¹ Hwekenu na ye tɛkpɔ Jeluzalɛmu we toxo nɔ, ye bo le Bɛtifaje kpo Betani kpo we axa, le oxo ke ji na olivutinye le we akpaji, Yesu ɖo nukplanvi etɔn owe dodan, ² bo lɔ na ye lɔ tun byo :« Mi yi otota ke le ŋukɔn na mi mɛ. Na mi gbɛ ɖyɛ emɛ, mi na kpɔn osɔ kɛtɛvi ɖe ke ji na ɛmɛ ti hɔn xɛ kpɔn. Mi tun okan ni-i amɔ sɔ-ɛ va. ³ Na emɛɖe kan mi se tun ŋunɛ dɔn na mi do wa emɔ ha nɔ ja, mi mɔ lɔ ni-i lɔ tun byo :« Xwetɔ lɔ mɛ mɔ ɖo ohyan etɔn. E na jo-e do zɔnɖokpo e mɔ va bwɛ.» ⁴ Ye yi bo kpɔn osɔ ketɛvi ɖe le kannu le omɔ lɔ ji le agbo ɖe we axa. Ye bo tun okan ni-i. ⁵ Ɛmɛ ke le blɛ lɛye we ɖeye bo lɔ na ye tun lɔ byo :« ŋunɛ mi wa nɔ xin lɔ? Ŋunɛ wa na mi do tun okan na osɔ kɛtɛvi xin lɔ nɔ?» ⁶ Ye bo ɖo e wu ni-i ɖi kena Yesu lɔ-ɛ ɖo na ye ha. Ɛmɛ lɛye bo jo ye do ye bo sɔn. ⁷ Ye bo hɛn osɔ kɛtɛvi lɔ ve na Yesu bo fɔ ye we awu ye do e ji,Yesu bo xinnɔ nyi le e ji. ⁸ Ɛmɛ susu ye bo tɛ ye we awu do omɔ lɔ ji nɔ, ɛmɛ ɖeye bo tɛ ama kena ye o gbo ye do omɔ lɔ ji nɔ. ⁹ Ɛmɛ ke le ŋukɔn kpodo ɛmɛ ke le godo na Yesu ye, bo do axwa nɔ tun byo :« Gigo na Mawu! ¹⁰ Mawu ni do na ɛmɛ ke gbɔnnɔ le Xwetɔ Mawu we nyikɔ mɛ! Mawu ni do na Xɔluɖuɖu ke gbɔnnɔ lɔ, Davidi mía dagbwɔ we Xɔluɖudu lɔ! Gigo na Mawu le sɛxwe!» ¹¹ Yesu ɖyɛ Mawu xwe lɔ le Jeluzalɛmu, ke e sa ŋukunsin bo kpɔn onu bisese vɔ, e sin Betani, i kpo onukplanvi weve lɛye kpo, ɖo, ozan o do nɔ. ¹² Onyihinhɔn atɔngɔgbe etɔn, hwekenu na ye lɛ le Betani nɔ, xovɛ ci Yesu. ¹³ E kpɔn Figitin ɖe ɖodan amaye bo le e ji, e bo zɔn yi ekɔn a do kpɔn tun sinsɛn ɖe na le e ji jaa. Ke etɛkpɔ-ɛ, ama ye kɛɖɛ jaan wɛ ekpɔn, ɖo, e hɔn nyi figi we hwenu. ¹⁴ I wɛ Yesu lɔ na figitin lɔtun byo :« Ɛmɛ ti hɔn na mɔ ɖu okun sinsɛn tɔwe kpɔn gbeɖe!» Onukplanvi etɔnye bo se oxo xin lɔ. ¹⁵ Ye va Jeluzalɛmu. Ke Yesu ɖyɛ Mawu we oxwe lɔ gbe, e xwi ɛmɛ ke sa onu nɔ ye kpo ɛmɛ ke xɔ onu nɔ ye nyinya, e fli oho cɛtɔye we tavoye kpodo hɔnnɛ satɔye we okpo ye cɔn, ¹⁶ e ko jo ɛmɛ ti do na e gbɔn oxwe lɔ gbe kpo agban ɖe. ¹⁷ I wɛ e kplan onu wu ye nɔ, bo lo na ye nɔ tun byo :« E hɔn le wiwlan le Mawu we oxo lɔ mɛ tun lɔ byo " ye na yɔ oxwe tɛye tun ɛɖɛxoxwe otogunye bisese tɔn wɛɛ?" Vɔ mi sɔ do ɖo jagudaye we okple ɖotyɔ.» ¹⁸ Avɔsantɔ daxoye kpo osɛnkplan-ɛmɛtɔye se oxo xin lɔ, bo ba ayixa na do hui-i. Vɔ, ye bo vɔ-ɛ nɔ, ɖo, onukpinkplan etɔn nɔ jɛŋu na emɛ susu. ¹⁹ Ke hwedo do, Yesu kpo nukplanvi etɔnye tɔn le toxo lɔ mɛ. ²⁰ Hwekenu ye va yi nɔ le kɛklɛnu, ye kpɔn figitin lɔ xu gbɔn do yi ogunnu. ²¹ Piyɛ ɖoŋu do onu ke jɛ lɔ wu, bo lɔ na Yesu tun byo :« Hlabi, kpɔn figitin ke o donu wu lɔ e xu.» ²² Yesu ɖo e wu na ye tun byo :« Mi kan do Mawu ji. ²³ Le xojɔxo mɛ ko lɔ na mi nɔ, na ɛmɛ ɖe lɔ na oso ke tun, kɔ ɖiwe tɛ le blɛ amɔ ve jɛ ɛxu mɛ, ɛmɛ lɔ ko xo kpɔn le oji etɔn mɛ, vɔ bo kan do e ji le oji etɔn mɛ byo oxo kena he m:ɔ lɔ ma jɔ, e na kpɔn e mɔ jɔ ɖo em:ɔ ha ni-i. ²⁴ I wɛ wa na ko do lɔ na mi no tun byo : nuɖe kpokpwe ke mi na byɔ le ɛɖɛ xixo mɛ, mi ɖo kan do e ji byo miye mo yi-i. ²⁵ Hwekenu na mi le ote bo xo ɛɖɛ nɔ, na mi ɖo onu ɖe kpanŋukɔn mɛɖe, mi sɔ kɛ-ɛ, exin, Miatɔ ke le sɛxwe can mɔ sɔ ɛhwɛ miatɔnye sɔ kɛ mi. ²⁶ Vɔ na mi hɔn nɔ sɔ ɛhwɛ sɔ kɛ ɛmɛ, Miatɔ ke le sɛxwe hɔn sɔ ɛhwɛ miatɔnye can sɔ kɛ mi nɔ.» ²⁷ Ye trɔ gbɔn va Jeluzalɛmu we toxo lɔ mɛ. Yesu bo yi nɔ, bo gbɔn nɔ le Mawu we oxwe lɔ gbe. Avɔsantɔ ɖaxo Mawutɔnye, Osɛnkplɔn-emetɔye kpodo Otomɛhyɔnye bo tekpɔ-e. ²⁸ Ye kan-ɛ se tun byo :« Ɛcɛ enɛ mɛ lɛ o nɔ wasi onu xinye le?» ²⁹ Yesu bo ɖo e wu na ye tun byo :« Ma kan oxo ɖokpo ge se wu mi, mi mɔ ɖo e wu na,-a, exin ko mɔ lɔ ɛcɛ ke ko do wa onu xin lɛye nɔ na mi. ³⁰ Mɛɛ ɖo Jan ɖodan byo ni mɔ ve lɛ Mawu we esin na ɛmɛye? Mawu wɛ loo alo gbetɔye wɛɛ? Mi ɖo e wu na-a.» ³¹ Vo ye bo xwi, lilɔ na yeɖeye tun :« Na mí byo Mawu mɛ, e na kan mí se tun, ŋunɛ wa na míye hɔn do kan do e ji jaa? ³² Vɔ ɖe gbɛtɔye kɔn wɛ mí na byo e mɔ sɔn?...» Vɔ ye vɔ na ɛmɛye nɔ, ɖo ɛmɛ bises wɛ nyɔ-ɛ byo Jan mɔ nyi oxolɔɖenyitɔ Mawutɔn. ³³ I we ye gbɔjwɛ ɖo e wu na Yesu tun byo :« Mí hɔn nyɔ-ɛ.» Yesu bo lɔ na ye tun byo : Bo can ko hɔn lɔ ɛmɛ ke na ɛcɛ wu na ko do wa onu xinlɛye nɔ, na mi nɔ.»