¹ Bɔ d'ewu, Mawu we ɛwɛndotɔ lɔ sɔ otɔ ke we ɛsin nɔ na ɛgbɛ wu ɛmɛ lɔ sɔ xlɔ-ɔ, e bo zin ceɖe-çeɖe ɖi klisitalikpɛn ha, otɔ lɔ bo tɔn sɔn Mawu kpo lɛngbɔvi lɔ we xɔluzinkpwe mɛ nɔ. ² Otin ke sinsɛn etɔn nɔ na ɛgbɛ wu ɛmɛ le dodomɛ na toxo lɔ we omɔ ɖaxo lɔ, bo otɔ sisa lɔ we ada owe lɛye ji. Otin lɔ nɔ sɛn okun zɔn weve le osun ɖokpo mɛ, e nɔ sɛn le sunzan ɖokpo-ɖokpo mɛ. Ye nɔ zan ama etɔnye a do ado na otgunye. ³ Onudo hɔn mɔ le nɔ. Mawu kpo lɛngbɔvi lɔ we xɔluzinkpwe na le toxo mɛ. Mawu we odan sɔviye bo na sɛn nɔ. ⁴ Ye na kpo ŋumɛ etɔn, nyikɔ etɔn bo na le ŋukɔnnu na ye. ⁵ Ozan hɔn mɔ do nɔ, ye hɔn hyan zogbɛn ɖe we kinklɛn nɔ gbɔɔn do hyan ohwe we kinklɛn nɔ can, ɖo Xwetɔ Mawu lɔ tete na klɛn na ye. Ye bo na ɖu xɔlu gbɔɔn do yi mavɔmavɔ. ⁶ I wɛ Mawu we ɛwɛndotɔ lɔ lɔ na tun byo:« Oxo xinye nyi oxojoxo ye bo na kan do ye ji, Xwetɔ lo Mawu ke na na gbigbɔ etɔn lɔ oxo na oxolɔɖonyitɔ etɔnye we sɔ ɛwɛndotɔ etɔn ɖodan ni a do va ɖe onu ke na va jɔ zaanɖe ye sɔ xle odansɔvi etɔnye.» ⁷ «Ko gbɔnɔ zanɖe. Nyɔnanɔ wɛ nyi ɛmɛ ke zɔn do oxolɔɖonyi we wema Mawu tɔn ke ji. ⁸ Blɔ Jan wɛ se bo kpɔn onu xinye. Ke ko kpɔn bo se, ko jɛ klita le ŋukɔn na Mawu we ɛwɛndotɔ ke sɔ onu lɔ no sɔ xlɔ-ɔ nɔ lɔ, a do sɛn-ɛ. ⁹ Vɔ, e bo lɔ na tun byo:« ká wasi emɔ! Odan sɔvi wɛ ko nyi ɖi yi kpo nɔvwe Mawu we oxolɔɖonyitɔye kpo ɛmɛ ke nɔ zɔn do wema ke lɔ we oxo ji nɔ ye ha. Mawu wɛ o ɖo na sɛn!» ¹⁰ Exin godo, e lɔ na tun byo: « Ká hwla oxolɔɖonyi we oxo ke le wema; ɖo, oganxixo kena Mawu ɖo na onu xin lɛye na do jɔ o tɛkpɔ. ¹¹ Onunyinylawatɔ ni ɖo ŋukɔn yiyi le Onunyinyla wiwa etɔn mɛ, ɛmɛɖuɖyu ni ɖo ŋukɔn yiyi le oɖyu etɔn mɛ, ɛmɛjijwɛ ni ɖo ŋukɔn yiyi le onujijwɛ wiwa etɔn mɛ, ɛmɛkinkwɛn ni ɖo ŋukɔn yiyi le ɛgbɛ kinkwɛn zinzan etɔn mɛ.» ¹² «Kpɔn! Ko gbɔnnɔ zaanɖe, ko na hɛn axɔtu tɛye do va, a bo tu axɔ na ɛmɛ ɖokpo-ɖokpo ɖi kena e wa odan ɖo ha. ¹³ Bo wɛ nyi alufa kpo omega, tantyɛn kpo kpotwi, titɔ eji kpo vivɔnu. ¹⁴ Nyɔnanɔye wɛ nyi ɛmɛ ke nɔ nya awu gaga yetɔnye, ye na ɖo ɛcɛ a do ɖu otin ke nɔ na ɛgbɛ wu ɛmɛ lɔ we sinsɛn, a bo gbɔn toxo lɔ agbo mɔnuye a do ɖyɛ'mɛ. ¹⁵ Vɔ, ovunye, azetɔye, kpaconɔye, ɛmɛhutɔye, yehwesɛntɔye kpo ɛmɛɖe kpokpwe ke nɔ yi owan na ojo bo nɔkan ojo, toxo lɔ we godo wɛ ye na nɔ. ¹⁶ Blɔ Yesu, ko dɔn ɛwɛndotɔ teye ɖodan ni a do ɖo ɛkpɛn onu xin lɛye ji le agunye mɛ. Bo wɛ nyi xɔlu Davidi we aɖɔ kpo jijimɛvi etɔn, bo nyi sunhwevi ke nɔ klin le keklenu.» ¹⁷ Gbigbɔ lɔ kpo nyɔnu lɔ lɔ nɔ tun byo:«va!» Ɛmɛ ke se ni lɔ tun byo: «va!» Ɛmɛ ke kɔmyɔ o ci nɔ ni va; na e jro ɛmɛɖe ni yi ɛsi ke nɔ nza ɛgbɛ wu ɛmɛ lɔ fata. ¹⁸ Ko ɖo ɛkpɛn eji nɔ na ɛmɛ ɖekpokpwe ke se oxolɔdonyi Mawu tɔn ke le wema ke mɛ ye nɔ tun byo: na ɛmɛɖe sɔ onuɖe sɔ kpe-e, Mawu na sɔ ofun kpikpe ke we oxo na ye lɔ le wema lɔ mɛ ye sɔ kpe vivɛ sise etɔn. ¹⁹ Na ɛmɛɖe, ɖe onuɖe drɔn le wema ke lɔ we oxolɔɖonyiye wu, Mawu na ɖe tɛnxo ke nyi etɔn tɛ lɛ ɛgbɛ we otin lɔ wu, a bo mɔ ɖe akpa etɔn tɛ le toxo kinkwɛn lɔ mɛ, toxo xin lɔ we oxoye wɛ ye lɔ le ɛgbɛ wema ke lɔ mɛ. ²⁰ Ɛmɛ kena ɖo ɛkpɛn onu xin lɛye ji nɔ lɔ tun byo:« ɛɛn, ko gbɔnɔ zanɖe!» Ami! Va, Xwetɔ Yesu! ²¹ Xwetɔ Yesu we ɛfɛnu ni nɔ kpo mi'me bi sese.