¹ YESU LƆ TUN YE MƆ NA VA GBA MAWU WE OXWE LƆ.

Hwekenu na Yesu tɔn le Mawu we oxwe lɔ gbe bo sɔn nɔ, onukplanvi etɔnye bɔ d'ewu a do ayixa etɔn ɖo Mawu we oxwe lɔ gbigba ji.

² Vɔ, e bo ɖ'ewu na ye lɔ byo: « Mi kpɔn onu xin ye bi nɔ? Ko lɔ na mi nɔ le xojɔxo nɔ tun lɔ byo, ɛkpɛn ɖokpo tete hɔn mɔ va nɔ ɛkpɛn ɖe ji le bwɛ nɔ, ye na gba bisese.» ³ Yesu xinnɛnyi do oso ke ji na Olivutinye le lɔ, i wɛ onunkplanvi etɔnye ɖoɖyo ve kpɔn-ɛ, bo kan-ɛ se lɔ byo: « Hwenɛnu ha lɛ onu xin lɛye na jɔ do? Josi enɛha lɛ na ɖe viva tɔwe kpo ɛgbɛ lɔ we vivɔnu sɔ xlɛ? Lɔ-ɛ na mi.» ⁴ Yesu bo ɖo ewu na ye lɔ byo: « Mi cɔ miaɖe, na mɛti ni ka va blɛ mi ɖu. ⁵ Ɖo ɛmɛ susu na va va, a bo sɔ nyikɔ tɛye, ɖokpo-ɖokpo yetɔn mɔ lɔ byo: "Bo wɛ nyi Klisu lɔ", ye na blɛ ɛmɛ susu ɖu. ⁶ Mi na se byo ahwanye mɔ jɔ nɔ, a bo se tun ahwan mɔ gbɔn nɔ. Mi kpɔn! Mi ka na ayixa a gbado na mi, ɖo, exin lɛye ɖo na jɔ, vɔ, ɛgbɛ lɔ hɔn vɔ do blɛ nɔ trolo.» ⁷ Togun ɖe na fɔn ahwan do togun ɖe ji, xɔluɖuɖu ɖe na fɔn ahwan do xɔluɖuɖu ɖe ji.Nyidan na hunhun le ofi ɖeye, xovɛ na tɔn le ofi ɖeye. ⁸ Onu xinye bi, vivɛ kena nyɔnusi nɔ se le ovijiji we bibɛnu ha jan wɛ e na le ɖi. ⁹ Exin we godo, ye na wle mi sɔ jo, na ye a do do aya na mi, a bo hu mi, otogun lɔ bi mɔ gbɛ owan na mi do nyikɔ tɛye wu. ¹⁰ E jɛ hwexinnu, ɛme susu na jɛnyi le xɔse mɛ, ye na sa yeɖeye nɔ, a bo gbɛ owan na yeɖeye nɔ, ¹¹ Oxolɔɖenyitɔ ojokantɔ ye na va tɔn susu a bo blɛ ɛmɛ susu ɖu. ¹² Kena onunyinyla wiwa na va gbakpe ɛgbɛ lɔ mɛ ɖo, na na na ɛmɛ susu we wanyiyi na ɖe drɔn. ¹³ Vɔ, ɛmɛ kena do vivɛnu gbɔɔn do yi vivɔnu, na kpɔn hwlɛngan. ¹⁴ Xɔluɖuɖu Mawutɔn we ɛwɛn nywɛ ke lɔ, na nyi jijla gbɔn ɛgbɛ lɔ mɛ bisese, e bo na nyi kunnu ɖiɖe na otogunye bi seŋu, exin we godo, vivɔnu lɔ mɔ va. ¹⁵ I wɛ dɔn, hwekenu na mi na va kpɔn onu xyɛwu ke nɔ do vivɔ ɖaxo na ɛmɛ na va le tɛnxo kinkwɛn lɔ ɖi kena oxolɔɖenyitɔ Daniyɛli lɔ ɖo ha (onuxlɛtɔ ni se i we gɔnmɛ ganji), ¹⁶ hwe xin nu, mɛ ke na le Jude we kansinmɛ ye, ye ni si yi osoye we godo. ¹⁷ Ɛmɛ ke na le sanŋutakpwejiye, ni bo ka jɛte a do ve sɔ onu etɔn ɖe le xɔ mɛ. ¹⁸ Emɔha ke, mɛ kena le glegbeye, ni bo ka trɔ gbɔn va oxwegbe a do ve sɔ awu ɖaxo etɔn. ¹⁹ Babaa na nyɔnusi ke na na le gomi kpodo nyɔnusi ken a ovi na gbɛ nɔ anɔ na nɔ ye, le azn xin lɛye ji. ²⁰ Mi xo ɛɖɛ na hwekenu na mi na si, ni bo ka nyi vivɔ we hwenu alo gbɔjwɛzangbe. ²¹ Ɖo hwe xin lɔ nu, vivɛsise lɔ na syɛnxu hugan hu vivɛsise ɖekpokpwe ke nɔ nyi sɔn ɛgbɛ lɔ we bibɛnu gbɔɔn do va jɛ egbe, vivɛsise ti ko mɔ va nɔnyi nɔ ɖemɔha nɔ kpɔn gbeɖe. ²² Ɖo na Mawu hɔn do ɖe azan xin lɛye drɔn wɛ, bɛ mɛ ti hɔn kpɔn hwlɛngan nɔ, vɔ do ɛmɛ cincanye wu, e na ɖe azan lɛye drɔn. ²³ I wɛ na ɛmɛɖe o lɔ na mi nɔ tun: « Klisu lɔ le bwɛ, alo KLisu lɔ le blɛ dan, mi ka kando eji. ²⁴ Ɖo Klisu ojokantɔye kpo oxolɔɖenyitɔ ojokantɔye na tɔn a bo nɔ ɖe josi ɖaxo-ɖaxoye xlɛ gbɔn ŋudandonu wiwasi mɛ a mɔ nɔ wasi onu kpaca ɛmɛ ɖax-ɖaxoye nɔ a do blɛ ɛmɛ ɖu, exin, na e na do kpewu a jɛ eji wɛ, ye mɔ do ble ɛmɛ cincanye can ɖu. ²⁵ I wɛ dɔn, ko do xo kpa na mi nɔ.» ²⁶ Na ye va lɔ na mi tun: «Mi kpɔn, Klisu lɔ le zogbeji, mi ka yi; alo na mi tun: emɔ le oxɔ ɖe mɛ, mi ka kan d'eji. ²⁷ Ɖo, ɖi kena oju nɔ de abi mlaŋu le jiŋukunsin mɛ ɖo ha, sɔn ohwezɛdo do va yi hweyixɔ, emɔha ke wɛ, e na nyi na gbɛtɔ we ovi lɔ we viva. ²⁸ Ofi kena onukuku le, blɛ wɛ aklasuye nɔ kple le. ²⁹ Yesu lɔ tun: « Le vivɛsise xin lɛye we godo trolo, ohwe na do vuvlu, osun hɔn mɔ klɛn nɔ. Sunhwleviye na tɔn sɔn jihwe, hɔnhlɔn we onu ke le jihwe yebo na hunhun. ³⁰ Le hwexinnu josi ke na do sɔnlin tu gbɛtɔ we vi lɔ mɔ gbɔn nɔ na ze le jihwe. Exin va yi, togun bisese ke le nyidan ji ye na le tamɛ bubu mɛ, ye bo na kpɔn gbɛtɔ we vi lɔ le sunwɔ mɛ, e mɔ gbɔn nɔ kpodo hɔnhlɔn ɖaxo kpo gigo. ³¹ Ahwankpɛn ɖaxo lɔ na ɖi, e bo na dɔn ɛwɛndotɔ etɔnye ɖodan ɛgbɛ lɔ we wɛkɛzo ɛnɛ lɛye mɛ, a bo kple ɛmɛ cincan etɔnye sɔn ɛgbɛ lɔ we odo ɖeji gbɔɔn do yi odo bu ji.» ³² Yesu mɔ do olo ke lɔ byo: « Mi yi okplan sɔn figitin wu, na mi kpɔn tun alɔklan etɔnye trɔ zun ɛmu ama etɔnye bo nɔ dɔn nɔ, mi nɔ nyɔ-ɛ tun oxweju mɔ va bɛ nɔ. ³³ Emɔha ke miye can, na mi kpɔn onu xinye va jɔ nɔ, mi mɔ nyɔ-ɛ tun gbɛtɔ we vi lɔ we viva mɔ tɛkpɔ, bo le ohɔn ji. ³⁴ Le xojɔxo mɛ ko lɔ na mi nɔ, jijimɛvi egbetɔn kiye hɔn ku nɔ bi keŋu gbɔxwe onu xin ye na jɔ. ³⁵ Jiŋukunsin kpo nyidan na va yi, vɔ oxo tɛyee hɔn va yi nɔ kpɔn gbeɖe.» ³⁶ Vɔ, kena nyi aza xin lɔ kpo oganxixo lɔ tɔn, ɛmɛti hɔn nywɛ, ɛwɛndotɔ Mawutɔn ke le sɛxwe, Ovi lɔ o, ɛmɛ ti hɔn nywɛ adavo Mawu otɔ lɔ ɖokpo gee wu. ³⁷ Ɖi ke ejɔ le Nɔwe we hwenu ɖo ha, emɔha ke wɛ e na va jɔ ɖo le Gbɛtɔ we Ovi lɔ we viva hwenu. ³⁸ Gbɔxwe na otɔ ɖaxo lɔ do va gɔ, ɛmɛye o ɖu onu nɔ, bo nu ahan nɔ, bo ɖe nyɔnu nɔ, bɔ sɔ vikpɛ nyɔnuvi yetɔnye sɔ na osu nɔ, gbɔɔn do ve jɛ hwekenu na Nɔwe ɖyɛ ɖaxo lɔ mɛ. ³⁹ Ye hɔ kpɔn onu jɛ onu ti wu gbɔɔn do jɛ hwekenu na otɔ ɖaxo lɔ va gɔ bo crɔn ye mɛ bisese. Ɛmɔha ke wɛ e na jɔ ɖo le le Gbɛtɔ we Ovi lɔ we viva hwenu. ⁴⁰ Ŋusunglo owe na le glegbe; ye na sɔ ɖokpo a bo jo ɖokpo ɖo. ⁴¹ Nyɔnusi owe na li ote nɔ do kpɔkpɔ , ye na sɔ ɛmɛ ɖokpo a bo jo mɛ ɖokpo do. ⁴² Mi bo nɔ ŋuzɔn, ɖo mi hɔn nyɔ azan ke gbe Xwetɔ miatɔn na va do. ⁴³ Vɔ mi nyɔ ganji tun e nyi tun xwetɔ ɖe va nyɔ ganke mɛ na ajotɔ na va fin onu le oxwe etɔngbe do le zanmɛ, e na nɔ ŋuzɔn, e ko yigbe nuwɔn nɔ tunajotɔ lɔ a mɔ ɖyɛ oxwe etɔngbe nɔ. ⁴⁴ I wɛ dɔn, miye can, mi nɔ gbesisɔ mɛ, ɖo, Gbɛtɔ we vi lɔ, na va le hwekenu na mi hɔn lɛn do.» ⁴⁵ Odansɔvi ogbejinɔtɔ bo mɔ ɖo onunyinyɔ, e nɛ lɛ Xwetɔ etɔn sɔ ɖo oxwe etɔn nu, na ni a do naa onuɖuɖu wu mɛ ke na le oxwe lɔ gbe ye? ⁴⁶ Nyɔnanɔ wɛ na nyi odansɔvi xin lɔ hwekenu na Xwetɔ lɔ na lɛkɔ va a bo va kpɔn-ɛ le odan ke e dɔn-ɛ lɔ kɔn. ⁴⁷ Le xojɔxo mɛ, ko lɔ na mi nɔ tun, e na sɔ-ɛ sɔ ɖo dɔkun etɔn bisese nu. ⁴⁸ Vɔ, na e nyi odansɔvi nyinyla, e na lɔ le eɖe mɛ lɔ byo: « Xwetɔ tɛye hɔn yawu gbɔn nɔ», ⁴⁹ e mɔ jɛ odfanwagbɛ etɔnye xixo ji, a bo jɛ onuɖuɖu kpo ahan nunu ji kpo ahannumunɔye; ⁵⁰ Xwetɔ etɔn na va lɛkɔ le azan ke ji na e hɔn lɛn do kpo hwekenu na e hɔn nyɔ. ⁵¹ E na dɔn oto ni-i nywɛɖe, elɔ kpodo ɛyɛmɛnuwatɔye wɛ na ɖo vivɔnu ɖokpo ŋumyɔ ye, blɛ lɔ wɛ avi viviye kpodo aɖukunkun ɖuɖu ye na nɔ onyi le.»