Filiputɔye ota owe 2

1 Ke e nyi byo akɔnfifa le klisu mɛ, wanyiyi ke nɔ do zozo lanmeɛ na ɛmɛ bo le, kpɔkpɔ ni nɔ le Gbigbɔ Kinkwɛn mɛ bo le , dɔmɛfaa kpodo dɔŋuɖunu kpinkpɔn na ɛmɛ bo le, 2 hun bɛ ko byɔ mi nɔ tun miye ni mɔɔ ɖo gbekpɔ; a mɔɔ ɖo wanyiyi ɖokpo ŋumyɔ a mɔ ɖo ayixa ɖokpo ye, kpodo susu ɖokpo gee. 3 Mi ka sɔ onu dindɔn we ayixa alo ɛmɛ tete we kanfu biba a do wa onu ti. Vɔ dogbɔn ɛmɛɖe sɔ hwe mɛ, mi nɔ sɔ ɛmɛ gbokpweye do kpɔn ɛmɛ ke hugan wu mi ye tete ye. 4 Ɛmɛ ti ni ka byo, hetɛye ɖoɖyo mɛ mɔ na nyɔ, vɔ ɖokpo-ɖokpo miatɔnye ni nɔ kan ɛmɛ gbokpwe can we onywɛ. 5 Mi na na ayixa ke le Klisu Yesu si ni nɔ mia mɛ. 6 Klisu o ɖo ninɔmɛ Mawutɔn sɔn diojɛ gbɔn, ganke e ko ba na ɖexlɛ gannu-gannu tun he kpodo Mawu kpo mɔ nyi onu ɖokpo lɛye. 7 Vɔ e mɔ nyɔ wa, elɔ tete mɔ gbɛ nu ke na e nyi bisese ɖ'enyi.Bo sɔ odfansɔvi we ninɔmɛ. Bo va sɔ eɖe xlɛ ɖi gbɛtɔ vɔvɔ ha. 8 E sɔ eɖe sɔ hwe, bo se tonu na Mawu gbɔɔn do yi oku, otinsogaji ku wɛ e bo ku can. 9 I wɛ wanu na Mawu do kɔ-ɛ sɔ ɖo tɛnxo ɖaxo mɛ, bo n i-i nyikɔ ke hugan wu nyikɔ bisese. 10 E xin na ye yɔ Yesu we nyikɔ, klitaye bisese mɔ yido le sɛxwe, le nyidanji kpodo nyidan gɔ. 11 Ɛɖɛ ɖekpokpwe mɔ lɔ tun Klisu mɛ mɔ nyi Xwetɔ lɔ, le gigo Mawu Otɔ lɔ tɔn mɛ. 12 E xin wu nɔvye vɛna-vɛnaye, ɖi kena mi nɔ se tonu le hwe bi nu ɖo ha, mi mɔ se tonu ke, ni bo ka nɔ nyi hwekenu na ko le mia kɔn ɖoɖyo hwɛn, vɔ le syɛ kena ko hɔn mɔ le mia kɔn can; Mi ɖe hlɛngan ke mi kpɔn lɔ we odanwiwa sɔ xlɛ dogbɔn odan kena mi na wa le e wu nɔ le egbe-swɛ ɛgbe-swɛ kpo vivɔ kpo, kpo ɛmɛ sisi kpo ye mɛ. 13 Ɖo Mawu wɛ nɔ sɔ ojlo lɔ kpodo odan lɔ wiwa sɔ do ayixa mɛ na mi, na tito onywɛ etɔnye a do nyi wiwa ee mɔ jɔji ni-i. 14 Odan ɖekpokpwe kena mi wa nɔ, mi ka wasi kpo ale nina kpo gbɔɔn a do hlun do numɛ le ekɔn can. 15 E xin mɛɖe ko do kpɔn oxo ɖe bo lɔ do mia wu nɔ, mi mɔ nyi ɛmɛ mimɛye, a bo mɔ nyi Mawu we vikpɛye ke wu na ofɛn ti hɔn le, le gbɛtɔ ayixa gɛdɛ-gɛdɛnɔye kpodo gbɛtɔ nynyla egbetɔn kiye mɛ. E xin, mi mɔ klɛn le ye mɛ ɖi kena ɛgbɛ lɔ mɛ nɔ klɛn ɖo ha, le ɛgbɛ lɔ mɛ. 16 Mi nɔte gliŋu a bo do lɔ oxo ɛgbɛtɔn lɔ na ye nɔ, e xin ko mɔ do kpɔn ɛhwɛjijɔ le Klisu we azan lɔ gbe, e xin e ko do nyi nɔ tun ko mɔ do wedun vɔvɔ alo ko mɔ jɛ tagba vɔvɔ do ota miatɔn mɛ. 17 Vɔ e nyi tun ye mɔ do sɔ sɔ na ɖi onu ke ye na do sanvɔ ha can do gbɔn avɔ kena mi o lo san nɔ dogbɔn xɔse we danwiwa wu, jijwɛ wɛ e nyi na-a, ko bo mɔ kpɔn jijwɛ kpo mi mɛ bisese nɔ. 18 Emɔha ke miye can mi kpɔn jijwɛ kpo. 19 Vɔ ko le omɔkpinkpɔn mɛ byo Xwetɔ Yesu lɔ mɔ na hun omɔ ɖe na, ko mɔ do sɔ Timɔte sɔ ɖodan mi, le madin-madin mɛ. E xin oxo kena ko na se do miawu mɔ na ojidido wu bo can. 20 Zɛgbɔn elɔ wu, ko hɔn mɔ ɖo mɛ bu ti ke ɖo susu ɖokpo ŋumyɔye ɖi bo ha gbɔɔn bo na do sɔ oxo miatɔn do yɔ oxo vivɛ taŋu can. 21 Ɖo ɛmɛ gbokpweye, yeteteye we wedun nu jan wɛ ye nɔ le, ye ko nya Klisu Yesutɔn do nɔ. 22 Miye tete mi nyɔ-ɛ tun Timɔte mɔ ɖe ɛmɛ nywɛ ke e mɔ nyi sɔ xlɛ. E bo wa Ɛwɛn Nywɛ jijla lɔ we dan kpo-o, ɖi kena ovi nɔ wadan kpo Otɔ ɖo ha. 23 Ko le omɔkpinkpɔn tun e nyi ko mɔ gbɛ nyɔ kena oxo tɛye mɔ na yi ɖo ko mɔ na sɔ Timɔte amɔ sɔ ɖodan mi. 24 Ko kan do Xwetɔ lɔ ji tun blɔ tete can mɔ na va mia kɔn le madɛn-madɛn mɛ. 25 Ko kpɔn byo e mɔ le vivɛɖe byo ma mɔ sɔ nɔvye le xɔse mɛ Epafloditi ke nyi odanwagbɛ kpodo ahwanfungbɛ tɛyesɔ ɖodan mi. Elɔ lɔ wɛ mi sɔ ɖodan san, e mɔ do va kpe do wu ye le ohyan tɛye mɛ. 26 E kan nɔ taŋu tu he a mɔ kpɔn mi mɛ bisese, e bo ci onulilo mɛ taŋu ɖo mi se tun e mɔ jɛ adɔn. 27 Ɖo le xojɔxo mɛ, e jɛ adɔn adodwemɛtɔn bo ɖibla ku klo, vɔ Mawu bo kpɔn dɔŋuɖunu ni-i, e ko nyi elɔ ɖoɖyo hwɛn, vɔ e kpɔn dɔhunɖunu na bo can, e dɛn hwɛn dɔŋuɖunu mɛ ninɔ tɛye na hugan din. 28 I wɛ dɔn na ko do ba nɔ byo ma mɔ yawu sɔ-ɛ sɔ ɖodan mi, e xin na mi kpɔn-ɛ, e mɔ nyi jijwɛ na mi, bo can ko do ci dɔŋuɖunu mɛ nɔ diin. 29 I wɛ wanu, mi yi i we jonɔ kpodo jijwɛ kpo le Xwetɔ lɔ mɛ, mi mɔ ɖo sisi na mɛ xin ha ye. 30 Ɖo do Klisu we odan lɔ tamɛ wɛ e ɖi bla ku klo le, e bo do va wasi onu kena mi hɔn kpewu na wa na le bwɛ.