¹ Falizitɔye kpo Sadusitɔye bɔ do yesu wu bo jlo na ɖo omɔ ni-i. I wɛ ye lɔ ni-i tun: « ni mɔɔ ɖe josi ɖe xlɛ gbɔn ŋudandonu wiwasi mɛ na hiye a mɔ do nyɔ-ɛ tun Mawu mɛ mɔ ɖo-e ɖodan. ² Vɔ, e bo ɖo ewu na ye lɔ byo: «Na hwedo do ohwe bo gba amizɛn, mi nɔ lɔ tun: swɛ, ɛgbɛ lɔ mɛ na nyɔ.» ³ Le klɛklɛnu na ɛgbɛ lɔ mɛ bla zɛgɛ, mi nɔ lɔ tun: «Oju mɔ na ja egbe. mi nyɔ kena ye nɔ ɖe jiŋukunsin we ninɔmɛ ye we gɔnmɛ ɖo, vɔ mi ko kpewu o ɖe ganxixo ke we gɔnmɛ nɔ. ⁴ Jijimɛvi egbetɔn kiye, ɛmɛ nyinylaye kpodo ogbejimanɔtɔye, wɛ mi nyi, mi kan josi ɖe nɔ, vɔ, oxolɔɖenyitɔ jonasi we josi ɖoɖyo jan wɛ ye na kpɔn.» Exin we godo, e bo jo ye do bo sɔn. ⁵ Hwekenu na ye sin otɔ lɔ we godo nɔ, onukplanvi lɛye wɔn kpɔnnɔ hinhɛn. ⁶ Yesu lɔ na ye tun lɔ byo: « Mi ɖo ayi te, mi cɔ miaɖeye nywɛɖe ɖo kpɔnnɔtinkɛn Falizitɔyetɔn kpodo sadusitɔyetɔn wu.» ⁷ Onukplanvi lɛye bo jɛ lilɔ ji le yeɖe mɛ lɔ byo: kpɔnnɔ ke mí hɔn hɛn wɛ dɔn na e do lɔ emɔha nɔ. ⁸ Kena Yesu kpɔn onu jɛ oxo xin lɔ wu, e lɔ na ye tun: «Mi mɛ xɔse ovii nɔ ye, ŋunɛ jɔ mi do lɔ le miaɖe mɛ nɔ tun, kpɔnnɔ ke hiye mɔ hɔn hɛn mɛ mɔ dɔn na bo mɔ do lɔ emɔha nɔ? xɔse miatɔn hwe ke! ⁹ Mi hɔn se i we gɔnmɛ wɛɛ? Mi hɔn ɖoŋu do kpɔnnɔ atɔɔn kena gbɛtɔ akpo atɔɔn (5000) ɖu kpodo jaxwi nɛmu-nɛmu ɖe ke mi bɛ wu wɛɛ? ¹⁰ Mi hɔn flin kpɔnnɔ acowe ke gbɛtɔ akpo ɛnɛ (4000) ɖu kpo jaxwi nɛmu-nɛmu ke mi bɛ wu wɛɛ? ¹¹ Ŋunɛ jɔ na mi hɔn do i we gɔnmɛ tun ko mɔ hɔn lɔ na mi tun lɔ byo: « Mi cɔ miaɖe do kpɔnnɔtinkɛn Falizitɔyetɔn kpodo Sadusitɔyetɔn wu?» ¹² Hwexin lɔ nu wɛ ye va se i we gɔnmɛ tun e mɔ hɔn tun ye mɔɔ gbɔn akpa na kpɔnnɔ tinkɛn, vɔ ye mɔɔ vɔ yeɖe do Falizitɔye kpo Sadusitɔye we onukpinkplanye wu. ¹³ Hwekenu na Yesu va sezale we kansinmɛ le Filipu we toxo lɔ mɛ, e kan oxo wu onukplanvi etɔnye se tun: «Mɛnɛ ha lɛ ɛmɛye nɔ lɔ tun Gbɛtɔ we Ovi lɔ mɔ nyi?» ¹⁴ Onukplanvi lɛye bo ɖo ewu ni-i tun lɔ byo: « Mɛɖeye nɔ lɔ byo, Jan Mawu we ɛsin lɛ na ɛmɛtɔ, mɛɖeye bo nɔ tun eli, mɛbuye bo nɔ lɔ tun i mɔ nyi Jelemi, alo ɛmɛ ɖokpo le Mawu we oxolɔɖenyitɔye mɛ.» ¹⁵ E bo lɔ na ye tun lɔ byo: « Miye ɛmɛ nɛ ha lɛ ko nyi na mi nɔ lɔ? ¹⁶ Simɔ piyɛ yi oxo, bo lɔ ni-i byo: « I wɛ nyi Klisu mawu ɛgbɛ-ɛgbɛ we Ovi.» ¹⁷ Yesu bo lɔ ni-i tun: « Simɔ Jonasi we vi, nyɔnanɔ wɛ o nyi, ɖo, ɛgbɛ hwɛn ɖe onu xin lɔ xlɛ we, vɔ, Didaye ke le sɛxwe wɛ ɖe-e xlɛ we. ¹⁸ I wɛ blɔ ko lɔ na we nɔ lɔ byo, i mɔ nyi Piyɛ (i we gɔnmɛ wɛ nyi ɛkpɛn), ko bo na tun oxɔ tɛye do ɛkpɛn xin lɔ ji. I wɛ oku we hɔnhlɔn hɔn kpewu na wa onu ti ni-i. ¹⁹ Ko na sɔ sɛxwe we xɔluɖuɖu lɔ we caviye sɔ na we, onuɖekpokpwe ke mi na bla le nyidan ji na nyi bibla le sɛxwe, emɔha ke, onu ɖekpokpwe ke mi na tun le nyidan ji na nyi tuntun le sɛxwe.» ²⁰ Esin we godo, Yesu do osɛn na onukplanvi etɔnye vivɛɖe tun ye ni mɔ ka lɔ na mɛ ɖe tun he mɛ mɔ nyi Klisu lɔ. ²¹ Bɛ sɔn hwexinnu wɛ Yesu jɛ ɖiɖexlɛ onukplanvi etɔnye ji tun he mɔ ɖo na yi Jeluzalɛmu, otomɛhyɔnye, Mawu we avɔsantɔ ɖaxoye kpodo osɛnkplan-ɛmɛtɔye mɔ na do aya susu na he, a mɔɔ hu he, vɔ, nyatɔngbe etɔn, he mɔ na fɔn sɔn oku. ²² I wɛ Piyɛ kplɔ-ɛ do jɛ ovo, bo jɛ gbigbɛ ni-i ji lɔ byo: «Xwetɔ! Mawu ni ka lɔn, e hɔn na jɛ do jiwe kpɔn gbeɖe.» ²³ Vɔ, Yesu lɛ kɔ bo lɔ ni-i lɔ byo: « Tɛyi le wu ye Satana! Afɔklɛnnu wɛ onyi na-a, ɖo susu tɔwe hɔn sɔgbe kpo Mawutɔnye kpo, vɔ gbɛtɔye we susu wɛ o ɖo.» ²⁴ Exin we godo, e lɔ na onukplanvi etɔnye tun: « Na mɛɖe jlo na xodo-o, e ɖo na gbɛ onu le eɖe wu, a bo kɔ otinsogagban etɔn, a bo xodo-o. ²⁵ Ɖo mɛɖe kpokpwe ke jlo na hwlɛn ɛgbɛ etɔn gan, na bu-i, vɔ mɛɖe kpokpwe ke na bu ɛgbɛ etɔn do blɔ wu ye, na kpɔn-ɛ. ²⁶ Ɖo na mɛɖe ɖo ɛgbɛ mɛ bwɛ we dɔkunnuye bisese, vɔ bo bu ɛgbɛ etɔn, ale enɛ ha lɛ e nyi ni-i? Alo ŋunɛ lɛ gbɛtɔ na na a do tu axɔ na ɛgbɛ etɔn? ²⁷ Ɖo, gbɛtɔ we Ovi lɔ na va le Otɔ we gigo mɛ, kpo ɛwɛndotɔ etɔnye, a bo tu odan ke mɛ ɖokpo-ɖokpo wa we axɔ ni-i. ²⁸ Ko lɔ na mi nɔ le xojɔxo mɛ tun: Le mɛ ke le bwɛ ye mɛ, ɛmɛ ɖeye hɔn ku nɔ gbɔxwe ye na kpɔn gbɛtɔ we Ovi lɔ, e mɔ va le xɔluɖuɖu etɔn mɛ.»