1 Hwekenu na Yesu lɔ oxo na mɛ ke na ɖo oto wu-i nɔ ye vɔ, e va ɖyɛ Kapɛnawumu. 2 Le blɛ lɔ, sɔjakanwekoga ɖe le, e bo ɖo odansɔvi ɖe ke vɛ ni-i taŋu, e bo jɛ adɔn nɔ gbɔɔn bo le kuku we mɔji. 3 Ke sɔjakanwekoga lɔ se oxo do Yesu wu, e ɖo otomɛhyɔn Jwifutɔnye dodan ekɔn, a do byɔ-ɛ tun ni mɔɔ va gɔ adɔn na odansɔvi hetɛye. 4 Ke otomɛhyɔn lɛye va Yesu kɔn, ye ɖe kuku ni-i bo lɔ ni-i nɔ tun:« E jɛ tun o na gɔ adɔn ni-i, 5 ɖo e yi owan na togun míatɔn taŋu e lɔ wɛ bo gba agunxɔ míatɔn.» 6 Yesu bo va xodo ye. Kena ye kpɔ oxwe lɔ gbe, sojakanwekoga lɔ dɔn hadwe etɔnye ɖodan tun ye mɔ lɔ ni-i tun:« Xwetɔ, ka jɛ tagb a ɖo ko hɔn jɛ na o na ɖyɛ oxwe tɛye gbe. 7 Exin lɔ wɛ dɔn na blɔ tete can ko do kpɔn tun ko mɔ hɔn jɛ na do va kɔnwe. Vɔ lɔ oxo ɖokpo gee, odansɔvi tɛye bo na kpɔn adɔn gigɔ. 8 Ɖo blɔ can, ye sɔ-ɔ sɔ ɖo ɛmɛ we acɛ gɔ, sɔja ye can bo le agɔ na. Ko nɔ lɔ na mɛ ɖokpo le ye mɛ tun: "Yi" e bo nɔ yi; ko mɔ nɔ lɔ na mɛbu tun: "Va bwɛ" e bo nɔ va; ko mɔ nɔ lɔ na odansɔvi tɛye tun: "Wasi onu ke" e bo nɔ wasi.» 9 Ke na Yesu se oxo xin lɛye, dahwe lɔ we onu kpaca do-e, e bo trɔ okɔ bo kpan ŋukɔn wu togun ke xod-e lɔ, bo lɔ ye tun:« Gbɔɔn do jɛ Izrayɛli can, kɔ hɔn kpɔn mɛ ɖe ɖo xɔse ɖi dahwe ke ha kpɔn.» 10 Hwekenu na sɔja ke ye dɔn ɖodan lɛye lɛkɔ va xwegbe, ye va kpɔn tun adɔn mɔ gɔ na odansɔvi lɔ. 11 E xin we godo, Yesu ɖyɛ toxo ke ye nɔ yɔ tun Nayinu mɛ, onukplanvi etɔnye kpo ɛmɛ susu geɖe-geɖe bo bo zɔn kpo-e. 12 Ke na Yesu tɛkpɔ toxo lɔ we agbo mɔnu, e kpɔn ɛmɛ ye, ye bo kɔ gbɛtɔ kuku, ke nyi ovi ɖokpo gee na nahwe kposyu ɖe, wɛ tovi susu bo le ɛtɛ na nahwe lɔ. 13 Ke Xwetɔ Yesu kpɔn nahwe lɔ, i we nu ɖu dɔŋu ni-i et lɔ na nawe lɔ tun:« Ka mɔ vi avi.» 14 Yesu bo va ɖo alɔ ɖaka ke mɛ na ovi kuku lɔ le, mɛ ke hɛn ɖaka lɛye bo tre, e bo lɔ na ye tun:«Hwanjɛvi ko lɔ na ye nɔ tun i mɔ cite.» 15 Ɛmɛ kuku lɔ bo xinnɔ onyi bo jɛ oxo lɔ ji. Yesu bo sɔ-ɛ sɔ do alɔ mɛ na onɔ. 16 Vivɔ bo va jɛ ye mɛ bisese ji, ye bo va jɛ Mawu kanfu ji bo lɔ tun:«Oxolɔɖenyitɔ ɖaxo ɖe va tɔn le mia mɛ, Mawu bo va gɔ alɔ na togun etɔn.» 17 Onu ke na Yesu wasi xin lɔ bo gbakpe gbɔn Jude we oto lɔ bi mɛ kpo oto ke lɛ do Jude we oto lɔ bi mɛ. 18 Onukplanvi Jan tɔn ye lɔ oxo xin lɛye bi ni-i. 19 E xin, Jan yɔ ɛmɛ owe le ye mɛ, bo ɖo ye dodan Xwetɔ Yesu kɔn a do ve kan-ɛ se tun:« Lɔ wɛ nyi mɛ ke na va lɔ, alo mía nɔte kpɔn mɛbu wɛ?» 20 Ke na ye va Yesu kɔn ye lɔ ni-i tun:«Jan Mawu we ɛsin lɛ na ɛmɛtɔ, dɔn mí dodan a do kan we se tun:« I wɛ nyi Klisu lɔ alo mí na mɔ tre kpɔn mɛ bu wɛ jaa?» 21 Le hwexin lɔ nu, Yesu gɔ adɔn na adɔnnɔ susu, mɛ ke lanmɛ gble ye, bo nya gbigbɔ nylakan ye, bo hun ŋukunsin na ŋuvanɔye. 22 E bo yi gbe na ye bo lɔ na ye tun:«Na mi sɔn, mi lɔ onu ke na mi kpɔn kpo onu ke na mi se ye kpo na Jan. Ŋuvanɔye o kpɔn onu nɔ, tɛkunɔye bo zɔn zɔnlin nɔ nywɛɖe, gbodonɔye bo trɔ zɔn ɛmɛ mimɛ nɔ, otokunɔye bo se onu nɔ, ɛmɛ kukuye bo fɔn sɔn oku nɔ, ayanɔye bo se ɛwɛn nywɛ lɔ nɔ. 23 Nyɔnanɔ we na nyi ɛmɛ ke na hɔn na gɔn onuɖiɖi na do onu ke na ko wa nɔ ye wu.» 24 Hwekenu na Jan we ɛmɛ ke ɖodan ye lɛkɔ bo sɔn vɔ, Yesu va jɛ Jan we oxo lɔ ji na na togun lɛye:« Ŋunɛ mi ve kpɔn le zogbe lɔ ji? Okɔn ke na jɛhɔn o do owe na nɔ wɛɛ? 25 Ŋunɛ mi ve kpɔn? Dahwe ɖe ke na jlaɖo taŋu lɔ wɛɛ? Vɔ ɛmɛ ke nɔ do cigan we awuye a bo ɖu ɛgbɛ nɔ ye bo nɔ nɔ xɔlu ye we xwegbe ye wɛ. 26 Syɛ ŋunɛ mi kpɔn? Mawu we oxolɔɖenyitɔye wɛɛ? Ɛɛn, ko lɔ na mi nɔ byo, e mɔ hugan wu oxolɔɖenyitɔye. 27 Mi kpɔn mɛ ke wu na ye wlan do tun: "Kpɔn ko ɖo ɛwɛndotɔ tɛye dodan, e na jla omɔ ji ɖo na we." 28 Ko lɔ na mi nɔ, le mɛ ke na nyɔnusi gbɛ ji ye mɛ,mɛ ti hɔn hugan wu Jan. E le ɖemɔha co, mɛ ke nyi ɛmɛ vitwe bi le xɔluɖuɖu Mawutɔn lɔ mɛ nyi hugan wu-i.» 29 Kena togun lɔ bisese kpo takwɛjɔtɔye se oxo etɔnye vɔ, ye va lɔ tun ɛmɛ jijwɛ mɛ mɔ nyi Mawu, hwekenu na Jan va lɛ Mawu we ɛsin na ye vɔ. 30 Vɔ Falizitɔye kpo Jwifuye we osɛnkplan-ɛmɛtɔye bo gbɛ tito ke Mawu wasi na ye lɔ ɖo ye hɔn lɛ Mawu we ɛsin Jan tɔn lɔ. 31 Ŋunɛ wu lɛ ko na sɔ gbɛtɔ egbetɔnye jlɛ do? Ŋunɛ wu lɛ ye ɖi? 32 Ye va ciɖi vikpɛviye ke na da ɛgbɛ nɔ le dogbaji ye ha, ye bo nɔ xinnɔnyi bo nɔ yɔ yeɖeye we nyikɔ nɔ bo nɔ lɔ nɔ tun: "Mí kun okpɛn bo ji jijwɛ we ohanye na mi mi ko ɖu owe. Mi bo va do onuwa-ɛmɛ we ohanye na mi, mi ko va vi avi." 33 Ɖo Jan Mawu we ɛsin lɛ na ɛmɛtɔ lɔ va, e ko nɔ ɖu kpɔnnɔ xuxu, e ko mɔ nɔ nu vɛn, mi bo nɔ lɔ tun: "E mɔ ɖo gbigbɔ nyinyla." 34 Ovi gbɛtɔtɔn lɔ bo va, bo ɖu onu, bo nu vɛn, mi bo lɔ tun: "Mi kpɔn adɔnɔ kpo ahannumunɔ, hadwe takwɛjɔtɔye kpodo onu nyinylawatɔye tɔn wɛ e nyi." 35 Vɔ onunyinyɔ etɔn wɛ vikpɛ etɔnye bisese nyɔ.» 36 Falizitɔ ɖokpo va yɔ Yesu tun ni mɔ va ɖu onu kpo he. Ke na Yesu va ɖyɛ Falizitɔ lɔ we xwegbe bo xinnɔnyi do tavo to, 37 nahwe onunyinylawatɔ ɖe le oto lɔ mɛ bo va e kɔn, hwekenu na e se tun Yesu mɔ le Falizitɔ lɔ we xwegbe. E bo hɛn celu hwɛnnywɛ ɖe ke le ogo ke ye sɔ ɛkpɛn wewe do wasi mɛ. 38 Ke e va hla ci godo ni-i, le afɔ etɔnye we axa, e jɛ Yesu we afɔ klɔ ji kpodo avisin etɔnye kpo, bo nɔ sɔ oɖa etɔnye a do tutu-i, bo nɔ kisi na afɔ lɛye a bo fu celu lɔ na ye. 39 Hwekenu na Falizitɔ ke yɔ Yesu do oxwe etɔn gbe lɔ va kpɔn onu xin lɔ, e va lɔ le eɖe mɛ tun:« Na e nyi tun dahwe ke do nyi oxlɔɖenyitɔ wɛ hun e na nyɔ nahwe ke kpoe nɔ xin tun, onunyinylawatɔ mɛ e mɔ nyi.» 40 Yesu bo yi oxo bo lɔ ni-i tun:«Simɔ, ko ɖo oxo ɖe bo na lɔ na we.» E bo yi ogbe ni-i tun:«Cica onukplan-ɛmɛtɔ, lɔ xo.» 41 Yesu bo lɔ ni-i tun:«Ɛmɛ owe ɖeye wyan oho le dahwe ɖe si. Mɛ ɖokpo ɖu ohogan kanweko (100), ɛmɛ owegɔ bo ɖu ohogan kanɖewo (50). 42 Ke na e va kpɔn tun ye mɔ hɔn kpewu mɔ na mɔ tu oho lɛye, e va sɔ oho lɛye bo sɔ kɛ ye mɛ owe lɛye. Syɛ, mɛnɛ lɛ na yi owan na dahwe lɔ hugan wu mɛɖe le ye mɛ owe lɛye mɛ?» 43 Simɔ bo ɖo e wu ni-i lɔ byo:«Ko ɖi tun ɛmɛ ke na e sɔ axɔ susu sɔ kɛ lɔ wɛ e na nyi.» Yesu bo lɔ ni-i tun lɔ byo:«O gbo ɛhwɛ lɔ nywɛɖe.» 44 Yesu bo va lilɛ okɔ bo kpɔn nahwe lɔ, bo lɔ na Simɔ lɔ byo:«O kpɔn nahwe ke, ko va kɔn we, o ko kɔn ɛsin do afɔ naa, vɔ e lɔ bo va klɔ afɔ tɛyee na kpo avisin etɔnye kpo, bo va sɔ oɖa etɔnye bo do tutu ye. 45 Lɔ hɔn kisi na, vɔ e lɔ sɔn hwekenu na e ɖyɛ oxwe lɔ gbe, e hɔn ka gɔn osi ma ki na afɔ tɛyee. 46 Lɔɔ hɔn kɔn ami ti do ota naa, vɔ e lɔ bo va fu celu na afɔ tɛyee. 47 E xin wɛ dɔn ko lɔ na we nɔ lɔ byo, e kpɔn si sɔ kɛ naonunyinyla susu ke e wasi ye bisese, ɖo e ɖe wanyiyi susu sɔ xlɛ.Vɔ mɛ ke na ye sɔ ɛhwɛ ovi bo sɔ kɛ owan oviɖe wɛ e nɔ yi na ɛmɛ.» 48 E bo va lɔni-i tun:«O kpɔn si sɔ kɛ na onunyinyla ke o wasi ye.» 49 Mɛ ke le tavo lɔ kɔn kpoe ye lɔ le yeɖeye mɛ tun:«Dahwe nɛ lɛ nyi ke gbɔɔn bɔ nɔ sɔ ɛhwɛ sɔ kɛ ɛmɛ? 50 Vɔ Yesu lɔ na nahwe lɔ tun:«Xɔse tɔwe hwɛn we gan, lɛkɔ sɔn le fifamɛ.»