¹ Yesu, va kɔ okɔ bo kpɔn dɔkunnɔye o sɔ onunina yetɔnye sɔ do onunina we ɖaka mɛ nɔ. ² E bo va kpɔn kposyu ayanɔ ɖe va sɔ ohogan owe ke na hɔn le onu ɖe ji, bo sɔ do onunina we ɖaka lɔ mɛ. ³ Ke Yesu kpɔn ɖemɔha, e lɔ tun:« Ma lɔ na mi le xojɔxo mɛ tun lɔ byo, kposyu ayanɔ ke, e na onu hugan wu mɛ bisese. ⁴ Ɖo mɛ bisese, oho zandrɔn yetɔnye wu wɛ ye sɔ le bo va na, vɔ e lɔ, ayaɖuho etɔn bisese, ke na e na do nɔ ɛgbɛ, wɛ e sɔ va na.» ⁵ Ke na e va kpɔn tun mɛɖeye mɔ lɔ xo do ke na ye ɖɔ acɔ na Mawu we oxwe lɔ ɖo nɔ, kpodo ɛkpen nywɛ-nywɛ ke ye sɔ bo do ɖo acɔ ni-i ye, kpo acɔ we onu ke ɛmɛye na Mawu ye, Yesu bo lɔ na yue tun: ⁶ « Onu ke mi kpɔn nɔ xin ye, azan ɖeye o gbɔnnɔ , we ɛkpɛn ɖokpo tete hɔn ci ɖe ji nɔ, ye na gba bisese.» ⁷ Ye kan Yesu se tun:« Onukplan-ɛmɛtɔ, hwenɛ nu lɛ onu xin lɛye na jɔ? Josi nɛ lɛ na ɖe xlɛ tun onu xin lɛye mɔ na va jɔ? » ⁸ Yesu bo yi ogbe na ye tun: « Mi cɔ mia ɖe, na mɛɖe ni ka va blɛ mi ɖu. Ɖo ɛmɛ susu na va va le nyikɔ tɛye mɛ, a bo lɔ tun: "Bo wɛ nyi Klisu lɔ, ogan lɔ o tɛkpɔ, mi ka xo do ye." ⁹ Na mi va se tun ahwanye mɔ jɔ nɔ, gbɛtɔye bo fɔn ogu do yeɖeye ji nɔ, mi ka vɔ, ɖo e xin lɛye na jɔ gbɔxwe, vɔ ɛgbɛ lɔ hɔn vɔ nɔ trololo.» ¹⁰ Yesu mɔ lɔ na ye tun: « Otogun de na tɔn ahwan wu otogun ɖe, xɔluɖuto ɖe mɔ va tɔn ahwan wu xɔluɖuto ɖe. ¹¹ Nyidan na va hunhun le fiɖeye, xovɛ ɖaxo bo na tɔn le fiɖeye, adɔn ke nɔ ɖe ovi mɔ va tɔn le ofiɖeye. Onu ke na gba ayixa do na ɛmɛ kpodo josi ɖaxo-ɖaxo ye na va& jɔ nɔ sɔ jiŋukunsin. ¹² Vɔ, keŋugbɔxwe onu xin lɛye na jɔ, ye na wle mi a bo ɖe ofun na mi, ye na dɔn mi yi ɛhwɛ nukɔn le okpletyɔnye, ye na wle mi do gankpamɛ, ye na dɔn mi yi ɛhwɛ nukɔn le xɔluye kpo otkplɔtɔye we ŋukɔn do nyikɔ tɛye wu. ¹³ Onu xin lɛye kena na jɔ nɔ, na na na mi na kpɔn omɔ a do ɖe kunnu na-a. ¹⁴ I wɛ dɔn, ni nɔ ayixa miatɔn mɛ nywɛɖe tun, e hɔn hyan tu mi na jla oxo ɖe ɖo a do hwlɛn ota miatɔn. ¹⁵ Ɖo bo tete ko na na mi onunyinyɔ we oxo ye, e xin, ɛhwɛɖɔtɔ miatɔnye ti ko kpewu va nɔ ote le ŋukɔn na oxo miatɔnye nɔ can. ¹⁶ Miatɔye, mianɔye, mianɔvyɔye, ɛmɛ miatɔnye gbɔɔn do jɛ hadwe miatɔnye ji, ye na sɔ mi sɔ jo na otogaye. Otoga lɛye bo na va na ye na gbo oku we ɛhwɛ na mɛ susu le mia mɛ. ¹⁷ Mɛ bisese bo na gbɛ owan na mi do nyikɔ tɛye wu. ¹⁸ Vɔ oɖa ke le ota na mi ɖokpo tete hɔn bu nɔ. ¹⁹ Do gbɔn vivɛ do do onu wu miatɔn mɛ, Mawu na hwlɛn okla miatɔnye gan. ²⁰ Yesu mɔ lɔ na ye tun lɔ byo: Hwekenu na mi na kpɔn ahwankpaye lilɛto do Jeluzalɛmu lɔ mi mɔ nyɔ-ɛ tun ogan ke mɛ na ye mɔ na va gbidi-i mɔ va. ²¹ Hwexinnu, mɛ ke le Jude we kansin mɛ ye, ye ni si a bo si-in oso ye we godo, mɛ ke le Jeluzalɛmu ye, ye can ni si, mɛ ke le otota lɔ mɛ ye, ye ni ka ɖyɛ toxo lɔ mɛ. ²² Ɖo le azan xin lɛye gbe, Mawu na dɔn oto na togun etɔn, i wɛ onu ke ye wlan le Mawu we oxo lɔ mɛ ye bisese na jɔ. ²³ Babaa na nyɔnusi ke na na le gomi ye, kpodo nyɔnusi ke na ovi na mɔ gbɛ le anɔ nu na ye, le azan xin lɛye ji. Ɖo vivɛsise ɖaxo ɖe na nɔ onyi le oto lɔ mɛ, Mawu bo na do aɖi do togun ke. ²⁴ Ye na hu ɛmɛ ɖeye le dɛnkpwe nu, ye bo na wle ɛmɛ ɖeye le ahwan gbeji, ye bo na dɔnye gbɔn oto bi mɛ, mɛ ke na hɔn nyɔ Mawu ye, na gbidi Jeluzalɛmu lɔ, le afɔ nu, do jɛ hwekenu na ogan ke ye ɖo na ye lɔ na va do. ²⁵ Ye na kpɔn josi le ohwe mɛ, le osun mɛ kpodo sunhwleviye mɛ. Le nyidan ji, ɛmɛye na le onulilo mɛ taŋu, ɖo zigidi ke na ɛxu na ɖu nɔ, kpodo ke e na xo nɔ ɖo, na do vivɔ na togun ye nɔ taŋu. ²⁶ Gbɛtɔye susu na va ku nɔ ɖo ye na bu tamɛ nɔ bo na mɔ vɔ nɔ do onu kena jɔ le nyidan lɔ ji nɔ wu. Ɖo hɔnhlɔn ke le jiŋukunsin ye na hunhun. ²⁷ I wɛ ye na kpɔn gbɛtɔ we ovi lɔ le sunwɔ mɛ, e mɔ gbɔnnɔ kpodo hɔnhlɔn kpodo gigo ɖaxo kpo. ²⁸ Na onu lɛye bɛ jijɔ ɖo e mɔ ha, mi jlɔ a bo kpɔn jihwe, ɖo okantuntun miatɔn o tɛkpɔ nɔ.» ²⁹ Yesu mɔ do olo ke na ye tun:« Mi kpɔn figitin kpo otin gbokpweye bi. ³⁰ Na mi kpɔn tun ye mɔ dɔn ama yɔyɔ nɔ, mi nɔ nyɔ-ɛ tun oxweju mɔ va bɛ nɔ. ³¹ Ɖemɔke miye can, na mi va kpɔn on u xinye va jɔ nɔ, mi mɔ nyɔ-ɛ tun xɔluɖuɖu Mawutɔn ,lɔ mɔ tɛkpɔ. ³² Le xojɔxo mɛ ko lɔ na mi nɔ, jijimɛvi egbetɔn kiye bi hɔn ku nɔ keŋu gbɔxwe na onu xin ye bisese na do jɔ. ³³ Jiŋukunsin kpo nyidan na va yi, vɔ oxo tɛyee hɔn va yi nɔ kpɔn gbeɖe. ³⁴ Mi cɔ miaɖe na ayixa miatɔnye ni ka va ci oxwe ɖuɖu diin, ahannumu, alo ɛgbɛmɛ bwɛ we onulilo ye ji na azan xin lɔ a va jɛ mia ji le ajiji mɛ? ɖi ke omɔ nɔ wle olan ɖo ha, ³⁵ ɖo azan xin lɔ na va cɔ ɛmɛ bisese ke le nyidan lɔ ji. ³⁶ Mi nɔ ŋuzɔn, a bo xo ɛɖɛ hwebinu na mia do kpɔn hɔnhlɔ a do kpan ŋukɔ wu onu bisese ke na va jɔ lɛye, a bo mɔ do kpewu a nɔ ote le ŋukɔ na Gbɛtɔ we vi lɔ.» ³⁷ Wɛ azan keye mɛ na Yesu o kplan onu wu emɛye nɔ le Mawu we oxwe lɔ gbe, e nɔ ve dɔ oso ke ji na Olivitin le lɔ ji le zanmɛ. ³⁸ Le kɛklɛnu fuu, togun lɔ bisese nɔ va e kɔn le Mawu we oxwe lɔ gbe a do va ɖo oto wu-i.