1 Ye mɛ bisese bo cite, bo kplɔ Yesu do yi Pilati kɔn. 2 Ye bo jɛ ɛhwɛ do ni-i ji, bo lɔ nɔ tun:« Mi kpɔn dahwe ke e bo hlu togun míatɔn do e wu nɔ, bo lɔ tun ye mɔ ko tu takwɛ na xɔlu ɖaxo Hlɔmatɔn ke ye nɔ yɔ tun Seza, e bo mɔ lɔ tun, he mɛ mɔ nyi Klisu, xɔlu lɔ.» 3 Pilati bo kan Yesu se tun:« Lɔ wɛ nyi Jwifuye we xɔlu lɔ?» Yesu bo ɖo e wu ni-i tun:« I xɛn o lɔ xin» 4 Pilati bo lɔ na Mawu we avɔsantɔye kpodo togun lɔ kpo tun:« Ko hɔn kpɔn onunyinyla ti bo na do do ɛhwɛ na dahwe ke.» 5 Vɔ ye bo mɔ tɛ ɛɖɛ e ji, bo tun:« E kplan onu nɔ na ɛmɛye a do fɔn ogu, e bop kplan onu nɔ sɔn Judewe oto lɔ bi mɛ, bɛ sɔn Galile we kansin lɔ mɛ bisese gbɔɔn do va jɛ bwɛ.» 6 Hwekenu na Pilati se oxo xin lɔ, e va kan se tun Galiletɔ wɛ nyi dahwe ke lɔ. 7 Ke e va se tun kansin ke mɛ na Elodu kpacɛ na mɛ wɛ e le, e va lɛkɔ ni dodan Elodu, hwexin lɔ nu can Elodu bo le Jeluzalɛmu le azan xin lɛye mɛ. 8 Ke Elodu kpɔn Yesu, oji ɖaxo ɖe jɔ-ɛ, ɖo e o lo ba nɔ na kpɔn-ɛ xoxoxo, do onu ke e se nɔ ye wu, e bo ɖo ŋukunsin te nɔ a do kpɔn ŋudandonu ɖe ke na Yesu wasi. 9 E bo va kan oxo susu se wu-i, vɔ Yesu hɔn ɖo ti e wu ni-i. 10 Mawu we avɔsantɔ ɖaxoye kpo osɛnkplan-ɛmɛtɔye bo le blɛ, bo do ɛhwɛ ni-i nɔ titeŋugbetɔn kpo ŋukunsi bibya. 11 Elodu kpodo sɔja etɔnye, bo zu-in, do vwɛ ni-i, e xin we godo ye bo sɔ awu onywɛ ɖokpo bo sɔ do ni-i, bo mɔ lɛkɔ ni-i do yi Pilati kɔn. 12 Gbexinlɔgbe we Elodu kpodo Pilati kpo trɔ zun hadwe, (ɖo kɛntɔ wɛ ye nyi saan). 13 Pilati bo yɔ Mawu we avɔsantɔ ɖaxoye, otokplɔtɔye kpo togun lɔ bi bo sɔ kple, 14 bo lɔ na ye tun:« Mi kpɔ dahwe ke va naa saan bo lɔ tun e mɔ hlu togun lɔ do e wu. Mi kpɔn syɛ ko kan oxo wu-i se le ŋumɛ miatɔn, vɔ ko bo va kpɔn tun onu ke we ɛhwɛ mi do ni-i nɔ lɛye, e mɔ wasi ti-i. 15 Elodu can hɔn mɔ va kpɔn ɛhwɛ ti bo na dɔn na ye na do ɖo oku we kojo ni-i. 16 Ko na dɔn oto n-i, a bo jo-e do.» 17 (Pilati bo ɖo na ɖe mɛ ke le gankpa mɛ ɖokpo tɔn na Jwifuye le oxwe lɔ we hwenu). 18 Vɔ ye mɛ bisese bo jɛ axwa do ji tun ni mɔ ɖe dahwe xin tɛ le ŋumɛ na hiye, a mɔɔ ɖe Balabasi tɔn na hiye.» 19 Balabasi lɔ, ye wle do gankpa mɛ do ogufinfɔn do ɛmɛ ji ke jɔ saan le toxo lɔ mɛ kpo ɛmɛ huhu we oxo wu. 20 Pilati bo mɔ lɔ oxo na ye, ɖo e jlo na jo Yesu do. 21 Vɔ ye bo do axwa nɔ tun:« Kan-ɛ do otinsokpoli ji! kan-ɛ do otinsokpoli ji!» 22 E mɔ lɔ na ye zɔn atɔn gɔ tun:« Onu nyinyla nɛ e wasi? Ko hɔn kpɔn onu ti kena na zɔn na ye na do hu dahwe ke. E nyi tun ko dɔn oto ni-i vɔ, ko na jo-e do.» 23 Vɔ ye bo tɛ ɛɖɛ e ji kpo axwa, bo byɔ nɔ tun ye mɔɔ kan-ɛ do otinsokpoli ji. Axwa yetɔnye bo hugan hu Pilati tɔn. 24 Pilati bo va yi gbe na ye tun, nu ke na ye mɔ byɔ nɔ lɔ ni mɔɔ nyi wiwasi ɖo e mɔ ha. 25 Ye bo va ɖe mɛ ke fɔn ogu bo hu ɛmɛ ye bo do wle do gankpa mɛ lɔ tɔn, ɖo mɛ xin lɔ wɛ ye byɔ mi nɔ tun ni mɔ jo do na hiye saan.Ye bo va sɔ Yesu lɔ bo sɔ ɔjo do gbɔn ojlo yetɔn mɛ. 26 Hwekenu na ye dɔn Yesu do sɔn nɔ, ye kpɔn dahwe ɖe ke lɛkɔ sɔn glegbe, ye bo nɔ yɔ-ɛ tun Simɔ Silɛnutɔn , ye bo kɔ otinsokpoli lɔ do kɔgbe ni-i, e mɔ do hɛn le godo na Yesu. 27 Togun lɔ we ɛmɛ susu bo xodo-e wɛ nyɔnusi ɖeye can bo xo do ye bo xo alɔ akɔnnu bo vi avi do ota ni-i nɔ. 28 Yesu bo va lilɛ okɔ bo kpɔn nyɔnusi lɛye, bo lɔ na ye tun:« Nyɔnusi Jeluzalɛmutɔnye, mi ka mɔ vi avi do ota tɛye mɛ, vɔ mi vi avi do ota na miye teteye kpo vikpɛ miatɔnye kpo. 29 Ɖo azan ɖeye o gbɔnnɔ, ye bo na va lɔ tun: "Nyɔnanɔ wɛ nyi ajikponɔye, ɛmɛ ke hɔn ji ovi, ye ko na anɔ wu ovi ɖe kpɔn!" 30 I wɛ ye na jɛ li lɔ ji na osoye tun: "Mi hɔ jɛ mia ji!" a bo lɔ na oso vitweye tun: " mi cɔn mí!" 31 Ɖo, e nyi tun ye wasi ɖemɔha na otin ɛmun nɔ, naɖe lɛ e na va nyi na otin xuxu?» 32 Ye bo kplɔ danuwatɔ owe ɖeye can bo do sɔn nɔ na do ve hu ye kpo Yesu kpo. 33 Ke ye ve jɛ ofi kena ye nɔ yɔ tun «Taka», sɔja lɛye kan Yesu do otinsokpoli ji le blɛ, ye bo kan dahwe owe lɛye can le blɛ, ɖokpo le amiɔ mɛ ni-i, owegɔn bo le aɖusi mɛ ni-i. 34 Yesu bo lɔ tun:« Otɔ, sɔ ɛhwɛ sɔ kɛ ye, ɖo ye hɔn nyɔ nu ke na ye wasi nɔ.» Sɔja lɛye bo wasi ovɖiɖe bo do ma onudido etɔnye. 35 Togun lɔ bo le blɛ, bo kpɔn onu nɔ le hwekenu na otogaye o ko Yesu nɔ, bo nɔ lɔ ni-i tun:« E hwlɛn ɛmɛ buye gan. E nyi tun ɛmɛ ke Mawu kɔn ami do ota na, mɛ ke Mawu can jan wɛ e nyi, ni bo hwlɛn eɖe gan.» 36 Sɔja lɛye can bo ko-e nɔ, ye bo tɛkpɔ-ɛ na do na vɛn hwinhwan taŋu wu-i, 37 ye bo lɔ nɔ tun:« E nyi Jwifuye we xɔlu wɛ onyi, bo hwlɛn ɖiwe gan.» 38 Wɛ, ye bo va wlan do otinsokpoli Yesutɔn lɔ we jihwe tun:« Mɛ ke wɛ nyi Jwifuye we xɔlu.» 39 Danuwatɔ keye ye kan do otinsokpoli ji le axa na Yesu lɔ we ɖekpo va jɛ acɔn kɔn do Yesu wu ji, bo lɔ ni-i tun:« Lɔ hwɛn nyi Klisu lɔ wɛɛ? Hwlɛn ɖiwe gan, a bo hwlɛn miye can gan.» 40 Vɔ ɛme owegɔ lɔ bo jɛ gbigbɛ na hatɔ lɔ ji tun:« Lɔ hɔn nɔ vɔ na Mawu wɛ, lɔ ke ye do oku we ɛhwɛ na kpo mɛ ke hɔn wa oku we nuɖe? 41 Miye tɔn, e le osɛn lɔ nu, ɖo onu ke mi wan ye, we xɔtu wɛ mi yi nɔ. Vɔ, mɛ ke lɔ e hɔn wasi onunyinyla ti.» 42 E b o lɔ na Yesu tun:« Ɖoŋu do wu ye le hwekenu na o na va ɖu xɔlu nɔ.» 43 Yesu bo ɖo e wu ni-i tun:« Le xojɔxo mɛ, ma lɔ na we tun le egbe, o na nɔ axa naa le sɛxwe.» 44 E na xo gan weve kɛklɛnutɔ emɔha nɔ kpoŋu, vuvlu bo va do le nyidan lɔ bisese ji gbɔɔn do yi gan atɔn hwedo tɔn mɛ, 45 nidɔn bo ci ɖo vuvlu bla do ŋumɛ ni-i, wɛ xɔmɛgbovɔ ke le Mawu we xwegbe lɔ va ma ɖo owe gbɔn dodo mɛ. 46 Yesu bo do axwa sinsyɛxu ɖe bo lɔ tun:« Otɔɔ, ko sɔ gbigbɔ tɛye sɔ do alɔ mɛ na we.» Ke e lɔ oxo xin lɛye vɔ, o bo myɔ onu bo ku. 47 Ke sɔja kanwekoga lɔ kpɔn onu ke na jɔ lɛye, kanfu wu Mawu, bo lɔ tun:« Ko kan do e ji syɛ tun, dahwe ke ɛmɛ jijwɛ mɛ e mɔ nyi saan xoxoxo.» 48 Ke mɛ ke le blɛ lɛye bi kpɔn onu ke na jɔ lɔ vɔ, ye va lɛkɔ, bo xo alɔ akɔnnu nɔ. 49 Mɛ ke nyɔ Yesu saan ye kpo nyɔnusi ke xodo-e sɔn Galile we kansin mɛ ye, bo dindɛnnu bo do kpɔn onu kena jɔ nɔ lɔ. 50 Vɔ dahwe ɖe le ɛhwɛɖɔtɔye mɛ, ye bo nɔ yɔ-ɛ tun Jozɛfu, ɛmɛ nywɛ wɛ e nyi bo mɔ nyi ɛmɛ jijwɛ, 51 (E hɔn ɖo alɔ le onu ke na ɛhwɛɖɔtɔ gbokpweye wa kpodo ogbeta ke ye sɔ ye mɛ), e bo nyi Alimate we toxomɛ tɔ, Alimate lɔ bo nyi Jwifuye we toxo, e bo tre kpɔn Mawu we xɔluɖuɖu lɔ nɔ. 52 Jozɛfu lɔ bo yi Pilati kɔn bo vee byɔ ogbe wu-i, a do kɔ Yesu we ocɔ. 53 E bo ɖe ocɔ lɔ jɛte le otinsokpoli lɔ ji, bo sɔ avɔ bo do butu-i, bo ɖi-i bo yɔgun ke ye kun do ɛkpin mɛ, ofi kena ye hɔn ɖi ɛmɛ ti do kpɔn. 54 Jlaɖozangbe na Jwifuye we gbɔjwɛzan wɛ, gbɔjwɛzan lɔ bo ɖo na bɛ. 55 Nyɔsi ke xodo Yesu sɔn Galile gbɔn ye bo xodo Jozɛfu, ye bo kpɔn yɔgun lɔ kpodo ke na ye sɔ Yesu we ocɔ lɔ do e mɛ ɖo. E xin we godo, 56 ye bo va trɔ siin oxwe yetɔnye gbe, bo ve kan ami sisi kpo celu hwɛnnywɛ ye kpo do alɔ ji. Ye bo va gbɔjwɛ le gbɔjwɛzan lɔ gbe ɖi ke na osɛn yetɔn lɔ ɖo ha.