¹ Le kɔsiɖagbe, nyɔnusi lɛye va yi yɔgun lɔ kɔn le kɛklɛnu fuu, bo hɛn ami hwɛnnywɛ ke na ye o jla ɖo ɖenyi lɛye. ² Nyɔnusi lɛye bo va kpɔn tun ye mɔ bli ɛkpɛn ke ye mɔ do tu yɔgun lɔ nu tɛ. ³ Ke ye va ɖyɛ yɔgun lɔ mɛ, ye hɔn mɔ va kpɔn ocɔ Xwetɔ Yesutɔn lɔ. ⁴ Ke ye hɔn mɔ nyɔ ke na ye na hɛn ɖo, dahwe owe ɖeye bo va tɔn do ŋumɛ na ye bo do awu ɖe ke klɛn nɔ taŋu. ⁵ Ke vivɔ jɛ nyɔsi lɛye hu ji, ye bo do kɔ do bo kpɔn nyidan mɛ nɔ, vɔ dahwe owe lɛye bo va lɔ na ye tun:« Ŋunɛ jɔ na mi do ba ɛmɛ gbɛgbɛ do ɛmɛ kukuye mɛ nɔ? ⁶ E hɔn mɔ le bwɛ, e o fɔn sɔn oku. Mi ɖoŋu do oxo ke e lɔ na mi le hwekenu na e mɔ gbe le Galile, ⁷ e bo do lɔ tun: "E le vivɛɖe tun ye a sɔ gbɛtɔ we vi lɔ a sɔ jo na onunyinylawatɔye, ye mɔ kan-ɛ do otinsokpoli ji, azan etɔn atɔngɔgbe e mɔ fɔn sɔn oku."» ⁸ Nyɔnusi lɛye bo va flin oxo ke na Yesu lɔ na ye saan lɔ, bo va lɛkɔ le yɔgun lɔ to. ⁹ Ye bo ve lɔ onu ke jɔ lɛye bisese na onukplanvi weɖokpo lɛye kpodo ɛmɛ gbɔkpwe ye. ¹⁰ Nyɔnusi xin lɛye wɛ nyi Mali Madalatɔn, Jani, Mali Jaki onɔ, kpo nyɔnusi buye. ¹¹ Vɔ oxo xin lɛye bo ci ɖi onumanywɛtɔ we oxoye ha do ŋumɛ na ɛmɛdindɔn lɛye, ye ko kan do nyɔnusi lɛye we oxo ji. ¹² Vɔ, Piyɛ bo va cite bo do wedun bo yi yɔgun lɔ to. Ke va xwi bo kpɔn yɔgun lɔ mɛ, i tete va kpɔn tun avɔvun ke ye do bla ocɔ lɔ jan mɛ mɔ le nyidan mɛ. E xin we godo, Piyɛ bo lɛkɔ siin oxwe etɔngbe, bo va kan eɖe se nɔ onu ke na jɔ lɔ. ¹³ Mi kpɔn , le gbexin lɔ gbe ke, onukplanvi owe le ye mɛ bo va yi oto ke ye nɔ yɔ tun Emayusi mɛ nɔ, oto xin lɔ bo dɛn le Jeluzalɛmu wu na kpɛntin weɖokpo ha. ¹⁴ Ye bo lɔ oxo nɔ le yeɖeye mɛ do onu ke na jɔ lɔ. ¹⁵ Hwekenu na ye lɔ oxo nɔ bo do aɖikan nɔ, Yesu lɔ tete tɛkpɔ ye, bo zɔn omɔ kpo ye nɔ. ¹⁶ Ye bo kpɔn-ɛ nɔ vɔ, ye ko nyɔ-ɛ nɔ, ɖo nuɖe cɔn ŋukunsin ji na ye, ye ko kpewu do josi wu-i. ¹⁷ Yesu bo lɔ na ye tun:« Oxo nɛ lɛ mi lɔ le miaɖe mɛ bo dɔ sɔn nɔ?» Ye bo tre bo le dɔŋuɖunu mɛ taŋu. ¹⁸ Mɛɖokpo le ye mɛ ye bo nɔ yɔ-ɛ tun Kleopasi, e bo va ɖo e wu na Yesu tun:« Be i dokpo ge wɛ le Jeluzalɛmu, o ko nyɔ onu kena jɔ le azan kiye mɛ?» ¹⁹ E bo ɖo e wu na ye tun:« Ŋunɛ lɛ nyi onu kena jɔ lɛye?» Ye bo ɖo e wu ni-i tun:« Onu ke jɔ do Yesu Nazlɛtitɔn ji, elɔ ke nyi Mawu we oxolɔɖenyitɔ sinsyɛnxu ɖe, oxo etɔnye kpodo on uwiwa etɔnye bo nɔ ɖo hɔnhlɔn le Mawu kpo togun lɔ bisese we ŋumɛ, ²⁰ ke na Mawu we avɔsantɔ ɖaxo ye kpodo oga miatɔnye bo sɔ-ɛ sɔ jo na Pilati ni a do ɖɔ oku we ɛhwɛ ni-i, bo ɖe ogbe na sɔjaye, ye bo kan-ɛ do otinsokpoli ji. ²¹ Mi bo ŋusi e wu nɔ tun, i mɛ mɔ na tun okan na Izrayɛli. Ɛɛn, e wasi azan atɔn gɔ gbe xin onu xin lɛye do jɔ. ²² Vɔ nyɔnusi ɖeye bo va gba ayixa do na, le egbe kɛklɛnu fuu, hwekenu ye va yi yɔgun lɔ kɔn. ²³ Ke ye hɔn kpɔn ocɔ etɔn lɔ, ye va lɔ na mi tun, Mawu we ɛwɛndotɔ ɖeye can mɔ va ze do ŋumɛ na hiye mɔ lɔ tun e mɔ le ɛgbɛ. ²⁴ Mɛ ɖeye bo va cite le mia mɛ, bo va yi yɔgun lɔ to, bo va kpɔn tun xojɔxo mɛ nyɔnusi lɛye mɔ lɔ. Vɔ, ye ko kpɔn elɔ tete lɔ.» ²⁵ I wɛ Yesu lɔ na ye tun:« Oo gbɛtɔ zinzin ma ɖo tɔye , ke na hɔn yawu ɖo kanɖeji do onu kena oxolɔɖenyitɔye lɔ ye wu! ²⁶ E hɔn jɛ tun Klisu lɔ na ɖu aya ɖemɔha, a bo va ɖyɛ gigo etɔn mɛ wɛɛ?» ²⁷ Wɛ bɛ sɔn Mɔyizi ji kpo do gbɔn oxolɔɖenyitɔ gbokpwe ye bi ji, e o na ye ti mɛ na onu ke kɛɛn ye do gbɔn onu wiwla bisese mɛ. ²⁸ Ke ye tɛkpɔ oto ke mɛ na onukplanvi lɛye o yi nɔ, Yesu wasi ɖi ɛmɛ ke yi dindɛnnu nɔ ha. ²⁹ Vɔ ye bo zin e ji nɔ, bo lɔ ni-i tun:« Nɔ miade, ɖo ohwe o lo sin oxɔ nɔ ozan bo va do nɔ.» E bo va ɖyɛ oxwe lɔ gb e a do nɔ blɛ lɔ kpo ye. ³⁰ Hwekenu na e yi tɛnxo bo na do ɖu onu kpo ye, e va sɔ kpɔnnɔ lɔ ke e do ɛkpɛ na Mawu do e ji vɔ, e va wɛn kpɔnnɔ lɔ bo sɔ na ye. ³¹ E xin ŋukunsin yetɔnye bo va hun, ye bo va nyɔ-ɛ, vɔ e bo va bu le ŋumɛ na ye. ³² Ye bo jɛ lilɔ ji na yeɖeye tun:« Hwekenu na e lɔ oxo na mí nɔ le mɔ ji bo do ɖe Mawu we oxo lɛye we gɔnmɛ na mí nɔ, akpakpa hɔn sɔ mí nɔ wɛɛ?» ³³ Ke ye cite zɔnɖokpo, ye va lɛkɔ siin Jeluzalɛmu, ye bo va kpɔn onukplanvi weɖokpo lɛye le blɛ, kpo mɛ ke bɔ do ye wu ye, ³⁴ bo lɔ nɔ tun:« Xwetɔ lɔ fɔn sɔn oku xojɔxo bo va ɖe eɖe sɔ xlɛ Simɔ.» ³⁵ Ye bo va jɛ onu ke jɔ do ye ji le mɔji lɛye lilɔ ji na ye, kpo ke na Yesu va sɔ eɖe sɔ xlɛ ye ɖo le hwekenu na e va wɛn kpɔnnɔ lɔ. ³⁶ Hwekenu na ye lɔ oxo ɖemɔha nɔ, Yesu tete ze le dodomɛ na ye, bo lɔ na ye tun:« Fifa ni nɔ kpo mi!» ³⁷ Vɔ ye bo vɔ gbɔɔn e hɔn le ti, ye bo bwi nɔ tun yɛflun mɛ hiye mɔ kpɔn nɔ ha. ³⁸ Yesu bo lɔ na ye tun:« Ŋunɛ jɔ na ayixa do gba do na mi nɔ, mi bo kan oxo se wu miaɖeye nɔ sɔn oji miatɔnye mɛ nɔ? Mi kpɔn alɔ kpo afɔ tɛyee, bo wɛ. ³⁹ Mi ɖo alɔ wuye a bo kpɔn. Gbigbɔ ɖe hɔn nɔ ɖo gbaza alo oxu ɖe, ɖi ke na mi kpɔɔn nɔ ɖo ha.» ⁴⁰ Ke e lɔ emɔ na ye vɔ, e bo va sɔ alɔ etɔn kpo afɔ etɔnye bo sɔ xlɛye. ⁴¹ Vɔ, hwekenu na ye va kpɔn jijwɛ nɔ vɔ ye ko ka kan do e ji, e bo kpaca do ye nɔ, Yesu bo va lɔ na ye tun:« Mi ɖo onuɖuɖu ɖe le bwɛ?» ⁴² Ye bo va sɔ ohwe hihi bo sɔ xlɛ. ⁴³ Yesu bo va yi-i, bo va ɖu-i le ŋumɛ na ye. ⁴⁴ E bo va lɔ na ye tun:«Onu xin lɛye we oxo wɛ ko lɔ na mi nɔ saan, hwekenu na ko le okpɔ kpo mi, ko lɔ na mi lɔ byo e mɔ jɛ tun onu ke ye mɔ wlan do wu ye le Mɔyizi we osɛn lɔ mɛ, le oxolɔɖenyitɔye, kpo ohanjiji we wema mɛ lɔ mɔ ɖo na jɔ.» ⁴⁵ E bo va hun susu na ye, ye bo do se Mawu we oxo lɔ gɔnmɛ. ⁴⁶ E bo lɔ na ye tun:«E ny wiwla tun Klisu lɔ mɔ na ɖu aya, a bo fɔn sɔn oku le azan atɔngɔ gbe. ⁴⁷ Ye bo na jla le nyikɔ etɔn mɛ na togun ɖekpokpwe bɛ sɔn Jeluzalɛmu, tun, ye mɔɔ ɖɔli jijɔ, na Mawu a mɔ sɔ ɛhwɛ yetɔnye a mɔ sɔ kɛ ye. ⁴⁸ Miye wɛ nyi onu xin lɛye we kunnuɖetɔye. ⁴⁹ Blɔ, ko na sɔ onu ke we ajɔgbe didaye fyan na mi lɔ a sɔ ɖodan mi. Vɔ miye, mi nɔ toxo lɔ mɛ gbɔɔn do yi hwekenu na mi na yi Mawu we hɔnhlɔn lɔ.» ⁵⁰ Wɛ Yesu va kplɔ ye gbɔɔn do tɛkpɔ Betani. E bo va kɔ alo etɔnye, bo xo dona we ɛɖɛ na ye. ⁵¹ Hwekenu na e xo ɛɖɛ na ye vɔ, e lɛ le ye kɔn Mawu bo va kɔ-ɛ do si-in sɛxwe. ⁵² Ke onukplanvi lɛye do onu do ni-i vɔ, ye lɛkɔ si-in Jeluzalɛmu kpodo jijwɛ ɖaxo ɖe kpo. ⁵³ Ye bo nɔ nɔ Mawu we oxwe lɔ gbe hweɖekpokpwe nu, a bo nɔ do kanfu-i nɔ kpo ohanye kpo ɛkpɛ dido ni-i kpo.