1 Gbeɖokpo, hwekenu na Yesu o kplan onu wu ɛmɛye nɔ le Mawu we xwegbe bo do jla ɛwɛn nywɛ lɔ nɔ, avɔsantɔɖaxo Mawutɔnye, osɛnkplan-ɛmɛtɔye kpo otmɛhyɔnye, tɛkpɔ-ɛ. 2 Ye bo kan-ɛ se tun:« Lɔ na mí, acɛ nɛ lɛ o nɔ do wasi onu xin lɛye alo mɛnɛ le na we acɛ xin lɔ?» 3 E bo do e wu na ye tun:« Blɔ can ko na kan oxo ɖokpo se wu mi. Mi lɔ na, 4 Mawu we ɛsin ke Jan va lɛ na ɛmɛye, Mawu de wɛ e sɔn, alo gbɛtɔye de?» 5 Ye bo va jɛ lilɔ ji na yedeye, tun: « E nyi mi yi gbe ni-i tun: "Mawu de mɛɛ", e na va kan mi se tun: "Ŋunɛ jɔ na mi hɔn do kan do e ji jaa?" 6 Vɔ na mí mɔ yi gbe ni-i tun: "Gbɛtɔye kɔn," togun lɔ bisese na va da ɛkpɛ do mí, ɖo ye nyɔ-ɛ tun Mawu we oxolɔɖenyitɔ me mɔ nyi Jan.» 7 8 Ye bo va ɖo e wu ni-i tun hiye mɔ hɔn nyɔ fi ke e mɔ sɔn. Yesu bo lɔ na ye lɔ byo:« Blɔ can ko hɔn nyɔ, ko hɔn lɔ acɛ ke ko do wasi onu xin lɛye le na mi nɔ.» 9 E xin we godo, Yesu do olo ke na ye bo lɔ tun:« Dahwe ɖe do vɛntin do ogle etɔn mɛ, bo sɔ na kpama na gletɔ ɖeye, bo va zɛhwɛn do yi oto dindɛn ɖe mɛ. 10 Ke sinsɛn lɛye we gbingbɛn ganmɛ va su, e dɔn odansɔvi ɖe dodan gletɔ lɛye kɔn, na ye a do ni-i sinsɛn ke na nyi axɔtu etɔn. Gletɔ lɛye xo odansɔvi lɔ bo nya-ɛ alo toto. 11 E mɔ dɔn odansɔvi bu dodan, ye bo mɔ xo i can, bo zun-i, bo nya-ɛ alɔ toto. 12 E mɔ dɔn odansɔvi atɔngɔ, ye bo mɔ xo e lɔ can, bo do fɔku wi, bo nya-ɛ tɔn le ogle lɔ gbe. 13 Vɛngletɔ lɔ bo va lɔ tun na tun:« Naɖe ko na hɛnɖo? Ko na sɔ ovi ŋusunglo tɛye vivɛ ke ko yi owan na taŋu lɔ ɖodan. Tanyɔ, ye na ɖo sisi na e lɔ.» 14 Vɔ, ke gletɔ lɛye kpɔn-ɛ, ye lɔ le yeɖe mɛ tun:« Mi kpɔn, ovi ke ba sɔ cinɔ nɔ lɔ xɛn nyi ke. Mía hu-i, na cinɔ lɔ a do ci onyi na mí.» 15 Ye dɔn-ɛ tɔn le ogle lɔ gbe, bo hu-i. Syɛ, ŋunɛ vɛngletɔ lɔ na wa na ye? 16 E na va a bo gu okun na gletɔ lɛye bisese, a bo sɔ ogle lɔ a bo sɔ na mɛ bu ye. Ke ye va se oxo xin lɔ vɔ, ye lɔ tun,« Na Mawu ni ko na na ni jɔ kpɔn!» 17 Vɔ Yesu ɖe kɔ kpɔn ye bo lɔ na ye tun:« Mawu we oxo lɔ lɔ tun « Ɛkpɛn ke na oxɔwatɔye gbɛ, i wɛ va nyi azweji we ɛkpin? Oxo xin lɔ we gɔnmɛ ɖe? 18 Mɛɖe kpokpwe ke na flɛ jɛ ɛkpɛn xin lɔ ji, ɛmɛ lɔ na kankan, wɛ mɛ ke ji na ɛkpɛn xin lɔ na va flɛ jɛ, ɛkpɛn lɔ na li-i ɛmɛ lɔ kpɔɖɔ-kpɔɖɔ.» 19 Osɛnkplan-ɛmɛtɔye kpo Mawu we avɔsantɔ ɖaxoye bo va kpɔn nu je e wu tun hiye mɛ Yesu mɔ do olo xin lɔ na, ye bo kan nɔ na wle le ganxixo xin lɔ mɛ, vɔ ye bo vɔ na togun lɔ nɔ. 20 Ye bo jɛ Yesu cɔ ji, bo va ɖo ɛmɛ ɖeye dodan ye bo nɔ cɔ-ɛ le ɛmɛye mɛ nɔ, mɛ xin lɛye bo nɔ wa onu nɔ ɖi ɛmɛ ke hɔn le ayixa nyinyla ɖe ji ha, na ye a do kpɔn ofɛn le onukpinkpla etɔnye mɛ, a do sɔ-ɛ sɔ do alɔ mɛ na otokplɔtɔ ke ɖo acɛ a do ɖo kojo ni-i. 21 Ye bo va kan se wu wi nɔ lɔ byo:« Onukplan-ɛmɛtɔ, mi nyɔ-ɛ tun o nɔ lɔ oxo a bo kplan onu wu ɛmɛye do omɔ jijwɔ ji, hɔn nɔ nɔ mɛɖe ji, vɔ, o nɔ kplan onu wu ɛmɛ do Mawu we oxo lɔ wu le xojɔxo mɛ. 22 Osɛn míatɔn yi gbe na mí tun mi mɔɔ tun takwɛ na Seza wɛ?» 23 Vɔ Yesu nyɔ-ɛ tun omɔɖiɖo we oxo mɛ bo va lɔ na ye tun: 24 « Mi sɔ ohogan de sɔ xlɔ. Mɛnɛ we oyɛ kpo nyikɔ le le e ji?» Ye bo yi gbe ni-i tun:« Seza» 25 E bo va lɔ na ye tun:« Mi sɔ nu ke nyi Sezatɔn a sɔ na Seza, a bo sɔ nu ke nyi Mawutɔn a sɔ na Mawu.» 26 Ye ko mɔ kpewu bo va kpɔn ofɛn ti le oxo etɔnye mɛ le togun lɔ we ŋukɔn. Oxo ɖo oxo wu etɔnye bo kpaca do ye, ye bo gbɔjwɛ bɔnu. 27 Sadusitɔ ɖeye ke nɔ lɔ tun fifɔn sɔ oku mɔ hɔn le ye, ye va tɛkpɔ Yesu bo kan oxo ke se wu wi. 28 « Onukplan-ɛmɛtɔ, osɛn ke Mɔyizi wlan na mí xɛn: "E nyi tun mɛɖe ɖo nɔvi ŋusunglo ɖe e bo ɖe nyɔnu vɔ e ko ji ovi gbɔxwe do ku, nɔvyɔ ŋusunglo bu hɛn e na so nɔvyɔ syɔ lɔ a do sɔ okpo, ovi ke e na ji lɔ mɔ nyi nɔvyɔ ke ku lɔ tɔn." 29 Nɔvi nɔvi ŋusunglo acowe ɖeye nɔny kpɔn, ɛmɛ tantɛntɔn ɖe nyɔnu bo ku ovi ma ji, 30 nɔvyɔ owegɔ bo sɔ nyɔnu lɔ bo do sɔ okpo, ɛmɛ atɔngɔ can bo mɔ sɔ nyɔnu lɔ bo mɔ sɔ ɖe, 31 ye mɛ acowe lɛye bi ɖe nyɔnu lɔ bo ku bo jo nyɔnu lɔ do ovi ma ji.» 32 E xin we godo nyɔnu xin lɔ can bo va ku. 33 Le fifɔn sɔn oku we godo, mɛnɛ tɔn lɛ na nyi nyɔnu lɔ? Ɖo ye mɛ acowe lɛye bi wɛ ɖee bo do ɖe nyɔnu. 34 Yesu bo ɖo e wu na ye tun:« Ɛgbɛ ke mɛ we vikpɛye nɔ ɖe nyɔnu a bo ɖe asu. 35 Vɔ mɛ ke na ye na kpɔn ɖi ɛmɛ jijwɛ haa le nyidan ke ji le fifɔn sɔn oku we wenu ye, ye hɔn de nyɔnu nɔ gbɔɔn a do ɖe osu nɔ can. 36 Ye ko mɔ ku nɔ can, ɖo ye na ci ɖi Mawu we ɛwɛndotɔye ha, ye bo na va nyi ovi Mawutɔn, ɖo ye fɔn sɔn oku. 37 Ɛmɛye nɔ fɔn sɔ oku, on u xin lɔ we Mɔyizi ɖe sɔ xlɛ le wiwlan ke mɛ na e lɔ oxo do Kliti ke le ozo mɛ, vɔ e ko bi nɔ lɔ wu, bo do yɔ Xwetɔ Mawu lɔ tun, Mawu Ablaxamutɔn, Mawu Izakitɔn, kpo Mawu Jakɔbutɔn. 38 Syɛ, Mawu hɔn nyi Mawu ɛmɛ kukuye tɔn, vɔ Mawu ɛmɛ gbɛgbɛye tɔn wɛ e nyi, ɖo mɛ bi le ɛgbɛ le e lɔ lɔ mɛ.» 39 Osɛnkplan-emɛtɔ ɖeye, bo va yi ogbe ni-i lɔ byo: « Cica onukplan-ɛmɛtɔ, o lɔ- nywɛɖe» 40 Ye ko mɔ kpewu mɔ va kan oxo ti se wu-i can. 41 Yesu lɔ na ye tun:« Naɖe lɛ e nyi ɖo na ɛmɛye nɔ do lɔ tun Klisu mɔ nyi Davidi we vi? 42 Davidi lɔ tete lɔ le ohanjijiwema mɛ tun:« Xwetɔ Mawu lɔ na Xwetɔ teye tun, "Xinnɔ onyi do aɖusi mɛ na, 43 gbɔɔn do jɛɛ hwekenu na ko na sɔ kɛntɔ tɔweye a do wasi fɔxomɛ tutunu tɔwe."» 44 Davidi nɔ yɔ Klisu tun, «Xwetɔ», naɖe lɛ e va nyi Davidi we vi ɖo?» 45 Hwekenu na togun lɔ bisese o ɖo oto Yesu nɔ, e lɔ na odansɔvi etɔnye tun: 46 «mi cɔ miaɖeye do osɛnkplan-ɛmɛtɔye wu, ojlo yetɔnye wɛ nyi tun ye na ɖi osa nɔ kpo awu gaga gblɛlɛlɛ le okɔ, ye bo nɔ yi owan na tun ɛmɛye a mɔ nɔ do ogbe na ye kpo sisi kpo le dogbaye ji, bo nɔ jlo na nɔ xinnɔnyi le tɛnxo tantɛntɔnye le okpletyɔn ye, a nɔ xinnɛnyi le okpo tantɛntɔnye ji le oxwe alo agɔɖuɖu we tɛnxo ye. 47 Ye bo mɔ nɔ yi onu ye le kposyu ye si, ye bo nɔ xo ɛɖɛ gaga na ɛmɛyɛ a do kpɔn ye. Oto ke Mawu na dɔn na ye na syɛnxu taŋu.»