¹ Nɔvye xɔsetɔye mi, a do vɔ e nu, mi nɔ kpɔn jijwɛ le Xwetɔ lɔ mɛ. Agbɔ hɔ kpyo nɔ do onu ɖokpo ŋumyɔ lɛye wiwlan ɖodan mi nɔ wu, ɖo e na na na mi na lido. ² Mi cɔ miaɖe do ovun xinye wu. Mi cɔ miaɖe do danuwatɔ nyinylaye wu, mi cɔ miaɖe do mɛ ke gbo ada ajotɔtɔnye wu. ³ Ɖo miye wɛ nyi mɛ ke sɛn Mawu nɔ dogbɔ Gbigbɔ etɔn ji nɔ lɛye, miye wɛ ye gbo ada xojɔxotɔn lɔ na, Yesu Klisu ke mɛ na mi le lɔ, wɛ mi nɔ do mla nɔ, e hɔn nyi gbaza mɛ we mimla hwɛn mi nɔ mla. ⁴ Ganke bo can ko hɛn, ko mɔ ɖeji do ɖiye wu. Na mɛɖeye kpɔn tun ye mɔ hɛn ye mɔ na ɖeji do yeɖe wu, donu nɛmu-nɛmu na va nyi blɔ tɛye. ⁵ Ɖo blɔ, ye ji blɔ we ŋukɔnɖiɖe atrotɔngɔgbe wɛ ye gbo ada naa, ko bo nyi Izrayɛli we kunkan bo jɔ le akɔta Bejamɛtɔn mɛ. Ebletɔ wɛ ko nyi, ebletɔ wɛ ji-u. Ko bo nɔ zɔn gbɔn Jwuifuye we osɛn ji, ɖo Falizitɔ wɛ ko nyi. ⁶ Na e nyi kpakpka tɔn wɛ, bo wɛ nɔ ɖe fun na agunviye. E nyi ɛgbɛ jijɔ zinzan ɖi kena osɛn lɔ byɔ ɖo ha tɔn wɛ, mɛ ti hɔn nɔ kpɔn ofɛn ti le wu ye. ⁷ Vɔ onu xinye bisese kena ko nɔ kpɔn byo ale mɔ le emɛ na ye, do Klisu lɔ wu syɛ, ko va kpɔnye ɖi nu ke la ɛmɛ ha. ⁸ Le xojɔxo mɛ can, ko va kpɔn tun onu xin ye bisese mɔ la ɛmɛ. ⁹ E xin le Klisu lɔ mɛ yue hɔn mɔ sɔ-ɔ do kpɔn ɛmɛ jijɔ dogbɔn osɛn ji zinzɔn gbɔn tɛye mɛ nɔ, vɔ, dogbɔn xɔse kena ko ɖo na Klisu lɔ ji mɛ. Mawu kɔ wɛ ɛmɛ jijɔ nyinyi xin lɔ nɔ sɔn, bo xinnɔnyi do xɔse ji. ¹⁰ Onu kena ko ba nɔ jan wɛ nyi tun, syɛ ma nyɔ Klisu lɔ a mɔ nyɔ fifɔn sɔn oku etɔn we hɔnhlɔn, a mɔ ɖu aya ɖi i ha, a mɔ ku oku ke ha na e ku, ¹¹ e xin bo can mɔ va fɔn le ɛmɛ kukuye mɛ. ¹² Nu ke we ogbe ko nya nɔ, ko hɔn wle hɔnɖyo, ko ko nyi ɛmɛ nywɛ ganji hɔnɖyo; vɔ ko le wedun lɔ ji a do wle-e, ɖo bo tete can Yesu wle-o. ¹³ Nɔvye xɔsetɔye e hɔn nyi byo ko wle-e hɔnɖyo hwɛn, vɔ susu ɖokpo kena ko nɔ zan jan wɛ nyi byo, ko nɔ wɔn nu ke le godo na-a, bo nya do onu ke le ŋukɔn na nɔ lɔ, ¹⁴ ko do wedun do yi on u kena ko ba nɔ lɔ kɔn nɔ, e xin, ko mɔ do yi sɛxwe ke we yɔ Mawu yɔ mí lɔ we ajɔ le Klisu Yesu mɛ. ¹⁵ E xin mi mɛ ke hwɛn le gbigbɔ mɛ ye bisese, susu xin haye ni nɔ nɔ mia si. Vɔ ganke na e mɔ do nyi susu bu wɛ mi ɖo can, Mawu na ɖe onu xlɛ mi do e wu. ¹⁶ Vɔ na nuɖekpokpwe mɔ do jɔ nɔ can, fi ke mi va jɛ syɛ ke, mi ɖo ŋukɔn yiyi le omɔ ke mi o sɔ lɔ ji. ¹⁷ Nɔvi xɔsetɔye, mi mɛ bisese mi sɔ afɔ sɔ do afɔdo tɛyee mɛ. Ŋukunsin miatɔnye mɔ le mɛ ke na zɔn do kpɔndewu kena mí ɖe sɔ xlɛ miye ji. ¹⁸ Ko o nɔ lɔ na mi eji-eji, ko bo mɔ gbɛ lɔ-ɛ na mi nɔ syɛ, kpo ɖasin le ŋumɛ, lɔ byo: ɛmɛ susu mɔ le mia mɛ ɛgbɛzinzan yetɔn bo nɔ ɖexlɛ tun ye mɔ nyi kɛntɔ na Klisu ke ye kan do otinsokpoli ji lɔ. ¹⁹ Cincrɔn wɛ nyi onu ke le te kpɔn ye, ad yetɔn wɛ nyi Mawu yetɔn, onu ke ɖo na nyi ŋunya wɛ ye nɔ do mla. Ɛgbɛ mɛ bwɛ we onuye jan wɛ nɔ le ayixa mɛ na ye. ²⁰ Vɔ toxo miye tɔn, le sɛxwe blɛ lɔ wɛ hlwlɛngantɔ míatɔn ke nyi xwetɔ Yesu Klisu ke mí tre kpɔn nɔ lɔ, na sɔn do va na mí. ²¹ Ɖo na e va trɔ va, hɔnhlɔn kena e nɔ do zin nuɖekpokpwe do acɛ etɔngɔ, e na zan hɔnhlɔn xin lɔ, a do ɖɔli gbaza míatɔn ke hɔn ɖo hɔnhlɔn ɖe do trɔ gbaza etɔn ke jɛ na sisi lɔ.