¹ Yesu lɛ le blɛ, bo yi Jude we kansinmɛ, bo mɔ yi Judɛn we otɔsisa lɔ godo. Ɛmɛ susu bo mɔ ve kple do ekɔn ke, e bo mɔ kplanu wu ye nɔ ɖi ke e le walɔ mɛ ni-i, e bo nɔ wasi ɖo san ha. ² Falizitɔ ɖeye bo tɛkpɔ-ɛ, a do do omo ni-i, ye bo kan-se nɔ tun byo :« Osɛn míatɔn ɖe mɔ byɔ ŋusunglo tu ni mɔ gbɛ osyɔ wɛɛ?» ³ Yesu bo ɖo ewu na ye tun byo :« Osɛn nɛ lɛ Mɔyizi do na mi?» ⁴ Ye bo lɔ byo :« Mɔyizi ɖe mɔ byo ye mɔɔ wlan nyɔnu gbigbɛ we wema a mɔ do nya ɛme syɔ.» ⁵ I wɛ Yesu lɔ na ye lɔ byo :« Oto titli miatɔn wɛ dɔn Mɔyizi do wlan onu xin lɔ na mi.» ⁶ Vɔ le ɛgbɛ lɔ we titɔ eji, ke Mawu ɖo ŋunsunglo kpo nyɔnusi, ⁷ ŋusunglo ɖo na lɛ le otɔ kpo onɔ kpo kɔn, amɔ vɛ tɛ do osyɔ wu, ⁸ ye mɛ owe lɛye mɔ trɔ zun gbaza ɖokpo gee. Ke e le e mɔɔ, ye hɔn mɔ nyi ɛmɛ owe, vɔ yenyi gbaza ɖokpo gee. ⁹ Hun bɛ gbɛtɔ ni ko o klan onu kena Mawu ca.» ^{10 11 12} Ke ye ve jɛ xwegbe, nukplanvi lɛye mɔ kan xo se wu-i do oxo xin lɔ wu. Yesu bo lɔ na ye tun lɔ byo :« Na ɛmɛ ɖe gbɛ osyɔ bo ve ɖe nyɔnu bu, e da le nyɔnu tantyɛn lɔ ji, Na nyɔnusi ɖe gbɛ oswɔ bo ve ɖe osu bu, e do afɔgbe.» ¹³ Ɛmɛye bo kplɔ vikpɛ yetɔn ye do va Yesu kɔn nɔ e mɔ do ɖo alɔ ye ji, vɔ nukplanvi lɛye, bo gbɛ na ye nɔ kpo adan kpo. ¹⁴ Vɔ, ke Yesu kpɔn ye, e hɔ jɛ ŋu ni-i, e bo lɔ na ye lɔ byo :« Mi jo vikpɛ lɛye do ye a va kɔn ye, mi ko mɔ tu omɔ do ye. Ɖo Xɔluɖuɖu Mawutɔn lɔ, ɛmɛ ke le ɖi vikpɛvi ye ha tɔn wɛ enyi. ¹⁵ Le oxojɔxo mɛ, ko lɔ na mi nɔ, ɛmɛ ɖekpokpwe ke na hɔn na yi Xɔluɖuɖu Mawutɔn lɔ ɖi ke na vikpɛviye na yi-i ɖo ha, e hɔn na ɖyɛ emɛ kpɔn gbeɖe. ¹⁶ Yesu bo dɔn vikpɛ lɛye do abɔ mɛ bo ɖo alɔ ta na ye. ¹⁷ Ke Yesu je mɔ, dahwe ɖe do o dun vɛ jɛklita le akɔnmɛ ni-i, bo kan-ɛ se nɔ tun byo :« Onukplan ɛmɛtɔ nywɛ, ŋunɛ ko na wa a do kpɔn ɛgbɛ mavɔmavɔ?» ¹⁸ Yesu bo lɔ ni-i tun byo :« Ŋunɛ wa na odo yɔ byo ɛmɛ nywɛ? ɛmɛ ti hɔn nyi ɛmɛ nywɛ zɛgbɔn Mawu ɖokpo gee wu. ¹⁹ O nyɔn osɛn lɛye, lɛye: ko hu ɛmɛ ; ko hu ɛmɛ, ko do afɔ gbe, ko fin efin; ko ɖe kunnu nyinyla ɖe do mɛ ɖe wu; ko tafu ɛmɛ ɖe; bu ɖi didawe kpo nawe.» ²⁰ Dahwe lɔ bo lɔ tun byo :« Nukplan ɛmɛtɔ sɔn hwanjɛvi tɛye mɛ gbɔɔn wɛ ko nɔ zɔn do osɛn xin lɛye bisese ji.» ²¹ Yesu kpɔn-ɛ bo yi owan ni, bo lɔ ni lɔ tun byo :« Onu ɖokpo gee wɛ hwe do we : ve sa onu ke odo ye bisese, omɔ ma oho lɔ na ayanɔ ye, omɔ do ɖo dɔkun le sɛxwe. Exin godo, omɔ va, a mɔ kplɔdo.» ²² Ke dahwe lɔ se oxo xin lɔ, agbɔ kpe, e bo sɔn, bo le onulinkpɔn mɛ taŋu, ɖo dɔkunnu le e si taŋu. ²³ Yesu kpɔn ɛmɛ ke lɛdo-e ye, bo lo na nukplanvi etnye tun lɔ byo :« E na syɛnxu na ɛmɛ ke ɖo dɔkunnuye, na do ɖyɛ Xɔluɖuɖu Mawutɔn mɛ!» ²⁴ Oxo xin lɛye kpaca do nuplanvi etɔnye. Vɔ Yesu mɔ vɔ lɔ na ye ke lɔ tun byo :« vikpɛ tɛyee mi, xɔɖuɖu Mawutɔn mɛ ɖiɖyɛ, na syɛnxu taŋu. ²⁵ Cinwi we otro mɛ gbigbɔn na bɔ-ɛwu na osɔ kpotɔnɔ hugan byo : dɔkunnɔ a do ɖyɛ Xɔluɖuɖu Mawutɔn lɔ mɛ.» ²⁶ E kpaca do ye ɖaxo, ye bo kanse yeɖe nɔ lɔ byo :« Mɛɛ na kpɔn hlɛngan lɔ hin?» ²⁷ Yesu kpɔn ye bo lɔ na ye lɔ byo :« Gbɛtɔye wɛ hɔn kpewu, vɔ Mawu kpewu, ɖo, nuti hɔn nɔ glo wiwa na Mawu.» ²⁸ Piyɛ bo xwi lilɔ ni lɔ byo :« Míye mí jo onu ke mí ɖo ye bisese do,bo plɔ we do.» ²⁹ Yesu bo ɖo ewu ni tun byo :« Le oxojɔxo mɛ ko lɔ na mi nɔ, na ɛmɛ ɖe jo oxwe do bo jo nɔvyɔ ŋusunglo kpodo nyɔnusiye, Otɔ, Onɔ, alo ogle ye do, do blɔ kpo ɛwɛn nywɛ lɔ wu, ³⁰ Mawu na ni onu xin lɛye we donu kanweko le ɛgbɛ ke mɛ : oxweye, nɔvi ŋusungloye , nyɔnusiye, onɔye, otɔye, vikpɛye, ogleye kpo ofunɖiɖe na ɛmɛye, amɔ ni-i ɛgbɛ mavɔmavɔle ɛgbɛ ke gbɔnnɔ mɛ. ³¹ Ɛmɛ susu le ɛmɛ tantyɛn ye me na va nyi eme kpotwi, ɛmɛ susu le emɛ kpotwi ye mɛ mɔ va nyi ɛmɛ tantyɛn.» ³² Ye le mɔji do sin Jeluzalɛmu nɔ, Yesu bo le ŋukɔn na ye. Onukplanvi lɛye bo le onulilɔ mɛ, ɛmɛ ke kplɔ-ɛ do ye bo vɔ nɔ. Yesu bo mɔ trɔ yɔ onukplanvi weve lɛye do axa, bo xwi onu ke ba jɔ do eji nɔ zaanɖe lilɔ na ye ji. ³³ E lɔ na ye tun byo :« Mí yi Jeluzalɛmu nɔ , i we ye na so gbɛtɔ we vi lɔ amɔ so jo na avɔsatɔɖaxoye kpo osɛnkplanemɛtɔye. Ye mɔ gbo oku we ehwe ni-i, amɔ sɔ jo na ɛmɛ ke hɔn nyi jwifuye. ³⁴ Ye mɔ ko-e, amɔ tun tan do ŋumɛ ni-i, amɔ xo-e kpodo lanba, amɔ hwi, onyihinhɔn atɔn gɔ gbe etɔn, emɔ fɔn sɔn oku.» ³⁵ Jaki kpo Jan ke nyi Zebede vikpɛye, tekpɔ Yesu bo lɔ ni-i nɔ tun lɔ byo :« Nukplan ɛmɛto, mí ba tun nu ke mí na byo we, i mɔ wasi na mí.» ³⁶ E bo kanye se tun byo :« ŋunɛ mi ba ma wa na mi?» ³⁷ Ye bo do ewu tun byo :« Ɖemɔ na mía va xinnɔnyi le axa na we, le hwekenu na o na va le gigo tɔwe mɛ.» ³⁸ Yesu bo lɔ na ye tun byo :« mi hɔn nyɔ nu ke na mi byɔ nɔ lɔ. Mi na kpewu a bo nu vivɛ suse we kɔfo ke ko ba nu nɔ lɔ, alo ye na kpewu a bo lɛ vivesise we ɛsin na mi ɖi ke ye ba lɛ ɖo na nɔ ha?» ³⁹ Ye bo ɖo ewu ni-i tun byo :« Mí kpewu» Yesu lɔ na ye tun byo :« Mi na va nu vivɛsise we kɔfo ke ko ba nu nɔ lɔ, mi na va lɛ vivɛ sise ke ye ba lɛ na nɔ lɔ. ⁴⁰ Vɔ, ke nyi axinnɔ nyi le axa na tɔn, bo hwɛn na sɔ na ɛme, ɛmɛ kena Mawu jla tɛnxo xinlɔ ɖenyi na ye, tɔn wɛ e nyi.» ⁴¹ Onukplanvi owo gbokpwe lɛye ke se oxo xin lɛye, bo do aɖi do Jaki kpo Jan. ⁴² Yesu yɔ ye bo lɔ na ye tun byo :« Mi nyɔ-ɛ tun ɛmɛ keye nɔ kpɔn ɖi otogaye ha, nɔ kpɛ cɛna otogun yetɔnye gannu-gannu, ɛmɛ ɖaxo-daxo ye mɔ kpa ɛce do ye ji. ⁴³ Ni ko nyi emɔ le mía mɛ́, vɔ ɛmɛ ɖekpokpwe ke ba na nyi ɛmɛ ɖaxo le mia mɛ, ni nyi odnsɔvi miatɔn. ⁴⁴ Na ɛmɛ ɖe ba na nyi ɛmɛ tantyɛn le mia mɛ, ni nyi ɛmɛxixɔ na ɛmɛ bisese. ⁴⁵ Ɖo gbɛtɔ we vi lɔ hɔn va byo ye amɔ sɔ odan ni-i, vɔ e va a do sɔ odan na ɛmɛ ye, amɔ do sɔ ɛgbɛ etɔn do tu axɔ do ota na ɛmɛ susu.» ⁴⁶ Yesu ve jɛ Jeliko we toxo mɛ. Ke Yesu tɔn le Jeliko kpo nukplanvi etɔnlɛye kpodo ɛmɛ susu geɖe-geɖe ɖeye, ŋuvanɔ Batime ke nyi Time vyɔ, xinnɔ nyi le omɔ lɔ to bo byɔ onu nɔ. ⁴⁷ Ke e se tun Yesu Nazalɛti tɔn mɛ, e xwi axwa dido lɔ byo :« Yesu Davidi vyɔ kpɔn dɔŋuɖunu na!» ⁴⁸ Ɛmɛ susu bo do axwa do ota na dahwe ŋuvanɔ lɔ nɔ byo ni mɔɔ bɔnu vɔ emɔ do axwa do e ji taŋu, tun byo :« Davidi vyɔ, kpɔn dɔŋuɖunu na-a!» ⁴⁹ Yesu bo tre bo lɔ tun byo :« Mi yɔ-e va na-a.» Ye bo yɔ ŋuvanɔ lɔ bo lɔ ni lɔ byo :« Do ji e yɔ we nɔ.» ⁵⁰ E bo ɖe awu ɖaxo etɔn flɛn, bo cite sin Yesu kɔn. ⁵¹ Yesu bo yi xo bo lɔ ni-i tun byo :« Ŋunɛ o ba ma wa na we?» Ŋuvanɔ lɔ bo ɖo ewu na Yesu byo :« Nukplan-ɛmɛtɔ, ko ba lɔ byo ma xwi onu kpinkpɔn!» ⁵² Yesu bo lɔ ni-i lɔ tun byo :« Va sɔn, do xɔse ke o ɖo wu,o kpɔn hwlɛngan, le tɛnxo lɔ mɛ zɔnɖokpo, ŋukunsi hun ni-i e bo kplɔ Yesu do le omɔ lɔ ji.