¹ Le hwexin lɔ nu, ounkplanvi Yesutɔnye va e kɔn bo lɔ ni-i tun: « Mɛnɛ ha lɛ na nyi ɛmɛ ɖaxo le sɛxwe we xɔluɖuɖu lɔ mɛ?» ² Yesu yɔ vikpɛvyu ɖokpo bo sɔ ɖo dodomɛ na ye ³ bo lɔ na ye tun: « Le xojɔxo mɛ ko lɔ na mi nɔ, na mi hɔn ɖɔli jijɔ bo trɔ zun vikpɛvyuye ha, mi hɔn ɖyɛ sɛxwe we xɔluɖuɖu lɔ mɛ nɔ kpɔn gbeɖe. ⁴ Exin wɛ dɔn, mɛ ɖe kpokpwe ke na sɔ eɖe sɔ hwe ɖi vikpevyuye ha we na nyi ɛmɛ ɖaxo le sɛxwe we xɔluɖuɖu lɔ mɛ. ⁵ Mɛɖe kpokpwe kena na yi vikpɛvyu ke ha le nyikɔ tɛye mɛ, bo tete wɛ e yi.» ⁶ Mɛɖe kpokpwe kena na tintrin ɖokpo le vikpɛvyu ke kan do jiye ye mɛ wa onunyinyla, na ye mɔ do sɔ ɛkpɛn ɖaxo ɖe sɔ sin do okɔ ni-i bo sɔ-ɛ sɔ flɛn do ɛxu mɛ can, e na mɔ nyɔ ni-i hu. ⁷ Babale na gbɛtɔye do ganxixo sinsyɛnxuye wu! Vɔ, babale na mɛ ke ji ye na gbɔn do va. ⁸ Na e nyi tun aɖusi lɔ tɔwe alo afɔ tɔwe wɛ nyi afɔklɛnnu na we, gbo-e tɛ a bo sɔ-ɛ sɔ flɛn do dindyɔnnu le wu we. E na nyɔ na we o na do ɖyɛ sɛxwe we xɔluɖuɖu lɔ mɛ kpo afɔ ɖokpo alo alɔ ɖokpo hugan hu, a ve le zomɛ kpodo afɔ tɔwe owe lɛye kpo alɔ owe lɛye. ⁹ E nyi tun ŋukunsin tɔwe ɖokpo wɛ nyi afɔklɛnnu na we, bo ɖe-e tɛ a bo sɔ flɛn do dindyɔnnu le wu we. E nyɔ na we hu o na ɖyɛ ozo mavɔ mɛ kpodo ŋukunsin owe lɛye. ¹⁰ « Mi kpɔn miaɖeye ji, mi ka kɔn acɔn do mɛ ɖokpo tete wu le vikpɛ kye mɛ, ɖo ko lɔ na mi nɔ tun, ɛwɛndotɔ yetɔnye mɔ le sɛxwe, mɔ nɔ le ote ganɖe kpokpwe mɛ, le ŋukɔn na Didaye ke le blɛ lɔ. ¹¹ Ɖo Gbɛtɔ we Ovi lɔ, va a do hwlɛn mɛ ke buye gan. ¹² Oxo nɛ ha lɛ mi kpɔn do oxo ke wu? Na mɛɖe ɖo lɛngbɔ kanweko, ɖokpo gee bo ve bu le ye mɛ ɖe, bɛ e hɔn jo lɛngbɔ kanwe fɔtɔn nukun ɛnɛ gbokpweye do fi ɖe le oso ji nɔ, a bo ve kan ke bu lɔ wɛɛ? ¹³ Ko lɔ na mi nɔ le xojɔxo me tun, na eva kpɔn-ɛ, e nɔ kpɔn jijwɛ do exin lɔ wu hugan hu kanwe fɔtɔn nukun ɛnɛ gbokpweye ke na hɔn bu lɛye. ¹⁴ Emɔha ke wɛ Miatɔ ke le sɛxwe can hɔn jlo tun ɖokpo a bu le vikpɛ kye wu.» ¹⁵ E nyi tun nɔvwe xɔsetɔ wa onunyinyla ɖe do we, yi e kɔn, a bo yɔ-ɛ, lɔ kpo i kpo ɖoɖyo, o mɔ lɔ onu ke e wa lɔ ni-i, na e se oxo tɔwe, dɔmɛ tɔwe na fa. ¹⁶ Na e hɔn se oxo tɔwe, yɔ ɛmɛ ɖokpo alo ɛmɛ owe bɔ do ɖi we wu, exin, mi mɔ lɔ oxo ɖekpokpwe a bo gbo dogbɔn ɛmɛ owe alo ɛmɛ atɔn we kunnuɖiɖe mɛ. ¹⁷ Na e gbɛ tun he mɔ hɔn se yetɔn nɔ, lɔ-ɛ na agun lɔ, na e mɔ gbɛ tun he mɔ hɔn se agun lɔ can we oxo nɔ, kpɔn-ɛ ɖi maxɔsetɔ ha alo takwɛjɔtɔ ha. ¹⁸ Le xojɔxo mɛ, ko lɔ na mi nɔ, onu ɖekpokpwe ke mi na bla le nyidanji, e na nyi bibla le sɛxwe, emɔha ke onu ɖe kpokpwe ke mi na tun le nyidan ji, e na mɔ nyi tuntun le sɛxwe. ¹⁹ Le xojɔxo mɛ, ko lɔ na mi nɔ ke, na ɛmɛ owe le mia mɛ bo ɖo gbekpɔ le nyidan ji bo do byɔ onu ɖe kpokpwe, Didaye ke le sɛxwe na sɔ-ɛ sɔ na ye. ²⁰ Ɖo ofi kena ɛmɛ owe alo atɔn kple le, le nyikɔ tɛye mɛ, ko le dodomɛ na ye.» ²¹ I wɛ Piyɛ va Yesu de bo lɔ ni-i tun: « Xwetɔ, zɔn nɛmu ha lɛ nɔvye na jɛ agɔ do-o, ko mɔ sɔ kɛ-ɛ? Gbɔɔn do jɛ zɔn acowe?» ²² Yesu bo ɖ'ewu ni-i tun lɔ byo: « O o! Gbɔɔn do jɛ zɔn acowe hwɛn ko lɔ na we nɔ, vɔ gbɔɔn do jɛ zɔn kanɖegban donu acowe. ²³ I wɛ dɔn, onu kena sɛxwe we xɔluɖudu lɔ ɖi xɛn: Gbeɖokpo xɔlu ɖe jlo tun odansɔvi hetɛye ni mɔɔ va jo kɔnŋuta na he. ²⁴ Kena e bɛ jɛ eji, ye kplɔ odansɔvi ke ɖu axɔ susu dwe, do va. ²⁵ Kena e hɔn ɖo onu ɖe bo na do tu axɔ etɔn, Xwetɔ lɔ na ogbe tun ye ni mɔɔ sa e lɔ, osyɔ, vikpɛ etɔnye kpodo onu ke e ɖo ye bisese, mɔɔ do tu axɔ etɔn lɔ. ²⁶ Kpoŋu, odansɔvi xin lɔ jɛ klita, bo do onu do ni-i, bo lɔ ni-i lɔ byo: "Xwetɔ, do agbɔxo na-a, ko na tu axɔ lɔ bisese na we." ²⁷ Xwetɔ lɔ kpɔn dɔŋuɖunu ni-i taŋu, bo sɔ axɔ etɔn lɔ sɔ kɛ-ɛ, bo jo-e do, e bo sɔn,. ²⁸ Hwekenu na odansɔvi xin lɔ tɔɔn, e kpe mɛɖe ke kpo i kpo nɔ wa odan, mɛ xin lɔ bo ɖu oho viɖe dwe. E wle ohlo ni-i, bo fyɔ-ɛ nɔ gbɔɔn bo ba tu gbigbɔ do xo ni-i nɔ, bo lɔ nɔ tun lɔ byo: " axɔ ke o ɖu do-o, twi na." ²⁹ Vɔ hatɔ xin lɔ, mɔ jɛ klita ni-i, bo ɖe kuku ni-i nɔ, bo mɔ lɔ nɔ tun: " Do agbɔxo na-a, ko na tu axɔ lɔ na we." ³⁰ Co o e bo gbɛ, bo dwɛn gbɔɔn sɔ sin gankpamɛ, na ni a nɔ blɛ gbɔɔn do jɛ hwekenu na e na tu axɔ etɔn lɔ. ³¹ Kena odanwagbɛ buye kpɔn onu kena jɔ nɔ lɔ, e zin ye ji, bo kpaca do ye, ye bo ve lɔ oxo lɔ na xwetɔ yetɔn lɔ. ³² I wɛ xwetɔ lɔ yɔ-ɛ do va, bo lɔ ni-i tun lɔ byo: "Odansɔvi nyinyla wɛ o nyi. Kena o ɖe kuku na-a, ko hɔn sɔ axɔ tɔwe bisese sɔ kɛ we wɛɛ? " ³³ Ke ko kpɔn dɔŋuɖunu na we ɖo, hɔn kpewu na kpɔn dɔŋuɖunu na odanwagbɛ tɔwe ɖ"emɔha wɛɛ?" ³⁴ I wɛ xwetɔ lɔ do aɖi dwe taŋu, bo mɔ sɔ-ɛ do gankpamɛ na ye a do do aya ni-i, gbɔɔn do jɛ hwekenu na e na tu axɔ etɔnye bisese. ³⁵ Emɔha wɛ Didaye ke le sɛxwe na wasi kpo mi, na ɖokpo-ɖokpo miatɔn hɔn sɔ ɛhwɛ sɔ kɛ nɔvyɔ sɔn oji etɔn mɛ.»