¹ Kena Yesu kplan onu xin lɛye onukplanvi etɔn weve lɛye vɔ, e lɛ le blɛ, a do ve kplan onu emɛye a mɔ do jla Mawu we oxo lɔ gbɔn toxo yetɔnnye mɛ. ² I we Jan yehwesinlɛna-ɛmɛtɔ le gankpamɛ bo se klisu we o dan ke e wasi nɔ ye we oxo. E bo sɔ ɛmɛ ɖo dɛn gbɔn onukplanvi etɔn ye ji bo na do kan-se tun byo : ³ «Yi wɛ nyi ɛmɛ kena na va lɔ? Alo mi mɔ na nɔte kpɔn ɛmɛbu wɛɛ ?» ⁴ Yesu ɖ'ewu na ye tun byo : «Mi yè lɔ onu ke mi o kpɔn nɔ ye kpo onu ke mi o se nɔ ye na Jan. ⁵ Ŋuvanɔye o kpɔn nu nɔ, tɛkunɔye bo zɔnzɔnlin nɔ okpodɔnnɔye bo trɔ zun ɛmɛ mimɛnɔ, otokunɔye bo senu nɔ, ɛmɛ kukuye bo fɔn sɔn oku nɔ, ayatɔnɔye bo se ɛwɛn nywɛ lɔ we oxonɔ . ⁶ Nyɔnanɔ we na nyi ɛmɛke k'ɔn nyi omɔglɔnnu na xɔse na.» ⁷ kena Jan we onukplanvi lɛye trɔ sɔn vɔ, Yesu jɛ oxo lilɔ na otogun lɔ do jan wu byo : «ŋumɛ mi jlo na ve kpɔn le zogbeji ? Okɔn kena jɛhɔn nɔ do owe na nɔ wɛɛ ? ⁸ Syɛ ɖe onu e nɛ lɛ mi jlo na ve kpɔn ye trolo ?Dahwe ɖe ke wa ɖanŋu jla ɖo wɛɛ ? Ɛmɛ ke nɔ do cigan we awuye, xɔluye we oxwegbe we ye nɔ nɔ. ⁹ Vɔ ŋume le mi tɔn ve kpɔn Oxolɔ ɖ'onyitɔ ɖe wɛɛ? Ɛin, ko o lɔ na mi nɔ tun byo, e hugan wu Mawu we oxolɔ ɖ'onyitɔ. ¹⁰ Mi kpɔn ɛmɛke wu ye wlan onu do tun : kpɔn, ko na sɔ oxolɔɖ'onyitɔ tɛye ɖodan, e na jɛ nukɔn na we; a bo do ve jla omɔ tɔwe ɖ'onyi na we". ¹¹ Le xojɔxomɛ ko o lɔ na minɔ : le ɛmɛ ke nyɔnusi gbɛ ji ye mɛ, ɛmɛti hɔn le bo hugan Jan Mawu we ɛsinɛna-ɛmɛtɔ lɔ. E le emɔha co ganke, ɛmɛ ke nyi vikpɛvi bisese le sɛxwe we xɔluɖu ɖu lɔ mɛ, hugan hu-i.

¹² Sɔn hwekenu na Jan Mawu we ɛsinlɛna-ɛmɛtɔ lɔ jla Mawu we oxo gbɔn do jɛ egbe sɛxwe we xɔluɖuɖu lɔ hɔnhlɔn nu wɛ e nyi, ɛmɛ ke nɔ do hɔnhlɔn taŋuye we nɔ dyɛ emɛ. ¹³ Ɖo Mawu we oxolɔɖ'onyitɔ zɛtɛbiye kpodo osɛn Mawutɔnye lɔ oxoɖ'onyi kaka gbɔn va jɛ Jan ji. ¹⁴ Na mi na kpɔn onu jɛ ɛwu ganji, I we nyi Eli ɛmɛ ke ɖo na va lɔ. ¹⁵ Ɛmɛke ɖo otó, ni se-e. ¹⁶ Onu enɛlɛ ko na sɔ egbe we jijimɛ vikpɛye sɔjlɛ fo ? Ye le ɖi vikpɛviye ke nyinɔ onyi bo da ɛgbe nɔ le oxi dogbaji ye ha, ye mɔ do axwa ɖo dan ye hatɔye nɔ tun byo : " ¹⁷ Mi kun okpɛn bo do ji jijwɛ we ohan na i mi kó ɖu owe, mi bo nɔ ji ocɔ́ we ohan na mi, mi ko mɔ vyavi." ¹⁸ Ɖo, jan va, e ko ɖu onu nɔ, eko nu ahan vɛn nɔ ye bo lɔ tun gbigbɔ nylakan mɛ mɔ le emɛ. ¹⁹ Gbɛtɔ we ovi lɔ va, bo ɖu onu, bo nu onu, ye bo lɔ mɔ tun byo : "Mi kpɔn adɔnɔ kpo vɛnnutɔ xɛn xin. E lɔ kpo takwɛjɔtɔye kpodo onunyinyla watɔ ye wɛ nyi hadwe." Vɔ ɛmɛ ke na yi Mawu we onunyinywɛ ye nɔ ɖe xlɛ gbɔn onuwina nywɛ mɛ.» ²⁰ Ɛxin godo, Yesu Jɛ ɛhwɛ dido ji taŋu na tòxò keye mɛ na ɛ wa ŋudandonu susu le ye, co ganke toxo lɔ mɛ tɔ ye ko dɔli jijɔ. «Bàbà na mi kolazɛntɔye ! ²¹ Baba na mi Bɛtisayidatɔye ! Ɖo e do nyi tun ŋudandonu ke jɔ le mia de ye do jɔ te Tilu kpo sidɔn we oto ye mɛ wɛ be xixo-xixo gbɔn ẅe otovi xin ye o na ɖoli jijɔ, a bo sɔ dɔkpoye sɔ do, a bo lɛ ofin. ²² Iwɛ dɔn ko lɔ na mi nɔ, le ɛhweɖozangbe, otódindɔn miatɔn na hugan tilutɔye kpo sidɔntɔye tɔn. ²³ Mi ye Kapɛnawumutɔye mi bu-i tun Mawu na kɔ toxo miatɔn do yi kaka jiŋukunsin na mi wɛɛ ? Gbede-kpɔn, kaka okutomɛ we Mawu na ɖiɖi-i je otè do na mi» Ɖo, na ŋudandonu ke jɔ le miakɔ ye do jɔ le sodomu we toxo mɛwɛ, toxo xin lɔ mla mɔ le gbɔn do va je egbe. ²⁴ I wɛ dɔn, ko do lɔ na mi nɔ tun byo le ɛhwɛɖɔzan lɔ gbe, otodindɔn miantɔn na syɛnxu hugan hu so domutɔ ye tɔn.» ²⁵ Le hwexinnu yesu lɔ tun : «Otɔ sɛxwe kpodo nyidan we xwetɔ, ko do ɛkpɛ na we ɖo onu ke o sɔ hwla do zinzin nɔye kpodo onunywɛtɔ ye, we o ɖexlɛ vikpɛ viviye. ²⁶ Ɛn, otɔ, o jlo nywɛɖe tun ni mɔ nɔ emɔha.

²⁷ Didaye wɛ sɔ onuxinye bisese sɔ do asi na : a ɛmɛti hɔn nyɔ ovi lɔ zɛgbɔn otɔ lɔ wu. Ɛmɛ ti ko mɔ nyɔ otɔ lɔ zɛgbɔn ovi lɔ kpo ɛmɛ ke ovi lɔ jlo na ɖe-e sɔ xlɛ wu.» ²⁸ Mi va dye, mi mɛ zɛtɛ bisese kena agban kpinkpɛn hinhɛn kpe agbɔ na ye, blo ko mɔ na na gbɔjwɛ wu mi. ²⁹ Mi ɖiɖa okɔnnugban tɛye sɔ hɛn, a bo yi okplantɛye okla miatɔnye mɔ do kpɔn gbɔjwɛ, ɖo ɛmɛ fifia we ko nyi bo nɔ hwe diye. ³⁰ Ɖo okɔnugban tɛye woɖo agan tɛye ko kpɛn.»