¹ Kena Yesu lɔ oxo xin lɛye bisese vɔ, e lɔ na onukplanvi etɔnye tun: ² « Mi o nyɔ-ɛ tun e mɔ drɔn ŋukɔnɖiɖe owe na vivayi we oxwe lɔ ɖuɖu. Ye na sɔ Gbɛtɔ we Vi lɔ sɔ jo na ye a do kan-ɛ do otinsogaji.» ³ Hwekenu na Mawu we avɔsantɔ ɖaxoye kpo otomɛhyɔnye, ve kple le Mawu we avɔsantɔye we oga ke ye nɔ yɔ tun Kayifu dogba ji. ⁴ Yee bo sɔ gbeta tun hiye a mɔ wa ɛyɛ, a mɔɔ wle Yesu, a mɔ hu-i. ⁵ Ɖo yee o lɔ nɔ tun: « Mí hɔn wasi emɔha le oxwe lɔ we ganmɛ nɔ, e hɔn nyi emɔ, otogun lɔ na gbɛ va fɔn ogu.» ^{6 7 8 9} Yesu le Betani le Simɔ ke jɛ gbodo we adɔn san lɔ we xwegbe. ⁷ I wɛ nahwe ɖe bɔ d'ewu, bo hɛn ogo ke ye nɔ sɔ ɛkpe wewe do wasi, do asi, celu oho vivɛtɔn bo gɔ-ɛ. Hwekenu na yesu yi tɛnxo bo na do ɖu onu, nahwe lɔ, ɖɔli celu lɔ do ota ni-i. Ke onukplanvi lɛye kpɔn ɖ'emɔha, e bo vɛ le yee wu, ye bo lɔ tun: « Ŋunɛ jɔ na celu lɔ na do la ɛmɛ ɖ'emɔha? Ye hɛn ye na sa celu xin oho vivɛ, a bo sɔ oho lɔ sɔ ma na ayanɔye.» ¹⁰ Vɔ, Yesu nyɔ oxo ke ye lɔ nɔ lɔ, i wɛ e lɔ na ye lɔ byo: « Ŋunɛ jɔ na mi do do hannu na nahwe lɔ nɔ? Onu nywɛ wɛ e wasi na-a. ¹¹ Ɖo ayanɔye na le miakɔn tɛgbɛ, vɔ, blɔ kɔn nɔ miakɔn nɔ tɛgbɛ. ¹² E hú celu ke na gbaza tɛye, a do jla-a ɖo, ɖ'enyi na ɖiɖizangbe tɛye. ¹³ Le xojɔxo mɛ, ko lɔ na mi nɔ, fiɖekpokpwe ke ye na jla ɛwɛn nywɛ ke lɔ le, le ɛgbɛ lɔ mɛ bisese, onu kena nahwe ke wasi, ye na nɔ lɔ-ɛ a nɔ do ɖoŋu do e lɔ lɔ wu.» ¹⁴ I wɛ Juda Isikalyɔtu ke nyi ɖokpo le onukplanvi Yesutɔnye mɛ, ve kpɔn avɔsantɔ ɖaxo Mawutɔnye, ¹⁵ bo lɔ na yee lɔ byo: «Na ko sɔ-ɛ sɔ jo na mi, ŋunɛ mi na na-a?» Yee bo va xlɛ ohogan ogban bo sɔ sɔ ni-i. ¹⁶ Bɛ sɔn hwexinnu, Juda jɛ ayixa kinkan ji, a do kpɔn omɔ, a bo do sɔ Yesu lɔ sɔ jo na yee. ¹⁷ Le kpɔnnɔ ma ɖo tinkɛn we azan tantɛn gbe, Yesu we onukplanviye ve kan-ɛ se tun: « Fye lɛ ojlo tun mí na ve ɖa vivayi we oxwe lɔ we onuɖuɖu lɔ na we le?» ¹⁸ E bo lɔ na yee lɔ byo: «Mi yi ɛmɛ lele kɔn le toxo lɔ mɛ, a bo lɔ ni-i tun onukplan-ɛmɛtɔ lɔ byo: « Ogan tɛye ba xo nɔ, kɔnwe wɛ ko na ɖu vivayi we oxwe lɔ le, kpodo onukplanvi tɛyee.» ¹⁹ Onukplanvi lɛye bo wasi ɖi kena Yesu dɔn ye ɖo ha, bo ɖa vivayi we oxwe lɔ we onuɖuɖu lɔ . ²⁰ Ke hwedo do, Yesu kpodo onukplanvi weve lɛye yi tɛnxo a do ɖunu. ²¹ Hwekenu na yee ɖu onu lɔ nɔ, Yesu lɔ na yee tun: « Le xojɔxo mɛ ko lɔ na mi nɔ, ɛmɛ ɖokpo le mia mɛ bo na sɔ-ɔ sɔ jo.» ²² E bo kpaca do yee, ye bo jɛ tamɛ bu ji taŋu, ɖokpo-ɖokpo yetɔn bo lɔ nɔ lɔ byo: « Xwetɔ, bo wɛɛ?» ²³ Yesu bo ɖ'ewu na ye lɔ byo: « Ɛmɛ ke do alɔ onugban ɖokpo mɛ kpo-o nɔ, ɛmɛ xin lɔ wɛ ba sɔ-ɔ sɔ jo nɔ. ²⁴ Gbɛtɔ we Vi lɔ na ku ɖi kena ye o wlan do ewu ɖo ha. Vɔ, babaɖe na mɛ ke we alɔ mɛ na Gbɛtɔ we Vi lɔ na nyi si sɔ jo gbɔn! Mɛ xin lɔ, na ye do sɔ nɔ ma ji-i, e na nyɔ ni-i hu.» ²⁵ Juda ke o sɔ-ɛ sɔ jo nɔ lɔ, va yi xo bo kan Yesu se nɔ tun: «Hlabi, bo wɛɛ?» Yesu bo ɖo ewu ni-i tun: «I xɛn o lɔ xin!» ²⁶ Hwekenu na ye ɖu onu lɔ nɔ, Yesu sɔ kpɔnnɔ, ke e do ɛkpɛ na Mawu do eji vɔ, e ma-ɛ, bo sɔ na onukplanvi etɔnye, bo lɔ byo: « Mi yi, a bo ɖu, e ke lɔ wɛ nyi gbaza tɛye.» ²⁷ Exin we godo, e sɔ kɔfo ke mɛ na vɛn le lɔ, ke e do ɛkpɛ na Mawu do eji vɔ, e sɔ na yee, bo lɔ na ye lɔ byo: « Mi mɛ bi, mi nu-i. ²⁸ Ɖo, e ke lɔ wɛ nyi ɛhun tɛye, i wɛ Mawu do wasi okancica. Ɛhun ke lɔ wɛ ye na kɔn ɖ'enyi do ota na ɛmɛ susu, na onunyinylaye we sisɔ kɛ. ²⁹ Ko lɔ na mi nɔ tun, ko hɔn mɔ nu vɛn ɖe nɔ kpɔn gbeɖe gbɔɔn do yi hwekenu na ko na mɔ va nu vɛn yɔyɔ kpo mi le Didaye we Xɔluɖuɖu mɛ.» ³⁰ Ke ye ji vivayi we oxwe we ohanye vɔ, ye sin oso ke ji na olivutinye le lɔ. ³¹ I wɛ Yesu lɔ na ye lɔ byo: « Mi mɛ bi na gbɛ-ɔ le hwedo ke, ɖo ye wlan tun: "ko na hu lɛngbɔkplɔtɔ lɔ, i wɛ lɛngbɔvi etɔnye na gbado." ³² Vɔ, na ko fɔn sɔn oku vɔ, ko na ve tre kpɔn mi le Galile.» ³³ Vɔ Piyɛ yi oxo bo lɔ na Yesu tun:« Na ɛmɛ bisese mɔ do gbɛ we can, blɔ ko hɔn gbɛ we nɔ kpɔn gbeɖe.» ³⁴ Yesu bo lɔ ni-i lɔ byo: « Le xojɔxo mɛ, ko lɔ na we nɔ, egbe, le ozan ke tete mɛ can, gbɔxwe na goklo na do atan, o na gbɛ-ɔ zɔn atɔn kpecyo.» ³⁵ Vɔ, Piyɛ bo ɖ'ewu ni-i tun lɔ byo: « Ko na mɔ do ku kpo we can, ko hɔn na gbɛwe kpɔn gbeɖe tun ko mɔ hɔn nyɔ we.» Onukplanvi gbokpweye can bo lɔ emɔha. ³⁶ I wɛ Yesu kpo onukplanvi etɔnye ve jɛ ɛɖɛ xo ji le ofi ke ye nɔ yɔ tun Jɛsitemanɛ, e bo lɔ na ye tun: « Mi xinnɔnyi le bwɛ, na ma ve xo ɛɖɛ le blɛ daan.» ³⁷ E kplɔ Piyɛ kpodo Zebede we vikpɛ owe leye. E bo jɛ onulilo ji, ota bo bla ahwan ni-i. ³⁸ I wɛ e lɔ na ye lɔ byo: «Ko le onulilo mɛ gbɔɔn bo va ku nɔ. Mi nɔ bwɛ, a bo nɔ ŋuzɔn kpo-o.» ³⁹ I wɛ e tɛyi viɖe bo cɔn ŋumɛnyi, bo xo ɛɖɛ nɔ lɔ byo: «Otɔ, na e na do kpewu jɛ eji wɛ, dɔn vivɛsise we kɔfo ke le wu ye. Ganke, ka wasi ojlo tɛye, vɔ wasi ojlo tɔwe.» ⁴⁰ E trɔ va ye kɔn, bo kpɔn ye le awlɔn mɛ. E bo lɔ na Piyɛ tun: « Mi hɔn kpewu na nɔ ŋuzɔn kpo-o na ganxixo ɖokpo tete can! ⁴¹ Mi nɔ ŋuzɔn a bo xo ɛɖɛ, na mi ko mɔ do va jɛ tintɛnkpɔn mɛ nɔ. Gbɛtɔ we ayixa nɔ ɖo ojlo nywɛ, vɔ gbaza lɔ mɔ gbɔjɔ.» ⁴² Yesu lɔ mɔ tɛyi le ye wu zɔnwe gɔ, bo xo ɛɖɛ nɔ lɔ byo: « Didaye, e nyi tun vivɛsise ke lɔ we kɔfo hɔn kpewu na tɛyi le wu ye, e bo nyi tun nu jan wɛ ko na nu-i, hun ojlo tɔwe ni bo nyi wiwa.» ⁴³ Exin we godo, e mɔ trɔ va onukplanvi lɛye kɔn, bo kpɔn ye le awlɔn mɛ, ɖo ŋukunsin kpɛn na ye. ⁴⁴ Yesu mɔ lɛ le ye kɔn ke, bo xo ɛɖɛ zɔn atɔngɔ, bo lɔ oxo ɖokpo ŋumyɔ lɛye ke. ⁴⁵ I wɛ e trɔ va onukplanvi lɛye kɔn, bo lɔ na ye tun:« Mi mɔ gbɛ dɔ awlɔn nɔ bo mɔ gbɛ gbɔjwɛ nɔ? Mi kpɔn ogn lɔ xo, ye bo sɔ Gbɛtɔ we Vi lɔ sɔ jo na onunyinylwatɔye. ⁴⁶ Mi cite na mia sɔn! Mɛ ke na sɔ-ɔ sɔ jo lɔ o tɛkpɔ.» ⁴⁷ Hwekenu na ye gbɛ lɔ oxo nɔ, Juda ke nyi ɖokpo le onukplanvi weve lɛye mɛ va, kpo ɛmɛ susu kpo, ye bo hɛn ahwanwanuye. Mawu we avɔsantɔ ɖaxoye, kpo otomɛhyɔnye wɛ sɔ ye ɖodan. ⁴⁸ Ɛmɛ ke va sa Yesu nɔ lɔ, lɔ na mɛ ke e va sɔ-ɛ jo na nɔ lɛye tun: « Mɛ ke na ko na kplasi okɔ na lɔ, i wɛ, mi na wle.» ⁴⁹ Zɔnɖokpo, e tɛkpɔ yesu bo lɔ ni-i tun: «Hlabi, ko do ogbe na we!» Bo kisi ni-i. ⁵⁰ Yesu lɔ ni-i lɔ byo: « Hadwe tɛye, wa onu ke gbe otɔn.» I wɛ ɛmɛ gbokpweye tɛkpɔ Yesu, bo ɖo alɔ ewu, bo wle-e. ⁵¹ Vɔ, le mɛ ke le kpo Yesu ye mɛ, mɛ ɖokpo lyɔ ohɛ etɔn, bo xu Mawu we avɔsantɔye we ga we odansɔvi, bo kpa oto ni-i. ⁵² I wɛ Yesu lɔ tun: « Sɔ ohɛ tɔwe ɖ'enyi, ɖo mɛ ɖe kpokpwe ke na sɔ ohɛ do ɛmɛ wu, ohɛ we oku ke wɛ e na ku. ⁵³ O bu-i nɔ tun ko mɔ hɔn kpewu na yɔ Didaye, e mɔ sɔ ahwankpa ɛwɛndotɔ etɔnye donu weve gbɔɔn onu mɔ le eji sɔ ɖodan syɛ trolo wɛɛ? ⁵⁴ Vɔ na ko wasi ɖ'emɔha, naɖe lɛ winwlan Kinkwɛn ke lɔ tun e mɔ na nyi emɔha ye, na hɛnɖo a do cɛ? » ⁵⁵ Le hwexinnu, Yesu va lɔ na ɛmɛ susu lɛye tun: « Mi hɛn ohɛye kpodo okpoye a do va wle-o. ⁵⁶ Vɔ, onu xin ye bisese, o jɔ nɔ na oxo ke Mawu we oxolɔɖenyitɔye wlan a do cɛ.» I wɛ onukplanvi lɛye bi jo-e do, bo si bo sɔn. ⁵⁷ Mɛ ke wle Yesu lɛye kplɔ-ɛ do yi Kayifu Mawu we avɔsantɔye we ga kɔn. Blɛ lɔ wɛ osɛnkplan-emɛtɔye kpo otomɛhyɔnye kpo kple le. ⁵⁸ Piyɛ bo le dindɛnnu daan bo do xo do ye, gbɔɔn do ɖyɛ avɔsantɔ lɛye we ga we xwegbe. E bo xinnɔnyi le ɛmɛcɔtɔye mɛ, a do kpɔn ke ha na onu lɛye na yi ɖo. ⁵⁹ I wɛ avɔsantɔ ɖaxo lɛye kpo ɛhwɛɖɔtɔ ɖaxo lɛye bi, o kan kunnuɖiɖe agɔgwɛ ɖe nɔ kena ye na do gbo oku we ɛhwɛ na Yesu. ⁶⁰ Kunnuɖetɔ ojokantɔ susu ɖe kunnu agɔgwɛye do ewu nɔ, co ganke, ye hɔn kpɔn oxo ti bo na do gbo okuhwɛ lɔ ni-i. Le vivɔnu, ɛmɛ owe va, bo lɔ tun: ⁶¹ Dahwe ke lɔ tun: « Ko kpewu na hɔ Mawu we oxɔ lɔ, a bo mɔ trɔ gba-ɛ le nyatɔn we dodomɛ. ⁶² Avɔsantɔye we oga lɔ cite bo lɔ byo: « Kunnu ke ye ɖe do wu we nɔ yee xɛn, hɔn ɖo oxo ti eewu nɔ wɛɛ? ⁶³ Vɔ, yesu bo bɔnu. Avɔsantɔye we oga lɔ ma kan se wu-i tun: « Le Mawu ɛgbɛ-ɛgbɛ lɔ we nyikɔ mɛ, ko byɔ we nɔ tun, i mɔɔ ɖo ewu na mí: lɔ wɛ nyi Klisu Mawu we Vi lɔ? » ⁶⁴ Yesu bo ɖ'ewu ni-i byo: «I lɔ xɛn o lɔ xin. Vɔ, ko lɔ na mi lɔ byo, bɛ sɔn syɛ, mi na kpɔn gbetɔ we ovi lɔ, e bo na le onyi xinnɔ le Mawu hɔnhlɔn bisese nɔ lɔ we aɖusi mɛ, mi na kpɔn-ɛ, e mɔ gbɔnnɔ le sunwɔ mɛ.» ⁶⁵ Wɛ avɔsantɔye we oga lɔ va vun awu itete tɔ le okɔ, bo lɔ tun: « E kɔn acɔn do Mawu wu, syɛ mí mɔ hyan kunnuɖiɖe ɖe wɛɛ? Mi se acɔn ke e kɔn do Mawu wu syɛ. ⁶⁶ Susu nɛ ha lɛ mi ɖe d'ewu? i wɛ yee ɖ'ewu ni-i lɔ byo: «E jɛ na oku.» ⁶⁷ I wɛ mɛɖeye va tun otan do ŋumɛ na Yesu lɔ, bo jɛ xixo-ɛ ji, mɛɖeye bo xo tomɛ ni-i nɔ, mɛɖeyee ⁶⁸ bo kanse wu-i nɔ lɔ byo: « Klisu, lɔ mɛ ke xo we yee na mí.» ⁶⁹ Piyɛ lɔ tun he mɔ hɔn nyɔ Yesu. Vɔ, Piyɛ xinnɔnyi le gaji le oxwe lɔ gbe. Odansɔvi nyɔnuvi ɖe bo bɔ do ewu bo lɔ ni-i lɔ byo: « I can gba, o zɔn kpo Yesu Galiletɔ lɔ.» ⁷⁰ I wɛ Piyɛ mɔ lɔ le ye mɛ bisese we ŋumɛ lɔ byo: Ko hɔn nyɔ oxo kena o lɔ nɔ.» ⁷¹ Hwekenu na e sin agbo lɔ we mɔnu nɔ, odansɔvi nyɔnuvi bu mɔ kpɔn-ɛ, bo lɔ na ɛmɛ ke le ble lɛye tun lɔ byo: «Dahwe ke lɔ can gba nɔ nɔ ɛtɛ na Yesu Nazalɛtitɔn lɔ.» ⁷² Piyɛ bo mɔ mɔ ke, bo ta onu, bo lɔ byo: « Ko hɔn nyɔ Dahwe xin.» ⁷³ Zanɖe kpoŋu, ɛmɛ ke le blɛ lɛye bɔ do piyɛ wu, bo lɔ ni-i tun: « Le xojɔxo mɛ, i can o le yee mɛ, ɖo ogbe ke le okɔnu na we, o ɖe sɔ xlɛ.» ⁷⁴ I wɛ Piyɛ lɔ na ye tun: « Na e nyi tun ojo wɛ ko kan nɔ, Mawu ni bo dɔn oto na-a, ko ta onu, ko hɔn nyɔ dahwe xin.» zɔnɖokpo kpoŋu, goklo bo do atan. ⁷⁵ I wɛ Piyɛ va flin oxo kena Yesu lɔ ni-i san lɔ, e lɔ ni-i san tun: « Gbɔxwe na goklo na do atan, o na gbɛ-ɔ zɔn atɔn kpecyo.» E bo va tɔn le oxwe lɔ gbe, bo vi avi taŋu.