¹ Hwekenu na ŋukɔnɖe, avɔsantɔ ɖaxo Mawutɔnye kpodo agunmɛhyɔnye va bla ogbe a do hu Yesu lɔ. ² Ye bo wle bo bla-ɛ; bo kplɔ-ɛ sɔ ve e na otoga Pilati. ³ Kena Juda ke sa Yesu lɔ va kpɔn tun ye mɔ dfa ɛhwɛ na Yesu lɔ, e va ɖɔli jijɔ bo lɛkɔ bo ve sɔ ohogan ogban lɔ bo ve sɔ na avɔsantɔ ɖaxo kpodo agunmɛhyɔn lɛyee, ⁴ bo lɔ na ye lɔ byo: « Onu nyinyla wɛ ko wasi do sa ɛmɛ ke hɔn nyɔ onu ti we odo.» Vɔ yee bo va lɔ ni-i tun: «Fye lɛ exin lɔ kan mí do? Iwɛ e kan.» ⁵ E bo sɔ oho lɔ bo sɔ kunhun do agunxɔ lɔ mɛ, bo tɔ, bo ve do okankɔ bo ku. ⁶ Avɔsantɔ ɖaxo lɛye bo bɛ oho lɔ bo lɔ lɔ byo: «E hɔn jɔhun tun mí na sɔ oho ke lɔ a sɔ do oho we ɖaka míatɔn mɛ ɖo ɛhun we ho wɛ.» ⁷ I wɛ yee va sɔ gbeta bo do sɔ oho xin lɔ do ve ogle ɖe ke gbe na ye na nɔ ɖi jɔnɔye we ocɔ do. ⁸ Exin lɔ wɛ dɔn na ye nɔ do yɔ ogle xin lɔ tun: «Ɛhungle» e bo le ɖemɔ gbɔɔn do va jɛ egbe. ⁹ Hun onu kena oxolɔɖenyitɔ Mawutɔn Jelemi o lɔ san lɔ va cicɛ mɛ hwekenu e lɔ tun: « Ye sɔ ohogan ogban, ¹⁰ bo sɔ jlɛ do Izrayɛli we togun lɔ wu bo sɔ-ɛ do xɔ ogle ɖe, ɖi kena Xwetɔ lɔ o ɖegbe etɔn ɖo ha.» ¹¹ Syɛ, ye sɔ Yesu do va Otoga Pilati kɔn, wɛ otoga lɔ kanse wu-i tun: « Lɔ wɛ nyi xɔlu Jwifuye tɔn?» Yesu bo ɖo e wu ni-i lɔ byo: « O lɔ-ɛ.» ¹² Vɔ hwekenu na avɔsantɔ ɖaxo ye kpo agunmɛhyɔnye do ɛhwɛ ni-i vɔ, e hɔn ɖo oxo ti e wu na ye. ¹³ Pilati bo lɔ ni-i lɔ byo: «Hɔn se ɛhwɛ ke ye do na we nɔ lɛye wɛɛ?» ¹⁴ Vɔ e hɔn do ɖo oxo ɖokpo tete e wu na yee can, onu xin lɔ bo kpaca do otoga lɔ taŋu. ¹⁵ E bo le walɔ mɛ na otoga xin lɔ tun na ye va ɖu vivayi we oxwe yetɔn nɔ, e nɔ ɖegbe na mɛ ke le gankpa mɛye ke na togun lɔ yi ogbe na, e mɔ tɔn le gankpa lɔ mɛ. ¹⁶ Le hwexin lɔ nu, ɖahwe ɖe le gankpamɛ ye bo nɔ yɔ-ɛ tun Banabasi. ¹⁷ Wɛ hwekenu na ye mɛ bisese va kple, Pilati kanse wu togun lɔ tun: «Mɛnɛ lɛ mi jlo tun na ma jodo na mi? Banabasi alo Yesu ke ye nɔ yɔ tun Klisu?» ¹⁸ Pilati lɔ bo nyɔ-ɛ tun he mɔ na na ogbe a mɔɔ do ɖe Yesu tɔn dogbɔn ɛwuhwinhwan mɛ. ¹⁹ Ganke mɛ na e le onyi xinnɔ le xɔlu zinkpwe lɔ ji, osyɔ va e kɔn bo lɔ ni-i lɔ byo: « Ka ɖo alɔ le ɖahwe ke hɔn kpɔn do na onu ti xin lɔ we oku mɛ; ɖo ko se vivɛ egbe taŋu le odrɔ tɛye mɛ do ota etɔn mɛ.» ²⁰ Wɛ oga lɛye kpodo agunmɛhyɔn lɛye va jɛ axwa do ji tun ni mmɔ ɖe Banabasi tɔn amɔɔ hu Yesu lɔ. ²¹ Otoga lɔ bo kan ye se tun: « Mɛnɛ lɛ ko na ɖe tɔn na mi?» Ye bo ɖo e wu ni-i tun: «Banabasi.» ²² Pilati bo kanse wu yee tun: «Naɖe ko na hɛndo na Yesu? Yee mɛ bisese bo ɖo e wu ni-i lɔ byo: «Kan-ɛ do otinsogaji.» ²³ Pilati bo kan ye se tun: ŋunɛ dɔn, ɛhwɛ nɛ lɛ ehu?» Vɔ yee bo mɔ do axwa nɔ d'eji sinsyɔ tun: «Kan-ɛ do otinsoga ji.» ²⁴ Exin Pilati va kpɔn tun he mɔ hɔn mɔ kpe onu ti wu mɔ na wa a do hwlɛn Yesu lɔ gan, vɔ onu ɖe bo va jɔ, e bo sɔ ɛsin, bo klɔ alɔ etɔnye le ŋukɔn na togun lɔ bo lɔ tun: «Ko hɔn ɖo alɔ le dahwe ke hɔn kpɔn odo na onu ti ke we oku mɛ. Miye te mi kpɔn.» ²⁵ Togun lɔ bisese bo lɔ nɔ tun: «Ɛhun etɔn ni kɔn do míye kpodo vikpɛ miatɔnye ji.» ²⁶ Exin we godo, e va ɖe Banabasi tɔn na yee vɔ bo do oxa na Yesu bo sɔ-ɛ sɔ jo na yee na yee a do kan-ɛ do otinsoga ji. ²⁷ Exin sɔja otoga lɔ tɔn ye bo kplɔ Yesu do yi oxwe etɔn gbe, sɔja gbokpweye bisese bo lɛ dwe. ²⁸ Ye ɖe awu ni-i, bo sɔ awu ovɛ ɖe bo sɔ do ni-i. ²⁹ Ye sɔ ɛwun bo do lɔn xɔlugba bo sɔ cɔn ni-i, bo kan otin ɖe bo sɔ ɖo aɖusi mɛ ni-i, exin we godo, ye nɔ jɛ klita le ŋukɔn ni-i, a bo ko-e nɔ, a bo lɔ ni-i nɔ lɔ byo: «Mí do ogbe na we, Jwifuye we xɔlu!» ³⁰ Ye nɔ tun otan do ŋumɛ ni-i a bo sɔ otin lɔ a do xo ota ni-i. ³¹ Kena ye ko-e vɔ, ye ɖe awu ovɛ lɔ le okɔ ni-i, bo mɔ sɔ onudido etɔnye sɔ ni-i, bo dɔn-ɛ do sɔn nɔ a do ve e kan-ɛ. ³² Hwekenu na ye tɔn, ye kpɔn dahwe ɖe ke ye nɔ yɔ tun Simɔ e bo nyi Silɛnutɔ, ye bo kɔ Yesu we otinsogagban lɔ do okɔ ni-i gannu-gannu. ³³ Ye bo va jɛ ofi ɖe ke ye nɔ yɔ tun Gɔlugota, ke we gɔnmɛ nyi tun: «Taka we tɛnxo.» ³⁴ Ye bo na vɛn ke mɛ na ye kɔn onu vivɛ taŋu do wu-i, vɔ kena Yesu ɖɔ-ɛ kpɔn, e gbɛ nunu. ³⁵ Kena ye kan-ɛ vɔ, ye va wasi ovoɖiɖe bo do ma onidido etɔnye; ³⁶ ye bo xinnɔnyi bo do kpɔn-ɛ nɔ. ³⁷ Ye bo wlan do tɛkpo ɖe ji tun: «Yesu ke nyi Jwifuye we xɔlu.» bo sɔ kan do ota ni-i. ³⁸ Ye bo mɔ kan ajotɔ owe can do axa na Yesu lɔ, ɖokpo do aɖusi mɛ etɔn, ɖokpo do amyɔ mɛ etɔn. ³⁹ E nyi mɛɖe va din nɔ, ye nɔ zun-i a bo bo hunhun ota ⁴⁰ a bo lɔ tun: « Lɔ mɛ ke nɔ lɔ tun he mɔ na gba agunxɔ lɔ , mɔ na mɔ gba-ɛ le ŋukɔnɖiɖe atɔngɔ etɔn gbe, hwlɛn ɖiwe gan! E nyi tun ovi Mawutɔn jan wɛ o nyi, jɛte le otinsoga lɔ ji!» ⁴¹ Ɖemɔha ke wɛ, avɔsantɔ ɖaxo Mawutɔn lɛye kpo osɛnkplan-ɛmɛtɔ lɛye kpodo agunmɛhyɔn lɛye can nɔ ko-e o nɔ, tun: ⁴² «E nɔ hwlɛn ɛmɛye gan vɔ e ko kpewu na hwlɛ eɖe gan can. E nyi xɔlu Izrayɛlitɔn, ni jɛte le otinsoga lɔ ji exin mí na kandeji. ⁴³ Yesu lɔ bo kando Mawu ji, tun Mawu mɔ hɛn e mɔ na hwlɛn he gan ɖo e lɔ tun: « Mawu we ovi wɛ ko nyi.» ⁴⁴ I wɛ ajotɔ ke ye kan do axa na Yesu lɔ lɛye can nɔ ko-e nɔ ɖemɔ ke. ⁴⁵ Bɛ sɔn gan weve mɛ, vuvlu do le nyidan lɔ ji bisese gbɔn do va yi gantɔn mɛ. ⁴⁶ Le gantɔn mɛ emɔha, Yesu do axwa sinsyɛnxu ɖe bo lɔ tun: «Eli, Eli, lama sabatani» i we gɔnmɛ wɛ nyi tun: « Mawu tɛye, Mawu tɛyeŋunɛ jɔ na o do jo-o do?» ⁴⁷ Kena mɛ ke na le blɛ lɛye diye se axwadido etɔn lɔ, ye lɔ tun lɔ byo: «Mi kpɔn e yɔ Eli nɔ.» ⁴⁸ Le zɔnɖokpo mɛɖokpo cite bo do wedun bo sɔ otu ɖe sɔ nylɔ do vɛn hwinhwan mɛ, bo trɛ-ɛ do otin wu, bo drɛn-ɛ ɖodan Yesu, na ni a nu. ⁴⁹ Ɛmɛ kpokpweye bo lɔ ni-i nɔ tun: « Jo-e do; mía kpɔn tun Eli na va hwlɛn gan wɛ ja.» ⁵⁰ Yesu bo do mɔ do axwa bu sinsyɔn bo jo gbigbɔ do (e ku). ⁵¹ Zɔnɖokpo, xɔmɛgbovɔ ke le Mawu we oxwe lɔ gbe bo ma ɖo owe sɔn jihwe gbɔɔn do va yi odo. Ŋyidan bo hunhun, ɛkpɛn ɖaxo-ɖaxuye bo fɛn. ⁵² Yɔgunye hun, wɛ xɔse susu ke na ku san yee bo fɔn sɔn oku. Kena Yesu va fɔn sɔn oku vɔ, ⁵³ xɔsetɔ xin lɛyee ke na o fɔn sɔn oku, tɔn sɔn yɔgun lɔ mɛ, bo ɖyɛ Jeluzalɛmu we toxo kinkwɛn lɔ mɛ, ɛmɛ susu bo kpɔn ye. ⁵⁴ Kena sɔjakanwekoga lɔ kpo sɔja ke na cɔ Yesu nɔ lɛye kpɔn tun nyidan mɔ hunhun kpo onu kena jɔ lɔ, yee vɔ taŋu, bo lɔ tun: « Le xojɔxo mɛ, Mawu we vi wɛ nyi mɛ ke lɔ.» ⁵⁵ Nyɔnusi susu ke xodo Yesu sɔn Galile gbɔɔn bo nɔ do sɔ odan ni-i nɔ yee, le blɛ lɔ, mi kpɔn ojlɛ lɔ. ⁵⁶ Le nyɔnusi xin lɛye mɛ, Mali Madalatɔn kpodo Mali Jaki onɔ kpo Jozɛfu, bo mɔ nyi onɔ na Zebede we vikpɛye. ⁵⁷ Ke hwedo do, dahwe ɖokpo nyi Alimatetɔ, ye bo nɔ yɔ-ɛ tun Jozɛfu i can gba bo nyi onukplanvi Yesutɔn va. ⁵⁸ E bo va yi Pilati kɔn bo byɔ ogbe wu-i a do kɔ Yesu we ocɔ lɔ a do ve ɖi. Pilati bo va na ogbe wu-i tun ye ni mɔɔ sɔ Yesu we ocɔ lɔ sɔ ni-i. ⁵⁹ Jozɛfu bo va sɔ ocɔ lɔ bo butwi do avɔ wewe mimɛ ɖe mɛ, ⁶⁰ bo va sɔ-ɛ sɔ do yɔgun yɔyɔ kena e na oho ye bo ɖe ni-i do oso lɔ mɛ. Exin we godo, e bli ɛkpɛn ɖaxo ɖe sɔ tun yɔgun lɔ nu bo lɛkɔ bo sin oxwe etɔn gbe. ⁶¹ Mali Madalatɔn kpodo Mali ɖelɔ bo le blɛ, ye bo xinnɔnyi kpanŋukɔn wu yɔgun lɔ. ⁶² Le ŋukɔnɖiɖegbe etɔn ke nyi Jwifuye we gbɔjwɛzangbe, Mawu we avɔsantɔ ɖaxoye kpodo Falizitɔye va yi Pilati kɔn, ⁶³ bo lɔ ni-i tun lɔ byo: « Ɛmɛ ɖaxo mí ɖoŋudo e wu tun hwekenu na ɛmɛblɛɖutɔ xin mɔ gbɛ le ɛgbɛ, e lɔ tun le ŋukɔnɖiɖe atɔngɔgbe, he mɔ na fɔn sɔn oku. ⁶⁴ I wɛ dɔn, ɖe ogbe na ye a cɔ yɔgun lɔ nɔ gbɔɔn do yi ŋukɔnɖiɖe atɔngɔ lɔ gbe, e dɛn hwɛn, onukplanvi etɔnye, na va yi fin ocɔ lɔ, a bo ve lɔ na togun lɔ tun e mɔ fɔn sɔn oku. Ɛmɛ biblɛ ɖu xin lɔ na nyla hugan wu tantɛntɔn lɔ.» ⁶⁵ Pilati lɔ na ye tun: « Mi sɔ ɛmɛcɔtɔ ɖokpo. Mi yi a bo ve cɔ yɔgun lɔ ɖi kena e nyɔ na mi ɖo ha.» ⁶⁶ Ye sɔn bo ve wasi tito do yɔgun lɔ cicɔ wu. Ye bo ɖo josi wu ɛkpɛn ke ye do tu yɔgun lɔ nu, bo sɔ sɔja ɛmɛcɔtɔye sɔ ɖo blɛ lɔ.