¹ Le Jwifuye we vivayi we oxwe lɔ we ŋukɔnɖegbe, ke nyi azan tantɛn na kɔsiɖa lɔ, Mali Madalatɔn kpodo Mali ɖe lɔ kpo va yi yɔgun Yesutɔn kɔn. ² Wɛ nyidan ɖaxo ɖe bo hunhun, ɖo ɛwɛndotɔ Mawutɔn ɖokpo jɛte sɔ jihwe, bo va fli ɛkpɛn ke ye sɔ do tu Yesu we yɔgun lɔ nu tɛ, bo xinnɔnyi le ɛkpɛn lɔ ji. ³ Ŋumɛ etɔn nɔ klɛn ɖi zɔngbɛn ha, awu etɔnye bo we pepepe ɖi alawe ha. ⁴ Mɛ ke o cɔ yɔgun lɔ nɔ ye vivɔ ɖaxo ɖe jɛ yee ji ye bo titɔ nɔ gbɔɔn bo va ci ɖi ɛmɛ kukuye ha. ⁵ Mawu we ɛwɛndotɔ lɔ bo yi oxo bo lɔ na nyɔnusi lɛye lɔ byo: « Mi ka vɔ, ɖo ko nyɔ-ɛ tun Yesu Klisu ke ye kan do otinsokpoli ji lɔ wɛ mi ba nɔ. ⁶ E hɔn mɔ le bwɛ, e o fɔn sɔn ɛmɛ kukuye mɛ, ɖi kena e o lɔ-ɛ ɖo na mi san ha. Mi va a bo va kpɔn fi kena ye sɔ Xwetɔ lɔ we ocɔ sɔ hlɔn i xɛn nyi ke. ⁷ Mi lɛkɔ bleŋu a bo ve lɔ na onukplanvi etɔnyee tun: «Yesu lɔ mo o fɔn sɔn ɛmɛ kukuye mɛ; e bo jɛ ŋukɔn na mi a do ve e tre kpɔn mi le Galile. Blɛ lɔ wɛ mi na va kpɔn-ɛ le.» Mi kpɔn, ko lɔ-ɛ na mi.» ⁸ I wɛ nyɔnusi lɛye va trɔkɔ bleŋu le yɔgun lɔ kɔn. Ye vɔ nɔ co ganke jijwɛ ɖaxo ɖe bo mɔ gɔ yee. Yee bo do wedun nɔ, a do ve e lɔ onu ke yee kpɔn lɔ na onukplanvi Yesutɔnye. ⁹ Hwekenu yee le mɔ ji bo sɔn nɔ, Yesu va kpe yee do mɔ ji bo lɔ na yee tun: «Fifa ni nyi miatɔn.» Nyɔnusi lɛye bo wle afɔ ni-i bo do onu do bo sɛɛn. ¹⁰ Exin Yesu mɔ lɔ na yee tun: «Mi ka vɔ. Mi ve lɔ na nɔvyee tun lɔ byo yee mɔɔ va kpe-o le Galile; ɖo blɛ lɔ wɛ ye na va kpɔn-ɔ le.» ¹¹ Hwekenu na nyɔnusi lɛye o sɔn nɔ, ɛmɛcɔtɔ ɖiye va do wedun bo ve lɔ onu ke jɔ leye bisese na onukplan ɛmɛtɔ ke na le toxo lɔ mɛ yee. ¹² Ke onukplan-ɛmɛtɔ lɛye kpo agunmɛhyɔ lɛye se onu xin lɔ, ye va na oxo wu sɔja lɛye ¹³ bo lɔ na yee lɔ byo: « Mi lɔ tun onukplanvi Yesutɔnye mɔ va le zanmɛ ganke mɛ na mi dɔ awlɔn nɔ bo va fi Yesu we ocɔ lɔ. ¹⁴ E nyi tun oxo ke ha va jɛ tomɛ na otokplɔtɔ lɔ, mí na va kpe do ewu wɛ mɛɖe ko mɔ va dɔn oto na mi nɔ.» ¹⁵ Wɛ sɔja lɛye yi oho lɔ, bo va wasi ɖi kena ye kplan yee ɖo ha. Hunnya-hunnya xin lɔ bo gbakpe Jwifuye mɛ bo le gbɔɔn do va jɛ egbe. ¹⁶ Vɔ Yesu we onukplanvi lɛye bo va yi Galile, le oso kena yesu o xlɛ yee lɔ ji. ¹⁷ Hwekenu na yee va kpɔn Yesu lɔ, e vivi na yee ye bo sɛɛn vɔ mɛɖeye le yee mɛ bo gbɛ xo onu kpɔn nɔ. ¹⁸ Ke Yesu va tɛkpɔ yee, e lɔ na ye tun: « Ye o sɔ acɛ lɛye bisese sɔ na-a le jihunkunsi kpodo nyidan ji. ¹⁹ Syɛ, mi yi, a bo sɔ mɛ bisese a do wasi onukplanvi tɛyee, a bo lɛ Mawu we ɛsin na yee le otɔ, ovi kpodo Gbigbɔ Kinkwɛn we nyikɔ mɛ. ²⁰ Onu ke ko kplan mi ye mi kplan yee can. I xɛn, ko le kpodo mi gbɔɔn do yi ɛgbɛ lɔ we vivɔnu.»