1 Gbeɖokpo Yesu le Jenɛzalɛti otɔtɔ, ɛmɛ ye bo hun xa-ɛ, bo titrin nɔ na do se oxo Mawu tɔn le onu ni. 2 E kpɔn tɔjihun owe le otɔ lɔ to, oṣɖɔ da tɔ ye bo tɔn le ye mɛ bo klɔ odɔ yetɔn ye nɔ. 3 Tɔjihun dokpo bo nyi Simɔtɔn, Yesu bo ɖyɛ tɔjihun lɔ mɛ, bo lɔ na Simɔ tun ni mɔ kun tɔjihun lɔ sɔ yi otɔ lɔ to viɖe, Yesu bo xinnɔ onyi le tɔjihun lɔ mɛ bo jɛ onu kplan otogun lɔ ji. 4 Ke na e kplan onu wu ye vɔ, e lɔ na Simɔ tun:« Dɔn tɔjihun lɔ do yi ŋukɔn ofi ke na otɔ lɔ tito le viɖe, lɔ kpodo hawetɔ oɖɔdatɔ lɛye kpo, mi da oɖɔ na mia wle ohwe.» 5 Simɔ lɔ ni tun byo:« Cica, mi nɔ zaŋute bo da oɖɔ gbɔɔn ganke mi hɔn wle ohwe ti kanŋukonu. Vɔ kena e nyi tun lɔ wɛ lɔ ɖemɔha, ko na da oɖɔ lɔ.» 6 Ye bo da oɖɔ lɔ bo wle ohwe susu geɖegeɖe gbɔɔn oɖɔ yetɔnye bo jɛ vunvun ji. 7 Ye wasi alɔ na ye hatɔ ke le tɔjihun owegɔ lɔ mɛ ye tun ye mɔɔ va kpe do hiye wu. Kena ye va, ye mɛ bisese nɔ kpɔkpɔ bo bɛ ohwe lɛye do otɔjihun owe le ye mɛ, agban bo va hugan tɔjihun owe lɛye kaka ye bo va jɛ sisyɔ ji. 8 Ke na Simɔ Piyɛ kpɔn ɖo emɔha, e jɛ klita le akɔnmɛ na, Yesu bo lɔ ni tun:« Xwetɔ tɛyi le wui ye ɖo onunyinylan watɔ wɛ ko nyi». 9 Kena ohwe lɛyue su ɖo, e kpaca do Simɔ kpo ɛmɛ ke bo do e wu ye bi. 10 E mɔ ke wɛ e kpaca do hatɔ Jaki kpodo Jan ke nyi Zebede we vikpɛye ɖo. Yesu bo lɔ na Simɔ tun lɔ byo:« ko mɔ vɔ, ɖo bɛ sɔn egbe ji, ɛgbɛtɔye wɛ o na nɔ kplɔ va na ɖi ke na o nɔ wle ohwe ɖo ha.» 11 E xin we godo, ye kun tɔjihun yetɔnye va agɔ, bo jo onu bisese do bo kplɔ Yesu,do. 12 Gbeɖokpo, Yesu le oto ɖe mɛ, e xin dahwe ɖe le ofi lɔ, okpodɔn ɖoɖyo bo gɔ goto ni-i. Ke e kpɔn Yesu e do onu do bo ɖe kuku na Yesu tun:« Xwetɔ na ojlo, o kpewu na na na matrɔ zun ɛmɛ mimɛ.» 13 Yesu drɛn alɔ bo sɔ ɖewu, bɔ lɔ tun:« Ko jlo, trɔ un ɛmɛ mimɛ.» Zɔnɖokpo, okpo dɔn lɔ bo bu le goto ni-i. 14 Yesu bo do sɛn ni tun:« Ka mɔ lɔ na ɛmɛ ti vɔ ve sɔ ɖiwe sɔ xlɛ Avɔsantɔ Mawtɔnye, a bo Ɛwusisra we onu nina sɔ na ɖi ke na Mɔyizi we osɛn lɔ byo ɖo ha. E xin lɔ wɛ na ɖe xlɛ tun adɔn tɔwe mɔ gɔ.» 15 Ganke Yesu we nyikɔ bo gbakpe ofi bisese nɔ, gbɛtɔ susu geɖegeɖe bo nɔ va kple a bo do se onukpinkplan etɔn, a bo mɔ do kpɔn adɔn gigɔ sɔn e de. 16 Vɔ Yesu bo tɔn le ye mɛ bo si-in gbɛfaji fiɖe na do ve xo ɛdɛ. 17 Gbeɖokpo, Yesu Yesu o kplan onu wu ɛwɛ ye nɔ. Falizitɔye kpodo osɛnkplan ɛmɛtɔye bo xlɔn nyi le axa ni-i. Ye bo sɔn Jeluzalɛmu we toxo lɔ mɛ kpodo otota bisese ke na le Galile kpo Jude we kansin lɔ mɛ. Xwetɔ Mawu we hɔnhlɔ bo le kpo-e, e mɔ do gɔ adɔn na adɔnnɔye nɔ. 18 Ɛmɛ ɖe ye kɔ dahwe kplibɔ nɔ ɖe do adɔn nɔ ye we okpɔn mɛ bo na do va Yesu kɔn. Ye bo jlo na hɛn adɔn nɔ lɔ do ɖyɛ oxwe ke gbe na Yesu le lɔ, a bo do sɔ-ɛ ɖo ŋukɔn ni-i. 19 Vɔ ke na ye hɔn kpewu na wasi ɖemɔha, ɖo ɛmɛ susu wɛ gɔ oxwe lɔ gbe, ye bo gbojwe xɛ oxɔ lɔ ta, bo ɖe omɔ ɖe bo sɔ adɔn nɔ lɔ jɛ te do agun mɛ le ŋukɔn na Yesu. Adɔnnɔ lɔ bo le onyihinhlɔn le okpɔn etɔn mɛ. 20 Kena Yesu kpɔn xɔse yetɔn, e lɔ na ye tun:« Dahwe o kpɔn si sɔ kɛ na ɛhwɛ tɔwe ye.» Osen kplan-ɛmɛtɔ kpo Falizitɔ ke le ofi lɛ ye, bo bu tamɛ nɔ tun:« Dahwe nɛ lɛ nyi ke, ke na o kɔn acɔn do Mawu wu nɔ? 21 Mɛ nɛ lɛ na sɔ ɛhwɛ sɔ kɛ ɛmɛ na e hɔn nyi Mawu kɛɖɛ jan wɛn?» 22 Yesu bo kpɔn nu jɛ susu yetɔn ye wu, e bo lɔ na ye tun:« Ŋunɛ jɔ na mi do ɖo susu nyinyla xiye ha le ayi miatɔnye mɛ? 23 E hɔn nyɔ hwɛn na ye na do lɔ na mɛɖe tun: "O kpɔn sisɔ kɛ na onu nyinyla tɔwe ye" a lo : "Cite a bo zɔn zɔlin?" 24 Vɔ mi ko nywɛ tun gbɛtɔ we vi lɔ mɔ ɖo acɛ le nyidan ji a do sɔ onunyinyla sɔ kɛ ɛmɛ, Ko mɔ lɔ na we nɔ tun lɔ byo: "Cite, sɔ okpɔn tɔwe a bo sɔn-yi oxwe tɔwe gbe."» 25 Haŋu ɖokpo kpoŋu, dahwe kplibɔnɔ lɔ bo cite le ɛmɛ bisese we ŋumɛ, e bo sɔ okpɔn etɔn bo si-in oxwe etɔn gbe bo ji kpikpa we ohan bo do kanfu Mawu nɔ. 26 E kpaca do ɛmɛ ye bi taŋu le ofi lɔ, ye bo ye Mawu kanfu ji, kpodo vivɔ kpo, bo lɔ nɔ tun:« Onu makpɔn kpɔn gbeɖe i wɛ mi kpɔn le egbe.» 27 E .xin we godo, Yesu tɔn, bo kpɔn takwɛjɔtɔ ɖe xinnɔ nyi le takwɛjɔxwe ye bo n ɔ yɔ-ɛ tun Levi. E bo lɔ ni-i tun:« Xodo.» 28 Levi bo cite bo jo nu bi do, bo xodo Yesu. 29 E xin we godo, Levi va ɖu oxwe ɖaxo ɖe le oxwe etɔn gbe kpo Yesu, takwɛjɔtɔ susu ye kpo ɛmɛ susu bu ye bo va ɖu on u kpo ye. 30 Falizitɔye kpo Osɛnkplan-ɛmɛtɔye bo va hlun do numɛ nɔ do onu xin lɔ wu bo lɔ na odansɔvi Yesu tɔn lɛ ye nɔ tun:« Ŋunɛ lɛ jɔ na mi do ɖo onu bo nu ahan kpo takwɛjɔtɔ onunyinyla watɔ xin lɔ nɔ?» 31 Yesu ɖo e wu na ye tun:« E hɔn nyi ɛmɛ ke hɔn jɛ adɔn nɔ hwɛn ɖo ohyan na doto, vɔ ɛmɛ ke jɛ adɔn nɔ ye wɛ ɖo doto we ohyan. 32 Ko hɔn va na do yɔ ɛmɛ ke na nyi ɛmɛ jijwɛ ye, vɔ onu nyinylawatɔye wɛ ko va na, ye mɔ do ɖɔli jijɔ yetɔnye.» 33 Ye bo mɔ lɔ ni tun:« Odansɔvi Jan tɔn ye kpodo Falizitɔye tn can, ye nɔ bla onu a bo xo ɛɖɛ, vɔ tɔwe ye bo nɔ ɖu onu bo mɔ nɔ nu ahan.» 34 Yesu bo lɔ na ye tun:« Mi kpewu na lɔ na sisunɔ we hadwe ye tun ye mɔ bla onu ganke mɛ na e gbɛ le yekɔn? 35 Azan ɖeye o gbɔn nɔ wɛ sisunɔ lɔ ye na ɖe le ye kɔn, le hwexinlɛyenu, ye tete na va bla onu.» 36 Yesu mɔ do olo ɖokpo na ye bo tun:« Ɛmɛ ti hɔn nɔ vun avɔ awu yɔyɔ viɖe a do ve jla awu xixo ɖo. E nyi e wa e mɔ ha, hun awu yɔyɔ lɔ na vun, wɛ avɔ yɔyɔ oviɖe ke na ye kan do jla xixo lɔ ɖo hɔn sɔgbe kpo-e nɔ. 37 Vɔ ɛmɛ ti hɔn nɔ kɔn vɛn yɔyɔ do olangbaza we ogo xixoye mɛ, e dɛn hwɛn vɛn lɔ na wo ogo lɔ, vɛn yɔyɔ lɔ na kun hun, ogo lɛ ye can bo na gba. 38 Hun olangbaza we ogo yɔyɔ mɛ wɛ ye nɔ kɔn vɛn yɔyɔ do. 39 Ɛmɛ ɖekpokpwe ke nu vɛn xixo, e nɔ gbɛ yɔyɔ lɔ, ɖo e lɔ tun: " Xixo lɔ mɔ nyɔ hwɛn taŋu."»