¹ Hwekenu na ye tɛkpɔ Jeruzalɛmu nɔ, bo jɛ Bɛtifaje le axa na oso ke ji na vintinye le, Yesu dɔn onukplanvi owe ɖodan, ² bo lɔ tun byo: « Mi yi otota ke le ŋukɔn na mi. Na mi ɖyɛ otota lɔ mɛ trolololo, mi na kpɔn osɔ kɛtɛ osi ɖe le okan nu, ovyɔ bo le axa ni-i, mi tun-i a bo sɔ ye va na. ³ Na ɛmɛɖe lɔ oxo ɖe na mi, mi ɖo ewu ni-i tun byo:''Xwetɔ lɔ ɖo ohyan yetɔn." Zɔn ɖopko ye na jo ye do na mi.» ⁵ E jɔ ɖo ɛmɔ ha, exin oxo ke na Mawu we oxolɔɖonyitɔ lɔ mɔ do cɛ. E lɔ tun byo: ⁴ «Mi lɔ na nyɔnuvi Sinyɔ tɔn tun byo: Kpɔn, xɔlutɔwe o gbɔnnɔ na we nɔ, e xinnɔnyi le osɔ kɛtɛ ji, osɔ kɛtɛvi ɖe wɛ, e bo nyi osɔ kɛtɛ osi ɖe we ovi, e bo nɔ nyɔ dɔmɛ.» ⁶ Onukplanvi lɛye yi, bo wasi onu kena Yesu dɔn ye. ⁷ Ye hɛn osɔkɛtɛ osi lɔ kpo osɔkɛtɛvi lɔ va, ke ye fɔ awu yetɔnye ɖo ye ji vɔ, Yesu xinnɔnyi le eji le awu lɛye ji. ⁸ Ɛmɛ susu gbagbagba o tɛ awu yetɔye do omɔ lɔ ji nɔ, ɛmɛɖeye bo gbo otinmaye bo tɛ do omɔ lɔ ji nɔ. ⁹ Ɛmɛ ke le ŋukɔn ni-i ye kpo ɛmɛ ke le godo ni-i ye, o do axwa nɔ tun byo: «Gigo na Davidi vyɔ! Ɛkpɛ na ɛmɛ ke gbɔnnɔ le Xwetɔ Mawu lɔ we nyikɔ mɛ! Gigo na Mawu le sɛxwe.» ¹⁰ Ke Yesu ɖyɛ Jeruzalɛmu, toxo lɔ bisese xozin, ye bo lɔ nɔ yun byo: « ɛmɛ enɛ lɛye dahwe xin lɔ!» ¹¹ Ɛmɛ lɛye bo ɖo ewu nɔ tun byo: «Mawu we oxolɔɖonyitɔ Yesu ke sɔn Nazarɛti we tomɛ le Galile we kansin mɛ wɛ. ¹² Yesu ɖyɛ Mawu we oxwe lɔ gbe, bo nya ɛmɛ ke sa onu ye kpo ɛmɛ ke xɔ onu nɔ ye, bo fli oho cɛ tɔye we tavoye kpo hɔnnɛ satɔye we okpoye. ¹³ Iwɛ e lɔ na ye tun byo: « E le winwlan le Mawuxo lɔ mɛ tun byo: '' Ye na yɔ oxwe tɛye tun ɛɖɛxotyɔn'', vɔ miye bo va sɔ do vasi jagudaye we okpletyɔn!» ¹⁴ Ŋuvanɔye kpo tɛkunɔye tɛkpwɛ le oxwe lɔ gbe. E bo gɔ adɔn na ye. ¹⁵ Ke Mawu we avɔsantɔ ɖaxoye kpo osɛnkplan-ɛmɛtɔye kpɔn onukpaca ɛmɛ ke Yesu wasi ye, bo se axwa kena vikpɛ o do nɔ le Mawu we oxwe lɔ gbe bo lɔ tun byo: «Gigo na Davidi we ovi!» E vɛ le yewu taŋu. ¹⁶ Iwɛ ye lɔ na Yesu tun byo: O se onu ke ye tun nɔ?» vɔ e lɔ na ye tun byo: « Ɛɛn! mi hɔn xlɛ oxo k'ye kpon wɛ? Oxo lɛye xɛn: ''O na na vikpɛ kpo vifeye kena le anɔ nuye o kanfu wu we nɔ''.» ¹⁷ Exin godo Yesu lɛ le yekɔn bo tɔn le toxo lɔ a do yi Betani we otota mɛ, blɛ wɛ e hlɔn le ozan lɔ mɛ. ¹⁸ Onyhinhɔngbe etɔn le keklenu, hwekenu na Yesu lɛ le Betani lɔ bo trɔ gbɔn va Jeruzalɛmu we toxo lɔ mɛ nɔ, xovɛ ci-i. ¹⁹ E kpɔn figitin ɖe le omɔ to tɛkpɔ-ɛ, vɔ amaye kɛɖɛ wɛ e kpɔn le e ji, iwɛ e lɔ na figitin lɔ tun byo: « Hɔn mɔ na sɛn oku ti kpɔn gbeɖe!» Le ontin lɔ mɛ zɔn ɖokpo, figitin lɔ bo xu le ote. ²⁰ Kena onukplanvi e tɔny kpɔn ɖo ɛmɔha, e kpa ca do ye, ye bo lɔ tun byo: «Naɖe lɛ figitin lɔ wa bo do ku le otin lɔ mɛ zɔnɖokpo?» ²¹ Yesu ɖo ewu na ye tun byo: «Le oxojɔxomɛ ko lɔ na mi nɔ, na mi ɖo xɔse mi ko xo onu kpon, mi na wasi onu kena ko wasi na figitin xin lɔ, e ko nyi exin ɖoɖyɔ hwɛn. Na mi lɔ na oso xin tun ni mɔ ve jɛ ɛxu mɛ ena jɔ. ²² Onuɖekpokpwe ke na mi na byɔ kpo xɔse le ɛɖɛxixo mɛ mi na yi-i. ²³ Hwekenu na Yesu ɖyɛ Mawu we oxwe lɔ gbe bo kplan onu ɛmɛye nɔ, avɔsantɔ ɖaxo Mawutɔnye kpo otomɛhynye tɛkpɔ-ɛ, bo kan-ɛ se tun byo: « ɛcɛ nɛ mɛ lɛ o nɔ wa onu xinye le, ɛmɛ nɛ lɛ na we ɛcɛ xin lɔ?» ²⁴ Yesu bo ɖo e wu na ye tun byo: « Bo can ko na kan oxo ɖokpo mi se, ɖokpo gee, na mi ɖo e wu na-a, ko na lɔ ɛcɛ ke ko do wasi onu xin lɛye nɔ na mi. ²⁵ Ɛmɛ nɛ lɛ ɖo jan dodan byo ni mɔɔ va yi lɛ Mawu we ɛsin na ɛmɛye? Mawu wɛ loo alo ɛgbɛtɔye?» Vɔ, ye jɛ lilɔ ji le yeɖe mɛ tun byo: «Na mi lɔ tun Mawu wɛ e na kan mi se tun byo: ''onunɛjɔ na mí hɔn do kan do eji ja?'' ²⁶ Na mí mɔ lɔ tun ɛgbɛtɔye tɔn wɛ, bɛ mí ɖo na vɔ na gbɛtɔ hwankpɔ lɔ bi, ɖo ye'mɛ bi nɔ sɔ Jan do kpɔn oxolɔɖonyitɔ Mawu tɔn.» ²⁷ Iwɛ dɔn ye ɖo ewu na Yesu tun byo: « Mí hɔn nyɔ.» Yesu bo ɖo ewu na ye tun byo ''bo can ko hɔn lɔ ɛmɛ ke na ɛcɛ wu na ko do wasi onu xin lɛye nɔ na mi nɔ. ²⁸ Yesu mɔ yi e ji bo lɔ tun byo: «oxo nɛ lɛ mi kpɔn do oxo ke wu? Dahwe ɖe le, bo ɖo ovi ŋusunglo owe. E tɛkpɔ ɛmɛ tantyɛntɔn, bo lɔ ni-i tun byo :''ovi tɛye, egbe, va yi wa odan le vɛngle tɛye mɛ. ²⁹ Ovi lɔ bo ɖo e wu ni-i lɔ tun byo: "ko hɔn ba yi ofi ɖe nɔ". oganxixo oviiɖe godo, e va ɖyɛ eɖe mɛ bo yi ofi lɔ.» ³⁰ Iwɛ dahwe lɔ sɔn ovi owegɔ lɔ de bo mɔ lɔ oxo ɖokpo ŋumyɔ lɔ ni. Ovi xin lɔ bo lɔ byo: '' Ko na yi'' vɔ, e ko mɔ va yi. ³¹ Ovi enɛ lɛ wasi do otɔ we ojro ji le ovi owe lɛye mɛ?» Ye bo ɖo ewu ni-i byo: "Tantyɛn lɔ wɛ." Iwɛ Yesu lɔ na ye tun: « Le oxojɔxo mɛ, ko lɔ na mi nɔ, takwɛjɔtɔye kpo kpaconɔye jɛ ŋukɔn na mi le Mawu wɛ xɔluɖuɖu lɔ mɛ. ³² Ɖo, Jan va bo ɖe ɛgbɛ jijwɛ zinzan we omɔ sɔ xlɛ mi, mi ko kan do eji; vɔ, takwɛjɔtɔye kpo kpaconɔye bo kan do eji. Iwɛ miye mi kpɔn ɖo emɔha ganke mi ko ɖyɛ miaɖe bo kan do eji.» ³³ Exin godo, Yesu lɔ tun byo: «Mi mɔ se olo didodo bu, vingletɔ ɖe le bo do vintiye do ogle etɔn mɛ bo do adokpa lɛdo-e, bo kun okun ogun ke mɛ na e na fyɔn rɛzin le lo, bo gba oxɔ ke mɛ na oglecɔtɔ na nɔ. Exin godo, e sɔ na kpama na oglelɛtɔ ɖeye bo zɛ hwɛn. ³⁴ Ke sinsɛn lɛye we ganmɛ va su, e dɔn odan sɔvi etɔnye ɖodan ogletɔ lɛye de na ye a do ni sinsɛn ke nyi axɔtu etɔn. ³⁵ Vɔ, oglelɛtɔ lɛye wle odansɔvi lɛye, bo xo ɖe, bo hu ɖe, bo tɔ ɛkpɛn wu ɖe gbɔɔn bo hu-i. ³⁶ Emɔ dɔn odan sɔvi buye dodan, ye bo su hugan tanyɛn tɔn ye, ogletɔ lɛtl bo mɔ wasi onu ɖokpo lɛye kpo ye, ³⁷ Le vivɔnu, e sɔ ovyɔ ŋusunglo sɔ ɖodan ye, bo lɔn tun byo: "ye na ɖo sisi na ovi ŋusunglɔ tɛye." ³⁸ Vɔ kena oglelɛtɔ lɛye kpɔn ovyɔ lɔ, ye lɔ na yeɖe tun byo: "Ovi ke ba sɔ cinnɔ lɔ nɔ xɛn, mí va, mí a hu-i, na mí a sɔ cinnɔ lɔ" ³⁹ Ye wle-e, bo dɔn-ɛ tɔn le ogle lɔ mɛ, bo hu-i. ⁴⁰ Syɛ na ogletɔ lɔ tete va va, naɖe e na hɛn ɖo na oglelɛtɔ lɛye"?» ⁴¹ Ye ɖo ewu ni-i tun byo: "E na hu oglelɛtɔ lannu wa tɔ lɛye nyinyla tɔn, a bo sɔ ogle lɔ na kpama wu ɛmɛ buye, ye bo na va ma etɔn ni le oganxixo etɔn mɛ". ⁴² Yesu lɔ na tun byo: «Mi hɔn xlɛ oxo ke lɔ le Mawu we oxo lɔ mɛ kpɔn gbeɖe wɛ? Ye wlan tun byo: "ɛkpɔn kena oxɔ tun tɔ ye gbɛ, iwɛ va trɔ zun azweji we ɛkpɛn. E ke sɔn Mawu de, bo yi Onu kpaca ɛmɛ na míye". ⁴³ Iwɛ dɔn, ko mɔ do lɔ na mi nɔ tun byo: Mawu na yi xɔluɖuɖu etɔn le mia si a bo sɔ na otogun ke na sɛn okun ke sɔgbe kpo xɔluɖuɖu etɔn lɔ. ⁴⁴ Ɛmɛ ke na flɛ jɛ ɛkpɛn xin lɔ ji, e na kankan, ɛmɛ ke ji na e na flɛ jɛ, ɛkpɛn lɔ na li-i kpɔɖɔ-kpɔɖɔ."» ⁴⁵ Kena Mawu we avɔsantɔ ɖaxo ye kpo Falizitɔye se olodido xin lɛye, ye se yi we gɔnmɛ hiye mɔ-ɛ Yesu mɔ lɔ oxo na nɔ. ⁴⁶ Ye kan ayixa nɔ ado wle-e vɔ ye vɔ ɛmɛ lɛye nɔ, ɖo ye nɔ susu-i tun Yesu mɔ nyi Mawu we oxolɔɖonyitɔ.