Matye ota 23
1
Yesu tɔ gbe wu onukplanvi etɔnye.
I wɛ Yesu lɔ na togun lɔ kpodo lɔ kpo onukplanvi etɔnye tun lɔ byo:
2
« Osɛnkplan-ɛmɛtɔye kpo Falizitɔye, we odan wɛ nyi tun, ye a ɖe Mɔyizi we osɛn lɔ gɔnmɛ,
3
Onu ɖekpokpwe ke ye na lɔ na mi, mi wasi-i, a bo zɔn do e ji, vɔ mi ka wa onu ɖi kena yee nɔ wasi ɖo ha. Onu kena yee nɔ lɔ na ɛmɛye, ye tete hɔn nɔ zɔn gbɔn e ji.
4
Ye nɔ do agban kpinkpɛn do ota na ɛmɛye, vɔ ye tete hɔn nɔ ɖo alɔvi ɖokpo tete e wu a do hɛn-ɛ kpo ye.
5
Odan yetɔnye bi, ye nɔ wasi-i na ɛmɛye a do kpɔn ye. Akpa ke mɛ na ye nɔ sɔ Mawu we oxo winwlan Kinkwɛn lɔ sɔ ɖo, a bo bla do ŋugonu alo abɔ wu, ɖaxo etɔn wɛ ye nɔ wasi bo nɔ bla, a bo wasi okan gblɛlɛlɛ ɖo awu yetɔn we oto .
6
Ye nɔ yi owan na okpo tantɛntɔnye ji ninɔ le okpletyɔnye.
7
Ɛmɛye a nɔ do ogbe na ye kpo sisi kpo le dogbaye ji, a bo nɔ mla ye nɔ tun Hlabi, Hlabvi, e xin wɛ ye nɔ yi owan na.
8
Vɔ miye, mi ka na na ye a yɔ mi tun Hlabi ɖo ɛmɛ ɖokpo gee wɛ nyi onukplan-ɛmɛtɔ miatɔn, mi mɛ bisese bo nyi nɔvi le xɔse mɛ.
9
Mi ka yɔ mɛti le nyidan lɔ ji tun Otɔ, ɖo otɔ ɖokpo gee wɛ mi ɖo, i wɛ le sɛxwe.
10
Mi ka na na ye a yɔ mi tun "Oga", ɖo Oga ɖokpo gee wɛ mi ɖo, i wɛ nyi klisu lɔ.
11
Ɛmɛ ɖaxo ke le mia mɛ, ɖo na nyi odansɔvi miatɔn.
12
Mɛɖe kpokpwe kena kɔ eɖe do yi oji, ye na zin-i do odo, vɔ mɛ kena na sɔ eɖe sɔ hwe, ye naa kɔ-ɛ do oji.»
13
Yesu do ɛhwɛ na osɛnkplan-ɛmɛtɔye kpo Falizitɔye
Babaa na mi osɛnkplan-ɛmɛtɔye kpo Falizitɔye, ɛyɛmɛnuwatɔye wɛ mi n yi! Ɖo, mi nɔ tun sɛxwe we omɔ lɔ do ɛmɛye, miye tete hɔn ɖyɛ emɛ nɔ, mi ko mɔ nɔ jo mɛ ke jlo na ɖyɛ emɛ ye do, na yee a do ɖyɛ emɛ.
14
Babaa na mi osɛnkplan-ɛmɛtɔye kpo Falizitɔye, yɛmɛnuwatɔye we mi nyi! Ɖo mi nɔ yi onu ken kposyuye ɖo le ye si, co ganke mi bo nɔ xo ɛɖɛ nɔ na oganxixo susu, na ɛmɛye a do kpɔn mi. Do exin lɔ wu, oto ke Mawu na dɔn na mi, e na syɛnxu taŋu.
15
Babaa na mi osɛnkplan-ɛmɛtɔye kpo Falizitɔye, yɛmɛnuwatɔye wɛ mi nyi! Ɖo mi nɔ dan gbɔn ofiɖekpokpwe, nydanji wɛ, otɔji wɛ, a do na na ɛmɛ ɖokpo ɖe a va zɔn do osɛn Mɔyizitɔn lɔ ji, i wɛ na e va jɛ zinzɔn do eji vɔ, mi nɔ na na ɛmɛ lɔ nɔ trɔ zun ozo mavɔ we ovi donu owe hugan wu miye tete yee.
16
Babaa na mi, ŋuvanɔye ke jɛ ŋukɔn na ɛmɛye nɔ wɛ mi nyi. Mi nɔ lɔ tun lɔ byo: «Na mɛɖe ta Mawu we oxwe lɔ bo do fyan-ajɔgbe, e xin mɔ hɔn le vivɛɖe dan-dan, vɔ na mɛɖe ta sika ke le Mawu we oxwe lɔ gbe, bo do fyan-ajɔgbe ɖe, e mɔ ɖo na wa do e ji dan-dan.»
17
Onumanyɔtɔye kpo ŋuvanɔye, enɛ lɛ hugan wu ɖe, sika lɔ wɛ alo Mawu we oxwe lɔ ke na na sika lɔ nyi onu ɖe ɖo ovo na Mawu?
18
Mi mɔ nɔ lɔ tun:« na mɛɖe ta avɔsinsan we ɖaka lɔ bo do fyan-ajɔgbe, exin mɔ hɔn le dan-dan, vɔ na mɛɖe ta avɔsannu ke le avɔsinsan we ɖaka lɔ ji bo do fyan-ajɔgbe ɖe, e mɔ ɖo na wa do eji dandan.»
19
Ŋuvanɔye, enɛ lɛ hugan hu ɖe, avɔsannu lɔ wɛ alo avɔsinsan we ɖaka lɔ ke na na avɔsannu lɔ do nyi onu e ɖo ovo na Mawu?
20
I wɛ dɔn mɛ ke ta avɔsannu we ɖaka lɔ, e ta avɔsinsan we ɖaka lɔ kpodo onu ke le eji ye bisese.
21
Mɛ ke ta Mawu we oxwe lɔ, e ta oxwe lɔ kpodo Mawu ke nɔ nɔ oxwe lɔ mɛ.
22
Ɛmɛ ke ta sɛxwe, e ta Mawu we oganɖuɖu kpo e ɔ ke xinnɛnyi le eji.
23
Babaa na mi, osɛnkplan-ɛmɛtɔye kpo Falizitɔye, yɛmɛnuwatɔye wɛ mi nyi. Mi nɔ na maɖo-owo ama hwɛnnywɛye ke ye nɔ yɔ tun mati tɔn, anɛti tɔn, kwimɛtɔnye, vɔ mi nɔ ɖekɔ le onu ke le vivɛɖe le osɛn lɔ mɛ wu, i wɛ nyi onu jijɔ wiwa, dɔŋuɖunu kpinkpɔn na ɛmɛ kpodo gbejininɔ. Ke mi ɖo na wasi lɛye xɛn bo xin, e ko nyi tun mmi na jo gbokpweye can do hwɛn.
24
Ɛmɛkplɔtɔ ŋuvanɔye wɛ mi nyi, mi nɔ sɔ onu ke mi nɔ nu yee a do ɖe onu le ɛgbɛ viv iye le emɛ, vɔ mi bo nɔ mi osɔkpotɔnɔye.
25
Babaa na mi, osɛnkpla-ɛmɛtɔye kpodo Falizitɔye, yɛmɛnuwatɔye wɛ mi nyi. Mi nɔ klɔ goto na kɔfo kpodo onu ke mi fiye kpo onu ke mi yi gbɔn susu nyinyla zinzan mɛ ye.
26
Falizitɔ ŋuvanɔye, mi klɔ kɔfo lɔ mɛ gbɔxwe, exin godo lɔ can mɔ va mɛ.
27
Babaa na mi osɛnkplan-ɛmɛtɔye kpo falizitɔye, yɛmɛnuwatɔye wɛ mi nyi. Ɖo, mi le ɖi yɔgun ke ye si osɛn owe na ye ha, ye bo nyɔ kpinkpɔn do goto, vɔ xugloxuye kpo onu nyinyɔ hamɛ-hamɛye wɛ gɔ ye mɛ.
28
Miye can, le ɛmɛye we ŋumɛ, mi nɔ le ɖi ɛmɛ jijwɛye ha, vɔ onu nyinyla kpo ɛyɛmɛnuwiwa kɛɖɛ wɛ gɔ ayi miatɔn mɛ.
29
Babaa na mi, osenkplan-ɛmɛtɔye kpo Falizitɔye, yɛmɛnuwatɔye wɛ mi nyi. Ɖo mi nɔ trɔ jla Mawu we oxolɔɖenyitɔye we yɔgun ye ɖo, a bo ɖo acɔ na ɛmɛjijɔye we yɔgun.
30
Mi mɔ nɔ lɔ byo: « Mi do jɔ le mía dagbwɔye we hwenu wɛ, mí hɔn nɔ osɛnbla mɛ nɔ na ye a do kɔn oxolɔɖenyitɔye we ɛhun do nyi na mí nɔ.»
31
Ele emɔha, bɛ miye teteye o ɖe kunnu do miaɖee wu nɔ tun, hiye mɔ nyi ɛmɛ ke mɔ hu Mawu we oxolɔdenyitɔye we vikpɛye.
32
E nyɔ, mi ɖo nukɔnyiyi le emɛ, a do vɔ odan ke miadagbwɔye tɔ eji.
33
Odanye, zakpata we kunkanye, naɖe lɛ mi na wa na do si na kojo ɖiɖo kee nɔ dɔn ɛmɛ do yi ozo mavɔ lɔ mɛ?
34
I wɛ dɔn, ko sɔ oxolɔɖenyitɔye, onukplan-ɛmɛtɔye kpo osɛnkplan-ɛmɛtɔye ɖodan mi nɔ. Mi na hu ɖiye; a bo kan ɖiye do otinsoga ji, mi na sɔ lanba do xo ɖeye le okpletyɔn miatɔnye, mi bo na ɖe ofun na yee gbɔn toxoye mɛ.
35
Exin, ɛmɛ jijɔ bisese ye we ɛhun ke na ye kɔn do nyidan ji ye mɔ do jɛ okɔ na mi, bɛ sɔn Abɛli we ɛhun ji gbɔɔn do ve jɛ Zakali Beleyavyɔ we ɛhun ji. Elɔ ke mi hu le Mawu we oxwe lɔ gbe, le avɔsinsan lɔ we agba kpo tɛnxo kinkwɛn lɔ we dodomɛ.
36
Le xojɔxomɛ, ko o lɔ na mi nɔ jijimɛvi egbetɔnye wɛ ohlɔn xin lɛye bi na jɛ.»
37
«Jeluzalɛmutɔye, Jeluzalɛmutɔye, miye, ɛmɛ ke nɔ hu Mawu we oxolɔɖenyitɔye, a bo tɔ ohwan wu mɛ kena Mawu ɖo ɖodan mi ye gbɔɔn ye mɔ ku! Zɔn nɛmu ɖe wɛ ko jlo na kple mi do kɔnye, ɖi ke goklo nɔ kple vikpɛ etɔnye do axwe etɔnye gɔ ɖo ha, vɔ, mi ko jlo.
38
E nyɔ, Mawu na jo oxwe miatɔn do e mɔ ci toto.
39
Ɖo ko o lo lɔ na mi nɔ lɔ byo: bɛ sɔn syɛ, mi hɔn mɔ kpɔn-ɔ nɔ gbɔɔn do jɛ hwekenu na mi na va lɔ tun: «Donanɔ me mɔ nyi me kena mɔ gbɔnnɔ le Xwetɔ Mawu lɔ mɛ.»