¹ Le nyatrekpo we godo, Yesu kplɔ Piyɛ, Jaki, kpo Jan ke nyi Jaki nɔvyɔ, ye be jɛ ovo le oso ke kɔ yi oji ɖe ji. ² Ninɔ mɛ etɔn ɖɔli le ŋumɛ na ye, ŋumɛ etɔn bo klɛn nɔ ɖi ohwe ha, awu etɔnye bo trɔ zun owe pepepe. ³ Haŋu zɔnɖokpo, Mɔyizi kpo Eli zɛ do ŋumɛ na onukplanvi lɛye bo lɔ oxo kpo Yesu nɔ. ⁴ Piye lɔ na Yesu lɔ byo: « Xwetɔ, bwɛ ke mí le ke nyɔ taŋu, na o jlo, ko na wasi nɔtyɔ atɔn do bwɛ lɔ, ɖokpo na nyi tɔwe, ɖokpo na nyi Mɔyizitɔn, ɖokpo mɔ nyi Elitɔn.» ⁵ Hwekenu na e gbɛ lɔ xo nɔ, sunwɔ kena klɛn nɔ ɖe va cɔn ye ji. Ogbe ɖe bo ɖi le sunwɔ lɔ mɛ tun lɔ byo: « Ɛmɛ ke lɔ wɛ nyi ovi vɛna-vɛna tɛye, elɔ wɛ nɔ do jijwɛ na-a, mi ɖo oto wu-i.» ⁶ Ke onukplanvi lɛye se ogbe xin lɔ, ye vɔ taŋu, bo cɔn ŋumɛnyi. ⁷ Yesu bo bɔ do yee wu bo ɖo alɔ ye wu, bo lɔ na ye tun: « Mi cite! Mi ka mɔ vɔ!» ⁸ Ke ye kɔ okɔ kpɔn jihwe, ye hɔn mɔ kpɔn mɛ ti zɛ gbɔn Yesu ɖokpo gee wu. ⁹ Hwekenu na ye jɛte le oso lɔ ji nɔ, Yesu do osɛn ke na ye tun: «Onu ke na mi kpɔn, mi ka lɔ na mɛ ɖe gbɔɔn do yi hwekenu na Gbɛtɔ we Vi lɔ na fɔn sɔn ɛmɛ kukuye mɛ.» ¹⁰ Exin we godo, onukplanvi etɔnye kan se wu-i tun: « Ŋunɛ jɔ na osɛnkplan-ɛmɛtɔye nɔ do lɔ tun, Eli mɛ mɔ ɖo na va jɛ ŋukɔn?» ¹¹ Yesu bo ɖ'ewu na ye lɔ byo: «Ɛɛn, Eli ɖo na va a bo va jla onu bisese ɖo. ¹² Vɔ, blɔ ko lɔ na mi nɔ tun, Eli lɔ mɔ o va ye ko do josi wu-i. Vɔ onu ɖekpokpwe ke jlo ye wɛ yee wasi kpwe. Emɔha ke wɛ ye na do aya na Gbɛtɔ we Vi lɔ

can ɖo.»

¹³ Hwexinnu wɛ onukplanvi lɛye va nyɔ-ɛ tun Jan Mawu we ɛsinlɛna-ɛmɛtɔ lɔ, we xo mɛ Yesu mɔ lɔ nɔ. ¹⁴ Kena Yesu jɛ ɛmɛ susu lɛye kɔn, dahwe ɖe bɔ do Yesu wu, bo jɛ klita le ŋukɔn ni-i, ¹⁵ bo lɔ ni-i tun byo: «Xwetɔ, kpɔn dɔŋuɖunu na ovi ŋusunglo tɛye, kukpwe we adɔn wɛ le ewu, e bo se vivɛ nɔ taŋu. Ganmɛ-ganmɛ e nɔ flɛ jɛ oz mɛ alo ɛsin mɛ. ¹⁶ Ko hɛn-ɛ do va na onukplanvi tɔweye, vɔ, yee hɔn kpewu bo gɔ adɔn ni-i.» ¹⁷ Yesu bo lɔ na ye tun: « Miye, ɛmɛnyinylaye kpodo mɛ kena h ɔn kan do Mawu ji yee wɛ mi nyi; Gbɔɔn do jɛ ogan nɛ mɛ lɛ ko na nɔ miakɔn na a bo do do agbɔxo nɔ? Mi kplɔ ovi lɔ va na-a le bwɛ!» ¹⁸ Yesu bo ɖegbe do gbigbɔ nylakan lɔ, e bo tɔn le ovi lɔ mɛ, ovi lɔ bo kpɔn adɔngigɔ le ganxixo xin lɔ mɛ. ¹⁹ I wɛ onukplanvi lɛye va tɛkpɔ Yesu do ovo, bo kan se wu-i nɔ lɔ byo: « Ŋunɛ jɔ na míye hɔn do kpewu bo nya gbigbɔ nylakan xin lɔ?» ²⁰ Yesu bo ɖ'ewu na yee lɔ byo: Xɔse miatɔn hwe din wɛ dɔ. Le xojɔxo mɛ, ko lɔ na mi nɔ tun, na mi do ɖo xɔse e bo le ɖi otinkunvi kete-keteye ha wɛ, mi na lɔ na oso xin ye lɔ byo: « Kɔ ɖiwe le blɛ, a bo ve jɛ ble dan, e bo na kɔ eɖe tɛ. Onu ti ko glo wiwasi na mi nɔ.» ²¹ Vɔ dogbɔn onu bibla kpo ɛɖɛ kpo mɛ wɛ gbigbɔ nylakan xin ha, nɔ tɔn le.]» ²² Gbeɖokpo, hwekenu na ye le kpɔkpɔ le Galile, Yesu lɔ na onukplanvi etɔnye tun: « Ye na sɔ Gbɛtɔ we vi lɔ sɔ jo na gbɛtɔye, ²³ ye bo na hu-i, i we nyatɔngbe etɔn e na fɔn sɔn oku.» Oxo xin lɔ bo nyi tamɛ bubu na ye taŋu. ²⁴ Hwekenu na Yesu kpo onukplanvi etɔnye va jɛ Kapɛnawumu, mɛ ke nɔ jɔ Mawu we oxwe lɔ gbe we takwɛyee tɛkpɔ Piyɛ, bo kanse wu-i lɔ byo: « Onukplan-ɛmɛtɔ miatɔn hɔn nɔ tu takwɛ lɔ wɛɛ?» ²⁵ Piyɛ bo ɖ'ewu ni-i tun lɔ byo: « Ɛɛn.» Kena Piyɛ va jɛ xwegbe, Yesu va lɔ ni-i tun lɔ byo: « Simɔ! Oxo nɛ ha lɛ o kpɔn do oxo ke wu? Ɛmɛ e nɛ ha lɛ na tu takwɛ alo hojɔ na ɛgbɛ mɛ bwɛ we xɔluye? Toviye wɛɛ alo jonɔye?» ²⁶ Piyɛ bo ɖ'ewu ni-i tun: « Jonɔ wɛ.» Yesu bo lɔ ni-i tun lɔ byo; « Kena e le emɔha, e hɔn kan tovi lɛye. ²⁷ Vɔ, na mi hɔn na do nyi afɔklɛnnu na ye, yi tɔji a bo da omlɛ, dɔn ohwe tantɛn ke o na wle, a bo klɛ onu ni-i, o na kpɔn ohogan ɖe le onu lɔ mɛ. Sɔ-ɛ sɔ na do bo kpo i kpo nu.»