¹ E xinj wu, nɔvye vɛna-vɛna ke ko yi wan na ye, ko jlo taŋu tun ma mɔ nɔ kpɔkpɔ kpo mi, miye wɛ nɔ do jijwɛ na, bo nyi xɔluɖugba tɛye, mi nɔte gliŋu ɖemɔ lɔ le Xwetɔ lɔ mɛ. ² Ko ɖe kuku na Evodi kpodo Sɛntici nɔ byo ye mɔɔ ɖo gbekpɔ le Xwetɔ lɔ mɛ. ³ Lɔ can ke nyi odanwagbɛ gbejinɔtɔ tɛye, ko byɔ we nɔ tun i can mɔɔ kpe do ye wu. Ɖo yee kpodo Klema kpodo bɔdewutɔ tɛye gbokpwe keye we nyikɔ le wiwlan le ɛgbɛwema lɔ mɛye, bo bɔ do wu ye mi do funahwan do ta na Ɛwɛn Nywɛ lɔ. ⁴ Mi nɔ kpɔn jijwɛ tɛgbɛ le Xwetɔ lɔ mɛ, ko mɔ lɔ-ɛ nɔ ke tun mi mɔɔ nɔ kpɔn jijwɛ. ⁵ Mi nyɔ dɔmɛ do mɛ bisese wu. Xwetɔ lɔ o tɛkpɔ. ⁶ Mi ka mɔ lin nuti kpɔn, vɔ le nuɖekpokpwe mɛ, mi lɔ onu kena mi ba nɔ na Mawu dogbɔn ɛɖɛxixo kpodo kukuɖiɖe mɛ. Mi mɔ nɔ wasi-i kpo ɛkpɛdido. ⁷ E xin fifa Mawutɔn ke le ŋukɔn na gbɛtɔ we zinzin ɖekpokpwe, mɔ hɛn ayixa miatɔnye ɖote le Yesu Klisu mɛ. ⁸ A do vɔ e nu, nɔvye xɔsetɔye onu ke nyi xojɔxo, bo jɛ na sisi, bo sɔgbe, bo mɛ, bo jɛ na wanyiyi, bo jɛ na bubu, bo jɛŋu, bo jɛ na kanfu ni nɔ nɔ ayimɛ na mi. ⁹ Onu ke ko kplan mi ye, onu ke mi yi sɔn kɔnye, oxo ke ko lɔ mi bo se ye kpodo onu kena ko wasi mi bo kpɔn-ɔ ye, mi wasi do e ji. Mawu ke nɔ na fifa wu ɛmɛ mɔ le kpo mi. ¹⁰ Ko kpɔn jijwɛ taŋu le Xwetɔ lɔ mɛ tun, onu tɛye ke le ayixa mɛ na mi, mi mɔɔ va jɛ ɖiɖexlɛ ji hin. Onu tɛye le ayixamɛ na mi fɛɛ, vɔ omɔ kena mi na kpɔn a do ɖexlɛ lɔ wɛ dɛn mi saan. ¹¹ E ko nyi hudo tɛye hwɛn dɔn na ko na do lɔ e mɔ nɔ, ko o kpla ɖiye, wɛ ke ko le nɔ jɛŋu na-a. ¹² Ko nyɔ onumale ɛmɛsi we ɛgbɛ zinzan. Le nuɖekpokpwe mɛ, ko kplan ɖiye do alɔkpa ɖekpokpwe ji, gomi gɔ o, gomi hɔn gɔ o, onu le sye o, onu hɔn le sye o. ¹³ Ko kpe onu bisese wu dogbɔn ɛmɛ ke o do hɔnhlɔn wu nɔ lɔ ji. ¹⁴ E le emɔha ganke, onu nywɛ ɖe wɛ mi wasi do gɔ alɔ na le vivɛsise tɛye mɛ. ¹⁵ Filiputɔye mi, miye tete mi nyɔ-ɛ ganji tun ke ko lɛ le Masedwanu le hwekenu na Ɛwɛn Nywɛ lɔ jijla bɛ, agun bu ti hɔn mɔ le ke nɔ gɔ alɔ na le onu ke ɖyɛ alɔ mɛ na kpodo ke ko nɔ zanye we mɔnu zɛgbɔn miatɔn lɔ wu. ¹⁶ Sɔn hwekenu na ko le Tɛsaloniki gbɔɔn wɛ mi o nɔ ɖo onu kena ko hyanye ɖodan, zɔn nɛmu-nɛmu ɖe. ¹⁷ E hɔn nyi ko do ba onuninaye do mia si nɔ hwɛn, vɔ nu ke ko ba nɔ wɛ nyi tun ale kena tɔn sɔn onu nina mɛ na mi ni jɛ e ji nɔ. ¹⁸ Ko kpɔn nu ke na mi sɔ ɖodan lɔ bisese, syɛ onu su le sye. Onunina miatɔn lɔ kena Epafloditi hɛn do va na, e kpyo gbɔɔn bo drɔn. Onunina lɔ ɖi celu ke hwɛnnywɛ ha, bo le ɖi avɔsinsan kena Mawu yi e bo jɛŋu n i-i ha. ¹⁹ Mawu tɛye dɔkunnɔ ɖaxo wɛ e nyi nuɖekpokpwe ken mi hyan e na na mi kpodo gigo dogbɔn Klisu Yesu ji. ²⁰ Gigo ni nyi Mawu miatɔn lɔ tɔn sɔn mavɔ do yi mavɔ mɛ. Ami. ²¹ Mi do gbe na xɔsetɔ ɖekpokpwe ke le Yes mɛ ye. ²² Xɔsetɔye bisese do gbe ɖodan mi, le taji ye mɛ ke le xɔlu ɖaxo Hlɔmatɔn we xwegbe ye. ²³ Xwetɔ Yesu Klisu we ɛfɛnu ni nɔ kpo mi. Ami.