1 Oxwe ke ye nɔ ɖu kpo kpɔnnɔ ma ɖo tinkɛn, ye bo nɔ yɔ-ɛ tun vivayi we oxwe lɔ o tɛkpɔ nɔ. 2 Mawu we avɔsantɔ ɖaxoye kpo osɛnkplan-ɛmɛtɔye bo kan ayixa nɔ bo na do wle Yesu, vɔ ye bo vɔ na togun lɔ nɔ. 3 Satana bo va ɖye Juda ke ye sɔ nyikɔ na tun Isikalyɔtu, e bo nyi ɖokpo le Yesu we onukplanvi weve lɛye mɛ, mɛ. 4 Juda lɔ bo va ɖo ogbe do kpɔ kpo Mawu we avɔsantɔ ɖaxoye kpo Mawu we oxwegbecɔtɔye we gaye, ɖo ke e na sɔ Yesu lɔ sɔ jo na ye ɖo wu. 5 E do jijwɛ na ye taŋu, ye bo fyan ajɔgbe tun hiye mɔ na tu oho wu-i. 6 Juda bo yi gbe, bo kan omɔ nɔ, a do sɔ Yesu lɔ sɔ jo na ye, otogun lɔ ko nyɔ-ɛ nɔ. 7 Azan ke gbe na ye ɖu kpɔnnɔ ma ɖo tinkɛn lɔ we oxwe nɔ, hwekenu na ye na hu lɛngbɔvi vivayi we oxwe lɔ tɔn va va. 8 Yesu bo dɔn Piyɛ kpo Jan kpo dodan, bo lɔ na ye tun: « Mi ve ɖa vivayi we oxwe lɔ we onuɖuɖu na mia ɖu.» 9 Ye bo kan-ɛ se tun:« Fye lɛ o jlo na mia ɖa onu lɔ le?» 10 E bo ɖo e wu na ye tun:« Mi ɖoto wu, hwekenu na mi na ɖyɛ oto lɔ mɛ nɔ, mi na kpe dahwe ɖe ke hɛn ɛsinzɛn do ota. Mi xodwe gbɔɔn a do ɖyɛ oxwe ke gb e na e na ɖyɛ. 11 Mi mɔ va lɔ na ɛmɛ ke kpacɛ na oxwe lɔ tun:"Onukplan-ɛmɛtɔ lɔ kan we se nɔ tun: «Fye lɛ oxɔ ke mɛ na ko na ɖu vivayi we onuɖuɖu lɔ kpo onukplanvi tɛyee lɔ le? 12 E bo na sɔ oxɔ ɖaxo de a bo sɔ xlɛ mi le sanŋu ɖe ji, ye bo to onu ye do emɛ. Blɛ lɔ wɛ mi na ɖa onu lɛye le.» 13 Ye bo yi bo kpɔn onu bisese ɖi ke na Yesu o lɔ na ye ɖo ha. Ye bo va ɖa vivayi we oxwe we onuɖuɖu lɔ. 14 Ke ogan lɔ xo, e va xi,,ɔ onyi kpo ɛmɛdindɔn lɛye. 15 E bo lɔ na ye tun:« E jlo taŋu tun ma ɖu vivayi we onuɖuɖu ke kpo mi gbɔxwe a je ayaɖu ji. 16 Ɖo, ko lɔ na mi nɔ, ko hɔn mɔ ɖu ti nɔ gbɔɔn do jɛ hwekenu na onu ke na oxo lɔ lɔ na va jɔ do le xɔluɖuɖu Mawutɔn lɔ mɛ.» 17 Wɛ, Yesu va sɔ kɔfo ke mɛ na vɛn le lɔ bo va do ɛkpɛ na Mawu do e ji, bo lɔ tun:« Mi yi kɔfo ke, a bo ma ven lɔ le miaɖeye mɛ. 18 Ɖo, ko o lɔ na mi nɔ tun, ko hɔn mɔ nu vɛn ɖe nɔ gbɔɔn do yi hwekenu na Mawu we xɔluɖudu lɔ na va do.» 19 E xin we godo, e sɔ kpɔnnɔ lɔ, ke e do ɛkpɛ do e ji vɔ, e ma-ɛ, bo sɔ na onukplanvi etɔnye, bo lɔ na ye tun:« E ke wɛ nyi gbaza tɛye ke ye sɔ na do ota miatɔn mɛ, mi nɔ wasi ɖeleha, a nɔ do flin-u.» 20 Ɖemɔha ke, ke ye ɖu kpɔnnɔ lɔ vɔ, e mɔ va sɔ kɔfo lɔ can bo kɔ-ɛ do jihwe, bo lɔ nɔ tun:« Vɛn ke lɔ wɛ nyi okancica yɔyɔ Mawutɔn dogbɔn ɛhun tɛye ke ye na kɔn do onyi do ota miatɔn mɛ lɔ. 21 Vɔ mi nɔ ŋuzɔn, ɖo mɛ ke va sɔ sɔ jo nɔ lɔ le tavo kɔn le bwɛ syɛ bo ɖu onu kpo-o nɔ. 22 Ɖo ovi gbɛtɔtɔn lɔ na ku ɖi kena Mawu o lɔ-ɛ ɖo ha. Vɔ babaa na ɛmɛ ke we alɔ mɛ e nyi si sɔ jo gbɔn lɔ!» 23 I wɛ onukplanvi lɛye jɛ kinkan yeɖeye se ji tun mɛnɛ lɛ va do onu xin lɔ sin le mia mɛ nɔ. 24 Onukplanvi lɛye bo va jɛ onu didɔn ji le yeɖeye mɛ tun mɛnɛ lɛ mɔ nyi ɛmɛ ɖaxo le ye mɛ ja. 25 Yesu bo lɔ na ye tun:« Xɔluye nɔ ɖegbe do togunye ji nɔ, wɛ otokplɔtɔye nɔ jlo tun ɛmɛye a mɔ yɔ ye tun onywɛwatɔye. 26 Vɔ e hɔn nyi e mɔ na miye nɔ. Vɔ na ɛmɛ ke nyi ɛmɛ ɖaxo le mia mɛ ni ci ɖi vikpɛvyu ha. Mɛ ke na nyi oga le mia mɛ mɔ ni ci ɖi odansɔvi ha. 27 Ɖo mɛ lɛ nyi ɛmɛ ɖaxo: le ɛmɛ ke xinnɔnyi bo ɖu onu kpo ɛmɛ ke o ma onuɖuɖu nɔ mɛ? E hɔn nyi mɛ ke xinnɔnyi bo ɖu onu nɔ hwɛn wɛ? E le ɖe mɔ co, ko bo ke mia mɛ ɖi mɛ ke o ma onuɖuɖu lɔ nɔ ha. 28 Miye mi nyi ɛmɛ ke na nɔ kɔnye le vivɛsise tɛyee mɛ le ogan ɖekpokpwe. 29 I wɛ dɔn ko na na mi xɔluɖuɖu ɖi ke na didaye naa ɖo ha 30 na mia do yi tɛnxo a bo ɖu, a bo nu kpo le xɔluɖudu tɛye mɛ. Mi bo na va xinnɔ onyi kpo le xɔlu we zinkpweye ji a do ɖo kojo na Izrayɛli we akɔta weve lɛye bi. 31 Yesu lɔ na Simɔ Piyɛ tun: Simɔ, Simɔ, ɖo ayi te, Satana byɔ ogbe, ye bo ni-i, ni a do ta mi ɖi ke na ye nɔ ta ɛjinukun ɖo ha. 32 Vɔ, blɔ ko xo ɛɖɛ na we na xɔse tɔwe ni ko bu onu. Hwekenu na o na va trɔ va kɔnye, do hɔnhlɔn lanmɛ na vɔvweye.» 33 Piyɛ bo lɔ ni-in tun:« Xwetɔ, ko le gbesisɔ bo na xodowe yi gankpa mɛ, alo bo na mɔ do ku kpo we can.» 34 Yesu bo lɔ ni-i tun:« Piyɛ ko lɔ na we nɔ syɛ tun, goklo hɔn do atan nɔ egbɛ, gbɔxwe na o na gbɛ-ɔ zɔn atɔn kpecyo tun he mɔ hɔn nyɔ.» 35 E mɔ kan ye se lɔ byo:« Ke ko sɔ mi sɔ ɖodan oho ma hɛn, oglo kpodo afɔkpa ma hɛn, onu ɖe ve hwe do mi wɛɛ?» Ye bo ɖo e wu ni-i tun:« Onu ti tete.» 36 E bo lɔ na ye tlɔ byo:« Vɔ syɛ, na mɛɖe ɖo oho, ni bo hɛn, na mɛɖe ɖo oglo, ni bo hɛn. Na mɛ ke hɔn ɖo dinkpwe, ni sa awu etɔn a bo do xɔ. 37 Ɖo ko lɔ na mi nɔ lɔ byo, na onu ke ye wlan do wu ye ni jɔ: " Ye xlɛ-ɛ do onunyinylawatɔye mɛ."» 38 Ye bo va lɔ tun:« Xwetɔ, kpɔn dinkpwe owe xɛn.» E bo lɔ na ye byo:« E o kpe.» 39 Hwekenu na ye ɖu onu vɔ, Yesu va yi oso ke ji na olivutinye le lɔ, ɖi ke e o nɔ wasi ɖo san ha, onukplanvi etɔnye bo xodo-e. 40 Hwekenu na ye va jɛ ofi lɔ, e lɔ na ye tun:« Mi xo ɛɖɛ na mi ko mɔ do va jɛnyi nɔ le tintɛnkpɔn we hwenu nɔ.» 41 E xin we godo, Yesu bo va tɛyi le ye wu viɖe, bo jɛ klita bo jɛ ɛɖɛ xo ji 42 bo lɔ nɔ tun:« Otɔ, na ojlo, bo dɔn vivɛsise we kɔfo ke tɛyi le wu ye. Ganke, ka wasi onu ke na ko jlo, vɔ wasi ojlo tɔwe.» 43 E xin ɛwɛndotɔ Mawutɔn ɖɔkpo bo va ze do ŋumɛ ni-i bo va do hɔnhlɔn lanmɛ ni-i. 44 Ke na e le onulilo mɛ taŋu, e mɔ yi do ɛɖɛ ji kpo hɔnhlɔn kpo, ɛdɛn etɔn bo va le ɖi ɛhunkɔn ha bo a ja do nyidan mɛ nɔ ciɖɛ-ciɖe. 45 Ke e xo ɛɖɛ vɔ, e va cite bo va yi onukplanvi etɔn lɛye kɔn, e bo va kpɔnye le awlɔnmɛ, ɖo ye le dɔŋuɖunu mɛ diin, 46 e bo kan ye se nɔ tun:« Ŋunɛ jɔ na mi do dɔ awlɔn nɔ? Mi cite a bo xo ɛɖɛ na ko mɔ do va jɛ tintɛnkpɔn mɛ nɔ.» 47 Hwekenu na Yesu mɔ gbɛ lɔ oxo nɔ, mi kpɔn, ɛmɛ susu ɖeye va tɔn do ye ji, mɛ ke ye nɔ yɔ tun Juda, ke nyi mɛ ɖokpo le onukplanvi weve lɛye mɛ, bo le ŋukɔn na ye. E bo tɛkpɔ Yesu bo na do kisi ni-i, 48 vɔ Yesu bo lɔ ni-i tun:« Juda, osi kiki na Gbɛtɔ we Vi lɔ mɛ wɛ o na sɔ-ɛ sɔ jɔ le?» 49 Ke na onukplanvi ke le Yesu kɔn lɛye kpɔn onu ke na jɔ nɔ lɔ, ye kan-ɛ se tun:« Xwetɔ, mia jɛ ye xo ji kpo dɛnkpwe kpo?» 50 I wɛ mɛ ɖokpo le ye mɛ sɔ dɛnkpwe lɔ bo kpa oto aɖusi mɛ tɔn na avɔsantɔye we ga we odansɔvi ɖokpo. 51 Yesu bo lɔ na ye tun:« Mi gɔɔ, mi nɔ te!» E bo ɖo alɔ oto wu na ɛmɛlɔ, oto lɔ bo mɔ va ke le san. 52 Yesu bo mɔ lɔ na Mawu we avɔsantɔ ɖaxoye, Mawu we xwegbe cɔtɔye we ogaye kpodo otomɛhyɔ ke va wiwle-e gbe lɛye tun:« Jaguda wɛ mi va wle nɔ bo do hɛn dɛnkpwe kpodo okpye kpo? 53 Hwekenu na ko le kpo mi le okpletyɔnye, mi hɔn do alɔ wu ye mɔ. Vɔ ogan miatɔn wɛ xo, kpo ogan vuvlumɛdanwatɔ satana we ogan wɛ xo.» 54 Ke ye wle Yesu vɔ, ye kplɔ-ɛ do yi avɔsantɔye we ga we xwegbe. Vɔ Piyɛ bo le dindɛnnu daan bo do le ɛtɛ na ye. 55 Gankemɛ na ye va ta zogbɛn do gaji bo xinnɔnyi do kpɔkpɔɔ, Piyɛ can xinnɛnyi le ye mɛ. 56 Nyɔnuvi odansɔvi ɖe bo va kpɔn Piyɛ le ozo lɔ we axa, bo kpɔn-ɛ nɔ tlululu, bo lɔ byo:« Dahwe ke can nɔ xodo Yesu.» 57 Vɔ Piyɛ bo kɛ bo lɔ tun:« Nahwe, ko hɔn nyɔ-ɛ sɔn fiɖe.» 58 Zanɖe kpoŋu, mɛbu mɔ kpɔn Piyɛ bo mɔ lɔ tun:« I can gba mɛɖokpo wɛ onyi le ye mɛ.» Vɔ Piyɛ lɔ tun:« Dahwe, ko hɔn nyi mɛ tri le ye mɛ.» 59 Oganxixo ɖokpo we godo ɖemɔha, mɛ ɖokpo bo mɔ va, bo tɛngbe do e ji nɔ tun:« Dandandan, ko kan do e ji tun dahwe ke can le ye mɛ ɖo Galiletɔ wɛ e nyi.» 60 Piyɛ bo ɖo e wu ni-i tun:« Dahwe ko hɔn nyɔ onu ke xo na o lɔ nɔ can.» Zɔnɖokpo kpoŋu, ke na e mɔ gbɛ lɔ oxo nɔ, goklo bo do atan. 61 Xwetɔ lɔ, bo trɔ, bo kpɔn Piyɛ. Hwexinnu wɛ Piyɛ va flin oxo kena Xwetɔ lɔ lɔ ni-i san tun:« Gbɔxwe na goklo na do atan egbe, o na gbɛ-ɔ zɔn atɔn.» 62 Ke Piyɛ va tɔn, e va jɛ avi vi ji vivɛɖe. 63 Mɛ ke cɔ Yesu nɔ ye, ye bo ko-e nɔ, bo mɔ xo-e nɔ. 64 Ye nɔ va cɔn avɔ do ŋumɛ ni-i, a bo kan se wi tun:« Lɔ! Mɛ ke xo we na mi?» 65 Ye bo kɔn acɔn susu buye do e wu. 66 Ke ŋukɔn ɖe, otomɛhyɔnye, Mawu we avɔsantɔ ɖaxoye kpodo osɛnkplan-ɛmɛtɔye, va yi okple, ye bo kplɔ Yesu do va ɛhwɛɖɔtɔ ɖaxoye we ŋukɔn 67 ye bo kan-ɛ se nɔ tun:« E nyi lɔ wɛ nyi Klisu lɔ, bo lɔ-ɛ na mí.» Vɔ e bo va lɔ na ye tun:« E nyi ko mɔ do lɔ-ɛ na mi syɛ can, mi hɔn kan do e ji nɔ 68 e nyi ko mɔ va kan oxo se wu mi can, mi hɔn va ɖo e wu na nɔ gbeɖe. 69 Bɛ sɔn syɛ, gbɛtɔ we vi lɔ na xinnɔnyi le aɖusi mɛ na Mawu hɔnhlɔn bisese nɔ lɔ. 70 Ye mɛ bi bo va kan-ɛ se tun:« I wɛ nyi Mawu we vi lɔ?» E bo va ɖo e wu na ye tun:« Miye tete wɛ lɔ-ɛ, i wɛ ko nyi.» 71 Ye bo lɔ tun:« Ŋunɛ jɔ mi mɔ hyan kunnuɖiɖe bu wɛ? Ɖo miye tete mi o va see le onu etɔn mɛ.»