¹ Blɔ Pɔlu kpodo Timɔte, míye ke nyi Klisu Yesu we odansɔviye o do gbe na mi nɔ. Ko wlan wema ke lɔ ɖodan xɔsetɔ bisese ke le Klisu Yesu mɛ le Filipu we toxo mɛ ye, kpodo agunkplɔtɔ yetɔnye, kpodo ye we agunji dansɔtɔye. ² Na Mawu míatɔ kpodo Xwetɔ Yesu Klisu ni na mi i we ɛfɛnu kpo i we fifa. ³ Ko nɔ do ɛkpɛ na Mawu le ogan ɖekpokpwe mɛ kena ko gbɛ flin mi tɛgbɛ, ⁴ le hweɖekpokpwenu ko nɔ xo ɛɖɛ do ota na mi kpo jijwɛ kpo, le ɛɖɛ tɛyee mɛ. ⁵ Ko nɔ wasi emɔ do alɔgɔ ke mi nɔ wasi na le Ɛwɛn Nywɛ lɔ jijla mɛ wu, sɔn gbekegbe mi kando Xwetɔ lɔ ji gbɔɔn do va jɛ egbe. ⁶ Ko bo ɖo kandeji tun Mawu ke na mɔ bɛ odan adodwe xin lɔ wiwa le mia mɛ, mɔ na yi ŋukɔn gbɔɔn a bo vɔ-ɛ le Yesu Klisu we vivazan lɔ gbe. ⁷ E sɔgbe byo ko mɔ ɖo susu xin ha do mi mɛ bisese wu ɖo mi le ayixa mɛ na. Emɔha ke hwekenu na ko le gɛdɛ mɛ, alo hwekenu na ko hwlɛn ota na Ɛwɛn Nywɛ lɔ nɔ, e mɔ do lido, Mawu nyɔ dɔmɛ do mi mɛ bisese, ɖi kena e nyɔ dɔmɛ do bo can ɖo ha. ⁸ Ɖo Mawu tete ŋutɔ na ɖe kunnu na tun ko mɔ yi wan na mi mɛ biseseɖi kena Yesu Klisu yi wan na mi ɖo ha. ⁹ Ɛɖɛ kena ko nɔ xo na mi nɔ wɛ nyi tun owan ke mi yi na miaɖeye ni jɛ e ji nɔ, mi mɔ do ɖo onunyinyɔ adodwe kpodo nu gɔnmɛ sise ke sɔgbe. ¹⁰ E xin mi mɔ do kpewu a do josi wu onu ke le vivɛɖe, a mɔ do nyi ɛmɛ mimɛ kpodo ɛmɛ ke wu na ye hɔn kpɔn ofɛn tyi le nɔ, na Klisu we azan lɔ. ¹¹ E xin mi mɔ do syɛn le ɛgbɛ jijwɛ zinzan we oku susu ke nɔ gbɔn Yesu Klisu ji do va, e mɔ nyi gigo kpodo kanfu na Mawu. ¹² Syɛ nɔvyee mi, mi nyɔ-ɛ byo onu ke mɔ jɔ do jiye lɔ, gbɔn mɛ mɔ na na Ɛwɛn Nywɛ lɔ do yi ŋukɔn. ¹³ Ɖo e xin lɔ wɛ dɔn na mɛ bisese ke lee toga lɔ we xwegbe, kpodo ofi gbokpweye bisese do nyɔ-ɛ tun Klisu kena ko mɔ sɛn nɔ lɔ mɛ mɔ dɔn na ko mɔ do le gankpa mɛ. ¹⁴ Ke mɔ bɔ d'ewu wɛ nyi tun, gankpa mɛ ke ko le na na nɔvi xɔsetɔye susu mɔ ɖeji do Xwetɔ lɔ wu. e bo na na ye ɖeji taŋu, bo nɔ jla Mawuxo lɔ nɔ nu ti ma vɔ. ¹⁵ Ɖo mɛɖeye le bo sɔ ɛwuhwinhwan kpodo onu dindɔn we ayixa bo do jla Klisu we oxo lɔ nɔ, vɔ mɛɖeye bo mɔ jla-ɛ nɔ kpodo ayixa onywɛ kpo. ¹⁶ Ɛmɛ kena jla Klisu we oxo lɔ nɔ kpodo wanyiyi ye nyɔ-ɛ lɔ Ɛwɛn Nywɛ lɔ wu mɛ ko mɔ le bwɛ do. ¹⁷ Vɔ mɛɖeye bo jla Klisu we oxo lɔ nɔ kpo onu dindɔn we ayixa kpo goyiyi, susu yetɔnye hɔn mɛ; ye bo bu-i nɔ tun hiye mɔ do vivɛsise vivɛsise ji na nɔ le gankpa mɛ wɛ ha. ¹⁸ Vɔ e hɔn waa nuɖe, na e mɔ do nyi ayixa nyinyla ji o, alo ayixa nywɛ ji o, Klisu lɔ we ɛwɛn o nyi jijla. Bo nyi jijwɛ na-a, bo na mɔ nyi jijwɛ na ke. ¹⁹ Ɖo ko nyɔ-ɛ tun dogbɔn ɛɖɛ miatɔnye kpodo alɔgɔ Gbigbɔ Kinkwɛn Klisu Yesutɔn kpo mɛ, oànu xin lɛyee bi na hɛn hwlɛngan do va na-a le vivɔnu. ²⁰ Dogbɔn omɔ kena ko kpɔn nɔ vivɛɖe ji byo onu ti mɔ hɔn na ŋunya wu. Vɔ ko gbɛ ɖo kandeji tetetɔn nɔ syɛ, ɖi kena ko ɖo-e ɖo tɛgbɛ ha byo ko ku o, ko le ɛgbɛ o, gbɛzan tɛye na do gigo na Klisu lɔ. ²¹ Ɖo blɔ Klisu lɔ wɛ nyi ɛgbɛ tɛye, oku bo nyi ale na. ²² Vɔ na e nyi byo ɛgbɛ kena ko na nɔ le ɛgbɛ mɛ bwɛ na na na odan kena ko wa na ɖe ale susu hun ko hɔn mɔ nyɔ kena ko na sɔ. ²³ Akpa owe xin lɛye wɛ o dɔn-ɔ nɔ: ko ba na lɛ le ɛgbɛ ke mɛ bo na do ve ci Klisu kɔn, e xin lɔ bo na nyɔ na-a taŋu. ²⁴ Vɔ e le vivɛɖe na taŋu byo ma mɔ nɔ ɛgbɛ do miye wu. ²⁵ Ko bo kan do e xin lɔ ji, bo nyɔ-ɛ byo ko mɔ na nɔ nyi, a mɔɔ nɔ kpɔkpɔ kpo mi mɛ bisese, mi mɔ do ɖo ŋukɔnyiyi, a mɔ do kpɔn jijwɛ le xɔse mɛ. ²⁶ E xin na ko trɔ gbɔn va mia kɔn, mi mɔ kpɔn omɔ taŋu, a mɔ do mla le Klisu Yesu mɛ, do blɔ wu. ²⁷ Onu ke mi ɖo na wa jan wɛ nyi tun lɔ byo, mi mɔ zan ɛgbɛ ke sɔgbe kpo Klisu we Ɛwɛn Nywɛ lɔ. E xin na ko va mia kɔn bo na do va kpɔn mi, alo na ko dokpo viva, ma se tun miye mɔ gbɛ le te gliŋu le gbigbɔ ɖokpo mɛ, mɔ sɔ ayixa ɖokpo mɔ do fun ahwan nɔ do ota na xɔsetɔ ke xinnɔnyi do Ɛwɛn nywɛ lɔ ji ye. ²⁸ Mi bo ka jo miaɖe do na kɛntɔye a do vi vɔ na mi le nuti mɛ. Ɖo e xin lɔ wɛ na nyi josi kena ɖe xlɛ ye byo yee mɔ crɔn nɔ, vɔ miye mɔ kpɔn hwlɛngan. Mawu kɔ wɛ e xin lɔ bo sɔn. ²⁹ Ɖo Mawu na ɛfɛnu wu mi, e ko nyi na mia do kan do Yesu ji ɖoɖyo hwɛn, vɔ a do ɖu aya do i can wu. ³⁰ Ɖo ahwan ɖokpo ŋumyɔye, ɖi kena mi kpɔn ko fun nɔ ɖo ha, mi mɔ va nyɔ-ɛ tun ahwan ɖokpo xin lɔ jan mɛ ko mɔ gbɛ fun nɔ.