¹ E xin godo Yesu xwi Olodido na ye, bo lɔ nɔ tun byo :« Dahwe ɖe do vɛntinye do gle etɔn mɛ, e bo do ojikpa lɛdo-e, bo kun ogun ke mɛ na e na fyɔn hlɛnzɛn le lɔ, bogba oxɔ ke mɛ na oglecɔtɔ lɔ na nɔ. E xin godo, e bo sɔ na kpama na ogletɔ ɖeye, bo sɔn yi omɔ ji. ² Ke tinkun sinsɛn lɛye we gbingbɛn we ganmɛ vasu, e dɔn odansɔvi ɖokpo ɖodan ogletɔ lɔ kɔn, ye mɔ do ni-i sinsɛn ke nyi i we axɔtu ye. ³ Ogletɔ lɛye wle odansɔvi lɔ bo xo-e bo nya-ɛ alɔ toto. ⁴ E mɔ dɔn odansɔvi bu ɖodanye, ye wo ota na elɔ, bo zun-i. ⁵ E mɔ dɔn odansɔvi atɔngɔ ɖodan, ye bo hu-i. E mɔ dɔn buye ɖodan susu, ye xo ɖeye, bo hu ɖeye. ⁶ E mɔ ɖo ɛmɛ ɖokpo mɔ sɔ ɖodan. Ovyɔ ŋusunglo ɖokpo ge ke e yi owan na taŋu, e bo sɔ-ɛ sɔ ɖodan le vivɔnu bo lɔ nɔ tun byo : "ye na ɖo sisi na ovi ŋusunglo tɛye. ⁷ Vɔ ogletɔ lɛye lɔ na ye ɖeye tun : Ovi ke ba sɔ cinnɔ lɔ nɔ, i xɛn nyi ke, mi va mía hu-i, cinnɔ lɔ mɔ trɔ míatɔn. ⁸ Ye wle bo hu-i bo dɔn-ɛ tɔn le ogle lɔ mɛ. ⁹ Syɛ ɖe ŋunɛ ogletɔ lɔ na wa na ye? E na va amɔ hu ogletɔ lɛye amɔ sɔ ogle lɔ sɔ na kpama na ɛmɛ buye. ¹⁰ Mi hɔn xlɛ oxo xinlɔ ke le winwlan kinkwɛn lɔ mɛ wɛɛ? Ye wlan tun byo : " ɛkpɛn kena oxɔgbatɔye gbɛ, i wɛ va trɔ zun azweji we ɛkpɛn. ¹¹ Xwetɔ Mawu lɔ we odanwiwa wɛ. E bo nyi onu kpaca le ŋumɛ na miye!» ¹² Ye ba nɔ na wle-e vɔ, ye vɔ ɛmɛ susu lɛye nɔ, ɖo ye se e gɔnmɛ byo hiye wu mɛ Yesu mɔ do olo xin lɔ do. Ye bo lɛ le ekɔn bo sɔn. ¹³ Ye ɖo Falizitɔye kpodo Elodutɔye ɖeye ɖodan Yesu kɔn a do tre omɔ ni-i gbɔn oxo lilɔ etɔn mɛ. ¹⁴ Ɛmɛ xin lɛye ve kan oxo wi se tun byo :« Onukplan-ɛmɛtɔ mí nyɔ-ɛ byo i mɔ nɔ lɔ xojɔxo. Osɛn míatɔn ɖe mɔ lɔ na mi byo mí mɔ tu takwɛ na Seza? Mí na tu loo alo mí hɔn tu nɔ?» ¹⁵ Vɔ Yesu kpɔnnu jɛ ɛyɛmɛ nu wiwa yetɔn wu, bo lɔ na ye tun lɔ byo :« Ŋunɛ wa na mi do ɖo omɔ na nɔ? Mi sɔ ohogan ɖe va na, na ma kpɔn.» ¹⁶ Ye bo sɔ ohogan ɖokpo do va, Yesu bo kan ye se tun byo : Oyɛ kpo nyikɔ mɛɛ tɔn lɛ le e ji?» Ye bo ɖo e wu lɔ tun byo :« Sezatɔn wɛ.» ¹⁷ Yesu bo lɔ na ye tun lɔ byo :« Mi sɔ onu ke nyi Sezatɔn na Seza, a bo sɔ onu ke nyi Mawutɔn a bo sɔ na Mawu.» Oxo ke eɖo e wu lɔ bo kpaca do ye taŋu. ¹⁸ Sadusitɔye ke nɔ lɔ byo, fifɔn sɔn oku mɔ hɔn le ye, ye va Yesu kɔn. Bo kan-ɛ se nɔ tun : ¹⁹ « Nukplan-ɛmɛtɔ osɛn ke Mɔyizi do na mí, " Na ɛmɛ ɖe ɖo nɔvi ŋusunglo ɖe e bo ɖo nyɔnu, e ko ji oviti gbɔxwe do ku, nɔvyɔ ŋusunglo ke jɔ do ɛtɛ ni-i bo le na sɔ okposyu lɔ sɔ ɖe, amɔ do ji ovi do nɔvyɔ lɔ we do mɛ emɔ nyi nɔvyɔ ke ku lɔ tɔn. ²⁰ Nɔvinɔ acowe deye le saan. Ɛmɛ tantyɛntɔn lɔ bo ɖe nyɔnu, bo ku, e ko ji ovi ti. ²¹ Nɔvyɔ owegɔ bo sɔ nyɔnu lɔ sɔ do sɔ okpo, i can gba bo mɔ ku ovi ma ji. Ɛmɛ atɔngɔ can mɔ ku. ²² Gbɔɔn do va jɛ ɛmɛ acowe gɔ lɔ ji, i can hɔn mɔ ji ovi le nyɔnusi ɖokpo lɔ wu bo mɔ ku. Vivɔnu etɔn, nyɔnusi lɔ can bo va ku. ²³ Le fifɔn sɔn oku zangbe, hwekenu na ye na va fɔn va ɛgbɛ, mɛ nɛ tɔn lɛ na va nyi nyɔnu lɔ? Ɖo ye mɛ acowe lɛye bi wɛ sɔ-ɛ do ɖe nyɔnu.» ²⁴ Yesu bo ɖo e wu na ye tun byo :« E ma nyi pnu mi wa jɛ do nɔ nɛ? Mi hɔn nyɔ winwlan kinkwɛn lɛye gbɔɔn do nyɔ Mawu we hɔnhlɔn can. ²⁵ Ɖo na ye fɔn sɔn ɛme kukuye mɛ, ye hɔn mɔ ɖe osu alo nyɔnu nɔ can, vɔ ye na le ɖi Ɛwɛndotɔ Mawutɔnye ha. ²⁶ Vɔ ke nyi ɛmɛ kukuye na fɔn sɔn ku tɔn, mi hɔn xlɛ Mɔyizi we wema ke lɔ xo do otin ke mɛ na ozo hun le e mɛ nɔ vɔ e ko fyɔ nɔ lɔ wu wɛɛ ? Ye nɔ xlɛ byo : Mawu lɔ na Mɔyizi tun : "Ko nyi Mawu Ablaxamutɔn, Mawu Mɔyizitɔn kpo Mawu Jakɔbutɔn kpo. ²⁷ Mawu hɔn nyi ɛmɛ kukuye we Mawu, vɔ ɛmɛ le ɛgbɛye we Mawu wɛ e nyi. Míaɖeye wɛ mí blɛɖu nɔ tete.» ²⁸ Osɛnkplɔn-ɛmɛto deye se ke Yesu lɔ oxo ɖo. E bo byo Yesu mɔ ɖo oxo lɔ wu na Sadusitɔye nyweɖe. E bo tɛkpɔ Yesu bo kan-ɛ se nɔ tun lɔ byo :« Osɛn nɛ lɛ nyi osɛn tantyɛn le osɛn lɛye bi mɛ?» ²⁹ Yesu bo ɖo e wu ni-i tun :« Osɛn tantyɛn lɔ wɛ nyi : Izrayɛli ɖo to, Xwetɔ lɔ wɛ nyi Xwetɔ Mawu míatɔn ɖokpo gee, ³⁰ O ɖo na yi owan na Xwetɔ Mawu tɔwe kpodo oji tɔwe blebu, Oklantɔwe blebu, ayixa tɔwe blebu kpodo hɔnhlɔn tɔwe bisese. ³¹ "Osɛn owegɔ lɔ xɛn nyi ke : O na yi wan na hawetɔ ɖi i tete ha." Osɛn ti hɔn mɔ le bo hugan hu exin lɛye.» ³² Osɛnkplan-ɛmɛtɔ lɔ bo lɔ ni lɔ byo :« Nukplan-ɛmɛtɔ o lɔ xojɔxo byo Mawu ɖokpo gee jɛn mɛ mɔ le , Mawu ti ko mɔ mɔ le zɛgbɔn elɔ lɔ wu. ³³ Owan yi ni kpo oji ɛmɛtɔn blebu kpo zinzin ɛmɛtɔn bisese, kpodo hɔnhlɔn ɛmɛtɔn bisese, amɔ yi owan na ɛmɛ hatɔ le ɖi ɛmɛ tete ha, exin lɔ mɔ nyɔ hugan avɔsinsan fifyɔ kpodo avɔsannuye bisese.» ³⁴ Ke Yesu kpɔn tun e mɔ lɔ oxo kpo onunywɛ kpo, e lɔ ni-i tun :« Xɔluɖuɖu Mawutɔn lɔ hɔn dɛn do we nɔ.» Ɛmɛ ti ko mɔ xa kan oxo ɖe se wu Yesu ke. ³⁵ Yesu yi xo bo mɔ xwi onukpinkplan ɛmɛye le Mawu we oxwe lɔ gbe, bo lɔ nɔ tun :« Naɖe lɛ e nyi ɖo na osɛnkplan-ɛmɛtɔye nɔ do lɔ tun Klisu lɔ Davidi vyɔ jɛn mɛ e mɔ nyi? ³⁶ Gbigbɔ kinkwɛn lɔ gbɔn Davidi lɔ teteŋutɔ ji tun byo : Xwetɔ Mawu lɔ na Xwetɔ tɛye xinnɔ nyi le aɖusi tɛye mɛ, gbɔɔn do yi hwekenu na ko na sɔ kɛntɔ tɔweye do wasi afɔtutunu tɔwe. ³⁷ Davidi lɔ tete xɛn yɔ-ɛ byo Xwetɔ tɛye , na ɖe e wa do nyi Ovyɔ kpoŋu?» Gbɛto susu bo ɖoto oxo etɔn nɔ kpo jijwɛ. ³⁸ Le onu kpinkplan etɔn mɛ, e lɔ nɔ tun byo :« Mi cɔ miaɖe do Osɛnkplan-ɛmɛtɔye wu, ojlo yetɔn wɛ nɔ nyi byo, ye a ɖisa nɔ kpo awu gaga gblɛlɛlɛ le okɔ, ɛmɛye mɔ do ogbe na ye nɔ kpo sisi kpo le dogbaye ji, ³⁹ ye mɔ xinnɔ nyi le okpo tantyɛntɔnye ji le okpletyɔn yetɔnye kpodo agɔɖutyɔnye. ⁴⁰ Nu kena kposwu ɖo ye ye nɔ yi-i le ye si a bo le ɛɖɛ gaga xokɔn na oganxixo susu, na ɛmɛye a do kpɔn ye. Oto kena Mawu na do na ye, e na syɛnxu taŋu.» ⁴¹ Le oxwe Mawutɔn lɔ gbe, Yesu xinnɔ nyi bo kpaŋukɔn onunina we ɖaka lɔ bo kpɔ kena ɛmɛye o sɔ onunina yetɔnye sɔ do ɖaka lɔ mɛ nɔ ɖo. Dɔkunnɔ susu bo sɔ oho susu sɔ do emɛ nɔ. ⁴² Nahwe kposwu ayanɔ ɖe va, bo sɔ ohogan owe ke hwe hu oho gbokpweye bisese, sɔ do onunina we ɖaka lɔ mɛ. ⁴³ Yesu yɔ nukplanvi etɔnye, bo lo na ye tun lɔ byo :« Ko lɔ na mi nɔ le xojɔxo mɛ, kposyu ayanɔ ke, e na onu hugan ɛmɛ gbokpweye bisese. ⁴⁴ Ɖo ɛmɛ gbokpweye oho zandrɔn yetɔnye wu wɛ ye ve sɔ le bo do na.