¹ I wɛ hwekenu na Yesu lɛkɔ sun Judɛn we otɔ lɔ to bo gɔ kpo Gbigbɔ Kinkwɛn Mawutɔn, Gbigbɔ Kinkwɛn lɔ kplɔ-ɛ do yi zogbeji ² fi ke na lɛgba va tɛnkpɔn le le hwekenu Yesu bla onu ŋukɔnɖiɖe kanɖe godo. E hɔn ɖu onu ti le azan xin lɛye mɛ, hwexinnu xovɛ bo va ci-i. ³ Lɛgba lɔ ni tun:« E nyi Mawu we vi jan wɛ o nyi, hun bo ɖegbe na ɛkpɛn xin na ni trɔ zun kpɔnnɔ.» ⁴ Yesu bo ɖo e wu ni tun byo:« E nyi winwlan tun: "Onuɖuɖu kɛɖɛ hwɛn nɔ na ɛgbɛ wu gbɛtɔ."» ⁵ E xin we godo, lɛgba mɔ kplɔ Yesu do yi jihwe fiɖe bo xlɛ-ɛ xɔluɖuto ke le nyidan ji ye bisese wi le hwenu vitweɖe mɛ. ⁶ Lɛgba bo lɔ ni nɔ tun lɔ byo:« Ko na sɔ acɛkpikpa kpodo dɔkunnu xɔluɖuto xinye bisese tɔn na we, ɖo bo wɛ ye sɔ onu xin ye bisese bo sɔ do alɔ mɛ na ko bo na na ɛmɛ ke na jlo. ⁷ E nyi tun o jɛ klita na kpoŋu bo sɛn-ɔ, hun tɔwe wɛ onu xin ye bisese na nyi. ⁸ Vɔ Yesu bo va yi ogbe ni bo ɖo lɔ ni tun:«E nyi winwlan le Mawu we oxo lɔ me tun lɔ byo, " Xwetɔ Mawu tɔwe kɛɖɛ we o na do onu do na, a bo sɛn i ɖo kpo gee."» ⁹ E xin we godo, lɛgba lɔ mɔ va kplɔ-ɛ do yi Jeluzalɛmu bo sɔ-ɛ sɔ ɖo ota na Mawu we oxwe lɔ le jihwe daan, bo lɔ ni-i tun:« Na o nyi Mawu we vi xojɔxo bo dɔn sɔn bwɛ a bo ve jɛ nyidan mɛ. ¹⁰ Ɖo e nyi winwlan tun:« Mawu na ɖegbɛ na ɛwɛndotɔ etɔnye ye bo na va kpe ŋukunsin do wu we. ¹¹ Ye bo na hɛn we do alɔ yetɔnye mɛ na hɔn na do gba afɔ tɔwe ɖe do ɛkpɛn wu.» ¹² Yesu bo ɖo e wu ni. Mawu we oxo lɔ lɔ tun:« Hɔn na va tɛn Xwetɔ Mawu tɔwe kpɔ gbeɖe.» ¹³ Kena lɛgba zan walɔ xin ye bo do tɛn Yesu kpɔn vɔ, e tɛyi le e wu. ¹⁴ Yesu gbɔn va Galile kpo Gbigbɔ Kinkwɛn we hɔnhlɔn wɛ ɛmɛye bo ɖe kun nu ni nɔ gbɔn Galile we kansin mɛ bi. ¹⁵ E bo jɛ onu kplan ɛmɛye ji gbɔn okpletyɔn Jwifuye tɔn bisese, ɛmɛ bisese bo kanfu wu nyikɔ etɔn nɔ. ¹⁶ Yesu va Nazalɛti, le toxo ke mɛ na e hwɛn le, ɖi kena e nyi walɔ na ye ɖo ha, e va ɖyɛ okpletyɔn Jwifuye tɔn le gbɔjwɛ zan yetɔn gbe. E bo kɔ ogbe yi o ji na do xlɛ nu. ¹⁷ I wɛ ye va sɔ wema ke nyi Mawu we oxolɔɖenyitɔ Ezayi tɔn ni. E bo hun wema lɔ nɔ ka ka bo va kpɔn ofi ke na ye wlan le tun: ¹⁸ « Gbigbɔ Mawutɔn le ji ye, ɖo e do ami ota na na ma do jla ɛwɛn nywɛ na ayanɔ ye. E ɖo dodan na ma do ve lɔ na ɛmɛ ke le gankpa mɛ ye tun lɔ byo, ye mɔ kpɔ okan tuntun, na ŋuvanɔye tun ŋukunsin yetɔnye mɔ hun, a bo mɔ do lɔ na ɛmɛ ke ye do aya na nɔ ye tun ye mɔ jɛ yeɖe si. ¹⁹ A bo do lɔ na mɛ bi tun oxwe ke mɛ Xwetɔ Mawu mɔ ɖe dɔmɛ nywɛ etɔn sɔ xlɛ mɛ bi. ²⁰ E xin we godo e bo tu wema lɔ, bo sɔ-ɛ sɔ na odansɔvi lɔ bo xinnɔ onyi. Ye mɛ bisese ke le okpletyɔn lɔ bo kpɔn-ɛ nɔ tululu. ²¹ E bo va jɛ li lɔ ji na ye tun lɔ byo:« Oxo Mawutɔn ke mi se egbe ke e cɛ do mia ji.» ²² Ye mɛ bisese bo ɖe kunnu nywɛ do Yesu wu nɔ do ɛfɛnu we oxo ke kɛɖɛ o tɔn sɔn onu etɔn mɛ nɔ wu. Ye bo lɔ nɔ tun:« E hɔn nyi Jozɛfu we vi lɔ hwɛn xin wɛ? ²³ E xin Yesu va lɔ na ye tun:« Ko kan do e ji tun mi na kpewu a bo tin olo ke mɛ na:« Doto, gɔ adɔn na ɖi we. Ye bo va lɔ ni tun lɔ byo onu keye na o wasi le Kapɛnawumu mi bo se ye, wasi le toxo ke mɛ na ye ji we le. ²⁴ E bo va ɖo e wu na ye tun:« Le oxojɔxo mɛ, ko lɔ na mi nɔ tun, mawu we oxolɔɖenyitɔ ti hɔn le na ye nɔ yi-i nywɛɖe le oto etɔn mɛ gbeɖe. ²⁵ Vɔ ko lɔ na mi nɔ le xojɔxo mɛ nɔ tun kposyu susu va le Izrayɛli le Eli we hwenu hwekenu na e va tu jihwe oju bo gbɛ jija na oxwe atɔn kpodo osunzan atrekpo xovɛ ɖaxo ɖe va tɔn le oto lɔ bisese mɛ. ²⁶ Vɔ, Mawu ko va ɖo Eli ɖodan kposyu xin lɛye ti, a mɔ e do-e ɖodan kposyu ɖokpo kɔn le toxo Salɛputa tɔn mɛ le Sidɔn. ²⁷ Ɖemɔha ke wɛ ɛmɛsusu wɛ jɛ okpo we adɔn nɔ le Izrayɛli le oxolɔɖenyitɔ Eli we hwenu, ganke ye mɛ ti hɔn kpɔn adɔn gigɔ, Naama ke nyi silitɔ lɔ kɛɖɛ wɛ kpɔn adɔn gigɔ.» ²⁸ Ke ye se onu xin lɛ ye bi vɔ aɖi wle ye mɛ ke gbe le okpletyɔn lɔ bisese. ²⁹ Ye cite bo ɖe Yesu tɔn le toxo lɔ mɛ, ye bo dɔn-ɛ do yi oso ke ji na Nazalɛti we toxo lɔ le we ota, a do tintlin ɖodan nyidan me le odo. ³⁰ Vɔ Yesu va gbɔn dodo mɛ na ye bo mɔ do sin ofi bu. ³¹ Yesu va yi Kapɛnawumu, toxo ɖe ke le Galile we kansin mɛ, e bo va jɛ onu kplɔn ye ji do gbɔjwɛzan lɔ we oxwe wu. ³² Onu kpinkplan etɔnye kpaca do ye ɖo e kplɔn onu nɔ kpo acɛkpikpa kpo. ³³ Dahwe ɖe bo le okpletyɔn lɔ gbigbɔ nylakan bo le e mɛ. E bo ca criɖiɖi kpo axwa lelele bo lɔ tun: ³⁴ «Awo! Ŋunɛ lɛ mi wa do we, Yesu Nazalɛti tɔn? O va na do gu okun na mi wɛ? Ko nywɛ tun ɛmɛ Kinkwɛ Mawutɔn wɛ o nyi!» ³⁵ Yesu bo ɖe ogbe tɔ-ɛ sinsyɔ bo lɔ ni tun:« Bɔ nu, a bo tɔn le dahwe ke mɛ!» Gbigbɔ nywlankan lɔ kɔ dahwe lɔ sɔ xu nyi, bo tun sɔn e mɛ e ko mɔ wa onu vivɛ ti kpo-e can. ³⁶ E bo kpaca do ye mɛ bisese taŋu, ye bo va je oxo lɔ ji le ye ɖe mɛ tun:« Oxo nɛye lɛ xin lɔ? E nɔ ɖe ogbe kpo acɛkpikpa kpo do gbigbɔ nywlankan ye, ye bo nɔ tɔn .» ³⁷ E xin we godo, Yesu we nyikɔ bo gbakpe fi bisese le kansin lɔ mɛ. ³⁸ Kena Yesu lɛ le Jwifuye we okpletyɔn lɔ vɔ, e va yi Simɔ we xwegbe. Vivɔ bo cɔ Simɔ sinɔ lɔ taŋu, ye bo ɖe kuku na Yesu tun ni mɔ va gɔ adɔn ni-i. ³⁹ Yesu tɛkpɔ adɔn nɔ lɔ bo xwi bo ɖegbe do adɔn lɔ vivɛɖe, vivɔ lɔ bo hɔn ni-i. Zɔɖokpo, nahwe lɔ bo cite bo jɛ jonɔ yi na ye ji. ⁴⁰ Ke na ohwe yi oxɔ, ɛmɛye kplɔ ɛmɛ yetɔnye ke jɛ adɔn hamɛ-hamɛ nɔ ye va Yesu kɔn , e bo ɖo alɔ ota na ye ɖokpo-ɖokpo bo gɔ adɔn na ye. ⁴¹ Gbigbɔ nywlakan bo tɔn le ye mɛ susu mɛ kpo axwa kpo bo lɔ nɔ tun:« I wɛ nyi Mawu we vi!» Yesu bo va gbɛ na gbigbɔ nywlakan lɛye tun ye ni mɔ bɔ onu, ɖo ye nyɔ-ɛ tun i mɛ mɔ nyi Klisu lɔ. ⁴² Ke na ŋukun ɖe, e va tɔn bo yi zogbeji fiɖe. Gbɛtɔ ahwankpo bo su geɖegeɖe bo va kan-ɛ nɔ gbɔn bo va va fi ke na e le lɔ. Ye jlo bo na hɛn e wu na e ko mɔ do sɔn le ye kɔn nɔ. ⁴³ Vɔ Yesu bo va lɔ na ye tun:« Ko ɖo na mɔ do ɛwɛn nywɛ Xɔluɖuɖu Mawutɔn lɔ na toxo bu ye can; ɖo e xin lɔ we ɖon na ye do ɖo dodan.» ⁴⁴ E xin, e bo mɔ jɛ onu kplan ɛmɛye ji le okpletyɔn ye le Jude we kansin lɛye mɛ.