1 Jwifuye we gbɔjwɛzangbe ɖokpo, Yesu wu o gbɔn ɛjinukun we ogle ɖe gbe nɔ, wɛ onukplanvi etɔnye bo kan ɛjinukun ɖeye bo flɛnu nɔ. 2 Vɔ Falizitɔ ɖeye bo byo:«ŋunɛ jɔ na mi do wa onu ke na osɛn gbɛ le gbɔjwɛzangbe nɔ?» 3 Yesu bo yi ogbe lɔ byo:«onu kena Davidi wasi hwekenu na xovɛ ciyi kpo ɛmɛ ke kplɔ-ɛ do ye, be mi hɔn xlɛ wɛ? 4 E dyɛ Mawu we hwegbe, bo sɔ kpɔnnɔ ke ye nɔ do san avɔ lɔ bo ɖu bo mɔ na ɛmɛ ke kplɔ-ɛ do ye. Kpɔnnɔ xin ye ke ɛmɛ ti hɔn ɖo na acɛ na ɖu zɛ ovɔsantɔ Mawutɔnye kɛɖɛ wu?» 5 Yesu mɔ lɔ na ye byo:« Gbɛtɔvi lɔ wɛ nyi cica gbɔjwɛzan lɔ tɔn» 6 Gbɔjwɛzan bu gbe, Yesu ɖyɛ okpletyɔn bo kplan onu ɛmɛ ye. Dahwe ɖe le ofilɔ i we aɖusilɔ bo ku. 7 Osɛnkplan ɛmɛtɔye kpo Falizitɔye kpo cɔ Yesu nɔ a do kpɔn byo, e na gɔ adɔn le gbɔjwezangbe exin ye mɔ do kpɔn onu ke wu ye na kpɔn do a do do ɛhwɛ na Yesu byo e mɔ wa onu nyinyla. 8 Vɔ Yesu nyɔ susu yetɔnye, wɛ e lɔ na dahwe abɔkunɔ lɔ byo:« cite a bo nɔ ote le dodomɛ na ɛmɛ bi.» Iwe dahwe lɔ cite bo nɔ ote. 9 Yesu lɔ na ye byo:« ko kan mi se nɔ tun, e jɛ na ye na wasi onu nywɛ alɔ onu nyinyla, ɛmɛ ɖe na kpɔn ɛgbɛ alɔ e mɔ bu-i le gbɔjwɛzangbe?» 10 Yesu bo sa ŋukunsi gbɔn ye mɛ bi ji. E xin we go do e bo lɔ na dahwe lɔ byo:« drɛn a lɔ tɔwe.» Dahwe lɔ bo wasi ɖi ke na Yesu lɔ ni-i ɖo ha, wɛ alɔ etɔn kpɔn adɔn gigɔ. 11 Ye bo lɔ oxo le yeɖemɛ nɔ bo do kan onu kena ye na wasi kpo Yesu, ɖo ye gɔ kpo aɖidido kpo. 12 Le azan xin ye mɛ, Yesu sin ɛɖɛ xo gbe le oso ji. Yesu bo nɔ ozante bo do xo ɛɖɛ yɔ hwetɔ Mawu nɔ. 13 Kena ŋukɔn ɖe, e yɔ onu kplanvi etɔnye, bo can ɛmɛ weve le ye mɛ, bo yɔ ye tun ɛmɛdindɔn. 14 Ɛmɛdindɔn lɛ ye we nyikɔ wɛ nyi Simɔ ke ye na nyikɔ wu tun Piyɛ, Andle Simɔ nɔvyɔ, Jaki, Jan, Batelemi, 15 Matiye, Toma, Jaki Alufevyɔ, Simɔ ke nyi ɛwɛn yi do na oto tɔ. 16 Juda ke nyi Jaki we vi kpo Juda Isikaliɔtu kena va sa Yesu. 17 E xin godo Yesu jɛte le oso lɔ ji kpo ɛmɛdindɔn etɔnye le ofi gbaja ɖe ji. Onukplanvi susu bo le blɛ lɔ kpo ɛmɛ susu geɖegeɖe. Ɛmɛ xin lɛ ye bo sɔn Jude kpo Jeluzalɛmu, kpo Tilu kpo Sidɔn we kansin ke na le ɛxutɔye mɛ. 18 Ye bo va na do ɖo oto Yesu a bo mɔ do kpɔn adɔn gigɔ. Ye ɛmɛ kena gbigbɔ nyinyla o do hannu na nɔ ye bo kpɔn okantuntun. 19 Otogun lɔ bisese bo jlo na ɖo alɔ Yesu wu ɖo hɔnhlɔn ɖe tɔn sɔn emɛ nɔ bo gɔ adɔn na ye mɛ bi nɔ. 20 Kena Yesu ɖe okɔ kpɔn onukplanvi etɔnye vɔ, e lɔ na ye byo:« nyɔna nɔ ye wɛ nyi mi mɛ ayanɔye, ɖo Mawu we xɔluɖuto lɔ nyi miatɔn. 21 Nyɔnanɔye wɛ nyi mimɛ kena xovɛ o ci nɔ syɛye, ɖo gomi na va gɔ mi. Nyɔnnanɔ wɛ nyi mimɛ ke vi avi nɔ syɛye, ɖo mi na va ko ɛdɛ. 22 Nyɔnanɔye wɛ mi nyi le hwekenu na Gbɛtɔye gbɛ owan na mi, le hwekenu na ye gbɛ mi, le hwekenu na ye zun mi nɔ, bo kɔ acɔn do mia wu nɔ do Gbɛtɔ we vi lɔ wu. 23 Mi zɔn jɛte a bo kpɔn jijwɛ le gbexingbe ɖo ale ɖaxo ɖe o tre kpɔn mi nɔ le Sɛxwe. Ɖo, ɖemɔ wɛ ye dagbwɔye nɔ do aya na Mawu we Oxolɔɖenyitɔye san. 24 Vɔ, baba na mimɛ dɔkunnɔye! ɖo mi o yi nyɔna miatɔn. 25 Tacɔ nɔ we nyi mimɛ ke na gɔ gomi syɛye, ɖo xovɛ na va ci mi. Babaa na mimɛ ke ko ɛdɛ nɔ syɛ ye ɖo mi na va nɔ dɔŋuɖunu mɛ, a bo vi avi nɔ. 26 Babaa na le hwekenu na gbɛtɔye bi o lɔ oxo do mia wu nɔ, ɖo e mɔ lɔ ke wɛ ye dagbwɔye o nɔ wasi kpo oxolɔɖenyitɔ ojokantɔye ɖo san. 27 Vɔ ko lɔ na mi mɛ ke o ɖo oto nɔ ye byo, mi yi owan na kɛntɔ miatɔnye, mi wa onywɛ na ɛmɛ ke gbɛ owan na mi ye, 28 mi xo ɛɖɛ nywɛ na mɛ ke o do onu wu mi nɔ ye. Mi xo ɛɖɛ na mɛ ke do aya na mi nɔ ye. 29 Na mɛɖe gba tomɛ na we do alɔ ɖe mɛ, bo mɔ ɖo owe gɔ ni. Na ɛmɛ ɖe ɖe awu le okɔ na we, ka glon omɔ ni na odo tɔn lɔ ɖiɖi. 30 Na onu wu ɛmɛ ɖekpokpwe ke gbɛ byɔ onu wu we. Na ɛmɛ ɖe sɔ onu tɔwe ɖe ko byɛ. 31 Onu ke na mi nɔ jlo tun ɛmɛye ni mɔ wasi na na mi, mi nɔ wasi emɔha pɛpɛpɛ na ɛmɛye can. 32 E nyi ɛmɛ ke yi owan na mi ye kɛɖɛ wɛ mi nɔ yi owan na, ale nɛ mi na kpɔn le emɛ? Ɖo ɛhwɛhutɔye can nɔ yi owan na ɛmɛ ke yi owan na ye-e. 33 Na ɛmɛ ke nɔ wa onyɛ na mi ye jɛn mi nɔ wa onywɛ na, ale nɛ le emɛ na mi? Ɖo ɛhwɛhutɔye can nɔ wasi emɔha. 34 Na mi nɔ wyan onu na ɛmɛ ke mi ɖo ŋukunsin tun e mɔ na va tu-i na hiye kɛɖɛ, ale nɛ lɛ le emɛ na mi? Ɖo onu nyinylan watɔye can nɔ wyqan onu na ye hatɔ onunyinylawatɔye, a bo ɖo ŋukunsi wu ye nɔ tun ye mɔ na va tu hiye gbesisɔ. 35 Vɔ mi yi wan na kɛntɔ miatɔnye, a bo nɔ wa onu nywɛ na ye. Mi wyan onu na ye a bo ko ɖoŋudo axɔtu wu. Exin mi na nyi Mawu ɖaxo we vikpɛye, ɖo Mawu lɔ tete nɔ nyɔ dɔmɛ do alɔgodo kpɛ do tɔye kpodo danuwatɔye wu. 36 Mi nyi dɔmɛnyɔtɔ ɖi ke na miatɔ nyi dɔmɛnyɔtɔ do ha. 37 Mi ko ɖɔ ɛhwɛ na mɛ ɖe, exin Mawu can ko mɔ do ɖɔ ɛhwɛ na mi nɔ. Mi ko do ɛhwɛ na mɛɖe, exin Mawu can ko mɔ do do ɛhwɛ na mi nɔ. Mi sɔ ɛhwɛ sɔ kɛ ɛmɛ na Mawu a sɔ kɛ miye can. 38 Mi na onu wu ɛmɛ, exin Mawu mɔ do na miye can. Ɖo ye na ba do avɔmɛ na mi, a bo mɔ hunhu-i, a bo zin gbɔɔn e mɔ tru kunhun nɔ. Ɖo onu jlɛ gannu ke na mi nɔ sɔ do jlɛ na miahatɔye, pɛpɛpɛ ke wɛ ye na sɔ do jlɛ na miye can. 39 Yesu mɔ do olo na ye byo:« ŋuvanɔ ɖe na kpewu a bo kplɔ hatɔ ŋuvanɔ ke wɛɛ? Na e wasi ye mɛ owe lɛye hɔn jɛnyi kpɔkpɔ do ogun mɛ nɔ wɛ? 40 Onukplanvi hɔn nɔ nɔ ota na oga etɔn, vɔ onukplanvi ɖekpokpwe ke yi okplan nywɛɖe na le ɖi oga etɔn lɔ ha. 41 Ŋunɛ dɔn na o do kpɔn nuwyɛ ke le ŋukunsi ji na nɔvwe nɔ vɔ o ko kpɔn tinkpo ke le ŋukunsin tɔwe ji nɔ? 42 Naɖe lɛ o na kpewu na lɔ na nɔvwe byo: Nɔvi, tre na ma ɖe nuywɛ ke le ŋukunsin ji na ye lɔ tɛ wɛ i tete ko kpɔn tinkpo ke le ŋukunsin tɔwe lɔ ji nɔ ɖo? Ɛyɛmɛnuwatɔ! Ɖe tinkpo ke le ŋukunsi tɔwe lɔ ji tɛ gbɔxwe, exin omɔ do kpɔn onu ganji a do kpewu a ɖe nuywɛ ke le ŋukunsi ji na nɔvwe. 43 Otin adodwe ɖe hɔn nɔ na okunsinsɛn nyinyla, ɖemɔke otin nyinyla ko mɔ nɔ na okunsinsɛn adodwe. 44 Kunsinsɛn ke otin ɖokpo ɖokpo naa we ye nɔ do nyɔ otin lɔ. Ye hɔn nɔ gbɛn figi le ɛŋujamɛ, ye ko nɔ gbɛn hlɛzɛn le oxɛtinji. 45 Gbɛtɔ nywɛ, onu nywɛ wɛ e nɔ ɖetɔn le oji etɔn ke na gɔ kpo onu nywɛ lɔ mɛ, vɔ Gbɛtɔ nyinyla onu n yinyla wɛ e nɔ detɔn le oji etɔn ke gɔ kpo onu nyinyla kpo lɔ mɛ. Ɖo onu ke na gɔ oji mɛ bo ta, i wɛ onu nɔ lɔ. 46 Ŋunɛ jɔ na mi nɔ do yɔ tun: "Xwetɔ, Xwetɔ," wɛ mi ko nɔ wasi onu ke na ko nɔ lɔ na mi ye? 47 Gbɛtɔ ɖekpokpwe ke va kɔnye, ke se oxo tɛye bo nɔ swɛ do walɔ mɛ, ma xlɛ mi mɛ ke wu ye na swɛ jlɛ do. 48 Mɛ xin lɔ le ɖi mɛ ke na o gb a oxɔ yetɔn nɔ bo kun ogun, ogun lɔ bo tito wɛ oxɔ lɔ we dodwe le ekpɛn ji ha. Hwekenu na otɔ gɔ, otɔ sisa bo va gba do oxɔ lɔ wu, oxɔ lɔ hɔn mun, ɖo ye gba-ɛ ganji. 49 Vɔ mɛ ke se oxo tɛye e ko mɔ nɔ sɔ do walɔ mɛ, le ɖi mɛ gba oxwe etɔn do ŋudan vɔvɔ ji, e ko mɔ do oxɔ lɔ do do dodwe ti ji ha. Hwekenu otɔ va gba do oxɔ lɔ wu, e mun zɔnɖokpɔ bo kankan bi.»