ni-i ye na jɔ do eji le onyihunhɔn ɖokpo gee gbe. Ye wɛ nyi, oku, lutu, xovɛ, ozo bo na fyɔ-ɛ. Ɖo, xwetɔ Mawu keni ɖɔ ɛhwɛ ni-i ɖo hɔnhlɔn.» ⁹ Hwekenu na nyidanji we vɔlu zɛtɛye keni zan ɛgbɛ ɖuɖyu kpo-e ye bo ɖu ɛgbɛ kpo-e ye, na kpɔn ozo keni lo fyɔ-ɛ nɔ la we azɔ na tun nɔ, ye na fan avin a bo na ale do ota ni-i. ¹⁰ Ye na vɔ na vivɛsise atɔn la nɔ, a bo mɔ byo:« Awo! Awo Babilɔnu, toxo ɖaxo keni ɖo hɔnhlɔn! Oganxixo ɖokpo gee jan wɛ ye sɔ ɖóte a bo mɔ do ɖɔ ɛhwɛ na we! » ¹¹ Nyidan lɔ ji we ajɔdotɔye can lo fan avin nɔ, bo le lutu mɛdoe wu, ɖo, ɛmɛ ti ɔn mɔ xɔ ajɔgban yetɔnye hɔ: ¹² Sika oganwe, ɛkpɛn ohovivɛtɔnye, oɣlɔye, avɔ nywɛ fɛɖɛ-fɛɖɛ, avɔ ovɛ cɛcɛcɛ, avɔ owee pepepe, avɔ ovɛ bu ye can, otin adodwe tɛnmɛ-tɛnwɛ ɖekpekpe, onu ɖekpekpe kena ye sɔ onyi aji naku we aɖu do wasi, otin ohovivɛ tɔnye, oganvɛ, ogan, ɛkpɛn ohovivɛtɔn bu, ¹³ ama hwɛn nywɛn kena ye nɔ yɔ byo kan ɛli, onu hwɛn nywɛ bu ye, ce luye; milu, zruya, vɛn, ami, owɔ, ɛjiŋukun kena ye nɔ yɔ byo ble, onyiye kpo lɛngbɔye, osɔye kpo ahwan hunye, ɛmɛxixɔye kpodo ɛgbɛtɔ bu ye. ¹⁴ « Onu keye na onɔ jlo na ɖo lɛɛ ye, sɔn do we, dɔkun tɔwe mɛ zɛtɛye bu do we, ɛmɛ ɖe ɔn mɔ kpɔn ye nɔ kpɔn gbeɖe!» ¹⁵ Toxo lɔ we vivɛsise na do vivɔ na ajɔdotɔ keye ni jɛ dɔkun dogbɔn ajɔ kena ye do le e mɛ ye mɛ, ye bo mɔ na ci dindyɔnnu, a bo fan avin, a bo le lutu mɛ, ¹⁶ a bo mɔ lɔ nɔ byo: « Awo! Awo! Toxo ɖaxo lɔ! Avo nywɛ fɛdɛ-fɛɖɛ wɛ e do san ma, bo mɔ do avɔ ovɛ cɛcɛcɛ kpo avɔ ovɛ buye, bo sɔ sika, ɛkpɛn ohovivɛtɔn buye kpo oɣlɔye sɔ kpla! ¹⁷ Ɖɔkunnu xin lɔ zɛtɛye do crɔn le oganxixo ɖokpo gee mɛ !» Otɔjihun ɖaxo kuntɔ zɛtɛye kpodo ɛmɛ zɛtɛye keni do otɔjihun lɛɛye, ɛmɛ kelɛye ni nɔ wa odan le otɔjihun lɔmɛ zɛtɛye, kpodo ɛmɛ zɛtɛye keni nɔwa odan le ɛxu jiye, le dindyɔnnu. ¹⁸ Kena ye kpɔn ozo keni lo fyo-ɛ nɔ lɔ we azɔ, ye do axwa nɔ byo: Toxo ti ɔn nɔ nyi ɖi toxo ɖaxo ke ha kpɔn! » ¹⁹ ye bɛ ofinzɔ kɔn dóta nɔ, bo le axwa nu bo do fan avin nɔ, bo na ale nɔ byo: « Awo! Toxo ɖaxo lɔ! Dɔkun etɔn wɛ na na ɛmɛ zɛtɛye keni ɖo otɔji hunye le ɛxɛ ji ye jɛ dɔkun. Oganxixo ɖokpo gee mɛ jan bɛ ye crɔn-ɛ le» ²⁰ Sɛxwe, kpɔn jijwɛ do cin crɔn etɔn wu! Mi ɛmɛ xɔsetɔye, ɛmɛdindɔnye kpodo Mawu we ogbeɖo tɔye, miye can, mi kpɔn jijwɛ! Do, Mawu ɖɔ onu nyanyla kena e wa kpo mi, we ɛhwɛ ni-i. ²¹ I wɛ, Mawu we ɛwɛndotɔ hɔnhlɔntɔ ɖe, ɖiɖa ɛkpɛn ɖe keni le ɖi ote ɖaxo ha, bo sɔ-ɛ flɛn do ɛxu mɛ bo lɔ byo: « Adan mɔsinhatɔn ke wɛ ye na do flɛn Babilɔnu, toxo lɔ, ɛmɛ ɖe ko mɔ kpɔn-ɛ nɔ kpɔn gbeɖe. ²² Le toxo tɔwe lɔ mɛ, ɛmɛ ti ɔn mɔ se onuxonu okannɔye nɔ, ohanji tɔye, kpete kun tɔye kpodo okpɛn kun tɔye we onuxixo nɔ. Ɛmɛ ɖe ɔn mɔ kpɔn alɔnudanwatɔ ti le kɔn nɔ ɛmɛ ɖe kɔ mɔ se ote we ogbe le kɔn we nɔ. ²³ Zogyan can ko mɔ klɛn le kɔn we nɔ kpɔn, ɛmɛ ɖe ɔn mɔ se osu kpo osi keye ni ɖe yeɖe trololowe. Ogbe le kɔn we nɔ kpɔn gbeɖe. Ɖo ajɔdotɔ tɔweye wɛ nyi ɛmɛ ŋukunsin le eji ye le nyixɔ lɔ ji san, o bo sɔ azenuwiwa tɔwe do blɛ otogun zɛtɛye ɖu.» ²⁴ Kɔn we bɛ ye kpɔn Mawu we ogbeɖotɔye, xɔsetɔye, kpo ɛmɛ kelɛye naye hu le nyidan lɔ ji ye we ɛhun le.