¹ Hwexinnu Falizitɔye kpo osɛnkplanɛmɛtɔye, sɔn Jeluzalɛmu, bo va Jesu kɔn, bo lɔ ni-i tun ² byo:«Onunɛjɔ na onukplanvi tɔweye hɔn nɔ zɔn do dagbo-dagboye we akɔnuye ji? Ɖo, ye hɔn nɔ klɔ alɔ yetɔnye ɖi kena akɔnu lɔ byɔ ɖo ha gbɔxwe nɔ ɖu onu.» ³ Yesu ɖo ewu na ye tun byo:«Miye ɖe, onunɛjɔ na mi nɔ do da le Mawu we osɛn ye ji a do va yi zɔn do akɔniu miatɔnye ji? ⁴ Ɖo Mawu lɔ tun byo: '' Bu didawe kpo nawe" iwɛ " ɛmɛ ke na lɔ oxo nyinla do onu wu ye ɖo na hu-i.'' ⁵ Miye mi nɔ lɔ tun byɔ: '' Na ɛmɛɖe lɔ na onɔ alo otɔ tun byo: '' onukena ko ɖo na we a do kpe do wuwe, ko kan atanŋu tun ko na sɔ na Mawu'', ⁶ e hɔn mɔ le dandan tun ɛmɛ xin lɔ a mɔ na onu xin lɔ otɔ kpo onɔ a bo do bubu ye wu. Emɔha wɛ mi nɔ sɔ akɔnu miatɔnye a do hu ɛcɛ n a Mawu we oxo lɔ ɖo. ⁷ Ɛyɛmɛnuwatɔye, oxo kena Mawu lɔ na ɛzayi, e bo lɔ do mia wu, e ɖi mia wu. E lɔ tun byo: ⁸ ''onu wu jan wɛ otogun ke nɔ do bubu wuye le, vɔ oji yetɔn ye din do. ⁹ Sinsɛn kena ye wasi na nɔ onu vovo wɛ e nyi ɖo, osɛn ke ye nɔ kplan ɛmɛye, ɛgbɛtɔye we ogbe ɖiɖeye wɛ''.» ¹⁰ Exin godo, Yesu yɔ ɛmɛ susu lɛye bo lɔ na ye nɔ tun byo:« Mi ɖ'oto a bo se oxo ke we gɔnmɛ: ¹¹ E hɔn yi onu kena ɖyɛ ɛgbɛtɔ we onu mɛ hwɛn nɔ do oɖyu-i, vɔ onu ke nɔ tɔn sɔn ɛgbɛtɔ we onu mɛ wɛ nɔ do oɖyu-i.» ¹² Iwɛ onukplanvi etɔnye tɛkpwɛ bo lɔ ni-i tun byo:« Onywɛ tun kena falizitɔye se oxo xin lɔ, e vɛ le ye wu? ¹³ E bo ɖo e wu tun byo:«Otin ɖekpokpwe kena didayeke le sɛxwe hɔn do ye na hɔn-ɛ. ¹⁴ Mi ɖe okɔ le ye wu. Ŋukunsintɔnnɔye wɛ hɛn alɔ nu na yeɖe ye. Na ŋuvanɔ ɖe kplɔ hatɔ ŋuvanɔ nɔ, ye'mɛ owe lɛye na ve flɛ jɛ ogun mɛ.» ¹⁵ Piyɛ yi oxo bo lɔ ni-i tun byo:« Ɖe olodido xin lɔ gɔnmɛ na mí.» ¹⁶ Yesu lɔ ni-i tun byo:« Bɛ zìnzìn mɔ hwedo miye can ɖ'emɔha wɛ? ¹⁷ Mi hɔn nywɛ tun onu ɖekpokpwe kena ɖyɛ onu mɛ, nɔ gbɔn adɔ mɛ, a bo ve tɔ le hwekenuna ye yi fɔji wɛ? ¹⁸ Vɔ, onu kena nɔ tɔn sɔn onù mɛ, oji mɛ wɛ e nɔ tyɔn sɔn, exin lɔ wɛ nɔ do oɖyu wu ɛgbɛtɔ. ¹⁹ Ɖo, oji mɛ wɛ susu nyinlaye nɔ sɔn: ɛmɛhuhuye, afɔdogbeye, ɛgbɛ ɖuɖyu zinzanye, ajojijɛye, kunnunyinyla ɖiɖeye, acɔn kinkɔn do ɛmɛ wu ye. ²⁰ Onu nyinyla xinye wɛ nɔ do oɖyu wu ɛgbɛtɔ. Vɔ na ye hɔn klɔ alɔ gbɔxwe ɖu onu, e hɔn nɔ do oɖyu wu ɛmɛ. ²¹ Yesu lɛ le blɛ bo sɔn yi Tilu kpo Sidɔn we akpa ji. ²² Iwɛ nyɔnu kana tɔ ke tɔn sɔn akpa xin lɔ ji va, bo xwi axwa dido yun byo:«Xwetɔ Davidi vyɔ, kpɔn dɔŋuɖunu na-a! Gbigbɔ nyinyla o do hannu na ovi nyɔnuvi tɛye nɔ taŋu.» ²³ Vɔ, Yesu hɔn kɛ onu do emɛ ni-i. Onukplavi etɔnye tɛkpwɛ bo lɔ ni-i tun byo:« Nya-ɛ ɖo e do axwa le ɛtɛ na mi nɔ.» ²⁴ Yesu ɖo ewu tun byo: Izrayɛlivikpeye ke le ɖi lɛngbɔ ke buye ha, kɔn jan wɛ ye ɖo-o dodan.» ²⁵ Vɔ, nyɔnu lɔ va jɛ klita le ŋukɔn ni-i bo lɔ tun byo: «Xwetɔ, va gɔ alɔ na-a!» ²⁶ Yesu ɖo ewu ni-i byo:« hɔn nyɔhwɛn na ye a sɔ vikpɛye we onuɖuɖu a sɔ da ɖodan ovu viviye.» ²⁷ Nyɔnu lɔ ɖo ewu ni-i tun byo:« Oxojɔxo wɛ Xwetɔ, ganke ovu viviye nɔ can onuɖukwi ke nɔ flɛ nɔ le hwekenu na xwetɔ yetɔnye nɔ ɖu onu nɔ ma!» ²⁸ Iwɛ Yesu ɖo ewu ni-i tun byo: Nyɔnu, xɔse tɔwe glo ke! Ni nyi wiwa si na we ɖi ke ojro ɖo ha. Ovyɔ nyɔnuvi lɔ bo kpɔn okan tuntun le oganxixo xin lɔ mɛ. ²⁹ Yesu lɛ le blɛ bo sɔn yi Galile we otɔ to. E xɛ oso ɖe ji bo xinnɔnyi le blɛ. ³⁰ Ɛmɛ susu gbagbagba bo va e kɔn bo hɛn ɛmɛ ke twɔn nɔ ye, ŋuvanɔye, tɛkunɔye, onumakɛnɔye, kpo adɔnnɔ bubuye do va. Ye bɛ adɔnnɔ lɛye do akɔnmɛ na Yesu, e bo gɔ adɔn na ye. ³¹ Ke ɛmɛ lɛye kpɔn tun onumakɛnɔye mɔ lɔ oxo nɔ, tɛkunɔye bo kpɔn adɔn gigɔ nɔ, ɛmɛ ke nɔ twɔn nɔ ye o zɔn zɔnlin nɔ nywɛɖe, ŋuvanɔye bo kpɔn onu nɔ, e kpaca do ye, ye bo xwi Izrayɛli we Mawu kinkanfu. ³² Yesu yɔ onukplanvi e tɔnye bo lɔ na ye tun byo:« ɛmɛ k'ye we onu ɖu adɔnu na-a, sɔn onyihinhɔn atɔn gbɔn xɛn ye le kɔn ye, ye kɔ ɖo onu ke na ye na ɖu. Ko hɔn jro na ɖe ogbe na ye tun ye mɔɔ xovɛ-xovɛ, gbafan na gbɛ ve xo ye le omɔ ji.» ³³ Onukplanvi etɔnye bo lɔ ni-i tun byo :« Fye le mí na kpɔn onuɖuɖu le e mɔ gɔ gomi na ɛmɛ ɖoɖo xin ye le zogbeji bwɛ?» ³⁴ Yesu bo kan ye se tun byo: «kpɔnnɔ nɛmu lɛ mi ɖo?» Ye bo ɖo ewu ni-i tun byo: «Acowe kpo ohwe vivi ɖeye.» ³⁵ Iwɛ e ɖe ogbe na ɛmɛ lɛye tun ye mɔɔ xinnɔnyi le nyidan mɛ. ³⁶ E yi kpɔnnɔ acowe lɛye kpo ohwe lɛye, iwɛ ke e do ɛkpɛ na Mawu do ye ji vɔ, e ma ye bo sɔ na onukplanvi lɛye, ye bo ma-ɛ na ɛmɛ lɛye. ³⁷ Ye'mɛ bi ɖu gomi bo gɔ ye'mɛ bi. Ye bo bɛ gbokpwe na ye hɔn du ye, e bo gɔ jaxwi acowe. ³⁸ Ɛmɛ ke ɖu onu lɛye, ŋusugloye nyi akpo ɛnɛ (4000) ye ko xlɛ nyɔnusiye kpo vikpɛviye. ³⁹ Kena Yesu ɖe ogbe na ɛmɛ lɛye byo ye mɔɔ va sɔn vɔ, e ɖyɛ otɔjihun me bo sɔn yi Magadan we kansin mɛ.