¹ Le hwekenu, Elodu ke ɖu ogbá le Galilé we kansinmɛ, se onu ke Yesu o wasi nɔ ye. ² E lɔ́ na odansɔvi etɔnye tun byo; « Jan Mawu we ɛsinlɛna-ɛmɛtɔ wɛ e nyi! E hɔn fɔn sɔn oku, yi wɛ dɔn na ŋudan donu wiwasi we ɛ̀cɛ̀ do le esi» ³ Ɖo Erodu o ɖe ogbe saa tun ye mɔ wle Jan mɔ sɔ tú do gankpamɛ, mɔ do caba ni-i. Erodya di Filipu syɔ, we oxo wɛ dɔn. Filipu lɔ bo nyi Erodu nɔvyɔ. ⁴ Ɖo Jan o lɔ na Erodu tun byo:« Omɔ ɖiɖe hɔn le na we na o na do yi-i sɔ ɖo siwe». ⁵ Erodu jlo na hu Jan, vɔ e bo vɔ ɛmɛye nɔ, ɖo ɛmɛ lɛye nyɔ-ɛ tun Jan, mɔ nyi Mawu we oxolɔ ɖ'onyitɔ. ⁶ I wɛ gbeke, gbe ke Erodu ɖu jijigbezan etɔ́n we oxwe nɔ, Erodyadi vyɔ nyɔnuvi va ɖu oxwe le ŋukɔn na ɛmɛ ke Erodu yɔ ye, e bo jɛŋu ni-i. ⁷ Gbɔɔn e bo fyan ajɔgbe ni-i tun, onuɖekpo kpwe ke e na byɔ, he mɔ na ni-i. ⁸ Dogbɔn nyɔnuvi lɔ onɔ́ we okplangbe mɛ, nyɔnuvi lɔ lɔ́ tun byo:« sɔ Jan Mawu we ɛsin lɛ na ɛmɛ tɔ lɔ we otá sɔ na-a, syɛ trolo, e mɔ le agba mɛ!» ⁹ Xɔlu lɔ bo ɖyɛ tamɛ bubu ɖaxo mɛ, vɔ do ajɔgbe ke e fyan le ɛmɛ kena e yɔ ye we ŋumɛ wu, e ɖe ogbe tun ye mɔ sɔɛ ni-i ¹⁰ E bo dɔn ɛmɛye do dan tun ye mɔ ve gbo otá na Jan le gankpa lɔ mɛ. ¹¹ Ye sɔ ota etɔn lɔ sɔ va, e bo le agban mɛ, bo sɔ na nyɔnuvilɔ, bo sɔ ve na onɔ ¹² Jan we onukplanvi ye ve kɔ ocɔ́ etɔ̀n bo ve ɖi-i Exin godo, ye ve lɔ onu ke jɔ̀ lɔ na Yesu. ¹³ Ke Yesu se Jan we oku xo, e bo lɛ le kansin lɔ mɛ, bo tɛ yi zɔga le toxoye mɛ bo zɔn afɔ̀ bo xo do-e. ¹⁴ Hwekenu na yesu tɔn le tɔjihun lɔ mɛ, e kpɔn ɛmɛ susu gbagbagba, onu yetɔn adɔnu ni-i taŋu, iwɛ e gɔ̀ adɔn na adɔn nɔ yetɔn ye. ¹⁵ Ke na ozàn o dò nɔ, onukplanvi etɔn ye va ekɔn bo lɔ ni-i tun byo:« zogbeji wɛ nyi bwɛ, hwedó bo o do. Ɖegbe na ɛmɛye na ye a sin otoxo lɛye mɛ a do ve xɔ onu ke ye na ɖu.» ¹⁶ Yesu bo ɖ'ewu na ye tun byo:« E hɔn hyan tun ye a sɔn, miye teteye mi na ye onuɖuɖu.» ¹⁷ Vɔ ye ɖo ewu ni-i tun byo:« kpɔn nɔ atún kpodo ohwe owe Jan wɛ mi ɖo le bwɛ.» ¹⁸ Yesu lɔ̀ na ye tun byo:« Mi sɔ ye va na-a» ¹⁹ Exin godo, e ɖe ogbe na ɛmɛ lɛye tun ye mɔ xin nɔ nyi le ogbe ye ji, e bo sɔ kpɔnnɔ atun lɛye kpo ohwe owe lɛye bo ɖe kɔ kpɔn jiŋukunsin bo do ɛkpɛ na Mawu. I wɛ e ma na ɛmɛ lɛye. ²⁰ Ɛmɛ zɛtɛbi ɖu onu gomi bo gɔ ye. Ye bo bɛ gbokpwe ke ye hɔn ɖu ye do jaxwi mɛ gbɔɔn jaxwi weve bo gɔ́, do sɔn. ²¹ Le ɛmɛ ke ɖu onu lɛye mɛ, ŋusungbloye na yi akpa atun ha, ye ko xlɛ nyɔnusiye kpo do vikpɛye. ²² Zɔnɖokpo Yesu zin onukplanvi lɛye ji tun ye mɔ dyɛ otɔjihun mɛ a mɔ jɛ ŋukɔn na he, a do yi otɔ̀ lɔ́ gòdó, hwexinu e bo ɖe gbe na ɛmɛ susu lɛye nɔ tun ye mɔ va sɔ́n. ²³ Kena e ɖe ogbe na ɛmɛlɛye ye bo sɔn vɔ, e sin osó ji a do ve nɔ zɔga a do xo ɛɖɛ Ozan do, e lɔ ɖokpo gee bo le blɛ. ²⁴ Otɔ ji hun lɔ bo o le dindyɔn nu daan na asanu, ɛsin bo gba kɔn do e wu nɔ taŋu, e bo kpe jɛhɔn nɔ. ²⁵ Le ozan gan ɛnɛ mɛ ha, e zɔn zɔnlin gbɔn otɔ̀ lɔji nɔ do sin yekɔ̀n nɔ. ²⁶ Hwekenu na onukplanvilɛye kpɔn-ɛ ebo zɔn zɔnlin gbɔn otɔ̀ ji nɔ, oji yetɔn bo gbado, ye bo lɔ tun byo:« yɛflun-wɛ!» vivɔ jɛ ye ji, ye bo jɛ axwa dido ji. ²⁷ Vɔ yesu lɔ̀ na ye zɔnɖokpo tun byo:« oji miatɔn ni jɛ e mɛ, bo wɛ, mi ká mɔ vɔ o!» ²⁸ Iwɛ Piyɛ lɔ ni-i tun byo:« xwetɔ na e nyi yi wɛ, bo ɖe ogbe na-a na ma zɔn zɔnlin gbɔn otɔ̀ lɔji, a do va kɔnwe.» ²⁹ Yesu ɖ'ewu ni-i tun byo: « va» iwɛ Piyɛ tɔ́n le tɔjihun lɔ mɛ, bo zɔn zɔnlin gbɔn otɔ̀ lɔ nɔ, a do ve kpe-e ³⁰ vɔ kena Piyɛ kpɔn tun jɛhɔn lɔ mɔ syɛnxu nɔ, e vɔ bo jɛ sisyɔ ji, iwɛ e d'axwa tun byo:« xwetɔ va yi-u!» ³¹ Zɔn ɖokpo yesu drɛn alɔ́ bo wle-e bo ni-i tun byo:« xɔse ovi nɔ, ŋunɛjɔ o do xo onukpɔn?» ³² Ke ye ɖyɛ tɔjihun lɔ mɛ, jɛhɔn lɔ ɖote. ³³ Iwɛ onukplanvi ke o le tɔji hun lɔ mɛ ye, do onù dò na Yesu bo lɔ tun byo:« Mawu we ovi wɛ o nyi xonúgbo!» ³⁴ Ke ye tà otɔ lɔ vɔ, ye ve jɛ ago do Jenɛzalɛti we kansinmɛ. ³⁵ Ɛmɛ ke le blɛ ye, dò josi wu Jawu yesu bo ve lɔ na ɛmɛ ke le kansin lɔ mɛ ye bisese, ye bo bɛ adɔnnɔ zɛtɛye va ni-i. ³⁶ Ye bo ɖe kuku ni-i nɔ tun ni mɔ na ogbe wu hiye a mɔ gbe ɖo alɔ awu etɔ́n we otó wu kpoŋu. Ɛmɛ bi ke do alɔ awu etɔn lɔ we oto wuye, nɔ kpɔn adɔ