¹ I wɛ, le Mawu we ɛwɛndotɔ acowe keye ni hɛn kɔkpo acowe lɛye mɛ, ɖokpo va lɔ oxo kpo-o, bo lɔ na-a byo: « va, na ma sɔ lena ye na ɖo kojo ɖo na kpaconɔ ɖaxo keni nɔ nɔ otɔye to lɔ sɔ xlɛ we. ² Elɔɔ kpodo nyixɔ ji we xɔluye wɛ zan ɛgɛ ɖuɖyu, ɛgbɛ zinzan etɔn bo mu ɛmɛ keye ni le nyixɔ lɔ ji ye ɖi vɛn ha.» ³ E kplɔ-ɔ do yi gbefaji le gbigbɔ mɛ. I wɛ ko kpɔn nyɔnu ɖe, e bo xlɔn onyi le kanlin ovɛ cɛcɛcɛ ɖe ji, nyikɔ keye ni lo kɔn acɔn do Mawu wu nɔ ye bo kpe gbɔn goto ni-i, e bo ɖóta acowe kpodo azo owo. ⁴ Nyɔnu lɔ do awu nywɛ ovɛ cɛcɛcɛ ɖe kena ye ɖo acɔ na kpodo sikanuye, ɛkpɛn ohovivɛtɔnye, kpodo oɣlɔye. Sika we kɔkpo ɖe le alɔ mɛ ni-i bo gɔ kpodo onu xyɔwuye keye ni nyi kpaco etɔn we onu ɖudyuye. ⁵ Ye wlan nyikɔ ɖe do ŋukɔnnu etɔn, nyikɔ makpɔndona wɛ. I wɛ nyi: Babilɔnu ɖaxo, kpaconɔye kpodo nyixɔ ji we onu xyɔwuye we onɔ. ⁶ Mi wɛ ko kpɔn byo nyɔnu xin lɔ, bo nu xɔsetɔye kpodo Yesu we kunuɖetɔye we ɛhun gbɔɔn bo mu. Kena ko kpɔn-ɛ, e hu onu do-o taŋu. ⁷ Mawu we ɛwɛndotɔ lɔ bo lɔ na-a byo: « ɛlɛ jɔ e do hu onu do we? mɔ, ko na lɔ onumakpɔndona kena nyɔnu lɔ nyi kpodo onu hwihwla kena kanlin ota acowe, azo owo nɔlɔ, ke ji na e xlɔn onyi le la, nyi na we. ⁸ Kanlin kena o kpɔn lɔ, e la ɛgbɛ san, vɔ siɛ, e ku. E na tɔn sɔn vivɛsise we osdʋn ɖaxo maɖodo lɔ mɛ, a bo do va yi crɔn. Nyixɔjitɔ keye we nyikɔ na ye ɔn wlan do ɛgbɛwema lɔ mɛ sɔn ɛgbɛ lɔ we dojɛ gbɔɔn ye, na kpɔn kanlin lɔ, ɖo e nɔ ɛgbɛ kpɔn, bo va ku, e bo na mɔ va sɔ eɖe sɔ xlɛ.» ⁹ ke lɔ hyan zinzin kpo onunyinywɛ. Ota acowe lɛye nyi otó acowe keye ji na nyɔnu lɔ xlɔn ye. Ye bo mɔ nyi, xɔlu acowe. ¹⁰ Atun le ye mɛ, xɔluɖuto yetɔn bo o gba, ɖo kpo ko mɔ va hɔndyo. Vɔ na e va va; oganxixo oviiɖe jan wɛ e na nɔ onyi na. ¹¹ Kanlin keni le ɛgbɛ san, vɔ bo o ku lɔ emyɔ ŋutɔ can nyi xɔlu atrotɔngɔ. E lɔɔ can mɔ nyi ɖokpo le xɔlu acowe lɛye mɛ, e bo lo sɔn yi cincrɔn mɛ nɔ ¹² Azo owo kena o kpɔn lɛye nyi xɔlu owo, ye ko jɛ xɔluɖuɖu ji hɔnɖyo, vɔ, ye na yi ɛcɛ, a bo mɔ do ɖu xɔlu na oganxixo ɖokpo kpodo kanlin lɔ. ¹³ Susu ɖokpo ŋumyɔ wɛ le ye si; I lɔ wɛ nyi, ye a sɔ hɔnhlɔn yetɔn kpodo ɛcɛ yetɔn ado wa odan na kanlin lɔ. ¹⁴ Ye na wa ahwan kpan ŋukɔn Lɛngbɔvi lɔ; vɔ lɛngbɔvi lɔ na ɖu le ye ji, ɖo e lɔɔ wɛ nyi xwetɔye we xwetɔ, no nyi xɔluye we xɔlu. E lɔɔ kpodo ɛmɛ keye na e yɔ ye, ɛmɛ cincanye, ogbejinɔtɔ atɔnye, na ɖu ye ji. ¹⁵ Ɛwɛndotɔ Mawutɔn lɔ bo lɔ na-a byo, otɔ keye na o kpɔn le ofi kena kpaconɔ lɔ le ye, otoviye wɛ, ɛmɛ susu gbagbagbaye, otogunye kpo ogbe ɖekpekpe wɛ. ¹⁶ Azo owo kena o kpɔn lɛye kpodo kanlin lɔ, yee na gbɛ owan na kpaconɔ lɔ; ye na yi onu etɔn zɛtɛye, a bo ɖe-e do ɛmɛ-ɛmɛ, ye na ɖu olan etɔn, a bo sɔ ozo do fyɔ-ɛ. ¹⁷ Ɖo Mawu sɔ tito atɔn sɔ do ayixa mɛ na ye, na a wasi-i, ye bo na ɖo ogbekpɔ a bo sɔ xɔluɖuɖu yetɔnye do wa odan na kanlin lɔ gbɔɔn do yi hwekenu na Mawu we oxoye na cɛ. ¹⁸ Nyɔnu kena okpɔn lɔ, toxo ɖavo keni kpa ɛcɛ na xɔluye le nyixɔ lɔyi wɛ.