¹ Yesu ɖyɛ Jeliko bo gbɔn toxo lɔ va yi nɔ. ² Mi kpɔn, i wɛ dahwe ɖe le blɛ, ye bo nɔ yɔ-ɛ tun Zace. E bo nyi ɖokpo le takwɛjɔtɔye mɛ, bo nyi dɔkunnɔ. ³ E bo ba nɔ na kpɔn mɛ ke ye nɔ yɔ tun Yesu lɔ, ⁴ e ko kpewu bo kpɔn-ɛ nɔ do ɛmɛye su di-in ɖo ɛmɛ kpokpoɖwe wɛ e nyi. E bo va do wedun bo je ŋukɔn na ye, bo ve xɛ otin ke ye nɔ yɔ tun sikomɔ ji, do blɛ lɔ wɛ Yesu ɖo na gbɔn. ^{5 6 7} Ke Yesu jɛ fi ke na ofi lɔ, e va kpɔn-ɛ le jihwe bo lɔ ni-i tun:« Zace, jɛte bleŋu, e jlo tun ma nɔ oxwe tɔwegbe le egbe.» E bo jɛte bleŋu, bo yi Yesu kpo jijwɛ kpo. Ke ɛmɛye kpɔn ɖemɔha, ye bo jɛ oxo lɔ ji, ye bo lɔ nɔ tun: Onunyinylawatɔ we xwegbe wɛ e va yi.» ⁸ Zace va nɔte le ŋukɔn na Xweɔ lɔ bo lɔ tun:« Kpɔn, Xwetɔ, ko na sɔ dɔkun tɛyee we ovlɔ sɔ na ayanɔye, e nyi tun ko o ɖu onuɖe we axɔ do mɛɖe, ko na sɔ a bo sɔ ni-i do donu ɛnɛ ji.» ⁹ Yesu bo lɔ ni-i tun:« Hwlɛngan ɖyɛ oxwe ke gbe le egbe, ɖo mɛ ke can Ablaxamu we vi wɛ e nyi. ¹⁰ Ɖo gbɛtɔ we vi lɔ va na do hwlɛ mɛ ke o bu ye gan.» ¹¹ Ke ɛmɛye ose oxo xin lɛye nɔ, Yesu mɔ do olo ɖe na ye ɖo ye tɛkpɔ Jeluzalɛmu nɔ, ye bo bwi tun xɔluɖuɖu Mawutɔn lɔ na va syɛ ɖoo mɛ ha. ¹² E bo va lɔ tun: «Dhwe ɖe tɔn sɔn xɔluye we xwedo mɛ bo va yi oto dindɛn ɖe mɛ na ye a do sɔ-ɛ sɔ do ɖo xɔlu le blɛ lɔ, e xin we godo, e mɔ lva lɛkɔ gbɔn va oto etɔn mɛ. ¹³ Keŋugbɔxwe na e na sɔn, e yɔ odansɔvi etɔn owo, bo sɔ sikaho ɖokpo-ɖokpo sɔ do asi na ye tun: " Mi sɔ-ɛ do do ajɔ gbɔɔn do jɛ hwekenu na ko na lɛkɔ do. ¹⁴ Vɔ oto etɔn mɛ tɔye bo gb e wan ni-i gbɔɔn bo va ɖo afɔsɔɖotetɔ yetɔn dodan, na ye a do ve lɔ na mɛ ke va sɔ-ɛ do ɖo xɔlu nɔ lɛye tun: "Mí hɔn jlo tun ni a ɖu xɔlu na mi." ¹⁵ Ganke, ye bo sɔ-ɛ do ɖo xɔlu lɔ. Ke e va gbɔn, e va yɔ odansɔvi ke e maa oho na lɛye na do kpɔn ale ke ye ɖu le ajɔ ke ye do lɛye mɛ. ¹⁶ Ɛmɛ tantɛntɔn lɔ va bo lɔ tun: "Xwetɔ, oho owo wɛ ko ɖu do oho ɖokpo ke o sɔ na lɔ ji." ¹⁷ E bo lɔ ni-i tun: "E nyɔhwɛn, odansɔvi onywɛ wɛ o nyi. Ɖo o nɔ gbeji le onu vito-e mɛ, ko na sɔ we do ɖo oga na toxo owo." ¹⁸ Ɛmɛ owegɔ va, bo lɔ tun: "Xwetɔ, oho atɔɔn wɛ ko kpɔn do ɖokpo tɔwe lɔ ji." ¹⁹ E bo lɔ ni-i tun: "Ɖu oga na toxo atɔɔn." ²⁰ Mɛ bu bo va, bo lɔ tun: "Xwetɔ, oho tɔwe, ko sɔ-ɛ bo ve sɔ hwla do awu tɛye dokpo mɛ, ²¹ ɖo ko vɔ na we nɔ, ɖo gbɛtɔ hunnylatɔ wɛ o nyi. O bo nɔ sɔ onu ke hɔn sɔ dɛnyi, o bo nɔ va ya onukun le ofi ke na hɔh do do." ²² Xwetɔ lɔ bo ɖo e wu ni-i tun lɔ byo: "Odansɔvi nyin yla we o nyi , oxo ke na itete o lɔ wɛ ko na do ɖo kojo na we. O nywɛ tun ko mɔ nyla ɛhun, bo nɔ sɔ onu le ofi kena ko hɔn sɔ onu ti do, bo nɔ ya ɛjinunkun le ofi kena ko hɔn do do. ²³ Ŋunɛ jɔ na hɔn do sɔ oho lɔ bo ve sɔ ɖo ohoɖoxwe na, na ko va gbɔn, ko mɔ va yi-i kpo ohojivi kpo? ²⁴ E bo lɔ na ɛmɛ ke le ofi lɛye tun: "Mi yi oho ɖokpo lɔ le esi, a bo sɔ na ɛmɛ ke si oho owo le lɔ." ²⁵ Ye bo lɔ ni-i tun: "Xwetɔ, oho owo o le e si ma." ²⁶ "Ma lɔ na mi tun, ye na mɔ na mɛ ke si e o le, vɔ ye na mɔ yi ovi lɔ lɛ mɛ ke na hɔn ɖo ti lɔ si. ²⁷ Syɛ, mi kplɔ kɛntɔ tɛyee va na, ye mɛ ke hɔn jlo na ma mɔ ɖu xɔlu le ye nu ye, a bo hu ye le ŋumɛ tɛye."» ²⁸ Hwekenu na e lɔ oxo xin lɛye vɔ, e mɔ wle Jeluzalɛmu we omɔ lɔ. ²⁹ Hwekenu na e tɛkpɔ toxo Bɛtifaje kpo Betani tɔn, ke tɛkpɔ oso ke ye nɔ yɔ tun Olivu lɔ, e va ɖo odansɔvi eton owe dodan, ³⁰ bo lɔ nɔ tun:« Mi yi otota owegɔ lɔ me. Na mi va ɖyɛ oto lɔ mɛ trolo, mi na kpɔn osɔketɛ ɖe ke ji na mɛ ti hɔn xɛ kpɔn. Mi tun kan ni, a bo kplɔ-ɛ do va na. ³¹ E nyi mɛɖe kan mi se tun, "Ŋunɛ jɔ na mi do tun okan ni-i nɔ jaa? Mi lɔ ni-i tun, "Xwetɔ lɔ ɖo hudo etɔn."» ³² Ye mɛ ke yi lɛye, ye kpɔn osɔkɛtɛ lɔ ɖi kena Yesu lɔ na ye ɖo ha. ³³ Ke ye tun okan na osɔkɛtɛ lɔ nɔ, mɛ ke tɔn nyi osɔkɛtɛ lɛye kan ye se tun :« Ŋune jɔ na mi do tun okan ni-i nɔ» ³⁴ Ye bo va ɖo e wu na ye tun: « Xwetɔ lɔ ɖo ohyan etɔn.» ³⁵ Ye bo va sɔ-e va na Yesu, ye bo va ɖe awu yetɔnye bo sɔ tɛ do osɔkɛtɛ lɔ ji, bo va sɔ Yesu sɔ xinnɔ onyi le e ji. ³⁶ Hwekenu na ye sɔn nɔ, ye nɔ va tɛ awu yetɔnye do omɔ lɔ ji. ^{37 38} Le hwekenu na Yesu va tɛkpɔ Jeluzalɛmu lɔ nɔ, bo jɛte le oso ke ji na Olivutinye le lɔ nɔ, onukplanvi susu geɖegeɖe ye kpɔn jijwɛ nɔ bo je Mawu kinkanfu ji kpo axwa kpo do onu ɖaxo-ɖaxo ke Yesu wasi ye bo kpɔn ye wu, bo nɔ lɔ tun:« Donanɔ wɛ nyi Xɔlu ke gbɔnnɔ le Xwetɔ lɔ we nyikɔ mɛ! fifa le sɛxwe, gigo na Mawu le jihwe!» ³⁹ Falizitɔ ɖeye bo va lɔ na Yesu tun le togun lɔ mɛ tun:« Cica onukplan-ɛmɛtɔ, lɔ na onukplanvi tɔweye tun ye mɔɔ bɔ nu.» ⁴⁰ Yesu bo va do e wu na ye lɔ byo:« Ma lɔ na mi o, na ye lɛye mɔ bɔ onu can, okpɛnye na va jɛ axwa dido ji!» ⁴¹ Ke na Yesu o tɛkpɔ toxo lɔ nɔ bo kpɔ-ɛ dodan, e va vi avi do ota etɔn mɛ, ⁴² bo lɔ byo:« E nyi tun o do nyɔ onu ke na hɛn fifa va na we le azan egbetɔn ji wɛɛ! Vɔ syɛ ye sɔ ye bo sɔ hwla do we. ⁴³ Ɖo, azan ɖeye o gbɔnnɔ na we nɔ, wɛ kɛntɔ tɔweye na do oglikpa a bo lilɛ do we, bo na finyɔ we gbɔn fi bisese. ⁴⁴ Ye na crɔn we, i kpodo vikpɛ tɔweye. Ye hɔn va jɔ ɛkpɛn tete ɖe do ɖe ji nɔ can, ɖo hɔn va ɖo josi wu hwekenu na Mawu va bo na do va hwlɛn we ga lɔ.» ⁴⁵ Yse bo ɖyɛ Mawu we oxwe lɔ gbe, bo jɛ mɛ ke o sa onu nɔ le blɛ lɛye nyinya ji, ⁴⁶ bo lɔ na ye nɔ tun lɔ byo:« E nyi wiwlan tun, "Oxwe tɛye na va nyi ɛɖɛ we oxwe", vɔ miye, mi bo va sɔ-ɛ do ɖo jagundaye we okpletyɔn.» ⁴⁷ Ŋukɔnɖegbe-ŋukɔnɖegbe Yesu nɔ kplan onu wu ɛmɛye nɔ le okpletyɔn ye. Wɛ avɔsantɔye, osɛnkplan-ɛmɛtɔye kpo otomɛhyɔnye bo ba na hu-i, ⁴⁸ vɔ ye ko nyɔ ke na ye na hɛnɖo, ɖo togun lɔ bisese we ɖo oto wi nɔ vivɛɖe.